7
Oje Qokolpjik Tuj Tqꞌabꞌ Te Choj Tzan Jkaj Tuj Tqꞌabꞌ Qtata Dios
1 Nxik nyoliꞌ etetz waq erman aj etotzqiꞌ te Kawbꞌil, ¿kꞌontiꞌl petzun etebꞌen qa jun xjal tzunx itzꞌoj, tzunx atqet tuj tqꞌabꞌ te Kawbꞌil? 2 Komo jun xuj aj at tichmil, te Kawbꞌil nyolin mojbꞌaꞌ tibꞌ tukyꞌi tichmil man itzꞌoj te tichmil, per ax nyolin qa ma kamik te tichmil yaji te xuj okolpjel tiꞌj te tichmil. 3 Yatzun qa te xuj owokel junan tukyꞌi junky ichan man itzꞌoj te tichmil, tetz jun kꞌajajiyon. Per qa te tichmil ma kamik ntons tetz oje kolpjik tiꞌj te aj ntyoliꞌ te Kawbꞌil bꞌix bꞌaꞌn tzan tok junan tukyꞌi junky ichan bꞌix nlay tzꞌok qꞌumlet jun kꞌajajiyon.
4 Ax ikxji etetz waq erman [tiꞌj te Kawbꞌil]. Etetz ax oje kxkolpjik tuj tqꞌabꞌ te Kawbꞌil tzan tpaj tkamlen te Krist tzan eten te tetz. Tetz ojaw anqꞌin kxol kye kamnaq, bꞌix astilji bꞌaꞌn tzan etaqꞌunan te jun galan te Qtata Dios. 5 Komo oqtxiꞌ tidiꞌchq nqokꞌulun tuq iktzaꞌ tgan te qchiꞌjel bꞌix kyaqil aj nyaꞌtx galan aj ntyoliꞌ te Kawbꞌil, bꞌix kyaqil nini cha nqoxik tuq tin tuj jkamiky. 6 Per ajnaꞌl oje qokolpjik tiꞌj te aj ntyoliꞌ te Kawbꞌil tzan tpaj oje qokamik tiꞌj aj nini aj tzyumoꞌ tuq titzaꞌ, bꞌix ajnaꞌl tzan tqet qokslaꞌ [te Qtata Dios] tukyꞌi jun tumeꞌl akꞌaꞌj tzan te Txew, bꞌix ya nyaꞌtx cha aꞌox iktzaꞌ aj ntyoliꞌ tuq te Kawbꞌil oqtxiꞌ.
Tzan Tpaj Aj Ntyoliꞌ Te Kawbꞌil Nꞌel Qnikyꞌ Alkyetz Te Galan Bꞌix Alkyetz Te Nyaꞌtx Galan
7 Ntons ¿tidiꞌ ojqꞌumaꞌtz? ¿Te aj ntyoliꞌ te Kawbꞌil jun choj? ¡Nyaꞌtx! Qa kꞌontiꞌl-wit tuq te Kawbꞌil, wetz kꞌontiꞌl-tal owel nnikyꞌ alkyetz te choj. Komo oj tel jqꞌajabꞌ tiꞌj jun tidiꞌ te junky, wetz kꞌontiꞌl-tal webꞌen qa choj nini qa kꞌontiꞌl-wit tuq te Kawbꞌil. Per nꞌel nnikyꞌ tiꞌj tzan tpaj te Kawbꞌil nyolin ikxjani: “Kꞌon tzꞌel aqꞌajabꞌ tiꞌj jun tidiꞌ aj te junky xjal.”*
8 Per ya ma tzꞌok nchaꞌoꞌ aj ntyoliꞌ te Kawbꞌil alkyetz te choj, yaji wetz mas owel nganiꞌ te choj, komo kꞌontiꞌl-wit te Kawbꞌil, ax kꞌontiꞌl-tal [owel nnikyꞌ tiꞌj] te choj. 9 Wetz tbꞌayaꞌ kꞌontiꞌl tuq webꞌen tidiꞌ nyolin te Kawbꞌil [tiꞌj te choj], per aj tok nchaꞌoꞌ titzaꞌ nyolin te Kawbꞌil, yaji owel nnikyꞌ tiꞌj te choj tuj wanim, bꞌix tzan tpaj nini kamnaqin tuq; 10 ikxji te Kawbꞌil aj okaj siꞌ [tzan txnaqꞌtzan wetz titzaꞌ] tzan wanqꞌin tuj tumeꞌl, cha mas inxik tin tuj nkamiky. 11 Komo ya ma tzꞌok nchaꞌoꞌ aj ntyoliꞌ te Kawbꞌil alkyetz te choj, yaji wetz mas owel nganiꞌ te choj, bꞌix ikxji inqet eqꞌiꞌ tzan nxik in tuj nkamiky. 12 Ikxji nꞌok qen te Kawbꞌil chꞌinwt nyaꞌtx galan tiꞌj,a bꞌix kyaqil aj ntyoliꞌ bꞌan galan bꞌix tumeꞌl bꞌix chꞌinwt nyaꞌtx galan tiꞌj.
13 Ntons nini aj te jun galan tuq te wetz, ¿cha owok peꞌ tzan nxik tin tuj nkamiky? ¡Nyaꞌtx! Sinoke toklen nchaꞌoꞌ tiꞌj te tumeꞌl galan, yaji te nyaꞌtx galan tuj wanim inxik tin tuj nkamiky, ikxji tzan tok wen te choj bꞌan bꞌanꞌax jun nyaꞌtx galan tuj wanim. 14 Komo qebꞌenky te Kawbꞌil tzajnaq tukyꞌi Qtata Dios [te jun galan] te qanim, per wetz cha xjal aꞌin aj pur nyaꞌtx galan nꞌel nganiꞌ iktzaꞌ qꞌapomin tuj tqꞌabꞌ te choj. 15 Komo te aj nkꞌuluꞌ kꞌontiꞌl nꞌel nnikyꞌ tistil nqet nkꞌuluꞌ, komo kꞌontiꞌl nqet nkꞌuluꞌ te aj ngan tzan tqet nkꞌuluꞌ, sinoke nqet nkꞌuluꞌ aj kꞌon ngan kꞌulun.* 16 Ntons komo kꞌon ngan te aj nqet nkꞌuluꞌ, ikxji dyakwerd atin tiꞌj te aj ntyoliꞌ te Kawbꞌil. 17 Ikxji nyaꞌtx aꞌin wetz te aj nkyinkꞌulun te nyaꞌtx galan sinoke a te choj aj atqex tuj wanim. 18 Wetz webꞌen tuj nchiꞌjel chꞌinwt tidiꞌ galan, komo wetz ngan-tal tzan nkꞌulun galan kyaqil per kꞌontiꞌl nbꞌantik witzaꞌ. 19 Komo kꞌontiꞌl nqet nkꞌuluꞌ te galan aj ngan, sinoke nqet nkꞌuluꞌ te nyaꞌtx galan aj kꞌon ngan tzan tqet nkꞌuluꞌ. 20 Ntons qa wetz nqet nkꞌuluꞌ aj kꞌon ngan kꞌulun, ntons nyaꞌtx aꞌin wetz te aj nqet kꞌulun te nyaꞌtx galan sinoke a te choj aj atqex tuj wanim.
21 Ntons nꞌok wen te aj nkyꞌik wiꞌj a te ja ntzani: wetz ngan kꞌulun te galan, per yaji kꞌontiꞌl nqet nkꞌuluꞌ sinoke nkyinkꞌulun te nyaꞌtx galan aj kꞌon ngan kꞌulun, tzan tpaj te nyaꞌtx galan aj at tuj wanim. 22 Wetz tuj wanim nkyinchalaj tiꞌj te aj tgan te Qtata Dios. 23 Per nꞌok wen te nchiꞌjel kꞌontiꞌl nꞌel tganiꞌ te aj tgan te Qtata Dios bꞌix te nchiꞌjel iktzaꞌ nqꞌojin tiꞌj te tumeꞌl aj webꞌen tuj nwiꞌ, bꞌix ikxji nkyinkaj stzyuꞌ tuj tqꞌabꞌ te choj aj nꞌel tganiꞌ te nchiꞌjel. 24 ¡Ikꞌbꞌajil nwitz! ¿Abꞌl owelal kolon te wetz tiꞌj te nchiꞌjel aj cha nkyinxik tin tuj nkamiky? 25 Pixon te Qtata Dios tzan tpaj te Jesukrist aj Qajawil [bꞌaꞌn tzan tkolpin te wetz]. Ntons, ikxji wetz tuj wanim qꞌapoꞌ wibꞌ nqet wokslaꞌ aj tgan te Qtata Dios, per tzan tpaj wetz jun xjal aꞌin, te nchiꞌjel nqet tokslaꞌ mas te choj.