9
Bꞌaꞌn Tzan Qok Tkꞌwaꞌal Qtata Dios Aꞌox Oj Tok Witꞌlet Jkꞌuꞌj Tiꞌj
1 Wetz nkyinyolin te bꞌanꞌax, te Qajaw Jesukrist tebꞌen kꞌontiꞌl nkyinnikꞌon, bꞌix te Txew Dios ntzaj tqꞌumaꞌ tuj wanim bꞌanꞌax te ntzani: 2 Wetz bꞌajqꞌij at jun nim bꞌis nnaꞌoꞌ tuj wanim. 3 Aꞌin-tal wetz aj qanbꞌenbꞌaj wajsik bꞌix pawaꞌ-tal wibꞌ tiꞌj Krist kkyꞌixel kye nxjalil bꞌix kye wijajil. 4 Komo kyetz aꞌeꞌ tijajil Israel, bꞌix te Qtata Dios otkꞌamoj te kyetz iktzaꞌ tkꞌwaꞌal-eꞌ bꞌix oqeten kxol tukyꞌi nim xhchqitzꞌunal, oxik tsiꞌ tyol kyetz tiꞌj [te galan aj otzajel tsiꞌ mas yaj], oxik tsiꞌ Tkawbꞌil, ekaj tsiꞌ kyetz tzan tqet kynaꞌoꞌ, oxik tsiꞌ tyol [tzan tkolon] te kyetz, 5 aꞌeꞌ kyetz kyijajil kye aj bꞌan tbꞌay twitzaleꞌ qijajil oqtxiꞌ, bꞌix ax tiꞌj kyijajil otzaj te Krist, te Koloyon Aj Qꞌumankaj Oqtxiꞌ bꞌix a tetz te Dios aj at tajwalil tiꞌj kyaqil. Instzaj naꞌoꞌxwit tuj kyaqil tyemp. ¡Intkyꞌikxwit ikxji!
6 Nyaꞌtx-wit te Qtata Dios kꞌontiꞌl otkꞌuluj iktzaꞌx okaj tyoliꞌ kyukyꞌi kye qijajil oqtxiꞌ. Komo nyaꞌtx kyaqil kye aj tkꞌwaꞌal qijajil Israel [nkyeqet en iktzaꞌ bꞌan bꞌanꞌax] aꞌeꞌ tijajil, 7 bꞌix nyaꞌtx kyaqil kye aj tijajil Abran [nkyeqet en iktzaꞌ bꞌan bꞌanꞌax] kꞌwaꞌalbꞌaj-eꞌ. Komo [te Qtata Dios oxik tqꞌumaꞌ tetz ikxjani]: “Tzan tpaj te akꞌwaꞌal Isak okyepuquyon awijajil.”* 8 Te ntzani telponx nijunwt tkꞌwaꞌal Qtata Dios cha tzan tpaj te kyijajil, sinoke kye aj kꞌwaꞌalbꞌaj-eꞌ bꞌan bꞌanꞌax, aꞌeꞌ kye aj nꞌok kywitꞌbꞌaꞌ kykꞌuꞌj tiꞌj te tyol aj oxik tsiꞌ, iktzaꞌx te Abran owok twitꞌbꞌaꞌ tkꞌuꞌj tiꞌj. 9 Komo ikxjani oxik tsiꞌ tyol Qtata Dios tukyꞌi Abran: “Oj tpon te qꞌij aj bꞌisuꞌ witzaꞌ, kyinꞌul, bꞌix te Sar owitzꞌjel jun tal.”*
10 Ntons, ax nyaꞌtx aꞌox nini, sinoke ax okyꞌik ikxji kyukyꞌi kye tal te Rebek, kye aj tkꞌwaꞌal qijajil Isak oqtxiꞌ. 11 Komo minaꞌ tuq kyitzꞌjik kye kꞌwaꞌl, bꞌix minaꞌ tuq tqet kykꞌuluꞌ chꞌinwt qa galan qatzun nyaꞌtxji, bꞌix tzan tkyꞌik kyaqil iktzaꞌx tgan te Qtata Dios aj nꞌel tjoyoꞌ iktzaꞌx tetz tgan, bꞌix nyaꞌtx tzan tpaj jun jkꞌulbꞌen galan sinoke tzan tpaj ikxji tetz tgan, 12 [astilji te Qtata Dios] oxik tqꞌumaꞌ te Rebek ikxjani: “Te itzikj oqtel mosiꞌ tzan te itzꞌinj.”* 13 Ntons ikxji, owel iktzaꞌx tzꞌibꞌankaj tuq [tuj Tuꞌjal Dios] aj jaꞌ nyolin ikxjani: “Owel njoyoꞌa te Jacob bꞌix te Sawu owel wikꞌoꞌ.”*
14 Ntons ¿tidiꞌ telponx ntzani? ¿Bꞌaꞌn petzun tzan txik jqꞌumaꞌ te Qtata Dios nyaꞌtx tumeꞌl nkꞌulun? ¡Nlay! 15 Komo te Qtata Dios oxik tyoliꞌ te Moisés ikxjani: “Owokel woneꞌ abꞌl aj wetz ngan tzan wonen tukyꞌiꞌl,b bꞌix owokel loꞌet nkꞌuꞌj tiꞌj abꞌl aj wetz ngan tzan tok loꞌet nkꞌuꞌj tiꞌj.”* 16 Astilji te aj nkꞌulun te Qtata Dios nyaꞌtx tzan tpaj-wit qetz qgan ikxji, bꞌix nyaꞌtx tzan tpaj-wit jun jkꞌulbꞌen, sinoke a tetz eꞌel tetz titzaꞌ nꞌok loꞌet tkꞌuꞌj qiꞌj. 17 Komo te Tuꞌjal Dios ax nyolin aj jaꞌ oxik tqꞌumaꞌ te Qtata Dios tukyꞌi Faraón ikxjani: “Wetz ochkaj nsiꞌ tzan akꞌulun mandad tzan tqet nyekꞌuꞌ wajwalil awiꞌj, bꞌix ikxji tzan txik pakbꞌaꞌ te tpakbꞌalil wiꞌj wetz tuj kyaqil twitz txꞌoꞌtxꞌ.”* 18 Ntons ikxji [nꞌel qnikyꞌ], te Qtata Dios nꞌok loꞌet tkꞌuꞌj tiꞌj abꞌl aj tetz tgan, bꞌix nkꞌulun tzan kꞌon tokslan abꞌl aj tetz tgan.c
19 Ntons qanq jun te etetz otzajel tqꞌumaꞌ ikxjani: “Qa ikxji, ntons ¿tistil te Qtata Dios nꞌel tuj twitz qa at qpaj? Komo nijunwt abꞌl bꞌaꞌn tzan tel tikꞌoꞌ te aj tgan te Qtata Dios.” 20 ¡Yatz aj cha xjal aꞌich! ¿Abꞌl yatz aꞌich tuj anabꞌl tzan ajaw kaw tukyꞌi Qtata Dios? Tiꞌtzun, obꞌantel tzan txik tqꞌumaꞌ jun ukyꞌil tukyꞌi te aj tzꞌaqol tetz: “¿Tistil ma kyinqet akꞌuluꞌ iktzaꞌ ntzani?”* 21 ¿Kꞌontiꞌl petzun tajwalil te jun tzꞌaqol tzan tkꞌulun tukyꞌi te txꞌoꞌtxꞌ jun ukyꞌil tzan token te jun galan, bꞌix junky tzan token te jun nyaꞌtx galan? 22 Komo te Qtata Dios bꞌaꞌn tzan tqꞌojin tiꞌj abꞌl aj tetz tgan bꞌix bꞌaꞌn tzan tqet tyekꞌuꞌ tajwalil tiꞌj abꞌl aj tetz tgan, bꞌix a tetz eꞌel tetz qa at nim tpasens kyiꞌj kye aj presis tzan kypon tnajsaꞌ, 23 bꞌix [a tetz eꞌel tetz qa tgan] tzan tqet tyekꞌuꞌ titzaꞌ tetz bꞌan galan nabꞌlin kyiꞌj kye aj nꞌok loꞌet tkꞌuꞌj kyiꞌj, aꞌeꞌ aj eqet tkꞌuluꞌ tzan tok kyen xhchqitzꞌunal,* 24 aj aꞌoꞌ qetz aj ukꞌlemoꞌ kxol kye aj tijajil Israel bꞌix kxol kye aj nyaꞌtx tijajil Israel. 25 Iktzaꞌx nyolin tuj [Tuꞌjal Dios] aj oqet stzꞌibꞌaꞌ Oseas [oqtxiꞌ] ikxjani: “Kye aj nyaꞌtx tuq nkꞌwaꞌaleꞌ, okyetzajel wukꞌleꞌ tzan kyok nkꞌwaꞌal, bꞌix kye aj nyaꞌtx tuq ganimeꞌ witzaꞌ, okyeqtel nganiꞌ.* 26 Bꞌix aj jaꞌ oxik qꞌumlet etetz nyaꞌtx aꞌix nxjalil, ntons axkix tzi oxeꞌl qꞌumlet etetz aꞌix tkꞌwaꞌal Qtata Dios, te Qtata Dios aj itzꞌoj.”* 27 Per kyiꞌj kye aj tijajil Israel, te Chay okaj tqꞌumaꞌ ikxjani:* “Anke kye aj tijajil Israel bꞌan kyꞌilaꞌj naqe sanik,d cha txqꞌan okyekajel, cha txqꞌan okyekoletel. 28 Komo te Qajawil otkꞌuluꞌtz te ja ntzani twitz txꞌoꞌtxꞌ, per bꞌeyx omankuyon kyaqil bꞌix nlay qnaꞌoj okyꞌel luwew.” 29 Iktzaꞌ oqet stzꞌibꞌaꞌ te Chay oqtxiꞌ ikxjani: “Qa te Qajawil kꞌontiꞌl-wit okaj tsiꞌ jun qijajil, ntons oponaj-talo qetz iktzaꞌ kye xjal aj Sodom bꞌix Gomor.”*
Qa Tijajil Israel Aꞌoꞌ Qa Nyaꞌtxji, Bꞌaꞌn Tzan Jkolet Aꞌox Tzan Tpaj Toklen Qwitꞌbꞌaꞌ Jkꞌuꞌj Tiꞌj Krist
30 Ntons ¿tidiꞌ ojqꞌumaꞌtz? Kye aj nyaꞌtx tijajil Israel aj kꞌontiꞌl tuq nkyejoyon te tumeꞌl titzaꞌ tzan tel in kchoj, kyetz owel in kchoj tzan tpaj toklen witꞌlet kykꞌuꞌj tiꞌj [Krist]. 31 Yatzun kye aj tijajil Israel aj kygan tuq tzan tel in kchoj tzan tpaj tqetlen kyokslaꞌ te Kawbꞌil, kyetz kꞌontiꞌl owel in kchoj. 32 ¿Tistil? Tzan tpaj kꞌontiꞌl owok kywitꞌbꞌaꞌ kykꞌuꞌj tiꞌj sinoke cha witꞌlik tuq kykꞌuꞌj tiꞌj te kykꞌulbꞌen. Ikxji [te Jesus iktzaꞌ] jun abꞌj bꞌix kyetz ebꞌajjaw tzꞌaqik tiꞌj. 33 Iktzaꞌx tzꞌibꞌankaj [tuj te Tuꞌjal Dios] ikxjani: “Ajnaꞌl nqet nsiꞌ tuj Sión [jun xjal iktzaꞌ] jun abꞌj bꞌix okyejawel jilan tiꞌj bꞌix otzajel kyqꞌoj tiꞌj; yatzun abꞌl aj owokslayon tiꞌj, tetz nlay tzꞌel in tkyꞌexaw.”*