16
Te Paꞌk Nliman Te Junjunchaq
1 Wetz ngan tzan txik nqꞌumaꞌ tiꞌj te qerman Fébe aj tetz topis nꞌonen kꞌulul kwent kye qerman tuj amaqꞌ Senkrey, tetz jun galan xjal. 2 Ngan tzan ekꞌamon tetz tuj jun tumeꞌl bꞌan galan tukyꞌi tbꞌi Qajaw iktzaꞌ aj presis tzan jkꞌamon kye qerman aj pawameꞌ te Qtata Dios; bꞌix ngan tzan tok etoneꞌ tukyꞌi jun tidiꞌ aj presis tetz, komo tetz oje tzꞌonen kyiꞌj kyꞌilaꞌj qerman bꞌix ax wiꞌj wetz. 3 Jun limbꞌil te qerman Akiy tukyꞌi txuꞌjel aj Xhil, aꞌeꞌ aj nkyeꞌonen wukyꞌiꞌl tuj qaqꞌun te Kristo Jesus.* 4 Ebꞌajꞌonen te wetz, dispwest tuq tzan kykamik tzan npaj, bꞌix ajnaꞌl nxik nsiꞌ pixon te kyetz, bꞌix nyaꞌtx aꞌox aꞌin sinoke ax kyaqil kye qerman aj nyaꞌtx tijajil Israel, ax kyetz nxik ksiꞌ pixon te kyetz. 5 Bꞌix ax jun limbꞌil kye qerman aj nꞌok kchimoꞌ kyibꞌ tuj kyjay [te Akiy bꞌix Xhil]. Bꞌix jun limbꞌil te wajyol Epenet aj ajbꞌilaꞌ nim witzaꞌ; a tetz te tbꞌay tuj Akay aj owokslan tiꞌj Krist. 6 Jun limbꞌil te Liy, aj oje tzꞌaqꞌunan te jun nim galan te etetz. 7 Txik esiꞌ chꞌin jun limbꞌil kye aꞌeꞌ nxjalil Andronk bꞌix Júnias; kyetz aꞌeꞌ tuq wukyꞌiꞌl aj akyeqex tuq pres; kyetz bꞌan otzqiꞌmj-eꞌ kxol kye tkyꞌixel Jesus, bꞌix kyetz eꞌokslan tiꞌj Krist tbꞌayon nwitz wetz. 8 Jun limbꞌil te wamiw Amplias aj ajbꞌilaꞌ nim witzaꞌ tzan tpaj tetz werman tzan tpaj Krist. 9 Jun limbꞌil te Urbáno aj nꞌonen wukyꞌiꞌl tuj qaqꞌun te Krist, bꞌix jun limbꞌil te Estaks aj ajbꞌilaꞌ nim witzaꞌ. 10 Jun limbꞌil te Apeꞌxh aj oje tipaj [te preb] bꞌix oje tzꞌel galan tuj twitz Krist, bꞌix jun limbꞌil kye kyaqil tuj tjay Aristóbulo. 11 Jun limbꞌil kye nxjalil Eradiy bꞌix kye aj tuj tjay te Xhixh aj nkyeꞌokslan te Qajawil. 12 Jun limbꞌil te Trifena bꞌix te Trifos aj nkyeꞌaqꞌunan nim tuj taqꞌun Qajawil. Bꞌix jun limbꞌil te qerman Persid aj ganiꞌ nim qitzaꞌ, tetz oje tzꞌaqꞌunan nim tuj taqꞌun Qajaw. 13 Jun limbꞌil te Rúfo* aj joyoꞌ tzan te Qajawil, bꞌix jun limbꞌil te tnan aj ax naqe nnan wetz. 14 Jun limbꞌil te Asinkrit, te Flejont, te Ermes, te Patrobs, te Ermas, bꞌix kye kyaqil qerman aj akyeqet kyukyꞌiꞌl. 15 Ax jun limbꞌil te Filólogo, bꞌix te July, te Nerey bꞌix te tanabꞌ, bꞌix te Olimp, bꞌix kye kyaqil aj pawameꞌ te Qtata Dios aj akyeqet kyukyꞌiꞌl. 16 Peꞌeliman etetz etibꞌx exolx tzi tukyꞌi jun limbꞌil bꞌan tumeꞌla tzan tpaj cha jun te Qtat. Kyaqil kye qerman aj kye kyaqil bꞌuchꞌuj aj nkyeꞌokslan tiꞌj Jesukrist, kyetz nkyesaman jun limbꞌil te etetz.
17 Ntons, ajnaꞌl wetz ngan tzan txik nqꞌumaꞌ etetz waq erman tzan tok esiꞌ enabꞌl kyiꞌj kye aj nkyekꞌulun tzan tok jun qꞌoj exol bꞌix ax kyiꞌj kye aj nkyekꞌulun tidiꞌchq tzan eqet tzꞌaqik, kyaqil aj nkyekꞌulun nyaꞌtx iktzaꞌ te xnaqꞌtzbꞌilj aj oxik xnaqꞌtzaꞌ etetz. Intel epawaꞌ etibꞌ kyiꞌj 18 tzan tpaj kꞌontiꞌl nkyeꞌaqꞌunan te Qajaw Jesukrist, sinoke cha tzyumeꞌ tzan te aj nꞌel kyganiꞌ, bꞌix tukyꞌi kyyol bꞌan tbꞌanil nqet kyeqꞌiꞌ kye xjal aj nyaꞌtx bꞌan jwert ateꞌ tukyꞌi te tumeꞌl. 19 Kyaqil oje tzꞌok kchaꞌoꞌ titzaꞌ etetz oje qet etokslaꞌ, astilji wetz bꞌan nkyinchalaj etiꞌj, bꞌix ngan tzan tel enikyꞌ byenech tiꞌj te tumeꞌl galan bꞌix tzan kꞌon tox esamoꞌ etibꞌ tukyꞌi te nyaꞌtx galan. 20 Ikxji te Qtata Dios aj nchewsan jkꞌuꞌj, tetz chꞌinky tkꞌulun tzan tox te Satanas tjaqꞌ etoq. Tzajxwit siꞌ etajsik etetz jun nim bꞌan galan tzan te Qajaw Jesukrist.
21 Jun limbꞌil te etetz tzan te wukyꞌiꞌl Timotey* aj nꞌonen wukyꞌiꞌl, bꞌix ax tzan Lusy, Jason bꞌix Sosípater, aꞌeꞌ nxjalil.
22 Wetz, Tértios aj nkyintzꞌibꞌan ja uꞌjni, ajnaꞌl ax nkyinsaman jun limbꞌil te etetz tukyꞌi tbꞌi te Qajawil.
23 Ax jun limbꞌil etetz tzan Gay.* Wetz atin tjay, bꞌix ax nꞌok kchimoꞌ kyibꞌ kyaqil kye qerman tuj tjay. Ax jun limbꞌil te etetz tzan Erast* aj eqꞌil tkwentil te tmin te amaqꞌ, bꞌix ax jun limbꞌil te etetz tzan te qerman Kwaꞌxh.b 24 Tzajxwit siꞌ etajsik etetz ekyaqil jun nim bꞌan galan tzan te Qajaw Jesukrist. ¡Kyꞌikxwit ikxji!
Jun Pixon Te Qtata Dios Aj Kꞌontiꞌl Junky Iktzaꞌ Tetz
25 Ntons jun pixon te Qtata Dios aj bꞌaꞌn tzan tkꞌulun tzan eten mas jwert tukyꞌiꞌl iktzaꞌx ntyoliꞌ te tpakbꞌalil aj nxik npakbꞌaꞌ wetz bꞌix nxik nxnaqꞌtzaꞌ tiꞌj Jesukrist. Te ntzani iktzaꞌxkix te aj oje tzaj tqꞌumaꞌ Qtata Dios tiꞌj te aj ntbꞌisuꞌ aj kꞌontiꞌl tuq qebꞌen oqtxiꞌ, aj ewaꞌ tuq atx aj minaꞌ tuq tqet kꞌuluꞌ te twitz txꞌoꞌtxꞌ. 26 Per ajnaꞌl oje xik qꞌumlet tzan tpaj ktzꞌibꞌen kye aj yolil tyol oqtxiꞌ iktzaꞌx oxik qꞌumaꞌ kyetz tzan te Qtata Dios aj itzꞌoj te jun-eleꞌx. Te ja ntzani oje xik qꞌumlet tzan tqet kyokslaꞌ kyaqil xjal tuj kyaqil amaqꞌ tzan tok witꞌlet kykꞌuꞌj tiꞌj te Qtat. 27 ¡Te Qtata Dios aj kꞌontiꞌl junky iktzaꞌ tetz bꞌix aj totzqiꞌ kyaqil, intqet jiqꞌbꞌaꞌxwit te jun-eleꞌx tzan tpaj te Jesukrist! ¡Kyꞌikxwit ikxji!