11
Aj Tpon Jesus Tuj Amaqꞌ Jerusalen
1 Ntons aj chꞌinky tuq kypon tuj amaqꞌ Jerusalen, qaynin tiꞌj te Betfaje bꞌix te Betany, [kabꞌeꞌ aldey] txeꞌ te witz Olib, bꞌix yaji te Jesus exik tlajoꞌ kabꞌeꞌ txnaqꞌatz, 2 oxik tqꞌumaꞌ kyetz ikxjani: “Pex waq tuj aj aldey aj nxik qen junxlaꞌ txini bꞌix chaꞌoj epon tzi, owokel noj ewitz jun nin tal bur kꞌaloꞌ bꞌix minaꞌ tiqan xjal ni jun-el. Owelal epujuꞌ bꞌix otzajel etin. 3 Qa at abꞌl otzajel chaꞌon etetz tistil nꞌel epujuꞌ etetz oxeꞌl eqꞌumaꞌ. “Te Qajawil owokeyon titzaꞌ per owajetz tswaꞌ luwew tzanikixiꞌ.””
4 Ntons kyetz ebꞌajxik bꞌix owoknoj te tal bur kywitz, bꞌix kꞌaloꞌ twitz jun lamel tuj bꞌey bꞌix owel kypujuꞌ. 5 Akyeqet tuq junjun xjal tzi bꞌix oxik kyqꞌumaꞌ ikxjani: “¿Tistil nꞌel epujuꞌ te tal burni?” 6 Ntons kyetz owaj ktzaqꞌbꞌeꞌ iktzaꞌx txiklen tqꞌumaꞌ te Jesus bꞌix ikxji kye xjal oktzoqpij tzan txik kyin.
7 Ntons, opon kyin te bur twitz Jesus, ojax ksiꞌ kye kyqꞌanaq tajsik te jun txpatxiꞌj, bꞌix te Jesus ojaw iqaꞌ. 8 Kyꞌilaꞌj xjal oqet ksiꞌ ktxoꞌw tuj tbꞌey bꞌix junjunky oxik ksakoꞌ txaq tzeꞌ tuj tbꞌey.a 9 Kyaqil kye xjal aj tbꞌayomeꞌ tuq twitz bꞌix kye aj lapikeꞌ tuq tiꞌj nkyechalajsan tuq tiꞌj, nkyesikyꞌin tuq ikxjani: “¡Hosana! [¡Galanxwit te aj maꞌtx tzul kolol qetz!]b ¡Galanxwit kyꞌik tiꞌj te aj tzul te tlajen Qajawil!* 10 ¡Galanxwit tzꞌel te tajwalil te qijajil Dawid, te tajwalil aj owokel junkyꞌel!c ¡Hosana! ¡Intqet jiqꞌbꞌaꞌxwit te Qtata Dios aj atjax tuj kaꞌj!”
11 Ntons ikxji owox te Jesus tuj amaqꞌ Jerusalen bꞌix tuj te Nin Jay Nabꞌil Qtata Dios. Bꞌix ya ma tzꞌok ten titzaꞌ atqet tuq kyaqil, komo qaleꞌky tuq, owex bꞌix oxik Betany kyukyꞌi kye kykabꞌlajujil txnaqꞌatz.
Aj Stzaj Tqanbꞌeꞌ Jesus Tajsik Jun Wiꞌ Igos
12 Bwen, tuj junky iwitq aj kyetz tuj Betany, te Jesus otzajꞌel tkꞌuꞌj. 13 Yaji oxik ten jun wiꞌ igos at tuq txaq, oxik laqꞌchet qaynin eꞌel qa at tuq twitz. Opon qaynin bꞌix oxik ten kꞌontiꞌl tuq twitz, komo nyaꞌtx tuq tyemp tetz. 14 Ntons te Jesus oxik tqꞌumaꞌ tyol tiꞌj te tzeꞌ ikxjani: “Nijunwt xjal nlay xik loꞌonky te awitz ajnaꞌl.” Ntons, kye txnaqꞌatz okchaꞌoj.
Aj Kyex Tlajoꞌ Jesus Kye Kꞌayiyon Tuj Te Nin Jay Nabꞌil Qtata Dios
15 Ntons, yaji aj kypon Jerusalen eꞌox tuj te Nin Jay Nabꞌil Qtata Dios. Bꞌix te Jesus owaqꞌik tzan kyetz tlajoꞌ kye aj nkyekꞌayin bꞌix kye aj nkyeloqꞌon tuq tzi bꞌix ebꞌajjaw tpoxkꞌaꞌ kymes kye aj nkyebꞌajkyꞌexbꞌen tuq tmin bꞌix ax ebꞌajjaw tpoxkꞌaꞌ kybank kye aj nkyekꞌayin tuq palom. 16 Yaji kꞌontiꞌl ostzoqpij tzan kꞌon tkyꞌik nijunwt tukyꞌi iqtz tuj te Nin Jay Nabꞌil Qtata Dios. 17 Bꞌix oxik tqꞌumaꞌ kye xjal ikxjani: “Tzꞌibꞌankaj tuj te Tuꞌjal Dios ikxjani: “Wetz njay owokeyon kye kyaqil amaqꞌ tzan kyox xnaqꞌtzon tuj.” [Ikxji nyolin te Tuꞌjal Dios], per yatzun etetz maꞌtx ekꞌuluj tzan token etitzaꞌ iktzaꞌ kyjay eleqꞌ.”d
18 Ntons yatzun kye pal aj nim kyajwalil, kyukyꞌi kye xnaqꞌtzal Kawbꞌil, kyetz owok kchaꞌoꞌ nyolin tuq ikxji bꞌix oqet kykawlaꞌ kyibꞌ titzaꞌ tuq oqtel kykansaꞌ tzan tpaj nkyexobꞌ tuq tiꞌj tzan tpaj kyaqil kye xjal bꞌan nkyechalaj tuq tiꞌj te aj ntqꞌumaꞌ.e
19 Yaji, aj qok qaleꞌ, ntons te Jesus omeltzꞌjik Betany junkyꞌelky kyukyꞌi kye txnaqꞌatz.
Aj Tyolin Jesus Tzan Kyqet Qnajsaꞌ Kye Aj Nkyekꞌulun Nyaꞌtx Galan Qiꞌj
20 Ntons tuj junky iwitq qꞌeqoꞌ ekyꞌikky aj jaꞌ tuq atqet te wiꞌ igos bꞌix owok kyen ojetq tuq jaw kyꞌixwik kyaqil tukyꞌix tlokꞌ. 21 Te Xhpeꞌy otzaj tiktzꞌan tuj tanim aj oxik tqꞌumaꞌ te Jesus tiꞌj te tzeꞌ, bꞌix oxik tqꞌumaꞌ tetz te Jesus ikxjani: “Xnaqꞌtzon, intxik awen te tzeꞌ aj otzaj aqanbꞌeꞌ tajsik iwini. ¡Ajnaꞌl maꞌtx jaw kyꞌixwik!”
22 Yaji te Jesus oxik tqꞌumaꞌ ikxjani: “Etetz intok witꞌlet ekꞌuꞌj tiꞌj Dios. 23 Oxeꞌl nqꞌumaꞌ etetz te bꞌanꞌax, abꞌl aj oxeꞌl tqꞌumaꞌ te ja witzni, “Pawel tzi bꞌix intxik axoꞌoꞌtz awibꞌ tuj aꞌ,” qa te xjal kꞌontiꞌl nnaꞌnon tanim sinoke witꞌlikok tkꞌuꞌj tiꞌj te Qtata Dios qa ikxji obꞌantel, ntons ikxjikix okyꞌel. 24 Astilji oxeꞌl nqꞌumaꞌ etetz, chaꞌoj txik eqaniꞌ jun tidiꞌ tukyꞌi Dios, intok witꞌlet ekꞌuꞌj iktzaꞌ ojetq ekꞌamoj; yaji ekꞌamoꞌtz.* 25 Qa man tuq nkxxnaqꞌtzan tukyꞌi Qtata Dios oj stzaj tiktzꞌan tuj etanim jun xjal aj ojetq tkꞌuluj nyaꞌtx galan etiꞌj, ntons intqet enajsaj waq; ikxji ax onajsletel te echoj etetz tzan Qtata Dios aj atjax tuj kaꞌj. 26 Per qa etetz nlay enajsaj ntons ax ikxji ax nlay najslet te echoj tzan Qtata Dios aj atjax tuj kaꞌj.”*
Titzaꞌ Owaj Stzaqꞌbꞌeꞌ Jesus Kye Kꞌulul Mandad Tuj Te Nin Jay Nabꞌil Qtata Dios
27 Ntons yaji te Jesus kyukyꞌi kye txnaqꞌatz ebꞌajpon junkyꞌelky Jerusalen. Aj man tuq nkyebꞌet tuj te Nin Jay Nabꞌil Qtata Dios, eꞌok laqꞌchet kyiꞌj kye pal aj nim kyajwalil kyukyꞌi kye xnaqꞌtzal Kawbꞌil bꞌix txqꞌanky kywitzaleꞌ nim kyajwalil kxol kye aj tijajil Israel. 28 Oxik kyqꞌumaꞌ kyetz te Jesus ikxjani: “¿Tidiꞌ awajwalil tzan akꞌulun tiꞌchq tzani? ¿Abꞌl oxik sin te awajwalil tzan akꞌulun tiꞌchq tzani?” 29 Ntons te Jesus oxik tqꞌumaꞌ kyetz ikxjani: “Ax wetz oxeꞌl nqaniꞌ etetz, bꞌix qa otzajel eqꞌumaꞌ aj oxeꞌl nqaniꞌ, yaji oxeꞌl nqꞌumaꞌ abꞌl otzaj sin wetz wajwalil. 30 Ntons, instzaj eqꞌumaꞌ ¿abꞌl otzaj lajon te Waꞌnch swal aꞌ kywiꞌ xjal, Qtata Dios peꞌ otzaj lajon tetz qatzun xjalji?” 31 Ntons oqet kykawlaꞌ kyibꞌkyibꞌx ikxjani: “¿Titzaꞌ owajel qtzaqꞌbꞌeꞌ? Qa oxeꞌl jqꞌumaꞌ, “Dios otzaj lajon tetz,” ntons otzajel tqꞌumaꞌ, “¿Tistil kꞌontiꞌl oxik etokslaꞌ?” 32 Bꞌix nlay bꞌantik tzan txik jqꞌumaꞌ qa xjal otzaj lajon tetz.” Nkyeyolin tuq ikxji tzan tpaj nkyexobꞌ tuq kywitz kye xjal, komo kye xjal tuj kynabꞌl te Waꞌnch bꞌanꞌax jun aj yolil tyol Dios tuq. 33 Astilji oxik kyqꞌumaꞌ te Jesus ikxjani: “¡Jeꞌky! Qetza kꞌontiꞌl qebꞌena.” Ntons te Jesus oxik tqꞌumaꞌ kyetz ikxjani: “Ntons ax wetz nlay xik nqꞌumaꞌ abꞌl otzaj sin wajwalil tzan tqet nkꞌuluꞌ ja ntzani.”