4
1 Ntons astilji, te ja qaqꞌuna ntzani otzaj siꞌ qetza [tzan te Qajawil] tzan tpaj owok loꞌet tkꞌuꞌj qiꞌja, bꞌix ajnaꞌl qetza nqonimsan jkꞌuꞌjna bꞌix kꞌontiꞌl nkaj jkolaꞌna. 2 Qetza nꞌel qikꞌoꞌna kyaqil aj nyaꞌtx galan aj nqet kykꞌuluꞌ kye xjal ewj bꞌix kyaqil aj eqꞌbꞌil kyꞌexawil, bꞌix kꞌontiꞌl nqojoyona titzaꞌ tzan tqet qeqꞌiꞌ nijunwt, bꞌix kꞌontiꞌl njaw qkyꞌixpuꞌ te Tyol Qtata Dios. Qetza nqoyolina te bꞌanꞌax bꞌix ikxji tzan tok en tzan kyaqil xjal titzaꞌ nqobꞌet tuj tumeꞌl tuj twitz Qtata Dios. 3 Bꞌix qa te tpakbꞌalil aj nxik qpakbꞌaꞌna kꞌontiꞌl nꞌel kynikyꞌ junjun tiꞌj, ikxji nkyꞌik kyukyꞌi kye aj nkyexiknaj. 4 Te twitzaleꞌ tiꞌj te nyaꞌtx galan twitz ja txꞌoꞌtxꞌnia oje kyeqet tmoyiꞌ kye aj kꞌontiꞌl nkyeꞌokslan, tzan kꞌon tel kynikyꞌ te aj bꞌan tbꞌanilb tiꞌj te tpakbꞌalil galan aj nyolin tiꞌj te tajwalil te Krist aj mer iktzaꞌx Qtata Dios. 5 Qetza kꞌontiꞌl nxik qpakbꞌaꞌna qiꞌjx qetza, sinoke nxik qpakbꞌaꞌna tiꞌj te Kristo Jesus, aji tetz te Qajawil, bꞌix qetza nqoꞌaqꞌunan te jun galan te etetz tzan tpaj tetz. 6 Komo te Qtata Dios aj oxik tkꞌuluꞌ mandad tzan tok xhkꞌatun tuj te qlolj,* axkix tetz otkꞌuluj tzan tel xhkꞌateꞌ tuj qwitzc tzan tel qnikyꞌ tiꞌj te aj bꞌan tbꞌanil te tetz aj nꞌok qen tiꞌjd Qajaw Jesukrist.
7 Te ja xhchqitzꞌunal ntzani atqex tuj qanim iktzaꞌ jun jqꞌinomal aj atqex tuj jun ukyꞌil; ikxji nꞌok en te qbalor aj bꞌan nim tzajnaq tukyꞌi Qtata Dios bꞌix nyaꞌtx qetzx. 8 Ikxji anke tidiꞌchq nyaꞌtx galan nkyꞌik qiꞌja, per at jaꞌ tzan jkolet; bꞌix tidiꞌchq nkyꞌik qiꞌja aj kꞌontiꞌl nꞌel qnikyꞌ tistil, per tzunx loꞌik jkꞌuꞌj tiꞌj Qtata Dios. 9 Nqoꞌex lajoꞌ, per [te Qtata Dios] kꞌontiꞌl nqokaj tkolaꞌ; bꞌix nqoqet wequꞌ, per kꞌontiꞌl nqoqet kyitzaꞌ. 10 Jaꞌchq oj qkyꞌikna, nꞌok qenkix twitz xhchoꞌnal tuj qchiꞌjel iktzaꞌ okyꞌik tiꞌj Jesus, ikxji tzan tok en qiꞌja titzaꞌ tetz ntzaj tsiꞌ jun qbalor tzan qanqꞌin tuj qchiꞌjel. 11 Qetza aj itzꞌojoꞌni, kobꞌchaq chꞌinky tuq nqokamik tzan tpaj te Jesus, ikxji tzan tok en qiꞌja titzaꞌ tetz itzꞌoj tuj qchiꞌjel aj nponaj. 12 Ikxji chꞌinky tuq nqokamik qetza, per ikxji owel te jun galan te etetz tzan etanqꞌin te jun-eleꞌx. 13 Qetza witꞌlik jkꞌuꞌja iktzaꞌ te aj oqet tzꞌibꞌaꞌ [tuj te Tuꞌjal Dios] ikxjani: “Owokslaj bꞌix astilji oxik nyoliꞌ tiꞌj.”* Ntons ax qetza, ax nqoꞌokslana, bꞌix astilji ax nxik qyoliꞌna tiꞌj. 14 Komo qetza qebꞌena te Qtata Dios ojaw tanqꞌinsaꞌ te Qajaw Jesus, ax ikxji oqojawel tanqꞌinsaꞌ tzan qten junchꞌin tukyꞌi Jesus, bꞌix junx etukyꞌiꞌl oqobꞌajxeꞌl tin tukyꞌiꞌl. 15 Nkyꞌik kyaqil ntzani qiꞌja tzan tok te jun galan te etetz, bꞌix ikxji kyꞌilaꞌj xjal jaꞌchq okykꞌamoꞌtz te nim bꞌan galan aj ntzaj siꞌ tzan te Qtata Dios anke kꞌontiꞌl nqajoꞌ, bꞌix ikxji mas kyꞌilaꞌj xjal oxeꞌl ksiꞌ pixon te Qtata Dios tzan tqet kyjiqꞌbꞌaꞌ.
16 Astilji qetza kꞌontiꞌl njaw kabꞌin jkꞌuꞌj, anke te qchiꞌjela bꞌan tij ikjaꞌn tok per tuj qanim nꞌok mas nim qbalor bꞌajqꞌij. 17 Komo te aj chꞌin xhchoꞌnal aj nꞌok qen twitz ja txꞌoꞌtxꞌni nkyꞌik luwew, per nꞌoken tzan tok te qetza te jun jiqꞌbꞌil bꞌan nim aj kꞌontiꞌl nmankun bꞌix aj kꞌontiꞌl nbꞌantik tzan tqet qparejsaꞌ tukyꞌi junky tidiꞌ. 18 [Astilji] qetza kꞌontiꞌl nꞌok qsiꞌna qnabꞌl tiꞌj kyaqil tidiꞌchq aj nxik qen tzani twitz txꞌoꞌtxꞌ, sinoke nꞌok qsiꞌ qnabꞌl tiꞌj te aj kꞌontiꞌl nxik qen, tzan tpaj te aj nxik qen nponaj, bꞌix te aj kꞌontiꞌl nxik qen a te aj nꞌok bꞌeyx te jun-eleꞌx.