15
Tzan Qbꞌet Tuj Tumeꞌl, Inqonen Kyukyꞌi Kye Aj Nyaꞌtx Jwert Ateꞌ
1 Ntons astilji, qetz aj jwert atoꞌ tukyꞌi Qtata Dios a tgan tzan sten qpasens kyiꞌj kye aj nyaꞌtx jwert ateꞌ, bꞌix nyaꞌtx tzan tok qsiꞌ jkꞌuꞌjx cha te jun galan te qetzx. 2 Junjunchaq te qetz a tgan tzan tok qsiꞌ jkꞌuꞌj tzan jkaj galan kyukyꞌi txqꞌanky tuj kyaqil tumeꞌl tzan kyok jwert kyetz. 3 Komo te Krist, tetz kꞌontiꞌl owok tsiꞌ tkꞌuꞌj cha te jun galan te tetzx, sinoke iktzaꞌx tzꞌibꞌankaj tuj Tuꞌjal Dios oqtxiꞌ ikxjani: “Kyaqil te kyyasbꞌen kye aj nkyeꞌok yason te yatz, aꞌin inꞌel chojon tetz.”* 4 Kyaqil te aj oqet tzꞌibꞌlet oqtxiꞌ, oqet tzꞌibꞌlet te jun xnaqꞌtzbꞌilj te qetz tzan kꞌon tkaj qsiꞌ tzan qokslan bꞌix tzan tnimsan jkꞌuꞌj tzan tpaj te aj ntyoliꞌ te Tuꞌjal Dios. 5 Qtata Diosxwit aj ntzaj sin qpasens bꞌix nnimsan jkꞌuꞌj, tzꞌonenxwit etukyꞌiꞌl tzan etanqꞌin galan exolx iktzaꞌx te Krist tgan. 6 Ikxji junx ekyaqil, tukyꞌi jun ewiꞌ oqtel ejiqꞌbꞌaꞌ te Qtata Dios aj stat te Qajaw Jesukrist.
7 Ntons peꞌekꞌamon waq etibꞌx exolx iktzaꞌx te Krist otkꞌamoj aꞌoꞌ tzan tqet jiqꞌbꞌaꞌ te Qtata Dios. 8 Nxik nqꞌumaꞌ etetz, te Krist owul kꞌulul jun galan kye aj tijajil Israela tzan tkyꞌik kyaqil aj oxik tsiꞌ te Qtata Dios tyol tiꞌj kyukyꞌi kye qijajil oqtxiꞌ, ikxji tzan tqet tyekꞌuꞌ tetz jun yolin tukyꞌi aj nkaj tqꞌumaꞌ. 9 Bꞌix ax owul tzan tqet kyjiqꞌbꞌaꞌ te Qtata Dios kye aj nyaꞌtx tijajil Israel tzan tpaj ax owok loꞌet tkꞌuꞌj kyiꞌj kyetz; iktzaꞌx tzꞌibꞌankaj tuj Tuꞌjal Dios oqtxiꞌ ikxjani: “Astilji wetz oxeꞌl npakbꞌaꞌ te tpakbꞌalil awiꞌj kxol kye aj nyaꞌtx tijajil Israel bꞌix okyinbꞌitzayon te yatz kxol kyetz.”* 10 Ax nyolin tuj junky part ikxjani: “Etetz aj nyaꞌtx tijajil Israel aꞌix, peꞌechalaj waq junx kyukyꞌi kye [aj tijajil Israel] aj pawameꞌ te Qtata Dios.”* 11 Bꞌix ax nyolin tuj junky part ikxjani: “Peꞌenaꞌon te Qajawil tukyꞌi nim chalajbꞌil etetz aj nyaꞌtx tijajil Israel aꞌix, peꞌenaꞌon te tetz kyaqil amaqꞌ twitz txꞌoꞌtxꞌ.”* 12 Ax te Chay okaj stzꞌibꞌaꞌ ikxjani: “Tzul jun aj tijajil Jesey,b tzul kꞌulul mandad kyiꞌj kye aj nyaꞌtx tijajil Israel, bꞌix kyaqil kye aj nyaꞌtx tijajil Israel okajel loꞌet kykꞌuꞌj tiꞌj.”* 13 Qtata Dios aj jaꞌ loꞌik jkꞌuꞌj, tzaj sinxwit te etetz jun nim chalajsbꞌil bꞌix jun chewsbꞌil tuj etanim etetz aj nkxꞌokslan tiꞌj, bꞌix tzan tonen te Txew Dios etukyꞌiꞌl tukyꞌi nim tajwalil tzan tkaj loꞌet ekꞌuꞌj tiꞌj te Qtat.
Te Paꞌk Nyolin Tiꞌj Te Aj Ojetq Bꞌantik Titzaꞌ Bꞌix Tiꞌj Te Aj Bꞌisuꞌ Titzaꞌ Tzan Tkꞌulun
14 Wetz webꞌen waq erman, etetz bꞌan galan xjal aꞌix, bꞌix at jun enabꞌl tzan tel enikyꞌ tiꞌj tidiꞌchq bꞌix bꞌaꞌn tzan txik ekawiꞌ kye txqꞌanky exolx etibꞌx. 15 Wetz kꞌontiꞌl tuj nwitz, ma qet ntzꞌibꞌaꞌ te etetz ja ntzani tzan stzaj enaꞌoꞌ tuj etanim jun tidiꞌ aj presis. Nqet nkꞌuluꞌ ntzani tzan tpaj te wajwalil aj otzaj tsiꞌ te Qtata Dios 16 tzan waqꞌunan te Kristo Jesus kxol kye aj nyaꞌtx tijajil Israel, tzan txik npakbꞌaꞌ te tpakbꞌalil galan kxol, bꞌix tzan kxik nxnaqꞌtzaꞌ. Ikxji tzan kxik nqꞌapoꞌ te Qtata Dios iktzaꞌ jun oyej galan tuj twitz bꞌix pawankaj aꞌox te tetz tzan te Txew Dios. 17 Astilji, wetz bꞌan nkyinchalaj tukyꞌi Kristo Jesus tiꞌj te waqꞌun aj nkyinkꞌulun te Qtata Dios. 18 Wetz nlay bꞌantik tzan tjaw njaqoꞌ ntziꞌ nichꞌinwt, sinoke aꞌox tiꞌj te aj oje qet tkꞌuluꞌ Jesus wukyꞌiꞌl tzan kyokslan kye aj nyaꞌtx tijajil Israel tzan tpaj npakbꞌen bꞌix nkꞌulbꞌen 19 bꞌix tukyꞌi tidiꞌchq yekꞌbꞌil aj at tidiꞌ telponx bꞌix tukyꞌi nim tajwalil Txew Dios. Ikxji nxik tuq npakbꞌaꞌ te tpakbꞌalil galan tiꞌj Jesukrist tuj Jerusalen bꞌix jaꞌchq max tuj tkwentil Ilíriko. 20 Ikxji tuq wetz nkyinꞌok il tzan txik npakbꞌaꞌ kyuj kye luwar aj jaꞌ minaꞌ tok chaꞌlet te tpakbꞌalil tiꞌj te Krist, tzan kꞌon txik npakbꞌaꞌ aj jaꞌ oje xik pakbꞌlet tzan txqꞌanky 21 sinoke [tzan npakbꞌan] iktzaꞌ ntqꞌumaꞌ te Tuꞌjal Dios oqtxiꞌ ikxjani: “Owokel kyen kye aj jaꞌ kꞌontiꞌl oxik pakbꞌlet, bꞌix owokex tuj kywiꞌ kye aj minaꞌ tuq tok kchaꞌoꞌ ni jun-el tiꞌj tetz.”*
22 Astilji tzan tpaj ntzani kꞌontiꞌl obꞌantik witzaꞌ tzan nxik qꞌolbꞌel etetz iktzaꞌx kyꞌilaꞌj-el oqet nbꞌisuꞌ,* 23 yatzun ajnaꞌl oje bꞌantik kyaqil waqꞌun aj presis tuj kyaqil ja luwar tzani, bꞌix tzan tpaj kyꞌilaꞌj aqꞌbꞌixiꞌ ngan tuq tzan nxik qꞌolbꞌel etetz. 24 Astilji oj nxik Espany, ngan tzan nkyꞌik tbꞌay qꞌolbꞌel etetz tzi, bꞌix oj nten jun tyemp exol tzan qchalaj chꞌin junx qkyaqil, yaji qanq bꞌaꞌn tzan etonen chꞌin wukyꞌiꞌl tzan nxik tuj nbꞌey max Espany. 25 Per ajnaꞌl okyinxeꞌl tuj Jerusalen, oxeꞌl win jun onbꞌil kye aj pawameꞌ te Qtata Dios txini. 26 Komo kye aj Masedony bꞌix kye aj Akay, kyetz oqet kybꞌisuꞌ tzan tok kchimoꞌ jun onbꞌil kye qermanc mebꞌaꞌ tuj Jerusalen.* 27 Komo ma qet kybꞌisuꞌ tuj tumeꞌl tzan kykꞌulun ikxjani, bꞌix bꞌanꞌax presis tzan txik kswaꞌ, tzan tpaj kye aj tijajil Israel oje xik ksiꞌ jun galan te kyetz, osey oje xik kypakbꞌaꞌ te tpakbꞌalil galan kyukyꞌiꞌl, ntons ajnaꞌl presis tzan kyonen kyukyꞌi kye aj tijajil Israel tukyꞌi jun tidiꞌ aj at te kyetz.* 28 Ya oj tkajbꞌaj nkꞌuluꞌ kyaqil ja ntzani bꞌix oj tkaj nqꞌapoꞌ kyetz ja onbꞌil ntzani, yaji oj nxik Espany okyinkyꞌel qꞌolbꞌel etetz tzi. 29 Wetz webꞌen oj npon exol etetz, owokel eten jun nim bꞌan galan aj otzajel tsiꞌ Jesukrist te etetz. 30 Wetz oxeꞌl nqꞌumaꞌ etetz waq erman tukyꞌi tbꞌi Qajaw Jesukrist bꞌix tzan tpaj te Txew ntnimsaꞌ jkꞌuꞌj tzan tqet qganiꞌ qibꞌx qxolx, nqet nwitz ewitz tzan etonen chꞌin wukyꞌiꞌl tzan exnaqꞌtzan tukyꞌi jun tkꞌuꞌjlal wiꞌj wetz. 31 Intxik exnaqꞌtzaꞌ tukyꞌi Qtata Dios tzan nqet tkoloꞌ kxol kye aj kꞌontiꞌl nkyexnaqꞌtzan tuj Judey, bꞌix tzan tel galan kyukyꞌi kye qermand tuj Jerusalen te onbꞌil aj oxeꞌl nqꞌapoꞌ kyukyꞌiꞌl. 32 Ikxji tzan npon exol tukyꞌi jun chalajsbꞌil tuj wanim tzan te Qtata Dios bꞌix tzan wojlan chꞌin exol. 33 Qtata Diosxwit aj chewsal qanim qetenxwit etukyꞌiꞌl ekyaqil etetz. ¡Kyꞌikxwit ikxji!