13
Aj Tyolin Jesus Tiꞌj Te Aj Okyꞌel Twitz Txꞌoꞌtxꞌ Oj Tul Junkyꞌelky
1 Ntons aj man tuq nkyeꞌetz tuj te Nin Jay Nabꞌil Qtata Dios jun txnaqꞌatz te Jesus oxik tqꞌumaꞌ ikxjani: “Xnaqꞌtzon, intjax awen ja nin jayni tbꞌanil bꞌix kꞌuluꞌ byenech tukyꞌi limaq abꞌj.” 2 Yaji te Jesus oxik tqꞌumaꞌ ikxjani: “Nꞌok awen yatz titzaꞌ kꞌulbꞌen tetz te ja nin jayni, kyaqil oqtel tilan. Nlay kaj ni jun pant tajsik junky.”
3 Ntons mas yaj chꞌinky, [ebꞌajpon] twiꞌ te witz Olib bꞌix te Jesus oqet witꞌlet tzi junxlaꞌ twitz te aj nin jayji bꞌix apart kywitz kyaqil te Xhpeꞌy tukyꞌi Jacoboa tukyꞌi Waꞌnch bꞌix tukyꞌi Lexh, kyetz oxik kchaꞌoꞌ te Jesus ikxjani: 4 “[Tat,] instzaj aqꞌumaꞌ janikꞌbꞌaꞌn kyꞌik aj ma tzaj aqꞌumaꞌ qetzani. ¿Tidiꞌ owokel qen tzan tel qnikyꞌ qa chꞌinky tuq tkyꞌik ja ntzani?”
5 Yaji te Jesus oxik tqꞌumaꞌ kyetz ikxjani: “Intok esiꞌ waq enabꞌl byenech tzan kꞌon eqet eqꞌiꞌ tzan nijunwt. 6 Komo kyꞌilaꞌj xjal okyeꞌulel, okyeyoliyon tukyꞌi nbꞌi ikxjani: “Aꞌin wetz aj nkyinꞌetiyoꞌ” bꞌix ikxji kyetz okyeqtel kyeqꞌiꞌ kyꞌilaꞌj xjal. 7 Etetz chaꞌoj tok echaꞌoꞌ jaꞌchq nꞌok qꞌoj, qatzun chaꞌoj tok echaꞌoꞌ nqꞌumjik tzul qꞌoj, ntons etetz kꞌon kxobꞌ tzan tpaj kyaqil nini okyꞌelkixiꞌ per nyaꞌtx a te tmankbꞌil twitz txꞌoꞌtxꞌji.b 8 Kyijajil txqꞌan xjal okyeqꞌojiyonkix tiꞌj kyijajil txqꞌanky xjal bꞌix txqꞌan amaqꞌ okyeqꞌojiyonkix kyiꞌj txqꞌanky amaqꞌ. Ax kabꞌjunabꞌ jaꞌchq okyꞌel bꞌix te waꞌij ax jaꞌchq okyꞌel. Per te ja ntzani man tuq nꞌaqꞌik te xhchoꞌnal.
9 Intok esiꞌ waq enabꞌl tiꞌj aj okyꞌel etiꞌj. Etetz okxeꞌl qꞌapoꞌ tuj kyqꞌabꞌ kye aj at nim kyajwalil kyuj kye jay nabꞌil Dios bꞌix tzi okxtel jubꞌchaꞌ. Okxtel wabꞌaꞌ kywitz kye kꞌulul mandad bꞌix kywitz kye kywitzaleꞌ kꞌulul mandad tzan tpaj etokslbꞌen wiꞌj bꞌix ikxji bꞌaꞌn tzan eyolin wiꞌj kywitz kyetz. 10 Minaꞌ tuq tpon te tmankbꞌil, a tgan tzan tponbꞌaj pakbꞌlet kxol kyaqil kyijajil xjal jaꞌchq te tpakbꞌalil galan tiꞌj titzaꞌ te Qtata Dios nkolon kyiꞌj kye xjal. 11 Bꞌix chaꞌoj exik qꞌapoꞌ tuj kyqꞌabꞌ kye kꞌulul mandad, kꞌon kxbꞌisun waq tiꞌj te aj oxeꞌl eqꞌumaꞌ tzan tpaj a te Txew Dios oyoliyon tuj etanim te aj presis tzan txik eqꞌumaꞌ, komo nyaꞌtx aꞌix te aj okxyoliyon sinoke a te Txew Dios.*
12 Kye aj nkyeꞌokslan Dios okyexeꞌl qꞌapoꞌ tuj kyqꞌabꞌ kye kꞌulul mandad tzan kyermanx tuj kyjayx tzan kyqet kansaꞌ, ax okyexeꞌl qꞌapoꞌ kye kꞌwaꞌalbꞌaj tzan kytat bꞌix ax kꞌwaꞌalbꞌaj oxeꞌl kyqꞌapoꞌ kytat tzan kyqet kansaꞌ. 13 Etetz [aj nkxꞌokslan wiꞌj] okxꞌokel qꞌojiꞌ tzan xjal jaꞌchq kyaqil twitz txꞌoꞌtxꞌ tzan tpaj etokslbꞌen wiꞌj. Per etetz aj etipaꞌtz max tmankbꞌil, okxkoletel tzan Qtata Dios.*
14 (Ntons abꞌl te aj njaw teꞌeꞌ, intox tuj twiꞌ ntzani:) Chaꞌoj tok eten ojetq pon te xmayiyon aj xituyon aj jaꞌ kꞌontiꞌl toklen tzan toxten,* ntons kye aj akyeqet tuj Judey a tgan tzan kyoqik naj tzan kyewan twiꞌ witz, 15 bꞌix kye aj akyejax twiꞌ jay, kꞌontiꞌl tzan kyqetz eqꞌil jun tidiꞌ tuj kyjay [sinoke tzan kyoqik naj]. 16 Bꞌix kye aj nkyeꞌaqꞌunan tuj kꞌul, kꞌontiꞌl tzan kyemeltzꞌjik kyjay eqꞌil kchump; ax tzi inkyoqik naj.* 17 Lasteꞌ kye xuj aj chꞌinky kkyꞌix aj qꞌijji. Lasteꞌ kye xuj aj man nkyetxuꞌun kyal aj qꞌijji. 18 Peꞌexnaqꞌtzan waq tukyꞌi Qtata Dios tzan kꞌon tkyꞌik ja ntzani tuj jabꞌalil. 19 Tuj aj qꞌijji owokel en twitz jun xhchoꞌnal bꞌan nim,* per jun xhchoꞌnal aj minaꞌ tkyꞌik ni jun-el atx aj tqetlen kꞌuluꞌ te twitz txꞌoꞌtxꞌ tzan Qtata Dios bꞌix ya nlay kyꞌik junkyꞌel. 20 Aj xhchoꞌnal bꞌan nimni, qa te Qajawil otkꞌuluꞌtz-wit tzan tok nim tuj, nijunwt-tal abꞌl otipaꞌtz. Per tetz oqtel tkꞌuluꞌ tzan kꞌon tnachqꞌin nim tuj tzan tpaj [nloꞌet tkꞌuꞌj kyiꞌj] kye aj joyomeꞌ titzaꞌ. 21 Ntons qa at abꞌl otzajel tqꞌumaꞌ etetz, “¡Instzaj eten! Tzani atqet te Koloyon Aj Qꞌumankaj Oqtxiꞌ,” qatzun kyekyitel “Eꞌex txini,” ntons etetz, kꞌon xik etokslaꞌ. 22 Komo kyeꞌul xjal mentiros aj okyqꞌumaꞌtz qa kyetz aꞌeꞌji te Koloyon Aj Qꞌumankaj Oqtxiꞌ, per nyaꞌtx bꞌanꞌax kyitzaꞌ, bꞌix kyeꞌul xjal aj okyqꞌumaꞌtz qa kyetz aꞌeꞌ aj yolil tyol Dios, per nyaꞌtx bꞌanꞌax kyitzaꞌ. Oqtel kykꞌuluꞌ nim labꞌal tukyꞌi kyajwalil bꞌix tidiꞌchq aj okyelabꞌayon kye xjal tiꞌj bꞌix kygan-tal tzan kyqet kyeqꞌiꞌ kye aj joyomeꞌ tzan Qtata Dios. 23 Intok esiꞌ waq enabꞌl tiꞌj kyaqil aj maꞌtx xik nqꞌumaꞌ etetzni bꞌix kyaqil nini minaꞌ tkyꞌik.
Aj Txik Tqꞌumaꞌ Jesus Titzaꞌ Owulel Junkyꞌelky
24 Ntons, chaꞌoj tkyꞌik aj tyemp nim xhchoꞌnalni, yaji te qꞌij oqloljxbꞌel twitz, bꞌix te qyaꞌ ax nlay qꞌanalin. 25 Kye cheꞌw twitz kaꞌj okyetzajel tzꞌaqik* bꞌix kyaqil [malspirit] aj nim kyajwalil twitz kaꞌj okyejawel kyitoꞌ. 26 Yaji okyinxeꞌl eꞌeꞌ [wetz] te Ichan Aj Tkꞌwaꞌal Dios [aꞌin] ikjaꞌn ntzaj tuj muj tukyꞌi nim wajwalil bꞌix nxhqitzꞌunal.* 27 Okyexeꞌl nlajoꞌ kye ángel tzan kyok kchimoꞌ kye aj joyomeꞌ witzaꞌ jaꞌchq, otzajelbꞌaj ksutiꞌ kyaqil twitz txꞌoꞌtxꞌ bꞌix twitz kaꞌj.c
28 Ntons intok esiꞌ waq enabꞌl tiꞌj ja yekꞌbꞌil tiꞌj te wiꞌ igos. Chaꞌoj tok alaꞌj tqꞌabꞌ bꞌix te txaq ikjaꞌn stzaj kꞌuplet, etetz nꞌel enikyꞌ chꞌinky qok kwares. 29 Ax ikxji chaꞌoj tok eten nkyꞌik twitz txꞌoꞌtxꞌ kyaqil aj maꞌtx xik nqꞌumaꞌni, owelal enikyꞌ telponx chꞌinky wul [wetz] te Ichan Aj Tkꞌwaꞌal Dios [aꞌin]. 30 Wetz oxeꞌl nqꞌumaꞌ etetz te bꞌanꞌax, kyaqil ntzani okyꞌel minaꞌ tuq kykamik kye ja qijajilni. 31 Te twitz kaꞌj bꞌix te twitz txꞌoꞌtxꞌ okyepoyonaj, per wetz nyol nlay ponaj, opoyonkixiꞌ kyaqil aj maꞌtx xik nqꞌumaꞌni. 32 Nijunwt abꞌl tebꞌen janikꞌbꞌaꞌn tkyꞌik ja ntzani; ni kye ángel tuj kaꞌj, ni wetz aj Tkꞌwaꞌal Dios aꞌin kꞌontiꞌl webꞌen; aꞌox te Qtata Dios tebꞌen janikꞌbꞌaꞌn kyꞌik ja ntzani.* 33 Ntons peꞌeten waq list tzan tpaj kꞌontiꞌl etebꞌen janikꞌbꞌaꞌn kyꞌik kyaqil ja ntzani [aj maꞌtx xik nqꞌumaꞌ etetzni].
34 Te ja ntzani iktzaꞌ jun tajaw jay ikjaꞌn txik tuj tbꞌey. Tetz okajel tsiꞌ kyajwalil bꞌix kyaqꞌun te junjunchaq tmos bꞌix okajel tqꞌumaꞌ te xbꞌuqiljay tzan sten list.* 35 Ax ikxji etetz peꞌeten waq list tzan tpaj kꞌontiꞌl etebꞌen janikꞌbꞌaꞌn wul wetz junkyꞌelky aj etajawil aꞌin, qa nqoxmutxꞌeꞌ qatzun chukaqꞌbꞌilji qatzun tbꞌayd toqꞌ kxlan qatzun chaꞌoj stzaj txekaꞌjji. 36 Tanderepent kyinꞌul bꞌix nyaꞌtx galan qa nyaꞌtx list atix. 37 Te aj nxik nqꞌumaꞌ etetzni, ax ikxji kye kyaqil xjal bꞌix astilji oxeꞌl nqꞌumaꞌ kye kyaqil tzan kyten list.”