5
Galan Atoꞌ Tukyꞌi Qtata Dios Tzan Tpaj Tkamlen Jesukrist
1 Ntons komo maꞌtx tzꞌel in qchoj tzan tpaj toklen witꞌlet jkꞌuꞌj tiꞌj [Jesukrist], astilji galan atoꞌ tukyꞌi te Qtat tzan tpaj te Qajaw Jesukrist. 2 Komo tzan tpaj toklen witꞌlet jkꞌuꞌj tiꞌj, astilji at qoklen tiꞌj te galan aj ntzaj tsiꞌ anke kꞌontiꞌl nqajoꞌ, bꞌix ikxji jwert atoꞌ tiꞌj nini bꞌix bꞌan nqochalaj tzan tpaj loꞌik jkꞌuꞌj [tzan tok qen] xhchqitzꞌunal te Qtata Dios.* 3 Bꞌix ax nqochalaj oj tok qen twitz xhchoꞌnal, komo qebꞌenky oj tok qen twitz xhchoꞌnal nꞌok mas nim qpasens, 4 bꞌix tzan tpaj te qpasens, yaji bꞌaꞌn tzan qipan tidiꞌchq, bꞌix tzan tpaj bꞌaꞌn tzan qipan tidiꞌchq yaji nkaj loꞌet jkꞌuꞌj mas byenech tiꞌj Qtata Dios, 5 bꞌix oj tkaj loꞌet jkꞌuꞌj tiꞌj, kꞌontiꞌl nqoqet kyꞌixwik, komo te Qtata Dios oje tzaj tsiꞌ te Txew tuj qanim tzan tok qen nqoqet tganiꞌ. 6 Qetz kꞌontiꞌl nbꞌantik tuq tzan jkolonx tuq qibꞌ, per yatzun te Jesukrist, mer tuj aj or aj bꞌan presis tuq, tetz owul bꞌix okamik tzan qpaj qetz aj chimol choj aꞌoꞌ. 7 Nijunwt abꞌl tgan tzan tkamik tkyꞌixel junky aj galan xjal, aꞌox qa te aj junkyni jun bꞌan galan xjal, ikxji qanq at abꞌl dispwest tzan tkamik te tkyꞌixel. 8 Yatzun te Qtata Dios oje qet tyekꞌuꞌ titzaꞌ bꞌan nqoqet tganiꞌ, komo otzaj tlajoꞌ te Jesukrist tzan tkamik tzan qpaj, anke qetz tzunx tuq aꞌoꞌ chimol choj. 9 Komo ajnaꞌl oje tzꞌel in qchoj tzan tpaj tkamlen Jesukrist aj tel xhchikyꞌel, tzan tpaj tetz ajnaꞌl bꞌan bꞌanꞌax oqokoletel tiꞌj te xhchoꞌnal aj otzajel tsiꞌ te Qtata Dios chaꞌoj tul te jwisy. 10 Komo qetz tbꞌay, aꞌoꞌ tuq tajqꞌoj Qtata Dios, bꞌix yaji okaj galan tukyꞌiꞌl tzan tpaj tkamlen te Tkꞌwaꞌal, ntons ajnaꞌl tzan tpaj ojaw anqꞌin junkyꞌel ax oqokoletelkix titzaꞌ. 11 Astilji ajnaꞌl nqochalaj tukyꞌi Qtata Dios tzan tpaj te Qajaw Jesukrist, komo tzan tpaj tetz galan atoꞌ tukyꞌi te Qtat.
12 Ntons iktzaꞌx te choj owok tzani twitz txꞌoꞌtxꞌ cha tzan jun xjal, bꞌix yaji tzan tpaj te choj owok te kamikyj, bꞌix ikxji te kamikyj owok kyiꞌj kyaqil xjal tzan tpaj kyaqil ebꞌajjoyon choj.* 13 Aj minaꞌ tuq tkaj siꞌ te Kawbꞌil, te choj ojetq tuq tzꞌok tzani twitz txꞌoꞌtxꞌ; per komo kꞌontiꞌl tuq te Kawbꞌil, astilji kꞌontiꞌl tuq jun tidiꞌ aj nyolin tidiꞌ tuq te qchoj. 14 Per anke ikxji tuq, te kamikyj atqet tuq kyajsik kyaqil xjal, atx aj atqet tuq te Adan max aj tul te Moisés [tzan txik tsiꞌ te Kawbꞌil kyetz], bꞌix ax kyajsik kyaqil kye aj kꞌontiꞌl ejoyon choj parej iktzaꞌ te Adan, bꞌix te Adan at tuq tidiꞌ telponx tiꞌj te [Krist] aj tzul tuq mas yaj. 15 Per te aj nim bꞌan galan aj ntzaj tsiꞌ te Qtata Dios aj kꞌontiꞌl nqajoꞌ kꞌontiꞌl owel iktzaꞌ te aj nyaꞌtx galan [aj otkꞌuluj te Adan]. Komo tzan tpaj xhchoj tetz, kyaqil kamnaqeꞌ. Per yatzun tzan tpaj te Qtata Dios bꞌan galan nabꞌlin qukyꞌiꞌl bꞌix tzan tpaj te nim bꞌan galan aj otzaj tsiꞌ cha jkotz tzan tpaj te Jesukrist aj cha jun tuq, te nini owel te jun bꞌan galan kye kyꞌilaꞌj xjal. 16 Bꞌix te aj bꞌan galan aj otzaj tsiꞌ cha jkotz, kꞌontiꞌl owel iktzaꞌ xhchoj te xjal. Komo aꞌox tzan tpaj te jun choj aj otkꞌuluj aj xjalji, kyaqil at kypaj, yatzun tzan tpaj te jun nim bꞌan galan aj otzaj siꞌ cha jkotz, ajnaꞌl qkyaqil bꞌaꞌn tzan tel in te qchoj. 17 Komo tzan tpaj te jun aj ojoyon choj oqtxiꞌ, kyaqil xjal ebꞌajkaj tuj tqꞌabꞌ te kamikyj; per yaji tzan tpaj te Jesukrist, otzajel siꞌ jun qanqꞌin bꞌan galan qkyaqil qetz aj njkꞌamoꞌ te aj nim bꞌan galan aj kꞌontiꞌl nqajoꞌ bꞌix otzajel siꞌ cha jkotz tzan jkaj galan tuj twitz te Qtata Dios. 18 Ntons iktzaꞌx tzan tpaj xhchoj te jun xjal owel tzan kxik chimlik kyaqil tzan kxik siꞌ tuj il, ntons yatzun ajnaꞌl te galan aj tkꞌulbꞌen te junky owel tzan tel in qchoj qkyaqil qetz tzan qanqꞌin [tukyꞌiꞌl te jun-eleꞌx]. 19 Komo tzan tpaj kꞌontiꞌl oqet tokslaꞌ te jun oqtxiꞌ, kyaqil xjal chimol choj-eꞌ, yatzun ajnaꞌl tzan tpaj tokslbꞌen [te Jesukrist], kyꞌilaꞌj saq-eꞌ tuj twitz Qtata Dios. 20 Te Kawbꞌil okaj siꞌ tzan [tel qnikyꞌ] bꞌan nim te nyaꞌtx galan aj nqokꞌulun, per aj [tel qnikyꞌ] bꞌan nim te nyaꞌtx galan, mas owok en bꞌan galan nabꞌlin te Qtata Dios qukyꞌiꞌl [tzan tqet tnajsaꞌ te qchoj]; 21 ikxji iktzaꞌx te choj okaj kyiꞌj kyaqil xjal tzan kykamik, ax ikxji ajnaꞌl te aj nim bꞌan galan aj ntzaj tsiꞌ te Qtata Dios maꞌtx kaj qiꞌj tzan tpaj te tumeꞌl [aj nꞌel tin qchoj] tzan qanqꞌin te jun-eleꞌx tzan tpaj Jesukrist aj Qajawil.