14
Tzan Qbꞌet Tuj Tumeꞌl, A Tgan Tzan Kꞌon Kyqet Qyoliꞌ Kye Qerman
1 Jun qerman aj minaꞌ tok jwert tiꞌj titzaꞌ nqoꞌokslan, peꞌekꞌamon tetz, per kꞌon kxwululun tukyꞌiꞌl tiꞌj jun tidiꞌ aj nyaꞌtx bꞌan presis. 2 Komo ateꞌ junjun qerman aj kyetz tuj kynabꞌl bꞌaꞌn tuj twitz Qtata Dios tzan txik qwaꞌaꞌ tidiꞌchq. Per ax ateꞌ junjunky aj minaꞌ tel kynikyꞌ byenech tiꞌj te tumeꞌl titzaꞌ nqoꞌokslan, kyetz tuj kynabꞌl nyaꞌtx galan tzan qwaꞌan kyaqil, kyetz aꞌox chꞌi itzaj tbꞌel kyweꞌ [tzan tpaj te aj nxik kyokslaꞌ]. 3 Ntons, kye aj nkyewaꞌan kyaqil, kꞌontiꞌl tzan tel kyikꞌoꞌ kye aj kꞌontiꞌl nkyewaꞌan kyaqil, bꞌix yatzun kye aj kꞌontiꞌl nkyewaꞌan kyaqil, ax kꞌontiꞌl tzan kyyolin kyiꞌj kye aj nkyewaꞌan kyaqil; komo te Qtata Dios nkꞌamon kyetz [ikxtzaꞌx kyetz nkyebꞌisun]. 4 ¿Komo tidiꞌ awoklen yatz tzan tqet ayoliꞌ te tmos junky? Galan aj ntkꞌuluꞌ qa nyaꞌtxji, per a te tajaw eꞌel tetz bꞌix te Qajawil bꞌaꞌn tzan tonen tukyꞌiꞌl tzan tkꞌulun iktzaꞌ te aj presis. 5 Ax ateꞌ junjun tuj kynabꞌl kyetz junjun qꞌij mas xjan twitz junky, bꞌix ax ateꞌ junjunky nkyqꞌumaꞌ kyaqil qꞌij parej. Junjunchaq a tgan tzan tqet kybꞌisuꞌ aj tumeꞌl nqet tuj kywitz. 6 Abꞌl aj nꞌok tsiꞌ twiꞌ tiꞌj jun qꞌij, nꞌok tsiꞌ twiꞌ tiꞌj tzan tqet tjiqꞌbꞌaꞌ te Qajawil; bꞌix abꞌl aj bꞌaꞌn tzan twaꞌan kyaqil, ax nwaꞌan tzan tqet tjiqꞌbꞌaꞌ te Qajawil tzan tpaj nxik tsiꞌ pixon te Qtata Dios; bꞌix te aj kꞌontiꞌl nwaꞌan kyaqil, kꞌontiꞌl nwaꞌan tzan tqet tjiqꞌbꞌaꞌ te Qajawil bꞌix nxik tsiꞌ pixon te Qtata Dios. 7 Komo nijunwt jun te qetz nqoꞌanqꞌin cha aꞌox te jun galan te qetzx, bꞌix ni te jkamiky nyaꞌtx te qetzx. 8 Qa itzꞌojoꞌ, ntons te Qajaw itzꞌojoꞌ; bꞌix qa nqokamik, te Qajaw nqokamik. Ikxji, qa itzꞌojoꞌ qatzun kamnaqoꞌji, te Qajaw aꞌoꞌ. 9 Komo tzan tpaj ntzani te Krist okamik bꞌix ojaw anqꞌin junkyꞌel, tzan tok te Kyajawil kye kamnaq bꞌix kye aj itzꞌojeꞌ.
10 Per yatz, ¿tistil nqet ayoliꞌ awerman? ¿Tistil nꞌel awikꞌoꞌ? Jun qꞌij qkyaqil qetz oqopoyon twitz Qtata Dios tzan stzaj tqꞌumaꞌ qa at qil qatzun kꞌontiꞌlji.* 11 Komo tuj te Tuꞌjal Dios oqtxiꞌ nyolin te Qajawil ikxjani: “Iktzaꞌx bꞌanꞌax itzꞌojin, ax bꞌanꞌax iktzaꞌ oxeꞌl nsiꞌ nyol ikxjani: Kyaqil xjal okyeqtel mejlet nwitz bꞌix kyaqil oxeꞌl kyqꞌumaꞌ wetz aꞌin Dios.”* 12 Astilji qkyaqil qetz twitz Qtata Dios oxeꞌl jqꞌumaꞌ kyaqil tidiꞌ jkꞌulbꞌen.
Tzan Qbꞌet Tuj Tumeꞌl, A Tgan Tzan Kꞌon Jkꞌulun Tzan Tqet Tzꞌaqik Junky Qerman
13 Ntons, astilji ya kꞌonky qet qyoliꞌ junky sinoke intqet qbꞌisuꞌ tuj tumeꞌl tzan kꞌon jkꞌulun jun tidiꞌ aj onaꞌnoyon tanim junky, bꞌix kꞌon qokꞌulun jun tidiꞌ tzan tqet tzꞌaqik junky. 14 Wetz webꞌen bꞌix sewur atin, kꞌontiꞌl jun tidiꞌ aj nyaꞌtx galan tzan tpaj ikxji-wit tkajlen swaꞌ.* Aꞌox qa at abꞌl nqet tbꞌisuꞌ tiꞌj jun tidiꞌ qa nyaꞌtx galan, ntons tuj twitz tetz nyaꞌtx galan. 15 Qa tzan tpaj te aj nxik awaꞌaꞌ, onaꞌnoyon tanim junky awerman, ntons ikxji kꞌontiꞌl nchbꞌet tuj jun tumeꞌl tzan tqet aganiꞌ. Kꞌon xik awaꞌaꞌ jun tidiꞌ aj oqtel tzꞌaqik junky awitzaꞌ, komo ax tzan tpaj te aj awerman te Krist okamik. 16 Ntons, kꞌon chkꞌulun chꞌinwt tukyꞌi jun tumeꞌl nyaꞌtx galan; ikxji tzan kꞌon kyyolin txqꞌanky nyaꞌtx galan tiꞌj te aj yatz tuj anabꞌl jun galan.a 17 Komo tzan jkaj tuj tqꞌabꞌ Qtata Dios, te nini nyaꞌtx tzan tpaj jun tidiꞌ aj nxik qwaꞌaꞌ qatzun aj nxik qukꞌaꞌji, sinoke tzan qbꞌet tuj tumeꞌl bꞌix tzan qten galan qxolx bꞌix tukyꞌi jun chalajsbꞌil tuj qanim tzan te Txew Dios. 18 Te aj nꞌaqꞌunan te Krist ikxji, nꞌel galan tuj twitz Qtata Dios bꞌix ax nꞌel galan tuj kywitz kye xjal.
19 Ntons astilji qobꞌajkꞌulun waq galan tzan qten galan qxolx bꞌix tzan qten jwert qxolx tukyꞌi Qtata Dios. 20 Kꞌon ekꞌuluj tzan tponaj taqꞌun te Qtata Dios exol tzan tpaj aj nxik ewaꞌaꞌ. Bꞌaꞌn tzan qwaꞌan kyaqil, per nyaꞌtx galan qa tzan tpaj aj nxik qwaꞌaꞌ oqtel tzꞌaqik te jun abꞌl qetz. 21 Mejor-tal tzan kꞌon echoꞌon chibꞌj bꞌix tzan kꞌon etukꞌan taꞌal ub txꞌamsaꞌ bꞌix tzan kꞌon ekꞌulun chꞌinwt aj okꞌuluyon tzan tqet tzꞌaqik awerman. 22 Te tumeꞌl titzaꞌ yatz witꞌlik akꞌuꞌj tiꞌj Dios, kꞌon kaj asiꞌ. Galanx-alo te aj nkꞌulun jun tidiꞌ bꞌix kꞌontiꞌl tidiꞌ nyolin tanim tiꞌj. 23 Per te aj [nxik twaꞌaꞌ jun tidiꞌ bꞌix] nnaꞌnon tanim tiꞌj [qa bꞌaꞌn tzan] txik twaꞌaꞌ, ajixk nxik tpoqoꞌ tibꞌ tzan tpaj kꞌontiꞌl nxik twaꞌaꞌ iktzaꞌ tetz witꞌlik tkꞌuꞌj; komo kyaqil aj nqet jkꞌuluꞌ qa nyaꞌtx iktzaꞌ witꞌlik jkꞌuꞌj ntons nqojoyon choj.