Kye Aj Rom 10

¹ Ntons waq erman, wetz nkyinxnaqꞌtzan tukyꞌi jun tkꞌuꞌjlal tukyꞌi Qtata Dios kyiꞌj kye aj tijajil Israel, ngan-talo tukyꞌi jun tkꞌuꞌjlal tzan kykolet kkyaqil kyetz. ² Wetz webꞌen, kyetz tuj kynabꞌl tukyꞌi jun tkꞌuꞌjlal nkyeꞌokslan tiꞌj Qtata Dios, per webꞌen kyetz nyaꞌtx tukyꞌi jun kynabꞌl bꞌan tumeꞌl. ³ Komo kꞌon kygan tuq tzan kykꞌamon te tumeꞌl titzaꞌ te Qtata Dios nꞌel tin qchoj, sinoke nkyekꞌulun jun tumeꞌl aj kyganx, ikxji kꞌontiꞌl nqet kyokslaꞌ te tumeꞌl iktzaꞌ te Qtat tgan. ⁴ Komo iktzaꞌ nyolin te Kawbꞌil, a te Krist oje kꞌulun tetz, astilji kyaqil kye aj okyeꞌokslayon tiꞌj okyeꞌelal galan tuj twitz Qtata Dios. ⁵ Komo te Moisés oqet stzꞌibꞌaꞌ [oqtxiꞌ] te tumeꞌl titzaꞌ nꞌel in te qchoj iktzaꞌ nyolin te Kawbꞌil, oqet stzꞌibꞌaꞌ ikxjani: “Te xjal aj oqtel tkꞌuluꞌ kyaqil iktzaꞌ nyolin te Kawbꞌil, ikxji owanqꞌiyon.” ⁶ Per tiꞌj te tumeꞌl titzaꞌ nꞌel in qchoj tzan tpaj witꞌlik jkꞌuꞌj tiꞌj Krist, bꞌaꞌn tzan txik qꞌumaꞌ ikxjani: “Kꞌon yolin qanim abꞌl ojawex tuj kaꞌj” (tzan tqetz tin te Krist [tzani twitz txꞌoꞌtxꞌ]), ⁷ bꞌix ax [kꞌontiꞌl tzan tyolin qanim] “abꞌl oqtex tjaqꞌ txꞌoꞌtxꞌ” (tzan tjatz tin te Krist kxol kye kamnaq). ⁸ Per ¿tidiꞌ nyolin te tumeꞌl? “Te tyol Qtata Dios atqet qaynin awiꞌj, tuj atziꞌ bꞌix tuj awanim.” Ntons aj ntzani te tpakbꞌalil aj nxik qpakbꞌaꞌna, te tpakbꞌalil tzan tok witꞌlet jkꞌuꞌj tiꞌj [Krist]. ⁹ Qa qetz oxeꞌl jqꞌumaꞌ tukyꞌi qtziꞌ qa a te Jesus Qajawil, bꞌix qa oxeꞌl qokslaꞌ tuj qanim tukyꞌi jun tkꞌuꞌjlal qa te Qtata Dios otkꞌuluj tzan tjaw anqꞌin junkyꞌel kxol kye kamnaq, ntons oqokoletel. ¹⁰ Komo tuj qanim nqoꞌokslan tzan tel in qchoj, bꞌix tukyꞌi qtziꞌ nxik jqꞌumaꞌ te [aj nqokslaꞌ] tzan jkolet. ¹¹ Komo tuj te Tuꞌjal Dios nyolin ikxjani: “Abꞌl aj owokslayon tiꞌj, tetz nlay tzꞌel in tkyꞌexaw.” ¹² Tuj twitz te Qtata Dios kꞌontiꞌl jun mas tbꞌanil twitz junky kxol kye aj tijajil Israel bꞌix kxol kye aj nyaꞌtx tijajil Israel. Komo axkix tetz te Tajaw kyiꞌj kyaqil xjal bꞌix ntzaj tsiꞌ tidiꞌchq galan kyaqil kye aj nqet kywitz twitz. ¹³ Komo ikxjani [nyolin tuj te Tuꞌjal Dios]: “Abꞌl aj nqet twitz twitz Qajawil, okoletel.”

¹⁴ ¿Per titzaꞌ oqtel kywitz twitz Qajawil qa minaꞌ kyokslan tiꞌj tbꞌay? ¿Bꞌix titzaꞌ okyeꞌokslayon tiꞌj qa minaꞌ tok kchaꞌoꞌ tiꞌj? ¿Bꞌix titzaꞌ owokel kchaꞌoꞌ qa kꞌontiꞌl abꞌl nxik pakbꞌan te kyetz? ¹⁵ ¿Bꞌix titzaꞌ oxeꞌl kypakbꞌaꞌ qa kꞌontiꞌl abꞌl nxik lajon te kyetz? Iktzaꞌx tzꞌibꞌankaj tuj Tuꞌjal Dios oqtxiꞌ: “Bꞌan nqochalaj oj kyul kye aj nkyepakbꞌan te tpakbꞌalil galan.” ¹⁶ Per nyaꞌtx kyaqil xjal oxik kyokslaꞌ te tpakbꞌalil galan. Iktzaꞌx otqꞌumaj te Chay oqtxiꞌ [tuj te Tuꞌjal Qtata Dios] ikxjani: “Tat, nijunwt maꞌtx xik tokslaꞌ te aj nxik qpakbꞌaꞌna.” ¹⁷ Ntons [yatzun qetz] nꞌok qwitꞌbꞌaꞌ jkꞌuꞌj tiꞌj tzan tpaj nꞌok qchaꞌoꞌ; bꞌix te aj nꞌok qchaꞌoꞌ, a te tpakbꞌalil tiꞌj Krist.

¹⁸ Ntons ax qokyi-wit ikxjani: “¿Minaꞌ petzun tok kchaꞌoꞌ [kye xjal] te tpakbꞌalil?” ¡Oje tzꞌok kchaꞌoꞌ! [Komo ikxji nyolin tuj te Tuꞌjal Dios:] “Tuj kyaqil twitz txꞌoꞌtxꞌ oje xik pakbꞌlet te tpakbꞌalil, bꞌix kyaqil jaꞌchq twitz txꞌoꞌtxꞌ oje tzꞌok chaꞌoꞌ te aj kyyolbꞌen.” ¹⁹ Ntons ax qokyi-wit ikxjani: ¿Minaꞌ petzun tel kynikyꞌ kye aj tijajil Israel? Komo tbꞌay, te Moisés oqet stzꞌibꞌaꞌ [tyol Dios] ikxjani: “Wetz onkꞌuluꞌtz tzan tel eganiꞌ tuj etanim [tzan etokslan] oj tok eten [titzaꞌ nkyeqet wen] kye aj junky amaqꞌ, bꞌix nkꞌuluꞌtz tzan stzaj jun eqꞌoj tzan kypaj xjal aj kꞌontiꞌl kyotzqiꞌ aꞌin.” ²⁰ Bꞌix ax te Chay oqet stzꞌibꞌaꞌ [tyol Dios] ikxjani: “Wetz oje kyinꞌoknoj tzan kye aj kꞌontiꞌl tuq nkyejoyon wiꞌj, bꞌix oje xik nyekꞌuꞌ wibꞌ kywitz kye aj kꞌontiꞌl tuq nkyejoyon wiꞌj.” ²¹ Per ax otqꞌumaj kyiꞌj kye aj tijajil Israel ikxjani: “Bꞌajqꞌij nkyetzaj tuq wukꞌleꞌ kye aj kꞌon kygan okslan, bꞌix kꞌon kygan tzan tox tuj kywiꞌ.”