12
Tzan Qbꞌet Tuj Tumeꞌl, Intkaj Jqꞌapoꞌ Qibꞌ Tuj Tqꞌabꞌ Qtata Dios
1 Ntons wetz ajnaꞌl nqet nwitz ewitz waq erman, tzan tpaj te Qtata Dios nꞌok loꞌet tkꞌuꞌj qiꞌj, intkaj eqꞌapoꞌ etibꞌ tuj tqꞌabꞌ tukyꞌi kyaqil echiꞌjel naqe jun present te tetz, jun present aj pawaꞌ aꞌox te tetz bꞌix aj galan nꞌel tuj twitz. Aj ntzaꞌn te tumeꞌl bꞌanꞌax titzaꞌ tzan tqet qnaꞌoꞌ te Qtat. 2 Kꞌon kxꞌok iktzaꞌ kye xjal aj kꞌontiꞌl nkyeꞌokslan, sinoke intkyꞌixpjik titzaꞌ nkxbꞌisun; ikxji tzan tel enikyꞌ tidiꞌ tgan te Qtata Dios, alkyetz te tbꞌanil bꞌix galan bꞌix tumeꞌl.
Tzan Qbꞌet Tuj Tumeꞌl, Injkꞌulun Te Qajbꞌen Kxol Kye Qerman Tukyꞌi Jun Tkꞌuꞌjlal
3 Komo te Qtata Dios oje tzaj tsiꞌ wajwalil tzan tpaj tetz bꞌan galan nabꞌlin, astilji oxeꞌl nqꞌumaꞌ te ekyaqil etetz tzan kꞌon ebꞌisun mas tlimaqal xjal aꞌix kywitz kye txqꞌanky, sinoke intqet ebꞌisuꞌ tukyꞌi tumeꞌl iktzaꞌx janikꞌpon oje tzaj tsiꞌ te Qtata Dios te junjunchaq te etetz tzan tok ewitꞌbꞌaꞌ ekꞌuꞌj tiꞌj. 4 Komo iktzaꞌx qetz qchiꞌjel cha jun xtxꞌotxꞌal tibꞌ-oq, per junjunchaq part tetz at tidiꞌ token, kye junjun part kꞌontiꞌl nkyekꞌulun te aj nkyekꞌulun kye txqꞌanky part.* 5 Ax ikxji qetz aꞌoꞌ; anke kyꞌilaꞌj qbꞌet per cha jun-oq aꞌoꞌ tiꞌj Krist, bꞌix qkyaqil qetz atoꞌ tzan qonen qxolx iktzaꞌ cha jun-oq tzan qkyaqil. 6 Te Qtata Dios ntzaj tsiꞌ qajbꞌen te junjunchaq te qetz bꞌix chuktkychaq qajbꞌen te junjun bꞌix ntzaj tsiꞌ tuj jun tumeꞌl bꞌan galan iktzaꞌx tetz tgan anke kꞌontiꞌl nqajoꞌ. Ntons kye aj at kyajbꞌen tzan txik kypakbꞌaꞌ jun tpakbꞌalil aj Txew Dios swal tetz, ntons a tgan tzan kypakbꞌan janikꞌpon witꞌlikok kykꞌuꞌj tiꞌj tetz.* 7 Bꞌix ax ikxji kyiꞌj kye aj at kyajbꞌen tzan kyonen kxol kye qerman: Inkyonen najji. Bꞌix ax kye aj at kyajbꞌen tzan kxnaqꞌtzan: Inkxnaqꞌtzan najji. 8 Bꞌix ax kye aj at kyajbꞌen tzan kynimsan kykꞌuꞌj txqꞌanky: Inkynimsan kykꞌuꞌj txqꞌanky najji. Bꞌix ax kye aj at kyajbꞌen tzan txik ksiꞌ te aj npaltin kye txqꞌanky: Intxik ksiꞌ nim najji tukyꞌi jun tkꞌuꞌjlal. Bꞌix ax kye aj at kyajbꞌen tzan kxik kyukꞌleꞌ kye txqꞌanky: Inkykꞌulun najji tuj jun tumeꞌl galan. Bꞌix ax kye aj at kyajbꞌen tzan tok loꞌet kykꞌuꞌj kyiꞌj txqꞌanky: Inkykꞌulun najji tukyꞌi jun chalajbꞌil.
Tzan Qbꞌet Tuj Tumeꞌl, Inkyqet Qganiꞌ Kye Txqꞌanky Tukyꞌi Jun Tkꞌuꞌjlal
9 Intqet eganiꞌ etibꞌ exol tukyꞌi jun tkꞌuꞌjlal, intkaj esiꞌ te aj nyaꞌtx galan bꞌix kꞌon kaj esiꞌ tzan ekꞌulun te aj galan. 10 Intqet eganiꞌ etibꞌ naqe etermanx etibꞌ, intxik esiꞌ luwar te junky eterman exolx. 11 Intjaw etin chꞌin etibꞌ, kꞌon kxꞌok kyꞌaj, sinoke sekꞌ etaqꞌunan te Qtata Dios tukyꞌi jun tkꞌuꞌjlal. 12 Peꞌechalaj tuj etanim tzan tpaj loꞌik ekꞌuꞌj [tiꞌj Qtata Dios], insten epasens oj tok eten jun xhchoꞌnal, kꞌon kaj esiꞌ tzan exnaqꞌtzan. 13 Inkyok etoneꞌ kye txqꞌanky eterman tiꞌj te aj presis te kyetz komo ax kyetz pawameꞌ te Qtata Dios, bꞌix intxik esiꞌ kyposad kye aj nkyeqꞌolbꞌen etetz. 14 Inkyqet ekyꞌiwlaꞌ kye aj nkxꞌok kyajqꞌojaꞌ, instzaj eqaniꞌ jun galan kyajsik bꞌix kꞌon kxqanbꞌen.* 15 Peꞌechalaj kyukyꞌi kye aj nkyechalaj, bꞌix peꞌetoqꞌ kyukyꞌi kye aj nkyeꞌoqꞌ. 16 Peꞌebꞌet galan exolx, kꞌon qet ejiqꞌbꞌaꞌ etibꞌ bꞌix inkyqet eten galan kye mebꞌaꞌ xjal, kꞌon qet ebꞌisuꞌ etiꞌjx qa bꞌan list aꞌix.* 17 Kꞌon qet ebꞌisuꞌ tzan ekꞌulun jun nyaꞌtx galan tiꞌj junky aj nkꞌulun nyaꞌtx galan etiꞌj. Intok esiꞌ ekꞌuꞌj tzan ekꞌulun te tumeꞌl kywitz kyaqil xjal. 18 Qa bꞌaꞌn tzan tbꞌantik etitzaꞌ, intok esiꞌ ekꞌuꞌj tzan eten galan kyukyꞌi txqꞌanky anke atqet nlay bꞌantik tzan tpaj kye txqꞌanky kꞌon kygan. 19 Etetz aj ganimix witzaꞌ, kꞌon kxjoyon tumeꞌl tzan tel xhchojoꞌ te junky aj nyaꞌtx galan maꞌtx tkꞌuluj etiꞌj, sinoke tzoqpij waq tzan tkꞌulun te Qtata Dios iktzaꞌ tetz tgan tukyꞌi ja xjalni, komo nyolin te Tuꞌjal Dios oqtxiꞌ ikxjani: “Aꞌin wetz nkꞌuluꞌtz tzan tel xhchojoꞌ” kyi te Qajaw.* 20 Bꞌix ax qa te jun etajqꞌoj at waꞌij tiꞌj, intxik esiꞌ tweꞌ, bꞌix qa at sekiy tiꞌj intxik esiꞌ tukꞌaꞌ; ikxji ekꞌuluꞌtz tzan tqꞌaqꞌwen twitz tzan tkyꞌexaw.* 21 Kꞌon kxqet eqꞌiꞌ tzan te nyaꞌtx galan, sinoke intqet ekꞌuluꞌ te galan tzan tpon enajsaꞌ te nyaꞌtx galan.