8
Nyaꞌtx Kꞌasbꞌenaꞌ Qitzaꞌ Tzan Jkꞌulun Iktzaꞌ Tgan Te Qchiꞌjel
1 Astilji ajnaꞌl kꞌontiꞌl tidiꞌ bꞌaꞌn tzan txik poqon te qetz aj mojbꞌaꞌ qibꞌ tukyꞌi Kristo Jesus. 2 Komo te tumeꞌl tiꞌj te qanqꞌin [te jun-eleꞌx] aj ntzaj tsiꞌ te Txew Dios tzan tpaj te Kristo Jesus, tzan tpaj te nini oje qokolpjik tuj tqꞌabꞌ te choj bꞌix tiꞌj te kamikyj. 3 Komo te aj kꞌontiꞌl obꞌantik tzan tkꞌulun te Kawbꞌil tzan tpaj nyaꞌtx jwert atoꞌ tzan tpaj te aj nꞌel tganiꞌ te qchiꞌjel, yatzun te Qtata Dios obꞌantik titzaꞌ. Tetz otzaj tlajoꞌ te tkꞌwaꞌal iktzaꞌ jun xjal tukyꞌi xhchiꞌjel [iktzaꞌ qetz aj] at qchoj, bꞌix ikxji okyꞌik tsiꞌ te qchoj tiꞌj tetz, bꞌix ikxji aj tkamlen opon tnajsaꞌ te qchoj. 4 Ikxji tzan tbꞌantik titzaꞌ kyaqil aj tgan tuq te Kawbꞌil tzan jkꞌulun qetz, qetz aj kꞌontiꞌl nqobꞌet iktzaꞌ nꞌel tganiꞌ te qchiꞌjel sinoke iktzaꞌ tgan te Txew Dios.
5 Komo kye aj nkyebꞌet iktzaꞌ nꞌel tganiꞌ te kchiꞌjel, kyetz nkyebꞌisun mas tiꞌj te aj tgan te kchiꞌjel; yatzun kye aj nkyebꞌet iktzaꞌ tgan te Txew Dios, nkyebꞌisun mas tiꞌj te aj tgan te Txew Dios. 6 Komo qa nqet qbꞌisuꞌ tiꞌj te aj tgan te qchiꞌjel, cha nqoxik tin tuj jkamiky; yatzun qa nqet qbꞌisuꞌ tiꞌj te aj tgan te Txew Dios, nqoxik tin tzan qanqꞌin bꞌix nchewsan jkꞌuꞌj. 7 Komo oj tel qganiꞌ tuj qanim tzan jkꞌulun aj tgan te qchiꞌjel, qetz nqoꞌok iktzaꞌ tajqꞌoj Qtata Dios tzan tpaj kꞌontiꞌl nqet qokslaꞌ te Tkawbꞌil, komo nlaykix bꞌantik tzan tqet qokslaꞌ [qa nꞌel qganiꞌ ikxji]. 8 Astilji kye aj nkyeꞌanqꞌin iktzaꞌ tgan te kchiꞌjel, kyetz nlay bꞌantik tzan kyel galan tuj twitz Qtata Dios.
9 Yatzun etetz kꞌontiꞌl nkxbꞌet iktzaꞌ tgan te echiꞌjel sinoke nkxbꞌet iktzaꞌ tgan te Txew Dios, tzan tpaj tetz atqex tuj etanim. Per qa at abꞌl aj kꞌontiꞌl atqex [te Txew Dios, osey]a Txew Krist, tuj tanim, ntons tetz nyaꞌtx mojbꞌaꞌ tibꞌ tukyꞌi Krist. 10 Per tzan tpaj atqex te Krist tuj etanim, etetz anke te echiꞌjel kamnaq tzan tpaj te choj, yatzun te etanim itzꞌoj tzan tpaj te Qtata Dios ntkꞌuluꞌ kyaqil tuj tumeꞌl. 11 Bꞌix tzan tpaj atqex tuj etanim te Txew Dios aj otkꞌuluj tzan tjaw anqꞌin te Jesus kxol kye kamnaq, ntons tetz ax otkꞌuluꞌtz tzan txik tsiꞌ jun tanqꞌin te echiꞌjel tzan tpaj tetz atqex tuj etanim.
12 Astilji waq erman, qetz nyaꞌtx kꞌasbꞌenaꞌ qitzaꞌ tzan jkꞌulun iktzaꞌ tgan te qchiꞌjel. 13 Komo qa etetz nkxbꞌet iktzaꞌ tgan te echiꞌjel, okxkamel; yatzun qa okxbꞌetel iktzaꞌ tgan te Txew Dios, opoyon enajsaꞌ te nyaꞌtx galan aj tgan te echiꞌjel bꞌix etetz okxꞌanqꞌiyon. 14 Komo kye aj nkyebꞌet iktzaꞌ tgan te Txew Dios, kyetz aꞌeꞌ tkꞌwaꞌal Qtata Dios. 15 Komo te Txew Dios aj ekꞌamoj etetz, nyaꞌtx tzan ekaj tuj tqꞌabꞌ [te choj] bꞌix nyaꞌtx tzan exobꞌ, sinoke tzan etok tkꞌwaꞌal Qtata Dios bꞌix ikxji tzan txik eqꞌumaꞌ tetz ikxjani: “¡Tat!b ¡Tat!” 16 Axkix te Txew Dios nyolin tuj qanim qetz aꞌoꞌ tkꞌwaꞌal Qtata Dios. 17 Bꞌix tzan tpaj tkꞌwaꞌal aꞌoꞌ,* ntons at qoklen tzan qetzan aj okaj tqꞌumaꞌ, otzajel tsiꞌ qetz junx tukyꞌi Krist, bꞌix qa bꞌanꞌax nꞌok qen twitz xhchoꞌnal junx tukyꞌiꞌl, ax junx tukyꞌiꞌl qetz otzajel siꞌ qajwalil iktzaꞌ tetz at tajwalil. 18 Bꞌix wetz webꞌen te xhchoꞌnal aj nꞌok qen twitz ajnaꞌl, kꞌontiꞌl npon chꞌinwt iktzaꞌ te nim bꞌan galan aj owokel qen mas yaj. 19 Komo kyaqil te tkꞌulbꞌen Qtata Dios nꞌiyon nꞌel tqꞌajabꞌ tujbꞌaꞌn te Qtat otkꞌuluꞌtz tzan kyok en abꞌleꞌ kye tkꞌwaꞌal. 20 Komo kyaqil te tkꞌulbꞌen Qtata Dios ajnaꞌl kꞌontiꞌl nꞌoken iktzaꞌx ojetq tuq qet tbꞌisuꞌ, nyaꞌtx tzan tpaj axk-wit te tkꞌulbꞌen owel tganiꞌ ikxji, sinoke tzan tpaj ikxji okaj tswaꞌ te Qtata Dios tzan tkaj iktzaꞌx atqet ajnaꞌl [max oj tkolpjik]. 21 Komo ax kyaqil te tkꞌulbꞌen okolpjel tuj tqꞌabꞌ te kamikyj bꞌix ikxji tzan tok bꞌan galan kyaqil iktzaꞌ qiꞌj qetz aj tkꞌwaꞌal Qtata Dios aꞌoꞌ. 22 Qebꞌenky te aj nkyꞌik tiꞌj kyaqil te tkꞌulbꞌen Qtata Dios, naqe te xhchoꞌnal aj nkyꞌik tiꞌj jun xuj aj ntxꞌeꞌqun tzan xhchoꞌnal alaꞌmj. 23 Bꞌix te ntzani nyaꞌtx aꞌox tiꞌj te tkꞌulbꞌen Qtata Dios sinoke ax qetz nqotxꞌeꞌqun anke te Qtat oje tzaj tsiꞌ te Txew tuj qanim iktzaꞌ te tbꞌay twitz tiꞌj kyaqil aj otzajel siꞌ qetz. Nqotxꞌeꞌqun tzan tpaj te xhchoꞌnal aj nꞌok qen tzani twitz txꞌoꞌtxꞌ bꞌix loꞌik jkꞌuꞌj tzan jkꞌamet kꞌwaꞌalbꞌaj aꞌoꞌ oj stzaj tsiꞌ Qtata Dios junky qchiꞌjel akꞌaꞌj. 24 Kolomoꞌ per tzunx loꞌik jkꞌuꞌj; komo qa te aj loꞌik jkꞌuꞌj tiꞌj tzan jkꞌamon oje tzaj siꞌ te qetz, ntons nyaꞌtx presis tzan qiyon tzan tpaj ya at. Komo jun tidiꞌ aj oje jkꞌamoj, ¿tistil tzunx qoꞌiyoyon tiꞌj qa oje jkꞌamoj? 25 Per qa loꞌik jkꞌuꞌj tzan jkꞌamon te aj minaꞌ tok qen tukyꞌi qwitz, ntons a tgan tzan qiyon tukyꞌi qpasens. 26 Ax te Txew Dios nqoꞌok toneꞌ tzan qten jwert [tzan qiyon tukyꞌi qpasens]. Komo qetz kꞌontiꞌl qotzqiꞌ titzaꞌ tzan qxnaqꞌtzan tuj jun tumeꞌl galan, per te Txew nqet twitz twitz Qtata Dios qiꞌj qetz, ntxꞌeꞌqun tukyꞌi jun yol aj kꞌontiꞌl nꞌoknoj qyol tiꞌj. 27 Bꞌix te Qtata Dios tebꞌen tidiꞌ atqex tuj kyanim kyaqil xjal, ax tebꞌen tidiꞌ ntbꞌisuꞌ te Txew aj nxnaqꞌtzan qiꞌj qkyaqil qetz aj pawamoꞌ te Qtata Dios bꞌix nxnaqꞌtzan iktzaꞌ te Qtat tgan.
Kꞌontiꞌl Jun Tidiꞌ Bꞌaꞌn Tzan Qel Tpawaꞌ Tiꞌj Qtata Dios
28 Bꞌix qetz qebꞌenky qkyaqil qetz aj nqet qganiꞌ te Qtata Dios, tetz nkꞌulun tzan tok kyaqil tidiꞌchq te jun galan te qetz, qetz aj oje qotzaj tukꞌleꞌ iktzaꞌ tetz tgan. 29 Komo qebꞌenky kye aj eꞌok totzqilaꞌ te Qtata Dios atx aj minaꞌ tuq tbꞌantik kyaqil twitz txꞌoꞌtxꞌ, kyetz ekaj tsiꞌ tzan kyok iktzaꞌx te Tkꞌwaꞌal, tzan tok tetz te aj mas nim kxol kyaqil terman. 30 Bꞌix kye aj ekaj tsiꞌ ikxji, ax etzaj tukꞌleꞌ [tzan kyok iktzaꞌx te Tkꞌwaꞌal]; bꞌix kye aj etzaj tukꞌleꞌ, ax otkꞌuluj tzan tel in kchoj; bꞌix kye aj owel in kchoj, ax eqet tjiqꞌbꞌaꞌ. 31 ¿Tidiꞌ ojqꞌumaꞌtz tiꞌj kyaqil ntzani? Komo te Qtata Dios nꞌonen qukyꞌiꞌl, ntons ¿abꞌl okꞌuluyon jun nyaꞌtx galan qiꞌj? 32 Te Qtata Dios kꞌontiꞌl oqet txkꞌayiꞌ tzan stzaj tlajoꞌ te Tkꞌwaꞌal sinoke oxik tqꞌapoꞌ tzan tkamik tzan qpaj qkyaqil qetz. Ntons ¿token nlay tzaj tsiꞌ tidiꞌchq kyaqil qetz junx tukyꞌiꞌl? 33 Ntons ¿abꞌl bꞌaꞌn tzan qxik tpoqoꞌ qetz aj joyomoꞌ aꞌoꞌ tzan Qtata Dios? Komo a te Qtata Dios te aj owel in qchoj. 34 Bꞌix ¿abꞌl bꞌaꞌn tzan qxik tsiꞌ tuj il? Komo a te Krist te aj okamik [tzan qpaj] bꞌix ax ojaw anqꞌin junkyꞌel bꞌix ajnaꞌl atqet tuj tbꞌanqꞌabꞌ Qtata Dios nxnaqꞌtzan qiꞌj qetz. 35 Bꞌix ¿abꞌl bꞌaꞌn tzan qel tpawaꞌ tiꞌj te Krist tzan kꞌon jqet tganiꞌ? ¿Tzan tpaj petzun te xhchoꞌnal, qatzun tzan tpaj te bꞌis, qatzun tzan tpaj nqoꞌok qꞌojiꞌ tzan txqꞌanky xjal, qatzun tzan tpaj waꞌijji, qatzun tzan tpaj kꞌontiꞌl jqꞌanaqji, qatzun tidiꞌchq nyaꞌtx galan aj okyꞌel qiꞌjji, qatzun tzan tpaj te jkamikyji?c 36 Iktzaꞌx nyolin [tuj Tuꞌjal Dios] ikxjani: “Tzan apaj yatz nꞌok qen twitz jkamiky bꞌajqꞌij, kyeꞌen tetz aꞌoꞌ naqe karner aj nkyexik in tuj te kansbꞌil.”* 37 Per anke kyaqil ntzani bꞌaꞌn tzan tok qiꞌj, per qkyaqil qetz nqoꞌok bꞌan jwert tzan tpaj te [Krist] aj oqet ganin te qetz. 38 Astilji wetz bꞌan sewur atin kꞌontiꞌl tidiꞌ bꞌaꞌn tzan qel tpawaꞌ tiꞌj Qtata Dios tzan kꞌon-wit jqet tganiꞌ, ni te jkamiky, ni te qanqꞌin, ni kye ángel, ni kye malspirit, ni kyaqil aj at ajnaꞌlni, ni aj okyꞌel mas yaj, ni kye aj at nim kyajwalil, 39 ni te aj nim twaꞌlkal ni te aj nim txeꞌ, bꞌix ni chꞌinwt aj oqet tkꞌuluꞌ Qtata Dios bꞌaꞌn tzan qel tpawaꞌ tiꞌj titzaꞌ nqoqet tganiꞌ tetz stzajlen tlajoꞌ te Qajaw Jesukrist aj [kolol qetz].