21
Te Toyej Jun Chꞌi Byud Mebꞌaꞌ
1 Ntons yaji te Jesus ojaw tin twitz, exik tkaꞌyiꞌ kye xjal qꞌinon aj nqex ksiꞌ tuq kyoyej tuj te tqatel tmin tuj te Nin Jay Nabꞌil Qtata Dios, 2 bꞌix ax oxik teꞌeꞌ jun chꞌi byud bꞌan mebꞌaꞌ xjal, nqex tuq tsiꞌ kabꞌeꞌ tmin nyaꞌtx nim tbalor. 3 Ntons oxik tqꞌumaꞌ ikxjani: “Wetz oxeꞌl nqꞌumaꞌ etetz te bꞌanꞌax, te ja chꞌi byud mebꞌaꞌni, tetz maꞌtx qex tsiꞌ mas nim kywitz kyaqil kye txqꞌanky xjal. 4 Komo kyaqil kye txqꞌanky nxik kyoyeꞌ aꞌox aj nsobrin te kyetz, per tetz konserke bꞌan chꞌi mebꞌaꞌ, tetz maꞌtx xik tsiꞌ kyaqil aj at tuq tetz tzan tanqꞌin.”
Aj Tyolin Jesus Tiꞌj Te Jwisy
5 Ntons junjun kye tukyꞌiꞌl nkyeyolin tuq tiꞌj te Nin Jay Nabꞌil Qtata Dios, nkyqꞌumaꞌ tuq kye abꞌj kꞌulbꞌen tetz bꞌan tbꞌanil bꞌix ax bꞌan tbꞌanil kyoyej kye xjal txakbꞌil te jay. Ntons te Jesus oxik tqꞌumaꞌ ikxjani: 6 “Tzul jun tyemp, kyaqil aj bꞌan tbꞌanil nxik eten etetzni nlay kaj per ni jun pant tajsik junky; kyaqil oqtel tiluꞌ.”
7 Ntons junjun aj ajuneꞌ tuq tukyꞌiꞌl oxik kchaꞌoꞌ tetz ikxjani: “Xnaqꞌtzon, ¿janikꞌbꞌaꞌn kyꞌik kyaqil ntzani? ¿Bꞌix tidiꞌ okyꞌel tzan tel qnikyꞌ qa chꞌinky tkyꞌik kyaqil nini?” 8 Ntons te Jesus oxik tqꞌumaꞌ ikxjani: “Intok esiꞌ waq enabꞌl tzan kꞌon eqet eqꞌiꞌ. Komo okyeꞌulel kyꞌilaꞌj xjal okyeyoliyon tukyꞌi nbꞌi iktzeꞌxtzun aꞌin wetz, bꞌix oxeꞌl kyqꞌumaꞌ ikxjani: “Aꞌin wetz [te Koloyon Aj Qꞌumankaj Oqtxiꞌ],” kyekyitel. Bꞌix ax oxeꞌl kyqꞌumaꞌ ikxjani: “Ajnaꞌl chꞌinky tul [te jwisy].” Ntons etetz kꞌon kxꞌok lapet kyiꞌj. 9 Bꞌix chaꞌoj tok echaꞌoꞌ jaꞌchq nꞌok qꞌoj bꞌix kye xjal jaꞌchq nkyejaw labꞌun, yatzun etetz kꞌon kxobꞌ waq tzan tpaj okyꞌelkixiꞌ kyaqil nini minaꞌ tpon te tmankbꞌil, per te tmankbꞌil nlay pon bꞌeyxnajji.” 10 Bꞌix ax oxik tqꞌumaꞌ ikxjani: “Kyijajil txqꞌan xjal okyeqꞌojiyonkix tiꞌj kyijajil txqꞌanky xjal, bꞌix txqꞌan amaqꞌ okyeqꞌojiyon kyiꞌj txqꞌanky amaqꞌ. 11 Okyekyꞌel kabꞌjunabꞌ bꞌan jwert, bꞌix owokel eꞌeꞌ twitz yabꞌil bꞌan jwert bꞌix waꞌij jaꞌchq. Tidiꞌchq aj nim txobꞌlal bꞌix tidiꞌchq bꞌan chuktky ojawel jalet twitz kaꞌj.
12 Per aj minaꞌ tuq tkyꞌik kyaqil ntzani, etetz okxjawel tzyuꞌ bꞌix okxjawel lajoꞌ. Etetz tzan tpaj etokslbꞌen wiꞌj, etetz okxeꞌl qꞌapoꞌ tuj kyqꞌabꞌ kye aj at kyajwalil kyuj kye jay nabꞌil Dios bꞌix okxtex siꞌ pres bꞌix okxeꞌl eqꞌiꞌ kywitz kye kywitzaleꞌ kꞌulul mandad bꞌix kywitz kye aj at nim kyajwalil. 13 Ikxji etetz bꞌaꞌn tzan eyolin wiꞌj wetz kywitz kyetz. 14 Per intqet ebꞌisuꞌ tuj etanim tzan kꞌon ebꞌisun tiꞌj tidiꞌ okxyoliyon tzan ekolon etibꞌx. 15 Komo wetz oxeꞌl nsiꞌ te eyol tukyꞌi jun enabꞌl, astilji nijunwt kye etajqꞌoj obꞌantel tzan kyqꞌuman jun tidiꞌ nyaꞌtx galan etiꞌj qatzun tiꞌj aj nꞌeyoliꞌji.* 16 Bꞌix okyejawel meltzꞌjik etiꞌj, okxeꞌl qꞌapoꞌ [tuj kyqꞌabꞌ kye kꞌulul mandad] tzan kye etat-x, bꞌix kye etermanx, bꞌix kye aꞌeꞌ efamilyx bꞌix kye aꞌeꞌ etajyol, bꞌix junjun te etetz okxtel kansaꞌ, 17 bꞌix etetz [aj nkyinꞌetokslaꞌ] okxꞌokel qꞌojiꞌ kyitzaꞌ kyaqil xjal tzan tpaj etokslbꞌen wiꞌj. 18 Per [anke owokel etiꞌj ikxji], kolomixkix [tuj tqꞌabꞌ Qtata Dios];a 19 okoletel te etanim tzan tpaj nlay kaj esiꞌ tzan etokslan.
20 Oj txik eten te amaqꞌ Jerusalen ajun soldad kyajqꞌoj nojnaqeꞌ tiꞌj, ntons owelal enikyꞌ chꞌinky tuq tzan tpon najsaꞌ. 21 Yaji kye aj akyeqet tuj Judey inkyoqik twiꞌ witz, bꞌix kye aj akyeqet tuj amaqꞌ Jerusalen ax inkyex naj tuj te amaqꞌ, bꞌix kye aj akyeqet xtxaꞌm amaqꞌ kꞌontiꞌl tzan kyox. 22 Komo nini owokel jun tyemp aj owokel siꞌ jun nim xhchoꞌnal kyiꞌj kye xjal [aj tijajil Israel] tzan tponkix te aj tzꞌibꞌaꞌ tuj Tuꞌjal Dios.* 23 Lasteꞌ kye xuj [aj Judey] aj chꞌinky kkyꞌix tuj aj qꞌijji, qatzun kye aj xuj tzunx nkyetxuꞌun kyal, komo owokel nim bꞌis txini bꞌix jun nim xhchoꞌnal otzajel siꞌ kyajsik qxjalil. 24 Bꞌan kyꞌilaꞌj kyetz okyeqtel kansaꞌ tukyꞌi machit kansbꞌil bꞌix txqꞌanky okyexeꞌl eqꞌiꞌ pres tuj kyaqil amaqꞌ jaꞌchq. Bꞌix kye aj nyaꞌtx tijajil Israel okyeꞌelax tajsik Jerusalen maxkix oj tpon te tyemp aj qꞌumankaj kyiꞌj [tzan Qtata Dios].
25 Owokel en tidiꞌchq bꞌan chuktky twitz qꞌij bꞌix tiꞌj qyaꞌ bꞌix kyiꞌj kye cheꞌw.* Bꞌix tzani twitz txꞌoꞌtxꞌ kye xjal okyexobꞌel bꞌix okyebꞌisuyon tiꞌj titzaꞌ nxojin te nim aꞌ [bꞌan chuktky] bꞌix titzaꞌ npon pulan [bꞌan chuktky] xtxaꞌm te nim aꞌ. 26 Kye xjal okyetzajel numan tzan kxobꞌal oj tqet kybꞌisuꞌ tiꞌj aj okyꞌel twitz ja txꞌoꞌtxꞌni; bꞌix tidiꞌchq aj at twitz kaꞌj okyejawel kyitoꞌ. 27 Ntons okyinxeꞌl eꞌeꞌ [wetz] te Ichan Aj Tkꞌwaꞌal Dios [aꞌin] ikjaꞌn ntzaj tuj muj tukyꞌi wajwalil bꞌix tukyꞌi nim nxhqitzꞌunal.* 28 Ya oj taqꞌik tzan tkyꞌik kyaqil ntzani, intok esiꞌ enabꞌl bꞌix intjaw etin ewiꞌ [nimsan waq ekꞌuꞌj] tzan tpaj chꞌinky tuq tzan ekolet.”
29 Ntons te Jesus ax oxik tqꞌumaꞌ ja yekꞌbꞌil ntzani: “Intok esiꞌ waq enabꞌl tiꞌj te wiꞌ igos bꞌix kyaqil kye tzeꞌ. 30 Chaꞌoj tok eteꞌeꞌ ikjaꞌn ktzaj kꞌuplet txaq, etetz nꞌel enikyꞌ chꞌinky qok kwares. 31 Ax ikxji tiꞌj te aj maꞌtx xik nqꞌumaꞌni, tzan tpaj chaꞌoj tok eten aj nkyꞌik ikxji twitz txꞌoꞌtxꞌ, owelal enikyꞌ telponx chꞌinky tul te Qtata Dios kꞌulul mandad tukyꞌi nim tajwalil. 32 Wetz oxeꞌl nqꞌumaꞌ etetz te bꞌanꞌax, kyaqil ntzani okyꞌel minaꞌ kykamik kye ja qijajilni. 33 Te twitz kaꞌj bꞌix te twitz txꞌoꞌtxꞌ okyepoyonaj, per wetz nyol nlay ponaj, [opoyonkixiꞌ kyaqil aj maꞌtx xik nqꞌumaꞌ]. 34 Intok esiꞌ enabꞌl tzan kꞌon tok esiꞌ ekꞌuꞌj cha aꞌox tiꞌj jun chalajbꞌil tzani twitz txꞌoꞌtxꞌ qatzun tiꞌj te xhbꞌaꞌj qatzun tiꞌj tidiꞌchq aj cha aꞌox nꞌoken tzan qanqꞌin twitz ja txꞌoꞌtxꞌni, bꞌix derepent okanoyon etiꞌj kyaqil tuj aj qꞌijji iktzaꞌ jun xpatxabꞌ. 35 Komo okyꞌel kyaqil ntzani kyiꞌj kyaqil xjal twitz txꞌoꞌtxꞌ. 36 Etetz peꞌeten list, peꞌexnaqꞌtzan waq bꞌajqꞌij tzan ekolet tiꞌj kyaqil aj okyꞌelni, bꞌix tzan [kꞌon eqet kyꞌixwik tuj aj qꞌijji chaꞌoj] tpon eyekꞌuꞌtz etibꞌ nwitz [wetz] te Ichan Aj Tkꞌwaꞌal Dios [aꞌin].”