11
Kye Aj Tijajil Israel Okyekoletel Max Oj Kykolet Kye Aj Nyaꞌtx Tijajil Israel
1 Ntons ax qokyi-wit ikxjani: ¿Oje petzun tzꞌel tikꞌoꞌ te Qtata Dios kye aj tijajil Israel aj joyomeꞌ titzaꞌ? ¡Kꞌontiꞌl! Komo wetz aꞌin jun aj tijajil Israel, aꞌin tijajil Abran aj te bꞌuchꞌuj Minch.* 2 Te Qtata Dios kꞌontiꞌl eꞌel tikꞌoꞌ kye aj joyomeꞌ titzaꞌ atx bꞌan oqtxiꞌ. ¿Tiꞌtzun, kꞌontiꞌl etebꞌen etetz tidiꞌ nyolin tiꞌj te Eliys tuj te Tuꞌjal Dios? Komo tetz oxik tqꞌumaꞌ tukyꞌi Qtata Dios ikxjani kyiꞌj kye aj tijajil Israel: 3 “Tat, kye aj yolil ayol yatz oje kyeqet kansaꞌ, bꞌix kye tzꞌeꞌsbꞌil oyej te yatz oje kye qet xituꞌ; aꞌox wetz nchukel oje kyinkaj, per ajnaꞌl ax wetz aꞌin kygan tzan nqet kykansaꞌ.”* 4 Per ¿tidiꞌ owajtz tqꞌumaꞌ te Qtata Dios tetz? Owajtz tqꞌumaꞌ ikxjani: “Ateꞌx wuq mil (7000) xjal kolomeꞌ te wetz, kyetz minaꞌ kyqet mejlet twitz titzbꞌalil te Baal.”* 5 Ntons ax ikxji ajnaꞌl; ateꞌx kyꞌilaꞌj [aj tijajil Israel] aj joyomeꞌ tzan Qtata Dios tzan tpaj tetz bꞌan galan nabꞌlin. 6 Bꞌix komo te ntzani cha aꞌox tzan tpaj te Qtata Dios bꞌan galan nabꞌlin anke kꞌontiꞌl nqajoꞌ, ntons nyaꞌtx tzan tpaj jun kykꞌulbꞌen [galan]; per qa cha tzan tpaj-wit te kykꞌulbꞌen [galan], ntons nyaꞌtx-tal cha aꞌox tzan tpaj te Qtata Dios galan nabꞌlin.
7 Ntons ¿tidiꞌ ojqꞌumaꞌtz? Kye aj tijajil Israel aj kygan tuq [tzan kyel galan tuj twitz] Qtata Dios, kyetz kꞌontiꞌl owoknoj kyitzaꞌ. Yatzun kye aj joyomeꞌ tzan Qtata Dios, kyetz obꞌantik tzan kyel galan tuj twitz, yatzun kye txqꞌanky cha eꞌok bꞌan tzꞌak. 8 Komo nyolin tuj te Tuꞌjal Dios oqtxiꞌ ikxjani: “Te Qtata Dios oxik tsiꞌ jun kyanim tzan kꞌon tel kynikyꞌ, oxik tsiꞌ jun kywitz naqe cha kꞌontiꞌl nkyeꞌeꞌ, bꞌix jun kxkyin iktzaꞌ kꞌontiꞌl akyeꞌok, bꞌix tzunx ikxji kyetz tuj ja tyemp ajnaꞌl.”* 9 Ax te Dawid oqet stzꞌibꞌaꞌ [Tyol Dios oqtxiꞌ] ikxjani:* “Kyaqilxwit qꞌij aj nkyeqꞌijlan tzꞌokxwit naqe jun tramp te kyetzx, bꞌix tzan kykaj qꞌaꞌet tuj bꞌix tzan kyjaw tzꞌaqik, ikxji tzan tok kyen twitz xhchoꞌnal, 10 te kywitz kꞌonxwit tzeꞌen iktzaꞌ jun moy, bꞌix te tzelkyiꞌj intqetxwit bꞌaj yukꞌan tzan tpaj toklen kyen nim xhchoꞌnal.” 11 Ntons ax qokyi-wit ikxjani: ¿Tiꞌtzun, ya ma kyeqet tzꞌaqik, bꞌeyx petzun eqet tzꞌaqik te jun-eleꞌx? ¡Kꞌontiꞌl! Sinoke tqetlen kykꞌuluꞌ nyaꞌtx galan, yaji opon te tpakbꞌalil galan kxol kye aj nyaꞌtx tijajil Israel tzan kykolet, bꞌix ikxji kye aj tijajil Israel owelal kyganiꞌ tuj kyanim [tzan kyokslan]. 12 Bꞌix tzan tpaj te kykꞌulbꞌen nyaꞌtx galan owel te jun galan kye txqꞌanky xjal twitz txꞌoꞌtxꞌ, bꞌix komo tzan tpaj kꞌontiꞌl eꞌok [jun amaqꞌ okslon], ikxji owel te jun galan kye aj nyaꞌtx tijajil Israel, ntons qa kyetz oxeꞌl kyin te galan junkyꞌel, ntons owelalkix te jun nim bꞌan galan [kye kyaqil].
13 Ngan tzan txik nqꞌumaꞌ etetz aj nyaꞌtx aꞌix tijajil Israel, te Qtata Dios intzaj tlajoꞌ te tkyꞌixel Jesus kxol kye aj nyaꞌtx tijajil Israel, astilji wetz nkyinyolin nim tiꞌj waqꞌun te tetz 14 tzan tel kyganiꞌ tuj kyanim kye nxjalil tzan kykolet junjun te kyetz. 15 Komo qa kye kyꞌilaꞌj xjal [aj nyaꞌtx tijajil Israel] oje kyekaj galan tukyꞌi Qtata Dios kyelen ikꞌoꞌ kye aj tijajil Israel, ntons owokel mas bꞌan tbꞌanil oj kykꞌamet kye aj tijajil Israel junkyꞌel, owokel mer iktzaꞌ jun kamnaq aj ojawel anqꞌin junkyꞌel. 16 Komo [kye aj tijajil Israel pawameꞌ te Qtata Dios] iktzaꞌx te tbꞌay wakaj qꞌotja nkaj pawaꞌ te tetz bꞌix ikxji kyaqil te qꞌotj ax nkaj pawaꞌ te tetz. Bꞌix yatzun tiꞌj jun tzeꞌ [aj telponx tiꞌj qijajil], tzan tpaj te tlokꞌ pawaꞌ aꞌox te Qtata Dios, ikxji kyaqil te tqꞌabꞌ ax nkaj pawaꞌ te tetz.b 17 Bꞌix komo iktzaꞌx junjun tqꞌabꞌ te tzeꞌ oje tzꞌel txꞌemuꞌ tzan tox lakꞌoꞌ junky tqꞌabꞌ, [aj telponx iktzaꞌ etiꞌj] etetz iktzaꞌ tqꞌabꞌ jun wiꞌ olib aj tuj kꞌul olib bꞌix ajnaꞌl oje kxꞌox junchꞌiꞌ tiꞌj te bꞌanꞌax olibc aj jaꞌ ntzaj ekꞌamoꞌ jun etanqꞌin tiꞌj te tlokꞌ. 18 Ntons kꞌon qet ejiqꞌbꞌaꞌ etibꞌ qa mas tbꞌanil etetz aꞌix kywitz kye [aj tijajil Israel] aj iktzaꞌ kye tqꞌabꞌ olib aj eꞌel eqꞌiꞌ. Qa etetz oqtel ejiqꞌbꞌaꞌ etibꞌ, instzaj enaꞌoꞌ titzaꞌ itzꞌojix, komo te tlokꞌ nyaꞌtx itzꞌoj tzan epaj etetz sinoke etetz itzꞌojix tzan tpaj te tlokꞌ. 19 Qanq etetz eqꞌumaꞌtz ikxjani: “Yeꞌ, per kyetz eꞌetz in iktzaꞌ te tqꞌabꞌ olib owetz in, bꞌix tzan qox junchꞌiꞌ qetza.” 20 Bꞌanꞌax eꞌetz in iktzaꞌ tqꞌabꞌ te tzeꞌ, per tzan tpaj kꞌontiꞌl eꞌokslan tiꞌj Qtata Dios; bꞌix etetz ajnaꞌl oje kxꞌox junchꞌiꞌ [qukyꞌila] tzan tpaj owok ewitꞌbꞌaꞌ ekꞌuꞌj tiꞌj Qtata Dios. Astilji kꞌon qet ejiqꞌbꞌaꞌ etibꞌ sinoke intxik exobꞌleꞌ chꞌin. 21 Komo qa te Qtata Dios kꞌontiꞌl oqet tnajsaꞌ kchoj kye aj tijajil Israeld konser kyetz aꞌeꞌ kye aj joyomeꞌ, ntons pyorx-al etetz, ax nlay qet tnajsaꞌ echoj [qa kꞌontiꞌl nkxꞌokslan te tetz].
22 Ntons intok esiꞌ enabꞌl tiꞌj ja ntzani: Te Qtata Dios bꞌan galan nabꞌlin per ax nswan xhchoꞌnal [kyiꞌj kye aj kꞌontiꞌl nkyeꞌokslan]. Oxik tswaꞌ xhchoꞌnal kyiꞌj kye aj eqet tzꞌaqik, per bꞌan galan nabꞌlin etukyꞌiꞌl qa nlay kaj esiꞌ tzan etokslan. Per qa okajel esiꞌ tzan etokslan ntons ax etetz oxkxꞌelal tin. 23 Bꞌix ax kye aj tijajil Israel, qa kyetz okyeꞌokslayonky, ax kyetz okyeꞌokex junchꞌiꞌ junkyꞌel qxol qetz tzan tpaj te Qtata Dios at nim tajwalil tzan tkꞌulun nini. 24 Ntons, komo etetz [nyaꞌtx aꞌix aj tijajil Israel], aꞌix iktzaꞌ tqꞌabꞌ aj tuj kꞌul olib aj owok lakꞌoꞌ tiꞌj te bꞌanꞌax olib, pyorx kyetz aj tijajil Israel, kyetz iktzaꞌ te bꞌan bꞌanꞌax tqꞌabꞌ te wiꞌ olib, kyetz bꞌaꞌn tzan kyox junchꞌiꞌ junkyꞌel.
25 Ntons, tzan kꞌon tqet ejiqꞌbꞌaꞌ etetz etibꞌ waq erman, wetz ngan tzan tok echaꞌoꞌ te aj kwest tzan tel kynikyꞌ kye xjal tiꞌj ikxjani: Kye aj tijajil Israel ajnaꞌl kꞌontiꞌl nqet kyokslaꞌ, per okyeꞌokslayon chaꞌoj kykolet kyaqil kye aj nyaꞌtx tijajil Israel [aj joyomeꞌ tzan Qtata Dios]. 26 Bꞌix yaji okyekoletel kyaqil kye aj tijajil Israel, iktzaꞌx oqet tzꞌibꞌaꞌ [tuj te Tuꞌjal Qtata Dios oqtxiꞌ] ikxjani: “Tzul te aj okolpiyon kye txjalil, tzajnaq kxol kye aj tijajil Israel,e owelal tin te nyaꞌtx galan tiꞌj kyanim.* 27 Ikxji opoyonkix kyaqil aj nxik nsiꞌ nyol tiꞌj kyukyꞌiꞌl chaꞌoj tqet nnajsaꞌ te kchoj.”*
28 Ntons, tiꞌj te tpakbꞌalil galan, kyetz aꞌeꞌ tajqꞌoj Qtata Dios [ajnaꞌl], tzan tok te jun galan te etetz. Per tzan tpaj aꞌeꞌ kyetz kye aj joyomeꞌ tbꞌayaꞌ, tzunx ganimeꞌ tzan Qtata Dios tzan tpaj kye kyijajil oqtxiꞌ. 29 Kyaqil aj ntzaj tsiꞌ Qtata Dios,* ya kꞌontiꞌl nꞌel tinky, bꞌix ax kꞌontiꞌl nkyeꞌaj tlajoꞌ aj ojetq kyetzaj tukꞌleꞌ. 30 Ax etetz oqtxiꞌ ax kꞌontiꞌl tuq nqet etokslaꞌ Qtata Dios, per ajnaꞌl te Qtat oje tzꞌok loꞌet tkꞌuꞌj etiꞌj tzan kypaj kye aj tijajil Israel kꞌontiꞌl nqet kyokslaꞌ. 31 Ax ikxji owelal kyiꞌj: Ajnaꞌl kyetz kꞌontiꞌl nqet kyokslaꞌ per cha tzan tok loꞌet tkꞌuꞌj Qtata Dios kyiꞌj iktzaꞌx owok loꞌet tkꞌuꞌj etiꞌj. 32 Ikxji te Qtat ostzoqpij tzan kꞌon qokslan tbꞌay qkyaqil qetz, bꞌix yaji tzan tok loꞌet tkꞌuꞌj qiꞌj qkyaqil.
33 ¡Bꞌan tbꞌanil te galan aj te Qtata Dios, bꞌix tetz at jun tnabꞌl bꞌan tumeꞌl bꞌix nꞌel tnikyꞌ tiꞌj kyaqil! Kꞌontiꞌl nꞌoknoj qyol tzan txik jqꞌumaꞌ tumeꞌl tiꞌj aj nqet tbꞌisuꞌ, bꞌix ni kꞌontiꞌl nꞌel qnikyꞌ tiꞌj kyaqil titzaꞌ nabꞌlin. 34 ¿Abꞌl oje tzꞌel tnikyꞌ tiꞌj aj ntbꞌisuꞌ te Qajaw? ¿Qatzun abꞌl oje xik xnaqꞌtzan tetz?* 35 ¿Abꞌl oje xik tsiꞌ jun tidiꞌ te Qtata Dios tzan tkꞌamon tkyꞌixel te aj oxik tsiꞌ? 36 Kyaqil aj tidiꞌchq at, a te Qtata Dios ntzaj sin tetz; bꞌix kyaqil aj at, tzan tpaj tetz atqet, bꞌix tzan token te tetz. ¡Intqetxwit jiqꞌbꞌaꞌ tetz tuj kyaqil tyemp! Intkyꞌikxwit ikxji.