13
Tzan Qbꞌet Tuj Tumeꞌl, Inkyqet Qokslaꞌ Kye Kꞌulul Mandad
1 Inkyqet qokslaꞌ kye kꞌulul mandad. Komo kꞌontiꞌl jun kꞌulul mandad qa nyaꞌtx Qtata Dios okaj swan tetz, bꞌix kye aj kꞌulul mandad ateꞌ ajnaꞌl, a te Qtata Dios okaj sin kyetz. 2 Abꞌl kye aj kꞌon kygan okslan kye kꞌulul mandad, kyetz kꞌon kygan okslan te aj okaj tsiꞌ Qtata Dios bꞌix kyetz okyexeꞌl poqoꞌ. 3 Komo kye kꞌulul mandad kꞌontiꞌl akyeqet cha tzan tok kswaꞌ kxobꞌal kye aj nkyekꞌulun galan, sinoke kye aj nkyekꞌulun nyaꞌtx galan. ¿Egan tzan ebꞌet nyaꞌtx tukyꞌi txobꞌlal kywitz kye kꞌulul mandad? Ntons peꞌekꞌulun galan bꞌix okxtel kyjiqꞌbꞌaꞌ. 4 Komo kye kꞌulul mandad akyeqet tuj tqꞌabꞌ Qtata Dios tzan kykꞌulun jun galan te etetz. Per qa kxkꞌuluyon nyaꞌtx galan, ntons peꞌexobꞌ tzan tpaj nyaꞌtx chagan akyeqet; komo at kyajwalil aj oje tzaj siꞌ tzan Qtata Dios tzan txik ksiꞌ xhchoꞌnal kyiꞌj xjal aj nkyekꞌulun nyaꞌtx galan. 5 Astilji presis tzan kyqet qokslaꞌ kye kꞌulul mandad, nyaꞌtx aꞌox cha tzan kꞌon stzaj ksiꞌ xhchoꞌnal qiꞌj sinoke tzan kꞌon tyolin qanim qiꞌjx. 6 Astilji etetz nkxchojon te chojenj, komo kye kꞌulul mandad akyeqet tuj tqꞌabꞌ Qtata Dios bꞌix a kyaqꞌunji. 7 Intxik esiꞌ te junjunchaq te aj presis tzan txik esiꞌ kyetz: Intxik echojoꞌ kyaqil txakl chojenj te aj npeyun tetz,* bꞌix inkyqet etokslaꞌ kye aj presis tzan kyqet etokslaꞌ, bꞌix inkyqet elimaꞌ kye aj presis tzan kyqet elimaꞌ.
Tzan Kyqet Qganiꞌ Txqꞌanky A Te Mas Presis Tzan Qbꞌet Tuj Tumeꞌl
8 Kꞌon kaj ekꞌasbꞌenaꞌ chꞌinwt tukyꞌi nijunwt, sinoke tzan tqet eganiꞌ etibꞌx exolx; komo jun aj nkyeqet tganiꞌ abꞌl tetz, tetz nkꞌulun iktzaꞌ tgan te Kawbꞌil. 9 Komo te Kawbꞌil nyolin ikxjani: “Kꞌon chkꞌajajin,* kꞌon chkansan,* kꞌon xhchꞌelqꞌan,* kꞌon chnikꞌon,* kꞌon tzꞌel aganiꞌ aj nyaꞌtx yatz.”* Kyaqil aj ntzani bꞌix kye txqꞌanky aj okaj qꞌumaꞌ, bꞌaꞌn tzan txik jqꞌumaꞌ ikxjani: “Intqet aganiꞌ abꞌl yatz iktzaꞌx nqet aganiꞌ yatz awibꞌx.”* 10 Ntons oj tqet qganiꞌ abꞌl qetz, kꞌontiꞌl nqokꞌulun jun nyaꞌtx galan kyiꞌj; komo oj kyqet qganiꞌ abꞌl qetz, nqokꞌulun iktzaꞌ tgan te Kawbꞌil.
Tzan Qbꞌet Tuj Tumeꞌl, Intkaj Jkolaꞌ Kyaqil Te Nyaꞌtx Galan
11 Intqet ekꞌuluꞌ aj maꞌtx xik nqꞌumaꞌni, per instzaj enaꞌoꞌ te ja tyemp aj itzꞌojixni, maꞌtx pon or tzan tjaw etebꞌeꞌ chꞌin ewitz, komo chꞌinky tpon or tzan jkolet, nyaꞌtx iktzaꞌ aj qokslan bꞌan tbꞌay-el. 12 Nqoꞌanqꞌin tuj jun tyemp iktzaꞌ maꞌtx tzꞌex te aqꞌbꞌil bꞌix chꞌinky qxhkꞌateꞌ, astilji intkaj jkolaꞌ kyaqil te aj nyaꞌtx galan bꞌix intok qsiꞌ jkꞌuꞌj tzan jkꞌulun aꞌox te galan iktzaꞌ nqobꞌet chijqꞌij naqe jun soldad nꞌok tsiꞌ taqꞌumbꞌil tzan tqꞌojin tiꞌj te aj nyaꞌtx galan. 13 Qobꞌajbꞌet tuj tumeꞌl, naqe oj qbꞌet chijqꞌij; kꞌon qobꞌajkꞌulun pyest aj jaꞌ kye xjal cha nkyekꞌulun pur nyaꞌtx galan, bꞌix kꞌon qobꞌajxhbꞌajin bꞌix kꞌon qobꞌajbꞌet tuj kꞌajajbꞌilj ni tuj tidiꞌchq aj nyaꞌtx galan, bꞌix kꞌon tzꞌok jqꞌojiꞌ junky bꞌix kꞌon tzꞌel qganiꞌ aj at te junky. 14 Qobꞌajbꞌet waq iktzaꞌ te Qajaw Jesukrist nbꞌet, bꞌix kꞌon xik qsiꞌ lad te qchiꞌjel tiꞌj kyaqil aj nyaꞌtx galan nꞌel tganiꞌ.