2
Te Qtata Dios At Tkawbꞌil Tuj Tqꞌabꞌ, Astilji Tuj Twitz Tetz Kꞌontiꞌl Jun Mas Tbꞌanil Twitz Junky
1 Astilji nlay bꞌantik tzan txik aqꞌumaꞌ chꞌinwt tzan akolet yatz nkesey abꞌl aꞌich tzi, yatz aj nchpoqon kye txqꞌanky. Yatz aj nchyolin ikxji, awibꞌx nxik apoqoꞌ tzan tpaj ax yatz nꞌakꞌuluꞌ ikxji.* 2 Qebꞌenky te Qtata Dios tukyꞌi tkawbꞌil tuj tqꞌabꞌ nkyexik tpoqoꞌ kye aj nkyekꞌulun kyaqil aj nyaꞌtx galanni. 3 Yatz aj nchpoqon kye txqꞌanky bꞌix ax nꞌakꞌuluꞌ ikxji, ¿tiꞌtzun yatz tuj anabꞌl ochkoletel tuj tqꞌabꞌ Qtata Dios oj tul te jwisy? 4 ¿Nꞌel awikꞌoꞌ peꞌ titzaꞌ te Qtata Dios galan nabꞌlin awukyꞌiꞌl bꞌix nim tpasens bꞌix kꞌontiꞌl nxik tsiꞌ xhchoꞌnal awiꞌj luwew? ¿Nꞌel anikyꞌ peꞌ te tumeꞌl bꞌan galan titzaꞌ nabꞌlin te Qtata Dios aj nkꞌulun tzan tjaw akyꞌixpuꞌ anabꞌlin bꞌix nyaꞌtx tzan tqet ayajlaꞌ titzaꞌ tetz nabꞌlin? 5 Per tzan tpaj bꞌan tzꞌak aꞌich bꞌix tuj awanim kꞌon agan tzan tjaw akyꞌixpuꞌ anabꞌlin, bꞌajqꞌij mas njaw achꞌuqiꞌ tqꞌoj Qtata Dios awajsik, bꞌix otzajel awajsik tuj te jwisy oj tok en te tqꞌoj Qtata Dios kyiꞌj kye aj nyaꞌtx galan bꞌix oj kykꞌamon kyaqil xjal iktzaꞌx te kykꞌulbꞌen. 6 Tetz otzajel tsiꞌ te junjun iktzaꞌx maꞌtx kykꞌuluj.* 7 Kye aj kꞌontiꞌl nkaj ksiꞌ tzan kykꞌulun galan tzan tpaj kygan tzan kyten tuj kaꞌj tukyꞌi Qtata Dios bꞌix tzan kyqet jiqꞌbꞌaꞌ bꞌix tzan kyanqꞌin tukyꞌiꞌl te jun-eleꞌx, ntons te Qtat oxeꞌl tsiꞌ jun kyanqꞌin te jun-eleꞌx. 8 Yatzun kye aj nqet kyjiqꞌbꞌaꞌ kyibꞌ bꞌix kꞌontiꞌl nqet kyokslaꞌ te bꞌanꞌax, sinoke cha nqet kyokslaꞌ te aj nyaꞌtx galan, ntons te Qtata Dios otzajel tqꞌoj bꞌan jwert kyiꞌj. 9 Ntons kyaqil xjal aj cha kykꞌulunqet nyaꞌtx galan, otzajel siꞌ nim xhchoꞌnal kyajsik bꞌix jun bꞌis; tbꞌay kyiꞌj kye aj tijajil Israel bꞌix yaji kyiꞌj kye aj nyaꞌtx tijajil Israel. 10 Yatzun kye aj nkyekꞌulun galan, okyepoyon tuj kaꞌj tukyꞌi te Qtata Dios bꞌix okyeqtel jiqꞌbꞌaꞌ bꞌix oqtel xhchewsaꞌ kykꞌuꞌj; tbꞌay kye aj tijajil Israel bꞌix yaji kye aj nyaꞌtx tijajil Israel. 11 Komo tuj twitz te Qtata Dios kꞌontiꞌl jun mas tbꞌanil twitz junky.* 12 Komo kyaqil kye [aj nyaꞌtx tijajil Israel] aj nkyejoyon choj bꞌix kꞌontiꞌl kyebꞌen te Tkawbꞌil Qtata Dios, kyetz ax okyekamel, per nyaꞌtx tzan tpaj te Kawbꞌil. Per kyaqil kye [aj tijajil Israel] aj nkyejoyon choj bꞌix kyebꞌen te Kawbꞌil, kyetz okyexeꞌl poqoꞌ tzan te Kawbꞌil. 13 Komo kye aj galan tuj twitz Qtata Dios nyaꞌtx aꞌeꞌ aj cha nꞌok kchaꞌoꞌ tukyꞌi kxkyin te Tkawbꞌil sinoke kye aj nkyekꞌulun iktzaꞌ tgan te Kawbꞌil, aꞌeꞌ kyetz kye aj owelal in kchoj. 14 Komo kye aj nyaꞌtx tijajil Israel, anke kꞌontiꞌl te Tkawbꞌil Qtata Dios kyukyꞌiꞌl, chaꞌoj kykꞌulun galan iktzaꞌ nyolin tuj te Kawbꞌil, ikxji aꞌeꞌxk kyetz nkynaꞌoꞌ tuj kyanim alkyetz te galan iktzaꞌ tgan te Kawbꞌil. 15 Ikxji tukyꞌi kykꞌulbꞌen nqet kyyekꞌuꞌ te aj tgan te Kawbꞌil aj oje kaj siꞌ tuj kyanim, bꞌix ikxji te aj oje kaj siꞌ tuj kyanim atqet nyolin nyaꞌtx galan kyiꞌj bꞌix atqet nyolin galan kyiꞌj. 16 Bꞌix tuj te jwisy, kyaqil te aj kꞌontiꞌl nxik qen aj nkykꞌuluꞌ kye xjal, te Qtata Dios oxeꞌl tqꞌumaꞌ galan qa nyaꞌtxji tzan tpaj te Jesukrist aj qꞌumal kyil kye xjal. Te ja ntzani ntumelaꞌ tukyꞌi te tpakbꞌalil aj nxik npakbꞌaꞌ.
Te Aj Bꞌan Bꞌanꞌax Tijajil Israel Jun Aj Nꞌokslan Tuj Tanim
17 Ntons qa yatz aꞌich aj tijajil Israel, bꞌix qa yatz witꞌlik akꞌuꞌj tiꞌj te Tkawbꞌil Qtata Dios, bꞌix qa nqet ajiqꞌbꞌaꞌ awibꞌ tzan tpaj te Qtata Dios okꞌulun jun galan awiꞌj oqtxiꞌ, 18 bꞌix qa awebꞌen tidiꞌ tetz tgan bꞌix qa oje tzꞌel anikyꞌ tiꞌj te Tkawbꞌil tzan tel ajoyoꞌ alkyetz te mas tbꞌanil, 19 bꞌix qa yatz tuj anabꞌl bꞌaꞌn tzan txik aqꞌumaꞌ tumeꞌl kybꞌey kye aj minaꞌ tel kynikyꞌ tzan tpaj qlolj tuj kywitz, 20 bꞌix qa nxik axnaqꞌtzaꞌ tiꞌj te Qtata Dios kye aj minaꞌ tox tuj kywiꞌ, bꞌix qa bꞌaꞌn tzan txik axnaqꞌtzaꞌ kye aj man tal, bꞌix komo at te Tkawbꞌil Qtata Dios awukyꞌiꞌl aj pur tumeꞌl bꞌix bꞌanꞌax, 21 ntons yatz aj nkyexik axnaqꞌtzaꞌ txqꞌanky, ¿kꞌontiꞌl petzun nqet axnaqꞌtzaꞌ awibꞌx tbꞌayaꞌ? Yatz aj nchpakbꞌan tzan kꞌon qelqꞌan, ¿tzun peꞌ nxhchꞌelqꞌan? 22 Yatz aj nchqꞌuman tzan kꞌon jkꞌajajin, ¿tzun peꞌ nchkꞌajajin? Yatz aj nchqꞌuman kꞌontiꞌl token kye titzbꞌalil aj ntzaj kynaꞌoꞌ kye xjal, ¿tzun peꞌ nkyeꞌex awelqꞌaꞌ jaꞌ ntzaj kynaꞌoꞌ nini? 23 Yatz aj nqet ajiqꞌbꞌaꞌ awibꞌ tzan tpaj te Tkawbꞌil Qtata Dios tuj aqꞌabꞌ, ¿tzun peꞌ nꞌel awin tkyꞌexaw Qtata Dios tzan tpaj kꞌontiꞌl nqet awokslaꞌ titzaꞌ ntqꞌumaꞌ te Tkawbꞌil? 24 Iktzaꞌx tzꞌibꞌankaj tuj te Tuꞌjal Dios oqtxiꞌ ikxjani: “Kye aj nyaꞌtx tijajil Israel nkyeyolin bꞌan nyaꞌtx galan tiꞌj Qtata Dios tzan epaj etetz aj tijajil Israel aꞌix.”*
25 Te qechalul [tiꞌj qchiꞌjel iktzaꞌ nyolin te Kawbꞌil], tetzji jun galan aꞌox qa nqet qokslaꞌ kyaqil iktzaꞌ tgan te Tkawbꞌil Qtata Dios. Per qa kꞌontiꞌl nqet qokslaꞌ [kyaqil] iktzaꞌ te Kawbꞌil tgan, ntons te qechalul chagan. 26 Qa jun xjal aj kꞌontiꞌl atok techalul ntkꞌuluꞌ-wit iktzaꞌ ntqꞌumaꞌ te Kawbꞌil, ¿nyaꞌtx petzun tetz iktzaꞌ at techalul? 27 Ikxji etetz aj at te Kawbꞌil etukyꞌiꞌl bꞌix atok etechalul, etetz okxeꞌl-tal poqoꞌ tzan kye aj kꞌontiꞌl kyechalul tzan tpaj kyetz nkykꞌuluꞌ iktzaꞌ tgan te Kawbꞌil bꞌix etetz kꞌontiꞌl. 28 Komo jun xjal aj bꞌan bꞌanꞌax tijajil Israel nyaꞌtx cha aꞌox tzan tpaj iktzaꞌ tok eꞌen naqe jun aj tijajil Israel, bꞌix te aj atok techalul nyaꞌtx tijajil Israel cha aꞌox tzan tpaj jun techaꞌl tiꞌj xhchiꞌjel; 29 sinoke te jun aj tijajil Israel bꞌan bꞌanꞌax, a te aj kyꞌixpumaj tanim, bꞌix tetz “techalul” atok tiꞌj tanim* tzan tpaj tjawlen kyꞌexpuꞌ tanim tzan te Txew [Dios], nyaꞌtx cha tzan tpaj nkꞌulun-wit iktzaꞌ nyolin te Kawbꞌil. Te ja xjal iktzaꞌ ntzani nqet jiqꞌbꞌaꞌ tzan Qtata Dios, nyaꞌtx cha aꞌox tzan xjal.