21
Aj Tox Te Jesus Tuj Jerusalen Iktzaꞌx Ojetq Tuq Kaj Tzꞌibꞌaꞌ Tiꞌj Bꞌan Oqtxiꞌ
1 Ntons ikjaꞌn tuq kypon qaynin tiꞌj Jerusalen, bꞌix aj kypon [xtxaꞌm] jun aldey Betfaje tbꞌi, tiꞌj te witz Olib, te Jesus exik tlajoꞌ kabꞌeꞌ txnaqꞌatz tzi, 2 bꞌix oxik tqꞌumaꞌ kyetz ikjani: “Pex waq tuj te aldey aj atqet qwitzni. Bꞌix tzi owokelnoj ewitz jun bur tukyꞌi tal bꞌix kꞌaloꞌ. Owelal epujuꞌ bꞌix okyetzajel etin tzani. 3 Qa at abꞌl otzajel tqꞌumaꞌ jun tidiꞌ, intxik eqꞌumaꞌ tetz ikxjani: “Te Qajawil owokeyon titzaꞌ bꞌix owajetz tswaꞌ luwew.””
4 Ntons kyaqil ntzani okyꞌik tzan tponkix tyol te aj yolil tyol Dios, te tyol aj oqet stzꞌibꞌaꞌ oqtxiꞌ ikxjani: 5 “Intxik eqꞌumaꞌ tuj te amaqꞌ Sióna ikxjani, ‘Intxik awen, tzul te twitzaleꞌ kꞌulul mandad etiꞌj. Tetz tzul kyebꞌaꞌ bꞌix galan nabꞌlin, bꞌix tzul iqaꞌ tajsik jun bur, tajsik jun bur man tal, tal jun kway iqal iqtz.’ ”*
6 Ntons, kye txnaqꞌatz ebꞌajxik bꞌix oqet kykꞌuluꞌ te aj ojetq tuq xik qꞌumaꞌ kyetz tzan Jesus. 7 Otzaj kyin te bur bꞌix te tal, ojax ksiꞌ ktxoꞌw tajsik bꞌix te Jesus ojaw iqaꞌ.* 8 Bꞌan kyꞌilaꞌj tuq kye xjal ajuneꞌ, bꞌix nqet tuq ksiꞌ ktxoꞌw tuj tbꞌey te Jesus bꞌix junjunky nqet tuq ksiꞌ txaq tzeꞌ.b 9 Kye aj tbꞌayomeꞌ tuq twitz bꞌix kye aj lapikeꞌ tuq tiꞌj, nkyesikyꞌin tuq ikxjani: “¡Hosana, jun chalajbꞌil te tijajil Dawid! ¡Galanxwit kyꞌik tiꞌj te aj tzul aj tlajen Qajawil! ¡Hosana, jun chalajbꞌil-wit tuj kaꞌj tiꞌj tetz!”*
10 Ntons, aj tox te Jesus tuj Jerusalen kyaqil kye xjal ebꞌajꞌetz labꞌun bꞌix kyꞌilaꞌj nkyechaꞌon tuq ikxjani: “¿Abꞌl te aj xjalni?” 11 Bꞌix kye aj ajuneꞌ tuq tukyꞌiꞌl oxik kyqꞌumaꞌ: “Tetz aji te Jesus aj yolil tyol Qtata Dios. Tzajnaq tuj Nasaret tuj tkwentil Galiley.”
Aj Kyetz Tlajoꞌ Jesus Kye Kꞌayiyon Tuj Te Nin Jay Nabꞌil Qtata Dios
12 Ntons, yaji te Jesus owox tuj te Nin Jay Nabꞌil Qtata Dios bꞌix ebꞌajꞌetz tlajoꞌ kye aj nkyekꞌayin tuq tzi bꞌix kye aj nkyeloqꞌon tuq bꞌix ebꞌajjaw txon te kymes kye kyꞌexbꞌel tmin bꞌix ax kywitꞌlel kye aj kꞌayil palom. 13 Bꞌix oxik tqꞌumaꞌ kyetz ikxjani: “Tuj te Tuꞌjal Dios nyolin ikxjani: “Wetz njay owokeyon tzan exnaqꞌtzan te wetz.”* [Ikxji nyolin te Tuꞌjal Qtata Dios] per yatzun etetz maꞌtx ekꞌuluj tzan token etitzaꞌ iktzaꞌ kyjay eleqꞌ.”*
14 Ntons tzi tuj te Nin Jay ebꞌajꞌok laqꞌchet tiꞌj kye moy bꞌix kye kox, bꞌix ebꞌajqet tqꞌanaꞌ. 15 Per yatzun kye pal aj nim kyajwalil bꞌix kye xnaqꞌtzal Kawbꞌil, ya ma tzꞌok kyen kyaqil kye seny aj nkyelabꞌan kye xjal tiꞌj aj nqet tuq tkꞌuluꞌ, bꞌix aj txik kchaꞌoꞌ kye kꞌwaꞌl nkyesikyꞌin tuq tuj te Nin Jay “Hosana, jun chalajbꞌil te aj tijajil Dawid,” ntons kyetz ebꞌajjaw qꞌojlik. 16 Oxik kyqꞌumaꞌ te Jesus ikxjani: “¿Nxik peꞌ achaꞌoꞌ te aj nkyqꞌumaꞌ kye ja kꞌwaꞌlni?” Yaji te Jesus owaj stzaqꞌbꞌeꞌ kyetz ikxjani: “Tzun, nxik nchaꞌoꞌ. Per ¿minaꞌ petzun tjaw eteꞌeꞌ etetz tuj te Tuꞌjal Dios aj jaꞌ nyolin ikxjani: “Kyukyꞌi kꞌwaꞌl bꞌan nekit bꞌix kyukyꞌi kye aj man nkyetxuꞌun, yatz maꞌtx qet akꞌuluꞌ tzan kchalajsan awiꞌj”?”* 17 Ntons tetz ebꞌajkaj tsiꞌ bꞌix owex tuj te amaqꞌ bꞌix oxik Betany aj jaꞌ oposadin.
Aj Stzaj Tqanbꞌeꞌ Jesus Tajsik Te Tzeꞌ Igos Aj Kꞌontiꞌl Tuq Twitz
18 Bꞌan qꞌeqoꞌ aj tmeltzꞌjik te Jesus tuj amaqꞌ [Jerusalen], tetz otzaj waꞌij tiꞌj. 19 Tetz oxik teꞌeꞌ jun wiꞌ tzeꞌ igos xtxꞌuꞌk te bꞌey, oxwaꞌq eꞌel te tzeꞌ per kꞌontiꞌl tuq twitz, cha pur tuq txaq. Bꞌix oxik tqꞌumaꞌ ikxjani: “¡Ajnaꞌl ya kꞌonky chwitzan!” Bꞌeyxnajji te tzeꞌ igos ojaw kyꞌixwik.
20 Yatzun kye txnaqꞌatz, ya ma tzꞌok kyeꞌeꞌ te aj ojetq tuq kyꞌik, ebꞌajlabꞌan bꞌix oxik kyqꞌumaꞌ tetz ikxjani: “¿Titzaꞌ ma jaw kyꞌixwik te tzeꞌ igos bꞌan luwew?” 21 Ntons te Jesus oxik tqꞌumaꞌ kyetz: “Wetz oxeꞌl nqꞌumaꞌ etetz te bꞌanꞌax, qa etetz owokel witꞌlet ekꞌuꞌj wiꞌj bꞌan byenech bꞌix kꞌontiꞌl nnaꞌnon etanim, ntons obꞌantel etitzaꞌ nyaꞌtx aꞌox iktzaꞌ maꞌtx tzꞌok nkꞌuluꞌ tiꞌj ja tzeꞌni, sinoke bꞌaꞌn tzan txik eqꞌumaꞌ jun tidiꞌ iktzaꞌ te ja witzni, “Pawel tzani bꞌix intxik axon awibꞌ tuj te nim aꞌ,” bꞌix ikxji okyꞌel.* 22 Bꞌix kyaqil aj oxeꞌl eqaniꞌ etetz oj exnaqꞌtzan bꞌix qa witꞌlik ekꞌuꞌj iktzaꞌx nꞌeqaniꞌ, ntons ekꞌamoꞌtz.”*
Te Jesus Nkolon Tibꞌ Kywitz Kye Aj Nkyeqanin Tuq Tetz Jaꞌ Tzajnaq Tuq Tajwalil
23 Yaji te Jesus owox tuj te Nin Jay Nabꞌil Qtata Dios. Bꞌix aj man tuq nxnaqꞌtzan, ebꞌajꞌok laqꞌchet tiꞌj kye pal aj nim kyajwalil bꞌix kye tijxjal kxol kye aj tijajil Israel bꞌix oxik kchaꞌoꞌ tetz ikxjani: “¿Tidiꞌ awajwalil tzan tqet akꞌuluꞌ kyaqil ntzani? ¿Abꞌl oxik sin awajwalil?” 24 Ntons te Jesus owaj stzaqꞌbꞌeꞌ kyetz ikxjani: “Wetz ax oxeꞌl nchaꞌoꞌ jun tidiꞌ etetz; qa etetz owajetz etzaqꞌbꞌeꞌ ntons ax wetz oxeꞌl nqꞌumaꞌ etetz tukyꞌi abꞌl qajwalil nqet nkꞌuluꞌ kyaqil ntzani. 25 ¿Abꞌl otzaj lajon te Waꞌnch tzan tswan aꞌ kywiꞌ kye xjal? ¿[Te Qtata Dios] aj atjax tuj kaꞌj otzaj lajon tetz, qatzun xjal otzaj lajon tetzji?” Ntons kyetz nkyeyolin tuq kyibꞌkyibꞌx ikjani: “Qa oxeꞌl jqꞌumaꞌ qa [te Qtata Dios] aj atjax tuj kaꞌj, ntons otzajel xhchaꞌoꞌ “¿Tistil kꞌontiꞌl oxik etokslaꞌ?” 26 Bꞌix qa oxeꞌl jqꞌumaꞌ qa xjal otzaj lajon tetz, [nlay bꞌantik tzan txik jqꞌumaꞌ ikxji] tzan tpaj kyaqil kye xjal nkyeꞌokslan te Waꞌnch jun aj yolil tyol Qtata Dios tuq.” 27 Ntons kyetz oxik kyqꞌumaꞌ te Jesus ikxjani: “Kꞌontiꞌl qebꞌena.” Yaji tetz oxik tqꞌumaꞌ kyetz ikxjani: “Ntons ax wetz nlay xik nqꞌumaꞌ etetz tukyꞌi abꞌl qajwalil nqet nkꞌuluꞌ kyaqil ntzani.”
Te Yekꞌbꞌil Tiꞌj Kabꞌeꞌ Kꞌwaꞌalbꞌaj
28 [Ntons oxik tqꞌumaꞌ te Jesus ikxjani:] “¿Titzaꞌ nꞌel tuj ewitz? At tuq jun xjal bꞌix ateꞌ tuq kabꞌeꞌ tkꞌwaꞌal. Tzaj te kꞌwaꞌlon, oxik tqꞌumaꞌ tukyꞌi te tbꞌay tkꞌwaꞌal ikxjani: “Nkꞌajol, pax aqꞌunon tuj qawal.” 29 Yaji te tkꞌajol owaj stzaqꞌbꞌeꞌ, oxik tqꞌumaꞌ ikxjani: “Nlay, kꞌon ngan xik.” Per mas yaj otzaj tnaꞌon tetz bꞌix yaji oxik aqꞌunon. 30 Yaji te kꞌwaꞌlon oxik tqꞌumaꞌ tukyꞌi te tkabꞌiꞌ tkꞌwaꞌal iktzaꞌx ojetq tuq xik tqꞌumaꞌ tukyꞌi te tbꞌay tkꞌwaꞌal. Yaji te tkabꞌiꞌ tkꞌwaꞌal owaj stzaqꞌbꞌeꞌ ikxjani: “Bꞌaꞌn tat, wetz ma kyinxik.” Bꞌix yaji tetz kꞌontiꞌl oxik. 31 ¿Alkyetz jun te kyetz oqet tkꞌuluꞌ iktzaꞌ tgan te stat?” Yaji kyetz oxik kyqꞌumaꞌ ikxjani: “A te tbꞌay kꞌwaꞌl.” Yaji te Jesus oxik tqꞌumaꞌ kyetz: “Wetz oxeꞌl nqꞌumaꞌ etetz te bꞌanꞌax, kye aj peyul chojenj bꞌix kye xuj aj kꞌajajiyon, kyetz okyekajel tuj tqꞌabꞌ Qtata Dios tbꞌay ewitz etetz. 32 Te Waꞌnch owul yekꞌul etetz titzaꞌ tuq tzan etanqꞌin tuj tumeꞌl, per etetz kꞌontiꞌl oxik etokslaꞌ. Per yatzun kye aj peyul chojenj bꞌix kye xuj aj kꞌajajiyon, kyetz oxik kyokslaꞌ. Per etetz anke owok eten kyaqil ntzani, kꞌontiꞌl ojaw ekyꞌixpuꞌ enabꞌlin tzan txik etokslaꞌ.”*
Te Yekꞌbꞌil Kyiꞌj Kye Aqꞌunon Aj Nyaꞌtx Galan Kyenabꞌlin
33 “Instzaj echaꞌoꞌ junky yekꞌbꞌil: Te tajaw te jun txꞌoꞌtxꞌ oqex tawaꞌ txqꞌan tawal ub, bꞌix owok tsiꞌ alwert tiꞌj; bꞌix oqet tkꞌuluꞌ jun luwar jaꞌ tzan tetz tyitzꞌoꞌ taꞌal te ub bꞌix ax ojaw tkꞌuluꞌ jun txbꞌuqbꞌil nim twaꞌlkal.* Yaji tetz oxik tsiꞌ majenj kyukyꞌi txqꞌanky aqꞌunon bꞌix tetz oxik [najayon tuj junky luwar]. 34 Ya ma pon tyemp tzan tjaw kyin twitz te awalj, ntons tetz exik tlajoꞌ txqꞌan tmos kyukyꞌi kye majenon tzan tuq tajtz ksiꞌ chꞌin taꞌal te kymajenbꞌen. 35 Per kye majenon, kyetz ebꞌajjaw meltzꞌjik kyiꞌj kye mosj bꞌix jun oqet kybꞌujuꞌ bꞌix junky oqet kykansaꞌ bꞌix junky oqet kyokꞌonsaꞌ tukyꞌi abꞌj. 36 Ntons yaji te tajaw txꞌoꞌtxꞌ exik tlajoꞌ txqꞌanky tmos mas kyꞌilaꞌj twitz te tbꞌay-el, per kye majenon ax owok kykꞌuluꞌ kyiꞌj kyetz iktzaꞌx kyiꞌj kye txqꞌanky tbꞌay-el. 37 Yaji mejor oxik tlajoꞌ te tkꞌajol, tetz nbꞌisun tuq ikxjani: “Te nkꞌajol oqtel kyokslaꞌ.” 38 Per ya ma xik kyeꞌeꞌ te tkꞌajol, kye majenon okyyolij kyibꞌkyibꞌx ikxjani: “Aj ntzani-alo te aj okajel etzan te txꞌoꞌtxꞌ. Intqet jkansaꞌ tzan tkaj te terensy te qetz.” 39 Ntons oqet ktzyuꞌ bꞌix owex kyin tiꞌjx te awalj bꞌix oqet kykansaꞌ. 40 Ntons, oj tpon te tajaw awalj, ¿tidiꞌ etetz tuj enabꞌl oqtel tkꞌuluꞌ kyukyꞌiꞌl kye majenon?” 41 Yaji kyetz owaj ktzaqꞌbꞌeꞌ ikxjani: “Okyeqtel tkansaꞌ kye aj xjal nyaꞌtx galan kyenabꞌlinni bꞌix nlay tzꞌok loꞌet tkꞌuꞌj kyiꞌj, bꞌix oxeꞌl tsiꞌ te xtxꞌoꞌotxꞌ majenj kyukyꞌi txqꞌanky aj bꞌaꞌn tzan tajtz ksiꞌ chꞌin twitz te awalj aj taꞌl te txꞌoꞌtxꞌ.”
42 Ntons te Jesus oxik tqꞌumaꞌ kyetz ikxjani: “¿Tiꞌtzun minaꞌ tjaw eteꞌeꞌ etetz tuj te Tuꞌjal Dios aj jaꞌ nyolin ikxjani? Komo nyolin: “Te abꞌj aj owex xoꞌoꞌ tzan kye albañil, ajnaꞌl oje tzꞌok iktzaꞌ te abꞌj aj bꞌan presis te twitꞌlel jay. A te Qajawil oje kꞌulun ikxji bꞌix bꞌan nqolabꞌan tiꞌj tkꞌulbꞌen.”* 43 Ntons, astilji wetz oxeꞌl nqꞌumaꞌ etetz, owelal in exol etetz te tumelil tzan eten tuj tqꞌabꞌ Qtata Dios bꞌix oxeꞌl siꞌ kye txqꞌanky xjal aj oqtel kykꞌuluꞌ iktzaꞌ te Qtata Dios tgan. 44 Bꞌix abꞌl aj ojawel xpetkꞌan tiꞌj ja abꞌjni, opoyon najsaꞌ; bꞌix qa te abꞌj oqtel tzꞌaqik tajsik jun xjal, te xjal okajel bꞌan xhink.”*