2
1 Astilji wetz oqet nbꞌisuꞌ tuj wanim tzan kꞌon nxik qꞌolbꞌel etetz tkaꞌmjjiꞌn-el qa cha te jun bꞌis te etetz. 2 Komo qa nkꞌuluꞌtz tzan tok jun bꞌis tuj etanim, ntons yaji ¿abꞌl okꞌuluyon tzan nchalaj wetz qa nyaꞌtx aꞌix etetz? 3 Astilji oqet ntzꞌibꞌaꞌ etetz iktzaꞌx oqet ntzꞌibꞌaꞌ tbꞌay-el. Ikxji oj npon kꞌontiꞌl tzan nnaꞌon jun bꞌis tzan epaj etetz aj aꞌox bꞌaꞌn-tal tzan nchalaj etiꞌj; wetz loꞌik nkꞌuꞌj etiꞌj ekyaqil etetz tzan ekꞌulun tzan nchalaj tuj wanim etiꞌj etetz bꞌix ikxji ax tzan echalaj etetz wukyꞌiꞌl. 4 Per aj tqet ntzꞌibꞌaꞌ aj uꞌjji, wetz bꞌan nkyinbꞌisun tuq bꞌix nkyinꞌoqꞌ tuq. Per kꞌontiꞌl oqet ntzꞌibꞌaꞌ tzan tok tuq jun bꞌis tuj etanim, sinoke tzan tok eten tuq titzaꞌ wetz nkxqet bꞌan nganiꞌ nim.
A Tgan Tzan Tqet Qnajsaꞌ Te Aj Nkꞌulun Jun Nyaꞌtx Galan Qiꞌj
5 Abꞌl aj maꞌtx tkꞌuluj tzan tok jun bꞌis tuj wanim, nyaꞌtx cha aꞌox wiꞌj wetz maꞌtx tzꞌok tsiꞌ te bꞌis, sinoke wetz tuj nnabꞌl ax etiꞌj etetz ekyaqil. 6 Te xhchoꞌnal aj maꞌtx xik esiꞌ ekyaqil etetz tiꞌj, kabal nini. 7 Ajnaꞌl a tgan tzan tqet enajsaꞌ bꞌix tzan tjaw etin tkꞌuꞌj tzan kꞌon txik tanim tuj bꞌis. 8 Astilji wetz ngan tzan txik nqꞌumaꞌ etetz tzan tqet eyekꞌuꞌ te tetz titzaꞌ nqet eganiꞌ.
9 Komo astilji wetz tbꞌayaꞌ oqet ntzꞌibꞌaꞌ te etetz tiꞌj te ntzani, tzan eqet nkꞌuluꞌ probar qa etetz dispwest atix tzan tqet etokslaꞌ kyaqil aj nxik nqꞌumaꞌ etetz. 10 Ikxji te aj nqet enajsaꞌ etetz, ax wetz nqet nnajsaꞌ. Bꞌix aj oje qet nnajsaꞌ wetz, qa bꞌanꞌax at tidiꞌ tuq tzan tqet nnajsaꞌ, oqet nnajsaꞌ te nini tuj twitz te Krist te jun galan te etetz. 11 Nkyinkꞌulun ikxji tzan kꞌon qoqet eqꞌiꞌ tzan te Satanas; komo oje tzꞌel qnikyꞌ titzaꞌ tetz nkꞌulun.
Titzaꞌ Te Qtata Dios Owonen Tukyꞌi Paꞌk Tzan Tpakbꞌan
12 Aj npon wetz tuj Troas tzan txik npakbꞌaꞌ tiꞌj te tpakbꞌalil galan tiꞌj te Krist, inkꞌamjik bꞌan galan tzan npakbꞌan tzan tpaj te Qajawil nꞌonen tuq wukyꞌiꞌl. 13 Per te wanim kꞌontiꞌl tuq nchalaj, tzan tpaj kꞌontiꞌl owoknoj witzaꞌ te qerman Tit, astilji wetz mejor ekaj nkawiꞌ bꞌix inxik tuj Masedony.*
14 Per pixon te Qtata Dios, komo tzan tpaj te Kristo Jesus, tetz nkꞌulun tzan kꞌon jqet tzꞌaqik, bꞌix jaꞌchq aj jaꞌ nqopon nꞌok en qiꞌj qetz te aj bꞌan tbꞌanila toklen qotzqilaꞌ tetz. 15 Twitz ja txꞌoꞌtxꞌni kxol kye aj nkyekolet, qetz iktzaꞌ at jun jkꞌokꞌjal tuj twitz te Qtata Dios tzan tpaj te Krist; bꞌix kxol kye aj nkyexiknaj 16 nqotzuꞌwxik tuj kywitz tzan tpaj qiꞌj qetz kyetz ntzaj kynaꞌoꞌ okyekamel; per yatzun kxol kye aj nkyekolet, tzan qpaj qetz ntzaj kynaꞌoꞌ okyeꞌanqꞌiyon. Tiꞌj te ntzani ¿abꞌl bꞌaꞌn tzan tbꞌantik titzaꞌ?* 17 Komo qetza nyaꞌtx aꞌoꞌ iktzaꞌ junjun aj cha nkyexkꞌaꞌman tiꞌj Tyol Dios, sinoke qetza nqoyolina tukyꞌi jun tumeꞌl tzan tpaj tlajen Qtata Dios aꞌoꞌna, bꞌix tuj twitz Qtat nqoyolina [tukyꞌi jun qajwalil aj ntzaj tsiꞌ] Krist.