16
Aj Tok Chaꞌoꞌ Ojetq Tuq Jaw Anqꞌin Te Jesus
1 Bwen, yatzun tkyꞌiklen te qꞌij ojlaꞌmj,a te Liy aj Magdála bꞌix te Liy aj tnan Jacobob bꞌix Salomey, kyetz exik loqꞌol jun tkꞌokꞌjal tzan tok ksiꞌ tuq tiꞌj te anim. 2 Tuj junky iwitq bꞌan qꞌeqoꞌ man tuq tjakullen qꞌij tuj te tbꞌay qꞌij te saman, exik stziꞌ te pantyon. 3 Bꞌix man tuq nkyebꞌet tuj bꞌey, nqet tuq kykawlaꞌ ikxjani: “¿Abꞌl owelal tolin te abꞌj stziꞌ te pantyon tzan qox?”
4 Per aj kypon, oxik kyen te abꞌj lambꞌil stziꞌ te pantyon ojetq tuq tzꞌel toliꞌ bꞌix te abꞌj jun chman abꞌj tuq. 5 Ya ma kyeꞌox tuj te pantyon oxik kyen jun kuꞌxon witꞌliqet tuj tbꞌanqꞌabꞌ. Tetz tqꞌanaq xluj bꞌix bꞌan sjapun tuq. Aj txik kyeꞌeꞌ, kyetz etzajbꞌaj. 6 Yaji tetz oxik tqꞌumaꞌ kyetz ikxjani: “Kꞌon kxobꞌ waq. Wetz webꞌen etetz nkxjoyon tiꞌj Jesus aj Nasaret aj okamik twitz krus. Per tetz maꞌtx jaw anqꞌin, kꞌontiꞌlky atqet tzani. Eꞌej waq tzani aj jaꞌ okaj tambꞌaꞌ. 7 Ntons ajnaꞌl, pex waq kyukyꞌi kye txnaqꞌatz bꞌix tukyꞌi Xhpeꞌy, intxik eqꞌumaꞌ tzan kxik max Galiley* tzan tpaj tetz maꞌtx tbꞌayaj, bꞌix max tzi owokel kyen iktzaꞌx otqꞌumaj.” 8 Ntons kye xuj eꞌaj kared bꞌix nkyeluꞌlun tuq tzan kxobꞌal bꞌix kꞌontiꞌl oxik kyqꞌumaꞌ te nijunwt [tuj bꞌey] tzan tpaj ojetq tuq kyexobꞌ.*
Aj Tyolin Jesus Kyukyꞌi Tukyꞌiꞌl Tjawlen Anqꞌin
9 Bwen, ntons te Jesus tjawlen anqꞌin qꞌeqombwen tuj te tbꞌay qꞌij te saman, tbꞌay owok eꞌeꞌ tzan te Liy aj Magdála aj ejatz in wuq malspirit tuj tanim oqtxiꞌ. 10 Yaji te Liy oxwaꞌq qꞌumal tetz kyukyꞌi kye aj eꞌok lapet tiꞌj, kyetz bꞌan bꞌis tuq ateꞌ bꞌix nkyeꞌoqꞌ tuq tiꞌj. 11 Per aj txik tqꞌumaꞌ te Liy kyetz qa te Jesus ojetq tuq jaw anqꞌin bꞌix ojetq tuq tzꞌok teꞌeꞌ, kyetz kꞌontiꞌl okyokslaj.
12 Ntons mas yaj te Jesus ojunan kyukyꞌi kabꞌeꞌ txnaqꞌatz tuj bꞌey tuj kꞌul, per tetz ojetq tuq chukjik kaꞌyin. 13 Yaji kyetz ax oxik kyqꞌumaꞌ kye txqꞌanky [txnaqꞌatz], per kye txqꞌanky kꞌontiꞌl oxik kyokslaꞌ.
Aj Tkaj Tqꞌumaꞌ Te Jesus Tidiꞌ Tuq Okykꞌuluꞌtz Kye Tkyꞌixel
14 Mas yaj te Jesus ojaw kanet kxol kye kyjunlajujil txnaqꞌatz nkyewaꞌan tuq junx tuj jun jay. Bꞌix owilin kyiꞌj tzan tpaj kꞌontiꞌl nkyokslaꞌ tzan ktzꞌakal, kꞌontiꞌl oxik kyokslaꞌ kye aj ojetq tzꞌok eꞌen tetz, aj tjawlen anqꞌin. 15 Yaji oxik tqꞌumaꞌ kyetz ikxjani: “Pex waq jaꞌchq kyaqil twitz txꞌoꞌtxꞌ tzan txik epakbꞌaꞌ kye kyaqil xjal te tpakbꞌalil galan.* 16 Kye aj okyokslaꞌtz bꞌix ojawel siꞌ aꞌ kywiꞌ, kyetz okyekoletel tzan Qtata Dios; yatzun kye aj nlay kyokslaj, kyetz okyexeꞌl siꞌ tuj il te jun-eleꞌx. 17 Yatzun kye aj nkyinkyokslaꞌ, oqtel kykꞌuluꞌ yekꞌbꞌil ikxjani: Ojawetz kyin malspirit tuj kyanim xjal,* bꞌix okyeyoliyon tukyꞌi junky yol aj kꞌontiꞌl kyotzqiꞌ tbꞌay,* 18 bꞌix tukyꞌi kyqꞌabꞌ ojawel ktzyuꞌ kan aj bꞌaꞌn kyetxꞌaꞌon, benen* bꞌix qa oxeꞌl kyukꞌaꞌ jun tidiꞌ benen nlay kyꞌik tidiꞌ kyiꞌj, bꞌix oqtel ksiꞌ kyqꞌabꞌ kyajsik yabꞌ bꞌix kye yabꞌ okyebꞌantel kyitzaꞌ.”*
Aj Txik Jesus Tuj Kaꞌj
19 Ntons te Qajawil Jesus, aj tmankun tyolin kyukyꞌiꞌl, ojax in tuj kaꞌj* bꞌix oqet witꞌlet tuj tbꞌanqꞌabꞌc te stat aj Qtata Dios.
20 Ntons kye txnaqꞌatz ebꞌajxik jaꞌchq pakbꞌal te tpakbꞌalil galan. Yatzun te Qajawil nꞌonen tuq kyukyꞌiꞌl tzan kykꞌulun tidiꞌchq tzan tok en qa bꞌanꞌax te aj nxik kyqꞌumaꞌ.