4
Te Abran Owel Galan Tuj Twitz Qtata Dios Tzan Tpaj Tokslbꞌen
1 Ntons te Abran aj qijajil oqtxiꞌ, ¿tidiꞌ otkambꞌaj tetz tiꞌj kyaqil ntzani? 2 Qa te Abran tzan tpaj-wit te tkꞌulbꞌen owel in xhchoj, qanq bꞌaꞌn-tal tzan tqet tjiqꞌbꞌaꞌ tibꞌ kywitz kye xjal, per nyaꞌtx tuj twitz Qtata Dios. 3 Te Tuꞌjal Dios nyolin ikxjani: “Te Abran oxik tokslaꞌ [tyol] Qtata Dios, bꞌix tzan tpaj tokslbꞌen, owel tuj twitz [te Qtat] ya kꞌontiꞌl xhchoj.”* 4 [Tuj kywitz kye xjal], qa jun xjal nkꞌulun taqꞌun junky, te aj twiꞌ tkꞌuꞌj ntkꞌamoꞌ nyaꞌtx naqe jun oyej sinoke te chojbꞌil te tetz. 5 Yatzun jun xjal chimol choj aj kꞌontiꞌl witꞌlik tkꞌuꞌj tiꞌj tkꞌulbꞌen tzan tel in xhchoj sinoke nꞌokslan tiꞌj te Qtata Dios tzan tel in xhchoj, ntons tetz nꞌel tuj twitz te Qtat kꞌontiꞌl xhchoj tzan tpaj tokslbꞌen tiꞌj. 6 Komo ikxji te Dawid [aj twitzaleꞌ kꞌulul mandad oqtxiꞌ] otqꞌumaj galan at te xjal aj oje tzꞌel tuj twitz [te Qtat] ya kꞌontiꞌl xhchoj per nyaꞌtx tzan tpaj jun tkꞌulbꞌen. [Otqꞌumaj ikxjani:] 7 “Galanx-alo kye aj oje qet najsaꞌ te kykꞌulbꞌen nyaꞌtx galan, bꞌix aj nlay tzaj naꞌoꞌ kchoj tzan te Qtata Dios. 8 Galanx-alo te xjal aj cha nkyꞌix-oq te xhchoj tzan te Qtata Dios.”*
9 ¿Te ja galan ntzani aꞌox peꞌ kye aj atok kyechalul qatzun ax kye aj kꞌontiꞌlji? Maꞌtx tzꞌok qchaꞌoꞌ te Abran owel tuj twitz [te Qtat] ya kꞌontiꞌl xhchoj tzan tpaj toklen witꞌlet tkꞌuꞌj tiꞌj. 10 ¿Titzaꞌ tuq atqet te Abran aj tel galan tuj twitz Qtata Dios? ¿Ojetq tuq tzꞌok siꞌ techalul tiꞌj qatzun minaꞌ tuqji? Owel galan tuj twitz Qtata Dios aj minaꞌ tuq tok siꞌlet techalul, nyaꞌtx aj ojetq tuq.* 11 Te techalul* telponx tuq, tetz owel tuj twitz te Qtat ya kꞌontiꞌl xhchoj tzan tpaj ojetq tzꞌok witꞌlet tkꞌuꞌj tiꞌj, per aj minaꞌ tuq tok siꞌlet techalul. Ikxji tetz owok naqe kꞌwaꞌlon kyiꞌj kye aj nyaꞌtx tijajil Israel aj kꞌontiꞌl atok kyechalul bꞌix nkyeꞌokslan, ikxji tzan kyel tuj twitz [te Qtat] ya kꞌontiꞌl kchoj. 12 Bꞌix te Abran ax owok naqe kꞌwaꞌlon kyiꞌj kye aj tijajil Israel aj atok kyechalul per nꞌok kywitꞌbꞌaꞌ kykꞌuꞌj tiꞌj te Qtata Dios iktzaꞌx te qijajil Abran owok twitꞌbꞌaꞌ tkꞌuꞌj tiꞌj aj minaꞌ tuq tok techalul.
13 Te Qtata Dios oxik tsiꞌ tyol te Abran bꞌix kye kyaqil tijajil, tzan kykꞌamon te twitz txꞌoꞌtxꞌ te jun kykotz, per nyaꞌtx tzan tpaj-wit [kykꞌulbꞌen aj ntyoliꞌ] te Kawbꞌil, sinoke tzan tpaj nꞌel in kchoj toklen witꞌlet kykꞌuꞌj tiꞌj tetz.* 14 Qa cha aꞌoxwit kye aj nkyeꞌokslan te Kawbꞌil kye aj okyekꞌamoyon te jun kykotz, ntons chagan-talo tzan tok witꞌlet jkꞌuꞌj tiꞌj Qtata Dios bꞌix ax kꞌontiꞌl-tal tajbꞌen kyaqil te aj oje xik tsiꞌ tyol tiꞌj.* 15 Komo tzan tpaj [kꞌontiꞌl nqet qokslaꞌ] te Kawbꞌil, astilji ntzaj tqꞌoj te Qtata Dios [qiꞌj qetz aj qebꞌen tidiꞌ ntyoliꞌ te Kawbꞌil], per qa kꞌontiꞌl-wit te Kawbꞌil ax kꞌontiꞌl-tal tidiꞌ qiꞌj jaꞌ nqopaltin. 16 Astilji aꞌox tzan tpaj toklen witꞌlet jkꞌuꞌj [tiꞌj Qtata Dios nqoꞌel galan tuj twitz], ikxji tzan tok iktzaꞌxkix tetz bꞌan galan nabꞌlin qukyꞌiꞌl anke kꞌontiꞌl nqajoꞌ; ikxji tzan jkꞌamon qkyaqil qetz te aj okaj tsiꞌ Qtata Dios tyol tiꞌj, nyaꞌtx aꞌox kye aj [kygan] te Kawbꞌil sinoke ax kye aj witꞌlik kykꞌuꞌj tiꞌj te Qtat, iktzaꞌx te Abran aj naqe kꞌwaꞌlon qiꞌj qkyaqil qetz [toklen witꞌlet jkꞌuꞌj iktzaꞌ tetz].* 17 Iktzaꞌx nyolin tuj te Tuꞌjal Dios oqtxiꞌ ikxjani: “Oje chkaj nsiꞌ kꞌwaꞌlon kyiꞌj kyꞌilaꞌj amaqꞌ.”* Te Qtata Dios aj okaj tyoliꞌ ntzani, a tetz te aj oxik okslaꞌ tzan te Abran, bꞌix tetz nkyejaw anqꞌin kye kamnaq titzaꞌ, bꞌix bꞌaꞌn tzan txik tqꞌumaꞌ tzan tok jun tidiꞌ aj kꞌontiꞌl at.* 18 Te Abran otokslaj bꞌix loꞌik tuq tkꞌuꞌj, anke kꞌontiꞌl tuq tidiꞌ qiꞌj bꞌaꞌn tzan tkaj loꞌet tkꞌuꞌj tiꞌjx, per okaj loꞌet tkꞌuꞌj tzan tok kꞌwaꞌlon kye kyꞌilaꞌj amaqꞌ tzan tpaj ojetq xik tqꞌumaꞌ te Qtata Dios tukyꞌiꞌl ikxjani: “Okyeꞌokel [bꞌan kyꞌilaꞌj] awijajil.”* 19 Bꞌix tetz kꞌontiꞌl onaꞌnon tanim tzan tok witꞌlet tkꞌuꞌj [tiꞌj te aj otzaj tqꞌumaꞌ Qtata Dios] konserke tebꞌenky tuq tetz xhchiꞌjel bꞌan tijky, komo ojetq tuq jakon oqal (100) aqꞌbꞌi tetz, bꞌix te Sar ya nlay bꞌantikky tuq tzan talan.* 20 Tetz kꞌontiꞌl onaꞌnon tanim tiꞌj te aj ojetq tuq tzaj tqꞌumaꞌ Qtata Dios tetz, sinoke onimsan tkꞌuꞌj tzan tok twitꞌbꞌaꞌ tkꞌuꞌj tiꞌj Qtat bꞌix oqet tjiqꞌbꞌaꞌ te Qtat. 21 Bꞌan ntokslaꞌ tuq at nim tajwalil te Qtata Dios tzan tkꞌulun iktzaꞌx ojetq tzaj tqꞌumaꞌ. 22 Astilji owel tuj twitz [te Qtat] ya kꞌontiꞌl xhchoj. 23 Aj ntzani te aj oqet tzꞌibꞌaꞌ tiꞌj: “Owel galan tuj twitz Qtata Dios.” Ntons, te ja ntzani nyaꞌtx telponx te jun galan aꞌox tiꞌj tetz 24 sinoke ax te jun galan te qetz ajnaꞌl. Ax qetz oqoꞌelal galan tuj twitz Qtata Dios, qetz aj nqoꞌokslan tiꞌj te aj ojaw anqꞌin kxol kye kamnaq, te Qajaw Jesus. 25 Tetz oxik qꞌapoꞌ tzan tpaj kyaqil aj jkꞌulbꞌen nyaꞌtx galan, bꞌix yaji ojaw anqꞌin tzan qten galan tukyꞌi Qtata Dios.