21
Aj Tjaw Kanet Jesus Tuj Galiley
1 Ya ma kyꞌik kyaqil ntzani, te Jesus ojaw kanet kywitz kye txnaqꞌatz stziꞌ te Tibérias Aꞌ bꞌix ikxjani okyꞌik. 2 Atqet tuq tzi te Simon Xhpeꞌy, bꞌix te Maxh aj nꞌok tuq qꞌumaꞌ tbꞌi Yuxh, bꞌix te Nat aj Kana tuj tkwentil Galiley, bꞌix kye tkꞌwaꞌal Sebedey, bꞌix kabꞌeꞌky txnaqꞌatz Jesus. 3 Yaji te Simon Xhpeꞌy oxik tqꞌumaꞌ kyetz ikxjani: “Wetz ma kyinx tzyul kyiy.” Yaji kyetz oxik kyqꞌumaꞌ: “Ax qetza ma qoxika awukyꞌiꞌl.” Ntons kyetz exik bꞌix ejax tuj jun bark. Per aj aqꞌbꞌilji nijunwt kyiy otzyet kyitzaꞌ.*
4 Ntons ikjaꞌn tuq qxhkꞌateꞌ, oxik kyeꞌeꞌ te Jesus stziꞌ te aꞌ, per kꞌontiꞌl owel kynikyꞌ qa aji tuq. 5 Te Jesus oxik xhchaꞌoꞌ kyetz ikxjani: “Waq, ¿etetz minaꞌ tjatz etin nijunwt kyiy?” “Nijunwt” kyekyi. 6 Yaji te Jesus oxik tqꞌumaꞌ kyetz: “Intqex esiꞌ te epa txini tuj ebꞌanqꞌabꞌ bꞌix okyetzyetel kye kyiy etitzaꞌ.” Ntons ikxji okykꞌuluj. Yaji kꞌontiꞌl tuq npon kybalor tzan tjatz kyin te pa tzan tpaj kye kyiy bꞌan ketant tuq akyeqex tuj te pa.* 7 Ntons te jun txnaqꞌatz aj bꞌan ganiꞌ tuq tzan Jesus, tetz oxik tqꞌumaꞌ te Simon Xhpeꞌy ikxjani: “¡A tetz te Qajawil!” 8 Ya ma tzꞌok xhchaꞌoꞌ te Xhpeꞌy qa aji tuq te Qajawil, owok tsiꞌ tetz tqꞌanaq bꞌix oxik txon tibꞌ tuj te aꞌ [tzan tpon luwew tukyꞌiꞌl]. Ya kye txqꞌanky txnaqꞌatz, kyetz ebꞌajpon tuj te bark, akyeqet tuq qaynin tzi cha oqal (100) metr tuq. Oxik kyjukꞌuꞌ te pa jaꞌ akyeqex kye kyiy.
9 Ya ma kyeꞌetz xtxaꞌm tlobꞌen aꞌ, oxik kyen jun qꞌaqꞌ bꞌix jun kyiy tuj te txanqꞌaꞌl bꞌix at tuq te wabꞌjky. 10 Yaji te Jesus oxik tqꞌumaꞌ ikxjani kyetz: “Instzaj etin kabꞌe kyiy aj man kyjatzlen etinni.” 11 Tzaj te Simon Xhpeꞌy, ojax tuj te bark, bꞌix otzaj tjukꞌuꞌ te pa bꞌan nojnaq tuq tukyꞌi kyiy. Ateꞌ tuq oqal tukyꞌi oxlajuj tuj oxqal (153) kyiy bꞌan limaq per anke kyꞌilaꞌj, te pa kꞌontiꞌl owel laqik. 12 Ntons te Jesus oxik tqꞌumaꞌ kyetz ikxjani: “Peꞌetzaj waq waꞌil.” Bꞌix nijunwt tuq kxol kye txnaqꞌatz nkynimsaꞌ tuq kykꞌuꞌj tzan txik kyqaniꞌ tetz abꞌl tuq, tzan tpaj kyetz kyebꞌen tuq aji te Qajawil. 13 Yaji tzaj te Jesus, ojaw stzyuꞌ te wabꞌj bꞌix oxik tsiꞌ kyetz, ax ikxji otkꞌuluj kyukyꞌi kye kyiy. 14 Te ntzani toxmajjiꞌn-el tuq tjawlen kanet te Jesus kywitz kye txnaqꞌatz atx aj tjawlen anqꞌin.
Aj Txik Tqaniꞌ Jesus Tukyꞌi Xhpeꞌy Qa Nqet Tuq Tganiꞌ
15 Ntons, ya ma mankun kywaꞌan, yaji te Jesus oxik tqaniꞌ te Simon Xhpeꞌy ikxjani: “Simon aj tkꞌajol Waꞌnch, ¿nkyinqet peꞌ aganiꞌ mas nim kywitz kye aj ntzani?” Yaji te Xhpeꞌy oxik tqꞌumaꞌ ikxjani: “Tat, yatz awebꞌen, wetz nchqet nganiꞌ.” Yaji te Jesus oxik tqꞌumaꞌ: “Ntons inkyqet akꞌuluꞌ kwent kye aj lapikeꞌ wiꞌj.”a 16 Yaji oxik tqaniꞌ junkyꞌel te Jesus te Xhpeꞌy: “Simon aj tkꞌajol Waꞌnch, ¿nkyinqet peꞌ aganiꞌ?” Ntons te Xhpeꞌy oxik tqꞌumaꞌ tetz: “Yeꞌ tat, yatz awebꞌen wetz nchqet nganiꞌ.” Ntons te Jesus oxik tqꞌumaꞌ: “Inkxik awen kye aj lapikeꞌ wiꞌj.”b 17 Yaji oxik tqꞌumaꞌ toxmajjiꞌn-el te Jesus te Simon Xhpeꞌy: “Simon aj tkꞌajol Waꞌnch, ¿bꞌanꞌax nkyinqet peꞌ aganiꞌ?” Yaji te Xhpeꞌy oje bꞌisun tzan tpaj ojetq tuq xik chaꞌoꞌ tetz toxmajjiꞌn-el. Owaj stzaqꞌbꞌeꞌ ikxjani: “Tat, yatz awebꞌen kyaqil. Yatz awebꞌen wetz nchqet nganiꞌ.” Ntons te Jesus oxik tqꞌumaꞌ tetz ikxjani: “Inkyqet akꞌuluꞌ kwent kye aj lapikeꞌ wiꞌj.c 18 Wetz oxeꞌl nqꞌumaꞌ yatz bꞌan bꞌanꞌax, aj man tuq kꞌwaꞌl aꞌich, nꞌok tuq asiꞌ aqꞌanaq awibꞌx bꞌix ntxik tuq aj jaꞌ yatz agan, per ya oj atijin cha owelal awin aqꞌabꞌ bꞌix junky owokel sin aqꞌanaq bꞌix otxeꞌl tin aj jaꞌ yatz kꞌon agan xik.”
19 Ntons ikxji te Jesus oxik tqꞌumaꞌ tumeꞌl titzaꞌ tuq okamel te Xhpeꞌy bꞌix ikxji tzan tqet tyekꞌuꞌ te tumeꞌl bꞌan bꞌanꞌax tiꞌj te Qtata Dios. Yaji oxik tqꞌumaꞌ ikxjani: “Pawok lapet wiꞌj.” 20 Ya ma tzꞌaj ten tiꞌj, te Xhpeꞌy oxik ten lapik tuq kyiꞌj te txnaqꞌatz aj bꞌan ganiꞌ tuq tzan Jesus, aj owok witꞌlet qaynin tiꞌj Jesus aj man tuq nkyewaꞌan te qaleꞌ [tiꞌj te qꞌij Paskw]* bꞌix oxik tqaniꞌ tukyꞌi Jesus ikxjani: “¿Tat, abꞌl oxeꞌl qꞌapon te yatz?”* 21 Ntons, te Xhpeꞌy, ya ma xik ten te aj junky, oxik tqaniꞌ tukyꞌi Jesus ikxjani: “Tat, ¿titzaꞌ okyꞌel tiꞌj tetz?” 22 Yaji te Jesus oxik tqꞌumaꞌ tetz ikxjani: “Qa wetz ngan tzan sten max oj wul tzani junkyꞌel, ¿tidiꞌ yatz awoklen tzan tok achaꞌoꞌ? Yatz pawok lapet wiꞌj.” 23 Astilji owel tpakbꞌal kxol kye erman qa tetz nlay tuq kamik. Per te Jesus kꞌontiꞌl oxik tqꞌumaꞌ qa tetz nlay tuq kamik sinoke oxik tqꞌumaꞌ, “Qa wetz ngan tzan sten max oj wul tzani junkyꞌel, ¿tidiꞌ yatz awoklen tzan tok achaꞌoꞌ?”
Jun Tpakbꞌalil Tiꞌj Te Aj Oqet Tzꞌibꞌan Ja Uꞌjni
24 Aꞌin wetz tuq te aj txnaqꞌatzni bꞌix wetz nxik nqꞌumaꞌ te aj owok wen, bꞌix aꞌin wetz nkyintzꞌibꞌan te ja uꞌjni, bꞌix etetz etebꞌenky wetz aj nqet ntzꞌibꞌaꞌni, bꞌan bꞌanꞌax. 25 Ax at tidiꞌchq oqet tkꞌuluꞌ Jesus, bꞌix cha oqtel-wit tzꞌibꞌlet kyaqil, kye aj uꞌj jaꞌ oqtex tzꞌibꞌlet nlay-tal bꞌantik kyten twitz txꞌoꞌtxꞌ.