12
Te Yekꞌbꞌil Kyiꞌj Kye Aqꞌunayon Aj Nyaꞌtx Galan Kyemodin
1 Yaji te Jesus owaqꞌik tzan tyolin kyukyꞌiꞌl tukyꞌi yekꞌbꞌil, oxik tqꞌumaꞌ kyetz ikxjani: “Ntons at tuq jun xjal, oqet tawaꞌ jun pedas xtxꞌoꞌotxꞌ tukyꞌi lobꞌj ub.* Oqet tkꞌuluꞌ jun nim peꞌon byenech tiꞌj bꞌix oqet tkꞌuluꞌ jun jul te xajbꞌil te lobꞌj ub bꞌix ojaw tkꞌuluꞌ jun txbꞌuqbꞌil nim twaꞌlkal. Yaji oxik tswaꞌ te xtxꞌoꞌotxꞌ majenj kyukyꞌi txqꞌan xjal bꞌix yaji tetz oxik laqꞌchik. 2 Yatzun ma pon tyemp tzan tjaw te lobꞌj ub bꞌix komo tetz laqꞌchik tuq at, oxik tlajoꞌ jun tmos tzan txik tkꞌamoꞌtz tuq te txqꞌan lobꞌj ub te taꞌal xtxꞌoꞌotxꞌ. 3 Per kye majenayon cha oqet ktzyuꞌ, bꞌix oqet kybꞌujuꞌ bꞌix owaj kylajoꞌ tjay, kꞌontiꞌl oxik ksiꞌ chꞌinwt taꞌal te txꞌoꞌtxꞌ. 4 Ntons yaji te tajaw oxik tlajoꞌ junky tmos, per yatzun kye majenayon, kyetz oqet kyokꞌonsaꞌ tiꞌj twiꞌ bꞌix owok kyyasoꞌ. 5 Yaji te tajaw oxik tlajoꞌ junky taqꞌunon per yatzun kye majenayon, kyetz oqet kykansaꞌ te aj mosjji. Yaji kyꞌilaꞌj-elky te tajaw oxik tlajoꞌ txqꞌanky tmos per junjun ebꞌajqet kansaꞌ bꞌix junjunky ebꞌajqet bꞌujuꞌ. 6 Yaji te tajaw kꞌontiꞌl tuq junky taqꞌunon, aꞌox tuq jun tkꞌajol bꞌix ganiꞌ tuq nim titzaꞌ. Ntons oqet tbꞌisuꞌ ikxjani: “Te nkꞌajol oqtel kyokslaꞌ tzan tpaj nkꞌajol.” 7 Per yatzun kye majenayon, aj txik kyeꞌeꞌ te tkꞌajol, oqet kykawlaꞌ kyibꞌkyibꞌx ikxjani: “Te aj nini, aji owetzayon te txꞌoꞌtxꞌ kyaqil. Mejor intqet jkansaꞌ tzan jkaj tajaw te txꞌoꞌtxꞌ kyaqil,” kyekyi. 8 Ntons oqet ktzyuꞌ bꞌix oqet kykansaꞌ bꞌix yaji owex kxoꞌoꞌ tiꞌjx te peꞌon. 9 Ntons ¿tidiꞌ oqtel tkꞌuluꞌ te tajaw txꞌoꞌtxꞌ? Tetz opoyon bꞌix okyeqtel tkansaꞌ kye majenayon. Yaji oxeꞌl tswaꞌ xtxꞌoꞌotxꞌ majenj kyukyꞌi txqꞌanky xjal. 10 Minaꞌ petzun tjaw eteꞌeꞌ tuj Tuꞌjal Dios aj jaꞌ nyolin ikxjani: “Te abꞌj aj owel kyikꞌoꞌ kye kꞌulul jay tbꞌay, oje tzꞌoken ajnaꞌl te twitꞌlel te eskin. 11 A te Qajawil oqet kꞌulun te ntzani bꞌix nꞌel tuj qwitz bꞌan galan.””*
12 Yaji [kye aj at nim kyajwalil tuj te Nin Jay Nabꞌil Qtata Dios], kyetz kygan tuq tzan tjaw ktzyuꞌ, tzan tpaj owel kynikyꞌ te yekꞌbꞌil nyolin tuq kyiꞌj kyetz. Per kꞌontiꞌl okynimsaj kykꞌuꞌj tzan tjaw ktzyuꞌ tzan tpaj nkyexobꞌ tuq kywitz kye xjal, ntons okaj ksiꞌ bꞌix eꞌaj.
Aj Tyolin Jesus Tiꞌj Te Chojenj
13 Ntons oxik kylajoꞌ junjun aj bꞌuchꞌuj Parisey bꞌix junjun tmulon te kꞌulul mandad aj Eródes tzan kyyolin tukyꞌi Jesus tzan tqet tuq kyeqꞌiꞌ tiꞌj tukyꞌi tyolx. 14 Ebꞌajpon tukyꞌiꞌl bꞌix oxik kchaꞌoꞌ tetz ikxjani: “Xnaqꞌtzon, qetza qebꞌena yatz jun chyolin bꞌix kꞌontiꞌl nchkꞌulun jun tidiꞌ cha aꞌox tzan akaj galan tuj kywitz txqꞌanky, tzan tpaj kꞌontiꞌl nꞌok asiꞌ anabꞌl tiꞌj jun xjal titzaꞌ tok kaꞌyin tiꞌj bꞌix nxikkix axnaqꞌtzaꞌ tuj tumeꞌl iktzaꞌ te Qtata Dios tgan. Ntons, ¿titzaꞌ atz tuj anabꞌl, bꞌaꞌn peꞌ tukyꞌi te Kawbꞌil tzan txik qchojoꞌ chojenja te twitzaleꞌ kꞌulul mandadb qatzun nyaꞌtxji?”c
15 Yatzun te Jesus ya ma tzꞌel tnikyꞌ tiꞌj kylaꞌjul, oxik tqꞌumaꞌ ikxjani: “¿Tistil egan tzan nqet eteqꞌiꞌ? Instzaj esiꞌ jun tmind tzan tok qen.” 16 Ntons oxik ksiꞌ jun tmin, bꞌix oxik tqꞌumaꞌ ikxjani: “¿Abꞌl qitzbꞌalil atok twitz ja tminni, bꞌix tidiꞌ nyolin tiꞌj?” Ntons kyetz owaj ktzaqꞌbꞌeꞌ: “Te titzbꞌalil te César bꞌix tbꞌi nyolin tiꞌj.” 17 Ntons te Jesus oxik tqꞌumaꞌ kyetz ikxjani: “Ntons intxik esiꞌ te César te aj te tetz bꞌix intxik esiꞌ te Qtata Dios te aj te Qtata Dios.” Ntons kyetz oje kyelabꞌan titzaꞌ owajtz tqꞌumaꞌ.
Aj Tyolin Jesus Tiꞌj Te Oj Qjaw Anqꞌin
18 Ntons ebꞌajpon tukyꞌi Jesus txqꞌan xjal aj bꞌuchꞌuj Sadusey, kyetz kꞌontiꞌl tuq nkyokslaꞌ qa oqojawel anqꞌin.* Ntons oxik kyqꞌumaꞌ te Jesus ikxjani: 19 “Xnaqꞌtzon, te Moisés okaj stzꞌibꞌaꞌ qa jun ichan okamel bꞌix kꞌontiꞌl jun tkꞌwaꞌal okajel tiꞌj te txuꞌjel, ntons te txuꞌjel bꞌaꞌn tzan tok junan tukyꞌi jun titzꞌin te ichan tzan tkaj tijajil.* 20 Ntons, ateꞌ tuq wuq ichan kyerman kyibꞌ. Yatzun te tbꞌay ermanj owok junan bꞌix minaꞌ tuq tkꞌwaꞌlin, tkamik. 21 Yaji te tkabꞌiꞌ ermanj owok junan tukyꞌi te tixnaꞌ. Yaji ax tetz okamik bꞌix minaꞌ tuq tkꞌwaꞌlin. Yaji ax ikxji okyꞌik tiꞌj te toxiꞌ ermanj. 22 Yaji ikxji okyꞌik kyiꞌj kyaqil kye txqꞌanky ermanj. Yaji okamik te xuj. 23 Ntons, qa bꞌanꞌax oqojawel anqꞌin, ¿abꞌl jun te kyetz ojawel xujelan te xuj [oj qjaw anqꞌin]? Komo kywuqil eꞌok junan tukyꞌi te xuj.”e
24 Ntons te Jesus oxik tqꞌumaꞌ ikxjani: “Etetz nyaꞌtx tumeꞌl nkxyolin tzan tpaj kꞌontiꞌl nꞌel enikyꞌ tiꞌj te Tuꞌjal Dios bꞌix kꞌontiꞌl nꞌetokslaꞌ qa te Qtata Dios at tajwalil tzan tbꞌantik tiꞌchq titzaꞌ. 25 Komo kye anim chaꞌoj kyjaw anqꞌin, kyetz nlay kyeꞌok junan tzan tpaj okyeꞌokel iktzaꞌ ángel tuj kaꞌj [kyetz kꞌontiꞌl nkyeꞌok junan]. 26 Yatzun kyiꞌj kye anim qa okyejawel anqꞌin, ¿minaꞌ petzun tjaw eteꞌeꞌ aj jaꞌ oqet stzꞌibꞌaꞌ te Moisés oqtxiꞌ aj jaꞌ nyolin tiꞌj te kyꞌiꞌx? Komo aj tjaw kanet te Qtata Dios twitz, tetz oxik tqꞌumaꞌ tukyꞌi Moisés ikxjani: “Wetz aꞌin te Dios aj intzaj tnaꞌoꞌ te Abran bꞌix te Isak bꞌix te Jacob.”* 27 Ntons te Qtata Dios tetz nyaꞌtx aꞌox jun Dios kye aj oje kyekamik, sinoke ax Dios kye aj itzꞌojeꞌ. Ntons etetz nyaꞌtx tumeꞌl nkxyolin.”
Aj Tyolin Jesus Alkyetz Te Aj Mas Presis Tzan Tqet Qokslaꞌ
28 Yaji otzaj laqꞌchet jun xnaqꞌtzal Kawbꞌil bꞌix tetz nchaꞌon tuq kyiꞌj aj nkyewululun tuq tukyꞌi Jesus. Owok ten titzaꞌ te Jesus owaj stzaqꞌbꞌeꞌ byenech tuj tumeꞌl. Ntons oxik xhchaꞌoꞌ tetz te Jesus ikxjani: “¿Alkyetz te aj mas presis aj okaj tqꞌumaꞌ Dios oqtxiꞌ tzan tqet qokslaꞌ?” 29 Yaji te Jesus oxik tqꞌumaꞌ ikxjani: “Te aj mas presis tzan tqet qokslaꞌ a te aj jaꞌ nyolin, “Instzaj echaꞌoꞌ waq etetz aj tijajil Israel aꞌix, te Etajawil aj Qtata Dios ntzaj enaꞌoꞌ, aꞌox tetz Etajawil, 30 bꞌix intqet eganiꞌ te Etajawil aj Qtata Dios ntzaj enaꞌoꞌ, intqet eganiꞌ tukyꞌi jun tkꞌuꞌjlal tuj etanim, bꞌix tukyꞌi jun tkꞌuꞌjlal tukyꞌi enabꞌl, bꞌix tukyꞌi jun tkꞌuꞌjlal tukyꞌi ebalor, bꞌix tukyꞌi jun tkꞌuꞌjlal tiꞌj kyaqil.”f 31 Yatzun te tkabꞌiꞌ aj mas presis tzan tqet qokslaꞌ a te aj jaꞌ nyolin, “Intqet eganiꞌ abꞌl etetz iktzaꞌ nqet eganiꞌ etibꞌx.”* Ntons kꞌontiꞌl junky Tyol Dios qꞌumankaj aj mas presis twitz kykabꞌil ja ntzani.”
32 Yaji kyi te xnaqꞌtzal Kawbꞌil ikxjani: “Xnaqꞌtzon, bꞌanꞌax tumeꞌl aj nꞌayoliꞌni. Aꞌox jun Dios at bꞌix kꞌontiꞌl junky* 33 bꞌix presis tzan tqet qganiꞌ tukyꞌi jun tkꞌuꞌjlal tuj qanim, bꞌix tukyꞌi jun tkꞌuꞌjlal tukyꞌi qnabꞌl, bꞌix tukyꞌi jun tkꞌuꞌjlal tukyꞌi qbalor, bꞌix tukyꞌi jun tkꞌuꞌjlal tiꞌj kyaqil, bꞌix ax tzan kyqet qganiꞌ abꞌl qetz iktzaꞌ nqet qganiꞌ qibꞌx. Nini mas presis twitz jun oyej aj nqet tzꞌeꞌsaꞌ twitz Qtata Dios bꞌix kyaqil qpresentg aj nxik qsiꞌ te tetz.”*
34 Yaji te Jesus owok ten, te xjal nyolin tuq tukyꞌi jun tnabꞌl bꞌan galan. Astilji oxik tqꞌumaꞌ tetz ikxjani: “Yatz chꞌinky tkaj aqꞌapoꞌ awibꞌ tuj tqꞌabꞌ te Qtata Dios.” Ntons, yaji nijunwt abꞌl otnimsaj tkꞌuꞌj tzan txik tqaniꞌ mas tukyꞌiꞌl.
Aj Tyolin Jesus Abꞌl Qijajil Te Koloyon Aj Qꞌumankaj Oqtxiꞌ
35 Yaji te Jesus nkyexik txnaqꞌtzaꞌ tuq kye xjal tuj te Nin Jay Nabꞌil Qtata Dios, oxik xhchaꞌoꞌ kyetz ikxjani: “¿Tistil nkyyoliꞌ kye xnaqꞌtzal Kawbꞌil qa te Koloyon Aj Qꞌumankaj Oqtxiꞌ tetz jun aj tijajil Dawid? 36 Komo te Dawid, aj man tuq nyolin te Txew Dios tuj tanim, oxik tqꞌumaꞌ ikxjani: “Te Qtata Diosh oxik tqꞌumaꞌ te Wajawil,i ‘Paqet witꞌlet tzani tuj nbꞌanqꞌabꞌ bꞌix nkꞌuluꞌtz tzan kyqet kye awajqꞌoj witzaꞌ.’ ”j 37 Axk te Dawid nꞌok tqꞌumaꞌ “Wajawil.” Ntons, ¿titzaꞌ ikxji qa te Koloyon Aj Qꞌumankaj Oqtxiꞌ tetz jun tijajil [Dawid]?” Ntons, kyaqil kye xjal nkyechaꞌon tuq tiꞌj tukyꞌi jun chalajbꞌil.
Aj Txik Tqꞌumaꞌ Jesus Tzan Tok Ksiꞌ Kynabꞌl Kyiꞌj Kye Aj Nim Kyajwalil
38 Ax nxik tqꞌumaꞌ tuq kyetz ikxjani: “Intok esiꞌ waq enabꞌl kyiꞌj kye xnaqꞌtzal Kawbꞌil aj kygan tzan kybꞌet tukyꞌi kyqꞌanaq xluj bꞌix ax tzan kyok limaꞌ tzan kyaqil xjal plasiyon. 39 Kyetz chaꞌoj kyox kyuj kye jay nabꞌil Dios, qa chaꞌoj kyqeten tuj jun ninqꞌij, mer kygan kywitꞌlel aj jaꞌ tzan kyok limaꞌ tzan kyaqil xjal. 40 Kyetz ax nꞌel kyin tidiꞌchq te jun chꞌi byud bꞌix tukyꞌi jun kxnaqꞌtzbꞌil nim tuj nqet kyyekꞌuꞌ iktzeꞌxtzun galan-eꞌ. Kyiꞌj kyetz te Qtata Dios oxeꞌl tsiꞌ mas nim xhchoꞌnal.”
Aj Tyolin Jesus Tiꞌj Te Toyej Jun Chꞌi Byud Mebꞌaꞌ
41 Yaji tetz witꞌliqet tuq qaynin twitz te tqatel tmin [tuj te Nin Jay Nabꞌil Qtata Dios] bꞌix nkaꞌyin tuq kyiꞌj kye xjal aj nqex ksiꞌ tuq kytumin. Ebꞌajpon kyꞌilaꞌj qꞌinon xjal bꞌix kyetz oqex ksiꞌ nim kytumin. 42 Yaji ax opon jun chꞌi xuj byud bꞌan mebꞌaꞌ tuq. Oqex tsiꞌ chꞌi kabꞌeꞌ tmin iktzaꞌ twisentab.k 43 Te Jesus aj txik teꞌeꞌji, ntons tetz etzaj tukꞌleꞌ kye txnaqꞌatz bꞌix oxik tqꞌumaꞌ kyetz ikxjani: “Wetz oxeꞌl nqꞌumaꞌ etetz bꞌanax, te aj chꞌi byud mebꞌaꞌni maꞌtx qex tsiꞌ mas nim kywitz kye txqꞌanky. 44 Kye txqꞌanky ma qex ksiꞌ aꞌox te aj nsobrin tuq te kyetz, per te ja chꞌi byudni maꞌtx qex tsiꞌ kyaqil aj chimoꞌ tuq titzaꞌ tuj tmebꞌaꞌul, kyaqil aj bꞌaꞌn tuq tzan token tzan twaꞌan.”