5
Te Paꞌk Nꞌel Tqꞌajabꞌ Tzan Tpon Tuj Kaꞌj
1 Komo qetz qebꞌenky, chaꞌoj tponaj te ja qchiꞌjela tzani twitz ja txꞌoꞌtxꞌni, at junky qchiꞌjel tuj kaꞌj tukyꞌi Qtata Dios, jun aj nyaꞌtx kykꞌulbꞌen xjal bꞌix nten bꞌeyx te jun-eleꞌx. 2 Astilji qetz ajnaꞌl tukyꞌi ja qchiꞌjel tzani twitz txꞌoꞌtxꞌ, bꞌanꞌax nqotxꞌeꞌqun bꞌix nꞌel jqꞌajabꞌ tzan jkꞌamon-tal naj te junky qchiꞌjel tuj kaꞌj, 3 komo oj stzaj siꞌ junky qchiꞌjel, nlay qokaj iktzaꞌ sqit. 4 Qetz man itzꞌojoꞌ tzani twitz txꞌoꞌtxꞌ tukyꞌi ja qchiꞌjelni, nqotxꞌeꞌqun, nꞌok qen twitz nim xhchoꞌnal, kꞌon qgana tzan jkaj iktzaꞌ sqit sinoke tzan stzaj siꞌ junky qchiꞌjel akꞌaꞌj, ikxji tzan tponaj te aj nmankun bꞌix tzan stzaj siꞌ jun qanqꞌin [te jun-eleꞌx]. 5 Bꞌix a te Qtata Dios oqet kꞌulun te qetz tzan tok qen kyaqil ntzani, bꞌix tetz oje tzaj tsiꞌ te Txew te qetz te jun yekꞌbꞌil aj telponx bꞌanꞌax te ntzani.
6 Astilji qetz kꞌontiꞌl nqobꞌisuna bꞌix qebꞌen aj man atoꞌ tuj ja qchiꞌjelni, kꞌontiꞌl aqoqet twitz Qajawil tzan txik qen tukyꞌi qwitz. 7 Komo qetz nqobꞌet tzani twitz txꞌoꞌtxꞌ witꞌlik jkꞌuꞌj tiꞌj Qtata Dios, bꞌix kꞌontiꞌl nqobꞌet cha aꞌox tzan tpaj te aj nxik qen. 8 Per witꞌlik jkꞌuꞌj bꞌix qgan-talo tzan tkaj jkolaꞌ te ja qchiꞌjelni tzan qpon najayon tukyꞌi Qajawil. 9 Astilji qa atoqet tzani twitz txꞌoꞌtxꞌ qatzun atoqet twitz Qtata Dios tuj kaꞌj, qetz nꞌok qsiꞌ qnabꞌl tzan qten galan tuj twitz te Qajawil. 10 Komo qkyaqil qetz qobꞌajkyꞌel twitz te Krist tzan stzaj tqꞌumaꞌ qa galan te jkꞌulbꞌen, komo qkyaqil junjunchaq oqokꞌamoyon te aj jkambꞌaꞌtz iktzaꞌx jkꞌulbꞌen aj man tuq itzꞌojoꞌ twitz ja txꞌoꞌtxꞌni, qa galan qatzun nyaꞌtxji.*
A Te Krist Oje Kꞌulun Tzan Jkaj Galan Tukyꞌi Te Qtata Dios
11 Komo qebꞌenky presis tzan tqet qokslaꞌ te Qajawil, astilji nxik qnimsaꞌna kykꞌuꞌj kye xjal tuj jun tumeꞌl. Te Qtata Dios tebꞌen bꞌanꞌax aj nxik jqꞌumaꞌni bꞌix ax etebꞌenxwit etetz. 12 Nyaꞌtx cha nqoyolina galan qiꞌjxa, sinoke cha nxik qsiꞌna lad te etetz tzan echalaj qiꞌja. Ikxji tzan tbꞌantik tzan taj etzaqꞌbꞌeꞌ tumeꞌl kye aj cha nqet kyjiqꞌbꞌaꞌ kyibꞌ tzan tpaj te aj cha nꞌok en tzan kye xjal bꞌix nyaꞌtx tiꞌj te aj at tuj kyanim. 13 Qa [nqoqet yoliꞌ iktzaꞌ] lok aꞌoꞌna, [a te Qtata Dios eꞌel tetz tzan tpaj] nqoꞌaqꞌunana te tetz; bꞌix qa [nqoqet yoliꞌ] kabal aꞌoꞌna, cha qgana tzan jkꞌulun jun galan te etetz. 14 Komo tzan tpaj titzaꞌ nqoqet tganiꞌ te Qajaw Jesukrist, astilji nqokꞌulun ikxji; komo qetza qebꞌenkyna jun okamik tzan qpaj qkyaqil, astilji qkyaqil okolpjikb [tiꞌj qchoj]. 15 Tetz okamik tzan qpaj qkyaqil tzan kꞌon qanqꞌin te qetzx, sinoke tzan qanqꞌin te tetz aj okamik bꞌix ojaw anqꞌin tzan qpaj.
16 Astilji qetza kꞌontiꞌl nqet qbꞌisuꞌna tiꞌj jun xjal iktzaꞌ nkyebꞌisun kye xjal, anke oqtxiꞌ nqobꞌisuna tuq tiꞌj te Krist iktzaꞌ tuq nkyebꞌisun kye xjal, per ajnaꞌl ya kꞌontiꞌl nqobꞌisuna tiꞌj ikxji. 17 Astilji qa at abꞌl mojbꞌaꞌ tibꞌ tukyꞌi Krist, tetz jun xjal akꞌaꞌj, kyaqil tanqꞌin oqtxiꞌ oje ponaj, ajnaꞌl tiꞌj tetz kyaqil oje qet kꞌuluꞌ akꞌaꞌj. 18 Kyaqil ntzani tkꞌulbꞌen te Qtata Dios aj otkꞌuluj tzan qten galan tukyꞌiꞌl tzan te Krist. Bꞌix tetz okaj tsiꞌna tzan txik qpakbꞌaꞌna titzaꞌ tzan qten galan tukyꞌiꞌl. 19 Komo te Qtata Dios atqet tuq tukyꞌi Krist nkꞌulun tuq tzan kyten galan kye xjal tukyꞌiꞌl, bꞌix ikxji cha okyꞌix-oq te kchoj,* bꞌix otzaj tqꞌumaꞌ qetza tzan txik jqꞌumaꞌ te ja tpakbꞌalilni. 20 Astilji qetza aꞌoꞌna tkyꞌixel te Krist tzan qyolin etukyꞌiꞌl, bꞌix ikxji iktzaꞌ te Qtata Dios nyolin etukyꞌiꞌl. Astilji nxik jqꞌumaꞌna etetz tukyꞌi tbꞌi Krist tzan etok laqꞌchet tiꞌj te Qtata Dios junkyꞌel tzan eten galan tukyꞌiꞌl tzan emeltzꞌjik junkyꞌel te Qtata Dios. 21 Te Krist kꞌontiꞌl owok ten twitz te choj, per te Qtata Dios okaj tsiꞌ te qchoj tiꞌj tzan tok te qkyꞌixel, ikxji tzan qel qetz galan tuj twitz Qtata Dios.