20
Aj Tjaw Anqꞌin Jesus
1 Ntons, tuj tbꞌay qꞌij te saman, man tuq qloljx, te Liy aj Magdála oxik aj jaꞌ owox muquꞌ te Jesus, bꞌix otzaj tkambꞌaꞌ te abꞌj lambꞌil stziꞌ te jul ojetq tuq tzꞌel in. 2 Oxik naj oqelan aj jaꞌ tuq atqet te Simon Xhpeꞌy tukyꞌi te junky txnaqꞌatz aj bꞌan ganiꞌ tzan te Jesus, bꞌix oxik tqꞌumaꞌ ikxjani: “Maꞌtx xtxik kyin te Qajawil bꞌix kꞌontiꞌl qebꞌen jaꞌ maꞌtx kaj ksiꞌ.” 3 Tzaj te Xhpeꞌy tukyꞌi te junky txnaqꞌatz, ebꞌajxik oqelan max tuj te jul aj jaꞌ owox muquꞌ. 4 Kykabꞌil nkyekaredin tuq bꞌix te junky otbꞌayaj twitz te Xhpeꞌy bꞌix opon tbꞌay. 5 Owox chlukꞌiꞌ tuj te jul bꞌix owox ten te xqꞌapj aj owok kybꞌalqꞌiꞌ tiꞌj, per kꞌontiꞌl owox tuj te jul. 6 Ntons yaji man tuq tponlen, tpon te Simon Xhpeꞌy bꞌix derech owox tuj te jul bꞌix ax owok ten te xqꞌapj aj owok kybꞌalqꞌiꞌ tiꞌj. 7 Bꞌix ax owok ten te xqꞌapj aj owoken kꞌalbꞌil twiꞌ te Jesus, kꞌontiꞌl tuq atqet junchꞌin tukyꞌi te aj xqꞌapj aj owok kybꞌalqꞌiꞌ tiꞌj sinoke cha tuq paqoꞌ atqet apart. 8 Yaji owox lapetky te txnaqꞌatz aj ojetq tuq pon tbꞌay, owok ten bꞌix otokslaj. 9 Komo kyetz minaꞌ tuq tel kynikyꞌ tiꞌj te Tuꞌjal Dios qa te Jesus ojawel tuq anqꞌin junkyꞌel. 10 Yaji ebꞌajꞌajtz kyjay.
Aj Tjaw Kanet Jesus Twitz Liy Aj Magdála
11 Ntons te Liy [aj Magdála]* tetz ojetq tuq kaj tiꞌjx te jul, bꞌix bꞌan nꞌoqꞌ tuq. Yaji oqet mokꞌlet, owox xhlukꞌin tuj te jul, 12 bꞌix owox ten kabꞌeꞌ ángel, saq kyqꞌanaq bꞌix witꞌlikeꞌ tuq tzi, jun tuj twiꞌ bꞌix junky txeꞌ toq aj jaꞌ oqet kytambꞌaꞌ te Jesus. 13 Ntons kye ángel oxik kyqꞌumaꞌ tetz ikxjani: “Xuj, ¿tistil yatz nxhchꞌoqꞌ?” Ntons tetz oxik tqꞌumaꞌ ikxjani: “Tzan tpaj maꞌtx xik kyin tlimal te Wajawil bꞌix kꞌontiꞌl webꞌen jaꞌ maꞌtx kaj ksiꞌ.” 14 Man tuq txiklen tqꞌumaꞌ ikxjani ntons owajtz meltzꞌjik tiꞌjx bꞌix oxik ten te Jesus, per kꞌontiꞌl owel tnikyꞌ tiꞌj abꞌl tuq. 15 Ntons te Jesus oxik xhchaꞌoꞌ tetz ikxjani: “Xuj, ¿tistil nxhchꞌoqꞌ? ¿Abꞌl nꞌajoyoꞌ?” Tuj tnabꞌl te Liy qa aji tuq te aj nxbꞌuqin te awalj bꞌix oxik tqꞌumaꞌ ikxjani: “Tat, qa yatz aꞌich maꞌtx xik eqꞌin tetz, instzaj aqꞌumaꞌ jaꞌ atqet tzan nxik wetz eqꞌil tetz.” 16 Ntons te Jesus oxik tqꞌumaꞌ tetz ikxjani: “¡Liy!” Ntons tetz owajtz kaꞌyin bꞌix oxik tqꞌumaꞌ tetz tuj yol ebrey aj kyyol kyetz ikxjani: “¡Rabóni!” (Te ntzani telponx Xnaqꞌtzon.) 17 Ntons te Jesus oxik tqꞌumaꞌ ikxjani: “Kyintzaj atzoqpiꞌ tzan tpaj minaꞌ nxik tukyꞌi Ntat. Mejor pax kyukyꞌi aꞌeꞌ werman tzan txik aqꞌumaꞌ kyetz, “ma kyinxik tukyꞌi Ntat wetz bꞌix Etat etetz, te Qtata Dios aj ntzaj nnaꞌoꞌ wetz bꞌix aj ntzaj enaꞌoꞌ etetz.””
18 Ntons [oxik, bꞌix yaji] tzaj te Liy aj Magdála, oxik tqꞌumaꞌ kyukyꞌi kye txnaqꞌatz te Jesus ikxjani: “¡Maꞌtx tzꞌok wen te Qajawil!” Yaji oxik tqꞌumaꞌ kyetz iktzaꞌx te Jesus otqꞌumaj tukyꞌiꞌl.
Aj Tjaw Kanet Jesus Kywitz Kye Txnaqꞌatz
19 Ya ma qoqet yupan tuj aj qꞌijji, komo tuj tbꞌay qꞌij tuj te saman, bꞌix te tlamelul te jay aj jaꞌ tuq akyeqet kye txnaqꞌatz Jesus lamoꞌ tzan tpaj nkyexobꞌ tuq kyiꞌj kye [aj nim kyajwalil kxol kye aj tijajil Israel], ntons ojaw kanet te Jesus kxol kyetz 20 bꞌix oxik tqꞌumaꞌ ikxjani: “Intok jun chewsbꞌil te etanim.” Ya ma xik tqꞌumaꞌ ikxjani, oxik tyekꞌuꞌ kyetz kye tqꞌabꞌ bꞌix te txuꞌuk. Per kyetz ebꞌajchalaj aj tok kyen te Qajawil. 21 Ntons te Jesus oxik tqꞌumaꞌ kyetz ikxjani: “Intok jun chewsbꞌil te etanim. Bꞌix iktzaꞌx te Ntat intzaj tlajoꞌ exol, ax ikxji okxeꞌl nlajoꞌ wetz.” 22 Ya ma xik tqꞌumaꞌ ikxjani oxik txupiꞌ kyajsik bꞌix oxik tqꞌumaꞌ kyetz ikxjani: “Peꞌekꞌamon waq te Txew Dios. 23 Abꞌl aj oqtel enajsaꞌ xhchoj, ntons bꞌanꞌax onajsletel te xhchoj. Per te aj nlay qet enajsaꞌ xhchoj, nlaykix najslet te xhchoj.”*
Aj Tok Eꞌeꞌ Jesus Tzan Maxh
24 Ntons jun aj kye kykabꞌlajujil, Maxh tbꞌi, aji aj nꞌok qꞌumaꞌ tuq Yuxh, tetz kꞌontiꞌl tuq atqet kxol aj tpon Jesus. 25 Etzaj kye txqꞌanky txnaqꞌatz te Jesus, oxik kyqꞌumaꞌ tetz ikxjani: “¡Qetza maꞌtx tzꞌok qena te Qajawil!” Bꞌix te Maxh oxik tqꞌumaꞌ ikxjani: “Wetz max chaꞌoj tok wen te techaꞌl te klab tuj tqꞌabꞌ, bꞌix max oj tok nmakoꞌ jaꞌ eꞌox kye klab, bꞌix max oj tok nmakoꞌ te techaꞌl tuj txuꞌuk, maxji owokslaꞌtz.”
26 Ntons wajxaq qꞌijxiꞌ tuq, bꞌix kye txnaqꞌatz Jesus ateqet tuq junchꞌin junkyꞌel tuj te jay, bꞌix te Maxh atqet tuq kyukyꞌiꞌl bꞌix te tlamelul te jay bꞌan lamoꞌ byenech tuq. Per te Jesus ojaw kanet kxol bꞌix oqet waꞌlet kxol bꞌix exik tlimaꞌ kyetz ikxjani: “Intok jun chewsbꞌil te etanim.” 27 Yaji oxik tqꞌumaꞌ te Jesus te Maxh ikxjani: “Intok amakoꞌ tzani bꞌix tzaj awen tuj nqꞌabꞌ bꞌix intok amakoꞌ te techaꞌl tuj nxuꞌuk. Kꞌon xhchꞌok jun xjal aj kꞌontiꞌl nꞌokslan sinoke intox tuj awiꞌ.” 28 Ntons te Maxh oxik tqꞌumaꞌ ikxjani: “¡Wajawil, yatz aꞌich Dios aj ntzaj nnaꞌoꞌ!” 29 Ntons te Jesus oxik tqꞌumaꞌ: “Yatz ajnaꞌl nxhchꞌokslan wiꞌj tzan tpaj maꞌtx kyinꞌok awen, per galanx-alo kye aj nkyeꞌokslan wiꞌj bꞌix kꞌontiꞌl inꞌok kyen.”
Tidiꞌ Token Te Ja Uꞌjni
30 Te Jesus oqet tkꞌuluꞌ tidiꞌchq yekꞌbꞌil kywitz kye txnaqꞌatz aj kꞌontiꞌl tzꞌibꞌanqex tuj ja uꞌjni, 31 per te ja ntzani maꞌtx qet tzꞌibꞌlet tzan etokslan te Jesus a te Koloyon Aj Qꞌumankaj Oqtxiꞌ bꞌix aji tetz Tkꞌwaꞌal Qtata Dios, bꞌix tzan tpaj etokslbꞌen, etetz at jun etanqꞌin te jun-eleꞌx tzan tpaj tajwalil.