3
Nijunwt Xjal Nkꞌulun Tumeꞌl Tuj Twitz Qtata Dios
1 Ntons ¿tidiꞌ jun tbꞌanil kye aj tijajil Israel kywitz kye aj nyaꞌtx tijajil Israel? ¿Tidiꞌ token te kyechalul kye aj tijajil Israel? 2 At nim tbꞌanil bꞌix nim token. Tbꞌay* tzan tpaj aꞌeꞌ kyetz kye tbꞌay aj jaꞌ oxik tsiꞌ te Qtata Dios te tpakbꞌalil oqtxiꞌ. 3 Ntons ¿tidiꞌ ojqꞌumaꞌtz tzan tpaj junjun kꞌontiꞌl oxik kyokslaꞌ? ¿Tzan tpaj kꞌontiꞌl eꞌokslan, ajnaꞌl nlay petzun tkꞌuluj te Qtata Dios iktzaꞌ okaj tqꞌumaꞌ? 4 ¡Nyaꞌtx! Anke kyaqil xjal laꞌj-eꞌ, per te Qtata Dios jun yolin. Komo nyolin tuj te Tuꞌjal oqtxiꞌ ikxjani: “Owokel eꞌelet bꞌanꞌax yatz at akawbꞌil tuj aqꞌabꞌ tzan tpaj aj nꞌaqꞌumaꞌ, bꞌix kye aj okyepoqoyon te yatz nlay bꞌantik tzan aqet kyitzaꞌ.”* 5 Ntons, per qa tzan tpaj te jkꞌulbꞌen nyaꞌtx galan nꞌok qen mas titzaꞌ te Qtata Dios at tkawbꞌil tuj tqꞌabꞌ, ntons ¿tidiꞌ ojqꞌumaꞌtz? ¿Kꞌontiꞌl petzun tkawbꞌil tuj tqꞌabꞌ te Qtata Dios oj txik tsiꞌ xhchoꞌnal kyiꞌj kye aj nkyekꞌulun nyaꞌtx galan? (Ja ntzani iktzaꞌx nkyqꞌumaꞌ kye xjal.) 6 ¡Nyaꞌtx ikxji! Qa te Qtata Dios kꞌontiꞌl-wit tkawbꞌil tuj tqꞌabꞌ, ¿titzaꞌ-tal obꞌantel tzan txik tqꞌumaꞌ qa nyaꞌtx galan aj njkꞌuluꞌ? 7 Qanq junjun oxeꞌl kyqꞌumaꞌ ikxjani: “Qa tzan tpaj qetz qxmeletzꞌul nꞌok en mas bꞌan galan nabꞌlin te Qtata Dios, ¿tistil qetz oqoxeꞌl poqoꞌ iktzaꞌ jun chimol choj?” 8 ¿Ntons tistil nyaꞌtx mejor tzan jkꞌulun te nyaꞌtx galan tzan tok en mas titzaꞌ te Qtata Dios bꞌan galan nabꞌlin? Ateꞌ junjun nqoqet kyyoliꞌ qa qetz nxik qyoliꞌ ikxji. ¡Tzan tpaj nkyeyolin ikxji, nkyajoꞌ tzan kxik siꞌ tuj il!
9 ¿Tidiꞌ ojqꞌumaꞌtz? ¿Tiꞌtzun, mas tbꞌanil aꞌoꞌ qetz kywitz kye aj nyaꞌtx tijajil Israel? ¡Nyaꞌtx! Komo maꞌtx tzꞌok qchan, tijajil Israel qatzun nyaꞌtxji, kyaqil xjal akyeqet tuj tqꞌabꞌ te choj. 10 Iktzaꞌx tzꞌibꞌankaj tuj Tuꞌjal Dios oqtxiꞌ ikxjani: “Kꞌontiꞌl ateꞌ nijunwt xjal aj kꞌontiꞌl xhchoj, ni tansiker chꞌi jun-wit. 11 Nijunwt nꞌox tuj twiꞌ, kꞌontiꞌl abꞌl njoyon te Qtata Dios. 12 Kyaqil oje tzꞌel kypawaꞌ kyibꞌ tiꞌj Qtata Dios, kyaqil kꞌontiꞌl kyoken, kꞌontiꞌl ni jun-wit aj nkꞌulun galan [tuj twitz Qtata Dios], tansiker chꞌi jun-wit, chꞌinwt.* 13 Te ktziꞌ iktzaꞌ jun tjay anim cha peqꞌlik, kyetz kyaqꞌ nꞌoken tzan tqet kyeqꞌiꞌ xjal, te ktziꞌ nꞌoken iktzaꞌ stziꞌ jun kan aj nkansan xjal,* 14 bꞌix kyaqil aj nꞌetz tuj ktziꞌ cha kyqanbꞌenqet bꞌix cha xtxꞌuꞌjetqet kywiꞌ.* 15 Tzan chꞌimuꞌs, nqet naj kyokꞌonsaꞌ junky, 16 jaꞌ nkyekyꞌik npon kynajsaꞌ kyaqil bꞌix kye xjal nkyekaj ksiꞌ tuj yaj, 17 kꞌontiꞌl owok kyotzqilaꞌ te tumeꞌl titzaꞌ tzan qten galan kyukyꞌi xjal,* 18 kꞌontiꞌl Dios tuj kywitz.”*
19 Qebꞌenky kyaqil aj nyolin tuj te Tkawbꞌil Qtata Dios, nyolin kye aj akyeqet tuj tqꞌabꞌ te Kawbꞌil. Ikxji oj txik tqꞌumaꞌ te Qtata Dios kyil, nlay bꞌantik tzan kyyolin chꞌinwt tzan kykolet bꞌix kye kyaqil xjal twitz txꞌoꞌtxꞌ oxeꞌl tsiꞌ te aj okyajoꞌtz. 20 Komo nijunwt xjal owelal in xhchoj tuj twitz Qtata Dios tzan tpaj jun tkꞌulbꞌen iktzaꞌ aj ntyoliꞌ te Kawbꞌil, komo te Kawbꞌil cha aꞌox nꞌoken tzan tel qnikyꞌ alkyetz te qchoj.*
Aꞌox Tzan Tpaj Toklen Witꞌlet Jkꞌuꞌj Tiꞌj Qtata Dios Bꞌaꞌn Tzan Qel Galan Tuj Twitz
21 Yatzun ajnaꞌl, tuj junky tumeꞌl akꞌaꞌj te Qtata Dios oje tzaj tyekꞌuꞌ titzaꞌ nꞌel tin te qchoj, per nyaꞌtx tzan tpaj te Kawbꞌil, sinoke te Kawbꞌil oqtxiꞌ oyolin tiꞌj te ntzani bꞌix ax kye yolil tyol oqtxiꞌ okyyolij tiꞌj. 22 Te Qtata Dios ntkꞌuluꞌ tzan tel tin te qchoj cha aꞌox tzan tpaj toklen qwitꞌbꞌaꞌ jkꞌuꞌj tiꞌj Jesukrist.* Te ja ntzani kye kyaqil kye aj nkyeꞌokslan tzan tpaj kyaqil xjal parejeꞌ tuj twitz Qtata Dios,* 23 komo kyaqil xjal ejoyon choj tuj twitz, astilji nijunwt npon iktzaꞌ te Qtata Dios tzan tpaj tetz nim xhchqitzꞌunal bꞌix kꞌontiꞌl xhchoj. 24 Qetz nꞌel in qchoj bꞌix nyaꞌtx presis tzan qchojon tzan tel in sinoke tzan tpaj tetz bꞌan galan nabꞌlin qukyꞌiꞌl tzan tpaj te Kristo Jesus okolpin te qetz. 25 Te Qtata Dios okaj tsiꞌ te Jesukrist iktzaꞌ te jun present te chojbꞌil te qchoj te qkyaqil qetz aj nꞌok qwitꞌbꞌaꞌ jkꞌuꞌj tiꞌj tkamlen aj telen xhchikyꞌel [twitz krus]; ikxji nqet tyekꞌuꞌ te Qtat at tkawbꞌil tuj tqꞌabꞌ anke [tbꞌay] cha okyꞌix-oq te qchoj titzaꞌ* 26 tzan tpaj nim tpasens, per yatzun ajnaꞌl nqet tyekꞌuꞌ at tkawbꞌil tuj tqꞌabꞌ bꞌix a tetz te aj nꞌel in qchoj toklen qwitꞌbꞌaꞌ jkꞌuꞌj tiꞌj Jesus.
27 Ntons qa ikxji ¿titzaꞌ bꞌaꞌn tzan tqet qjiqꞌbꞌaꞌ qibꞌ? ¡Nlay bꞌantik! ¿Tistil nlay bꞌantik? Tzan tpaj jun jkꞌulbꞌen kꞌontiꞌl token tzan tel in qchoj; sinoke te aj nꞌoken cha aꞌox oj tok witꞌlet jkꞌuꞌj [tiꞌj Jesukrist]. 28 Komo nꞌel qnikyꞌ te qchoj nꞌel in oj tok qwitꞌbꞌaꞌ jkꞌuꞌj tiꞌj tetz bꞌix nyaꞌtx tzan tpaj jun jkꞌulbꞌen galan iktzaꞌ tgan te Kawbꞌil. 29 Ntons ¿te Qtata Dios aꞌox Dios petzun qiꞌj qetz aj tijajil Israel? ¿Nyaꞌtx petzun ax Dios kyiꞌj kye aj nyaꞌtx tijajil Israel? ¡Ax! Te Qtata Dios tetz ax Dios kyiꞌj kye aj nyaꞌtx tijajil Israel. 30 Komo cha jun te Qtata Dios at, bꞌix a tetz nꞌel in te kchoj kyaqil xjal cha aꞌox tzan tpaj toklen kywitꞌbꞌaꞌ kykꞌuꞌj tiꞌj, tijajil Israel-eꞌ qatzun nyaꞌtxji.a 31 Ntons ¿kꞌontiꞌl petzun token te Kawbꞌil tzan tpaj ajnaꞌl cha aꞌox a tgan tzan tok qwitꞌbꞌaꞌ jkꞌuꞌj tiꞌj Jesukrist? At token, bꞌix nqet qyekꞌuꞌ dyakwerd atoꞌ tukyꞌi te aj ntyoliꞌ te Kawbꞌil.