3
Te Paꞌk Nyolin Tiꞌj Tistil Okaj Siꞌ Tetz Jun Pakbꞌon Tiꞌj Te Akꞌaꞌj Tyolbꞌen Qtata Dios
1 ¿Oqoꞌaqꞌel petzun tzan qyolina galan qiꞌjx qetza tiꞌj qajwalilna? ¿Presis petzun tzan txik jqaniꞌna jun uꞌj tzan jkꞌametna etitzaꞌ, qatzun tzan eyolin galan qiꞌja tzan jkꞌamet tuj junky partji iktzaꞌ nkykꞌuluꞌ txqꞌanky xjal? 2 Aꞌixk etetz iktzaꞌ te uꞌj tzan jkꞌametna, [nyaꞌtx cha jun txaq uꞌj sinoke] te qanima nyolin etiꞌj, bꞌix kyaqil xjal oje tzꞌok kchaꞌoꞌ etiꞌj. 3 Kyetz kyebꞌen etetz aꞌix iktzaꞌ jun uꞌj aj oqet tzꞌibꞌaꞌ tzan te Krist, bꞌix aꞌoꞌna qetza iktzaꞌ kye tmandader aj nxik qeqꞌiꞌ te uꞌj tzan jkꞌametna; bꞌix ja tpakbꞌalilni nyaꞌtx tzꞌibꞌaꞌ tukyꞌi jun tinta sinoke tukyꞌi Txew te Qtata Dios aj at jun tanqꞌin, bꞌix ax nyaꞌtx jun tpakbꞌalil aj tzꞌibꞌaꞌ twitz abꞌj* sinoke tuj qanim. 4 Tzan tpaj te Krist, qetz tuj twitz Qtata Dios nqnaꞌoꞌ kyaqil ntzani bꞌanꞌax. 5 Nlay bꞌantik tzan tok jqꞌumaꞌ qa jun tidiꞌ jkꞌulbꞌen jun tidiꞌ aj te qetzx, sinoke kyaqil aj bꞌaꞌn qitzaꞌ a te Qtata Dios ntzaj swan tetz. 6 A tetz oje qokaj tsiꞌ tzan qpakbꞌan te tumeꞌl akꞌaꞌj [titzaꞌ nqokolet], bꞌix nyaꞌtx jun tumeꞌl iktzaꞌ nyolin te Kawbꞌil, sinoke tiꞌj te Txew Dios; komo te Kawbꞌil cha nqoxik tpoqoꞌ tzan jkamik, per te Txew Dios ntzaj tsiꞌ jun qanqꞌin.*
7 Te Kawbꞌil oqtxiꞌ aj cha nqoxik tuq tpoqoꞌ tzan jkamik, aj tzꞌibꞌanqet tuq twitz abꞌj, at tuq jun xhchqitzꞌunal tiꞌj [aj tzajnaq tukyꞌi Qtata Dios], astilji kye aj tijajil Israel kꞌontiꞌl obꞌantik tzan txik kykaꞌyiꞌ twitz te Moisés tzan tpaj te xhchqitzꞌunal tiꞌj twitz, anke te nini jun xhchqitzꞌunal aj kyebꞌayleꞌ nmankun tuq.* 8 Per yatzun tiꞌj te aj nkꞌulun te Txew Dios qukyꞌiꞌl, ¿nyaꞌtx petzun mas bꞌan tbꞌanil te nini twitz te aj oqtxiꞌ? 9 Komo te Kawbꞌil aj cha nqoxik tpoqoꞌ tuq, tetz nini tbꞌanil tuq, pyorx-alo te tumeꞌl aj nꞌel tin qchoj [bꞌeyx te jun-eleꞌx] mas bꞌan tbꞌanil. 10 Te aj at tuq tbꞌayaꞌ galan tuq, per ajnaꞌl ya kꞌontiꞌl npon iktzaꞌ te aj mas bꞌan galan aj at ajnaꞌl. 11 Komo te aj nponaj oqtxiꞌ bꞌan tbꞌanil tuq, pyorx-alo te aj kꞌontiꞌl nponaj mas bꞌan tbꞌanil.
12 Tzan tpaj qetza witꞌlik jkꞌuꞌjna tiꞌj te ntzani, kꞌontiꞌl nqoxobꞌ tzan qyolina tukyꞌi jun tkꞌuꞌjlal. 13 Qetza kꞌontiꞌl njkꞌuluꞌna iktzaꞌ te Moisés otkꞌuluj, oqet tsiꞌ jun bel twitz* tzan kꞌon txik kyeꞌeꞌ kye aj tijajil Israel te chqitzꞌunal aj kyebꞌaꞌ tuq nqextzaj. 14 Per kyetz kꞌontiꞌl owox tuj kywiꞌ, bꞌix tzunx ajnaꞌl oj tjaw kyeꞌeꞌ te Tuꞌjal Dios oqtxiꞌ, iktzaꞌ atok jun bel kywitz aj kꞌontiꞌl ntzoqpin tzan tel kynikyꞌ tiꞌj tzan tpaj aꞌox bꞌaꞌn tzan tjaqet kywitz tzan tpaj te Krist. 15 Bꞌix tzunx ajnaꞌl oj tjaw kyen te stzꞌibꞌen Moisés, kꞌontiꞌl nꞌox tuj kywiꞌ iktzaꞌ atok jun bel kywitz aj kꞌontiꞌl ntzoqpin tzan tel kynikyꞌ. 16 Per oj kyokslan tiꞌj te Qajaw, nꞌel in te bel aj kꞌontiꞌl ntzoqpin tuq tzan tox tuj kywiꞌ. 17 Te aj Qajawilni, a tetz te Txew Dios, bꞌix aj jaꞌ atqex te Txew Dios, tetz nqotkolpiꞌ. 18 Qkyaqil qetz [aj nqoꞌokslan] ajnaꞌl oje tzꞌel in te aj ntxayin tuq qwitz [aj kꞌontiꞌl ntzoqpin tuq tzan tel qnikyꞌ], bꞌix ajnaꞌl qiꞌj qetz nꞌok en titzaꞌ bꞌan galan nabꞌlin te Qajawil. Bꞌix komo te Txew te Qajawil nꞌaqꞌunan tuj qanim, bꞌajqꞌij ikjaꞌn nqoꞌok iktzaꞌ tetz bꞌix mas ntzaj en qiꞌj titzaꞌ tetz bꞌan galan nabꞌlin.