6
Aj Kyel Joyoꞌ Wuq Oneyon Kye Tkyꞌixel Jesus
1 Ntons tuj aj tyempji mas tuq kyꞌilaꞌj kye txqꞌanky xjal nkyeꞌokslan tiꞌj Jesus, bꞌix kye aj tijajil Israel aj nkyeyolin tuq tuj yol gryeg,a kyetz eꞌaqꞌik tzan kyyolin nyaꞌtx galan kyiꞌj kye aj nkyeyolin tuq tuj yol ebrey. Kyetz nkyeyolin tuq, kye xuj byud kxol kyetz kꞌontiꞌl tuq nkyeqet en galan oj tqet sipaꞌ te onbꞌil aj nxik siꞌ tuq kyetz bꞌajqꞌij. 2 Ntons kye kykabꞌlajujil tkyꞌixel Jesus eꞌok kchimoꞌ kyaqil kye qerman bꞌix oxik kyqꞌumaꞌ kyetz ikxjani: “Nyaꞌtx galan qa qetza okajel qsiꞌna tzan qpakbꞌan tyol Qtata Dios bꞌix tzan txik qsipaꞌ bꞌajqꞌij te onbꞌil kye qerman. 3 Astilji waq erman, intqet ejoyoꞌ exol etetz wuq ichan aj jiqꞌbꞌameꞌ tzan kye xjal bꞌix nojnaqeꞌ tukyꞌi Txew Dios bꞌix nim kynabꞌl, bꞌix okajel siꞌlet tuj kyqꞌabꞌ kyetz te ja aqꞌunj ntzani. 4 Per qetza owelax jqꞌij bꞌajqꞌij tzan qxnaqꞌtzan tukyꞌi Qtata Dios bꞌix tzan txik qxnaqꞌtzaꞌ Tyol.”
5 Ya ma xik kyyoliꞌ kyukyꞌi kye qerman ikxji, kyaqil kye aj akyeqet tuq tzi oqet tuj kywitz. Ntons owel kyjoyoꞌ te Xhteꞌk, jun xjal bꞌan witꞌlik tuq tkꞌuꞌj tiꞌj Qajawil bꞌix nojnaq tuq tukyꞌi Txew Dios, bꞌix ax te Lip bꞌix Prócoro bꞌix Nicánor bꞌix Timon bꞌix Pármenas, bꞌix te Nik jun xjal aj Antyokiy tuq aj nyaꞌtx tijajil Israel per nxik tin tuq te aj nkyeꞌokslan kye aj tijajil Israel. 6 Yaji exik kyin kywitz kye aꞌeꞌ tkyꞌixel Jesus, bꞌix kyetz oqet ksiꞌ kyqꞌabꞌ kyajsik bꞌix ebꞌajxnaqꞌtzan kyiꞌj.b
7 Ntons, te tyol Qtata Dios nꞌok tuq chaꞌoꞌ jaꞌchq tuj Jerusalen bꞌix mas tuq txqꞌanky xjal nkyeꞌokslan, bꞌix ax kyꞌilaꞌj kye pal nkyeꞌokslan tuq te tumeꞌl titzaꞌ nꞌok qwitꞌbꞌaꞌ jkꞌuꞌj tiꞌj Qajawil.
Aj Txik In Pres Te Xhteꞌk
8 Te Xhteꞌk, tetz jun xjal aj bꞌan atqet tuq te Qtata Dios tukyꞌiꞌl bꞌix tidiꞌchq nbꞌantik tuq titzaꞌ tzan tpaj tajwalil te Qtata Dios. Tetz nqet tuq tkꞌuluꞌ kxol kye xjal tidiꞌchq aj nkyelabꞌan tuq tiꞌj bꞌix tidiꞌchq yekꞌbꞌil tukyꞌi tajwalil Dios. 9 Junjun xjal aj nꞌok kchimoꞌ tuq kyibꞌ tuj te jun jay nabꞌil Dios aj tbꞌi “Te Jay Nabꞌil Dios Kye Aj Oje Kyejatz Tzoqpiꞌ,” kyetz bꞌix txqꞌanky aꞌeꞌ aj amaqꞌ Siren, bꞌix txqꞌanky aj amaqꞌ Alejandriy, bꞌix txqꞌanky aj amaqꞌ Silisy, bꞌix xjal aj txqꞌanky amaqꞌ tuj tkwentil Asy, kyaqil kyetz eꞌaqꞌik tzan kywululun tukyꞌi Xhteꞌk. 10 Per kꞌontiꞌl nbꞌantik tuq tzan tqet kyitzaꞌ tzan tpaj te Xhteꞌk jun xjal aj bꞌaꞌn nbꞌisun tuq tuj tumeꞌl bꞌix komo te aj ntyoliꞌ tzan tpaj te Txew Dios nyolin tuq tuj tanim.
11 Ntons kyetz eqet kchojoꞌ txqꞌan xjal tzan kyyolin tiꞌj te Xhteꞌk ikxjani: “Owok qchaꞌoꞌna nyolin tidiꞌchq yol nyaꞌtx galan tiꞌj Qtata Dios bꞌix tiꞌj te [Kawbꞌil aj oqet stzꞌibꞌaꞌ] Moisés.” 12 Ntons ikxji kyetz okykꞌuluj tzan kyjaw labꞌun kye xjal bꞌix kye tijxjal aj nim kyajwalil bꞌix kye xnaqꞌtzal Kawbꞌil tiꞌj kyrelijyon, ojaw ktzyuꞌ te Xhteꞌk bꞌix oxik kyeqꞌiꞌ twitz te bꞌuchꞌuj tijxjal aj mas nim kyajwalil kxol kye aj tijajil Israel. 13 Bꞌix oxik kyin xjal aj nyaꞌtx bꞌanꞌax tuq kyitzaꞌ, oxik kyqꞌumaꞌ ikxjani: “Te ja xjalni kꞌontiꞌl nkaj tsiꞌ tzan tyolin yol nyaꞌtx galan tiꞌj te ja jay ntzani aj pawaꞌ te Qtata Dios bꞌix tiꞌj te Kawbꞌil tiꞌj qrelijyon. 14 Qetza oje tzꞌok qchaꞌoꞌna nyolin tuq qa te Jesus aj Nasaretni oqtel txituꞌ tuq te ja jayni bꞌix ojawel tkyꞌixpuꞌ te aj okaj stzꞌibꞌaꞌ Moisés aj nqet jkꞌuluꞌ qetz.” 15 Ntons kkyaqil kye aj te bꞌuchꞌuj tijxjal aj witꞌlikeꞌ tuq tzi, kyetz oxik kyen te Xhteꞌk, per tetz twitz naqe twitz jun ángel.