6
Te Choj Ya Kꞌontiꞌl Toklen Qiꞌj
1 Ntons, ¿tidiꞌ ojqꞌumaꞌtz? ¿Qobꞌajjoyoyon peꞌ mas choj tzan tok qen mas te nim bꞌan galan aj ntzaj tsiꞌ te Qtata Dios? 2 ¡Nlay! Komo qetz ya kꞌontiꞌl tidiꞌ qoklen tiꞌj te choj, iktzaꞌ kamnaq aꞌoꞌ tiꞌj te choj, bꞌix ¿titzaꞌ oqoꞌanqꞌiyon junkyꞌel tzan qchimon choj? 3 ¿Tiꞌtzun, kꞌontiꞌl etebꞌen etetz aj qok junx tukyꞌi Jesukrist aj tjaw siꞌ aꞌ qwiꞌ, telponx ax qetz okamik tukyꞌiꞌl? 4 Komo aj tjaw siꞌ aꞌ qwiꞌ telponx ax qetz omuqet junx tukyꞌiꞌl aj tkamlen, per yaji iktzaꞌx tetz ojaw anqꞌin kxol kye kamnaq tzan tajwalila Qtata Dios, ax ikxji qetz bꞌaꞌn tzan qbꞌet tuj jun tumeꞌl akꞌaꞌj.* 5 Komo iktzaꞌx qetz oje tzꞌok qmojbꞌaꞌ qibꞌ junx tukyꞌiꞌl tzan tpaj tkamlen, ax ikxji qetz at jun qanqꞌin akꞌaꞌj tzan tpaj tjawlen anqꞌin. 6 Bꞌix qetz qebꞌenky te tumeꞌl titzaꞌ nqoꞌanqꞌin tuq oqtxiꞌ oje ponaj tzan tpaj tkamlen twitz krus, bꞌix ikxji tzan tponaj te aj tuj qchiꞌjel njoyon choj, tzan qanqꞌin kolpimoꞌ tuj tqꞌabꞌ te choj. 7 Komo jun xjal aj oje kamik, tetz kolpimaj tuj tqꞌabꞌ te choj. 8 Ntons komo qetz oje qokamik [tiꞌj te choj] tzan tpaj tkamlen Krist, astilji nxik qokslaꞌ oqoꞌanqꞌiyon junx tukyꞌiꞌl. 9 Qetz qebꞌenky te Krist ojaw anqꞌin junkyꞌel kxol kye kamnaq, astilji ya nlay kamikky junkyꞌel, komo te kamikyj ya kꞌontiꞌl toklen tiꞌj. 10 Komo aj tkamik, tetz okamik tiꞌj te choj bꞌeyx te jun-eleꞌx; per komo itzꞌoj ajnaꞌl, tetz itzꞌoj [te jun-eleꞌx] tzan tanqꞌin qꞌapoꞌ tibꞌ te Qtata Dios. 11 Ax ikxji etiꞌj etetz, ajnaꞌl peꞌenaꞌon kamnaq aꞌix tiꞌj te choj, bꞌix itzꞌojix tzan etanqꞌin te Qtata Dios tzan tpaj te Kristo Jesus.
12 Ntons tzan tpaj nini, ya kꞌonky etzoqpij tzan tkꞌulun mandad te choj tiꞌj echiꞌjel aj nponaj, ikxji tzan kꞌon tqet etokslaꞌ te nyaꞌtx galan aj tgan te echiꞌjel. 13 Bꞌix ax kꞌon kaj eqꞌapoꞌ te echiꞌjel tzan token etitzaꞌ tzan ekꞌulun te nyaꞌtx galan, sinoke intkaj eqꞌapoꞌ etibꞌ [tuj tqꞌabꞌ] te Qtata Dios iktzaꞌ xjal aj oje kxjaw anqꞌin junkyꞌel kxol kye kamnaq, bꞌix intkaj eqꞌapoꞌ kyaqil part te echiꞌjel te Qtata Dios tzan token te jun tumeꞌl bꞌan galan. 14 Komo te choj ya kꞌontiꞌl toklen etiꞌj, komo etetz ajnaꞌl ya kꞌontiꞌl atikxqet tuj tqꞌabꞌ te Kawbꞌil sinoke tuj tqꞌabꞌ te Qtata Dios aj ntzaj tsiꞌ nim bꞌan galan etajsik anke kꞌontiꞌl nꞌetajoꞌ.
A Tgan Tzan Jkꞌulun Aꞌox Te Galan Tzan Tpaj Ya Kꞌontiꞌl Atoqet Tuj Tqꞌabꞌ Te Choj
15 Ntons, ¿tidiꞌ ojqꞌumaꞌtz? ¿Oqojoyoyon peꞌ mas choj tzan tpaj te Qtata Dios bꞌan galan nabꞌlin qukyꞌiꞌl anke kꞌontiꞌl nqajoꞌ bꞌix ya kꞌontiꞌl aqoqet tuj tqꞌabꞌ te Kawbꞌil? ¡Nlay! 16 Etetz etebꞌenky oj tkaj eqꞌapoꞌ etibꞌ tuj tqꞌabꞌ junky tzan tqet etokslaꞌ, etetz mosiꞌ aꞌix tzan te aj nqet etokslaꞌ; ikxji qa mosiꞌ aꞌix tzan te choj, okxkamel, bꞌix qa mosiꞌ aꞌix tzan te tumeꞌl, owelal in te echoj. 17 Per pixon te Qtata Dios, anke etetz oqtxiꞌ atikxqet tuq tuj tqꞌabꞌ te choj, yatzun ajnaꞌl oje qet etokslaꞌ tukyꞌi jun tkꞌuꞌjlal te xnaqꞌtzbꞌilj aj oje xik xnaqꞌtzaꞌ etetz. 18 Bꞌix aj ekolpjik tuj tqꞌabꞌ te choj, okxkaj tuj tqꞌabꞌ te tumeꞌl galan.
19 Nkyinyolin ikxjani naqekix kyeyolin kye xjal, tzan tpaj nyaꞌtx jwert atix tzan tel enikyꞌ. Oqtxiꞌ etetz oxik eqꞌapoꞌ etibꞌ tuj tqꞌabꞌ te nyaꞌtx galan tzan ekꞌulun tidiꞌchq nyaꞌtx galan, yatzun ajnaꞌl intxik eqꞌapoꞌ kyaqil part te echiꞌjel tuj tqꞌabꞌ Qtata Dios bꞌix peꞌebꞌet tuj tumeꞌl tzan ekaj pawaꞌ aꞌox te Qtata Dios.* 20 Komo aj atikxqet tuq tuj tqꞌabꞌ te choj, kꞌontiꞌl tuq nbꞌantik tzan tqet ekꞌuluꞌ tumeꞌl tzan tpaj nyaꞌtx tuq kolpimix [tuj tqꞌabꞌ te choj]. 21 Bꞌix ¿tidiꞌ tuq jun galan te etetz tzan tpaj te nini tuj aj tyempji? Komo kyaqil te aj nꞌekꞌuluꞌ tuq akix te aj nkxkyꞌixwik tiꞌj ajnaꞌl, bꞌix kyaqil nini nꞌoken tuq tzan ekamik. 22 Per ajnaꞌl oje kxkolpjik tuj tqꞌabꞌ te choj, bꞌix oje xik eqꞌapoꞌ etibꞌ tuj tqꞌabꞌ te Qtata Dios; astilji nkxkꞌulun galan bꞌix pawamix aꞌox te Qtata Dios bꞌix ikxji okxꞌanqꞌiyon tukyꞌiꞌl te jun-eleꞌx. 23 Te aj njkambꞌaꞌ tzan tpaj te qchoj, aꞌox jun jkamiky; yatzun te aj njkambꞌaꞌ tukyꞌi Qtata Dios, jun qanqꞌin te jun-eleꞌx [tzan tpaj] mojbꞌaꞌ qibꞌ tukyꞌi Qajaw Kristo Jesus.