2
Te Tbꞌay Milagr Aj Oqet Tkꞌuluꞌ Jesus
1 Ntons aj tkyꞌiklen oxe qꞌij, nkyeqꞌijlan tuq txqꞌan xjal tuj amaqꞌ Kana tuj tkwentil Galiley kyoklen mojlet kabꞌeꞌ xjal. Te tnan te Jesus atqet tuq tzi, 2 bꞌix te Jesus kyukyꞌi kye txnaqꞌatz ax kyetz ebꞌajxik ukꞌleꞌ tzan kyqꞌijlan. 3 Yaji omankun te kyukꞌaꞌ taꞌal ub, bꞌix tzaj tnan te Jesus, oxik tqꞌumaꞌ te Jesus ikxjani: “Maꞌtx mankun te taꞌal ub.” 4 Te Jesus owaj stzaqꞌbꞌeꞌ ikxjani: “Nan, ¿tistil ntzaj aqꞌumaꞌ wetz? Komo minaꞌ tpon or te wetz.” 5 Yaji te tnan oxik tqꞌumaꞌ ikxjani kye aꞌeꞌ aj nkyesipan tuq kyweꞌ kye xjal: “Intqet ekꞌuluꞌ kyaqil aj otzajel tqꞌumaꞌ.”*
6 Ntons, ateqet tuq tzi waqaq qꞌawubꞌ pur xtxꞌotxꞌal abꞌj aj nꞌoken tuq tqatel kyaꞌ kye xjala oj tqet kykꞌuluꞌ jun kostumbr aj eqꞌiꞌ kyitzaꞌ tzan tkaj saq kyanim. Tuj junjun qꞌawubꞌ kabal tuq nxik mas tajsik lajuj tuj oxqal (50) litr aꞌ tuj. 7 Oxik tqꞌumaꞌ te Jesus kyetz ikxjani: “Intqex enojsaꞌ kye qꞌawubꞌ tukyꞌi aꞌ.” Ntons oqet kynojsaꞌ kye qꞌawubꞌ bꞌix ejaw libꞌan. 8 Yaji te Jesus oxik tqꞌumaꞌ: “Intjatz etin chꞌin bꞌix intxik etin tukyꞌi te xbꞌuqil te qꞌij.” Ntons oxik kyin. 9 Aj txik tnikyꞌbꞌeꞌ te xbꞌuqil te qꞌij, te aꞌ ojetq tuq tzꞌok taꞌal ub, bꞌix te xjal kꞌontiꞌl tuq tebꞌen jaꞌ otzaj te taꞌal ub, per kye mosj kyebꞌenky qa cha aꞌ tuq tbꞌay. Tzaj te xjal, otzaj tukꞌleꞌ te ichan aj njunan tuq 10 bꞌix oxik tqꞌumaꞌ tetz ikxjani: “Kyaqil kye xjal tbꞌay nqet ksiꞌ te aj bꞌan tbꞌanil taꞌal ub. Ya oj tjatz kygan kyaqil, nqet ksiꞌ te aj nyaꞌtx bꞌan tbꞌanil. Per te aj ma qet asiꞌ max tmankbꞌilxiꞌ, mas bꞌan tbꞌanil twitz te junky aj maꞌtx xik qukꞌaꞌ.”
11 Ntons te ja ntzani aj oqet tkꞌuluꞌ te Jesus tuj te amaqꞌ Kana tuj tkwentil Galiley a te tbꞌay yekꞌbꞌil aj oqet tkꞌuluꞌ tukyꞌi tajwalil, ikxji oqet tyekꞌuꞌ tajwalilb iktzaꞌ te Qtata Dios bꞌix kye txnaqꞌatz eꞌokslan tiꞌj. 12 Ntons, ya ma kyꞌik kyaqil ntzani, te Jesus oxik Capernaúm* tukyꞌi te tnan bꞌix kyukyꞌi titzꞌin bꞌix kyaqil kye txnaqꞌatz, bꞌix tzi ekajten kabꞌe qꞌij.
Aj Kyex Tlajoꞌ Jesus Kye Aj Nkyekꞌayin Tuq Tuj Te Nin Jay Nabꞌil Qtata Dios
13 Ntons yaji komo chꞌinky tuq tkanon te qꞌij Paskw* aj eqꞌiꞌ tuq kyitzaꞌ kye aj tijajil Israel, astilji te Jesus oxik tuj amaqꞌ Jerusalen. 14 Bꞌix etzaj tkꞌulbꞌaꞌ tuj te Nin Jay Nabꞌil Qtata Dios kye xjal aj nkyekꞌayin tuq wakxh bꞌix karner bꞌix palom,c bꞌix kye kyꞌexbꞌel tmin. 15 Ya ma xik ten kyaqil nini, oxik tin jun tasyal bꞌix eꞌetz tlajoꞌ kye kꞌayiyon tukyꞌix kyaloꞌ bꞌix kywakaxh bꞌix owel tkyituꞌ kytumin kye aj nkyekyꞌexbꞌen tuq tmin bꞌix ebꞌajjaw tpoxkꞌaꞌ te kymes. 16 Bꞌix oxik tqꞌumaꞌ kye aj kꞌayil palom ikxjani: “Intex etin kyaqil ntzani. Kꞌon tzꞌok te tjay Ntat te jun jay te ekꞌaybꞌil.” 17 Ntons kye txnaqꞌatz otzaj kynaꞌoꞌ aj tzꞌibꞌankaj oqtxiꞌ [tuj Tuꞌjal Dios] ikxjani: “Kꞌontiꞌl nꞌel win taꞌal twitz ajay.”* 18 Yaji txqꞌan xjal tzi [aj nim tuq kyajwalil kxol kye] aj tijajil Israeld oxik kyqꞌumaꞌ ikxjani: “¿Tidiꞌ oqtel akꞌuluꞌ tzan tok qen qa at awajwalil tzan akꞌulun ikxjani?” 19 Yaji te Jesus owaj stzaqꞌbꞌeꞌ: “Intjaw exituꞌ ja jayni bꞌix tuj toxiꞌn qꞌij obꞌantel junkyꞌel witzaꞌ.”* 20 Yaji kyetz oxik kyqꞌumaꞌ: “Oxik tin waqaq tuj oxqal (46) aqꞌbꞌi tzan tbꞌantik, bꞌix ¿yatz nꞌaqꞌumaꞌ tzan oxe qꞌij obꞌantel junkyꞌel awitzaꞌ?” 21 Per te jay aj ntqꞌumaꞌ tuq te Jesus, nyolin tiꞌjx tuq tetz xhchiꞌjel. 22 Astilji aj tjaw anqꞌin junkyꞌel, kye txnaqꞌatz otzaj kynaꞌoꞌ te aj otqꞌumaj, bꞌix oxik kyokslaꞌ te Tuꞌjal Dios oqtxiꞌ bꞌix tiꞌj te aj otqꞌumaj te Jesus kyetz. 23 Aj man tuq atqet te Jesus tuj Jerusalen tuj te qꞌij Paskw, kyꞌilaꞌj xjal eꞌokslan tiꞌj, toklen kyen tidiꞌchq labꞌal aj nqet tuq tkꞌuluꞌ tukyꞌi nim tajwalil. 24 Per te Jesus kꞌontiꞌl tuq witꞌlik tkꞌuꞌj kyiꞌj tzan tpaj tetz ojetq tuq tzꞌel tnikyꞌ kyiꞌj kyaqil xjal. 25 Nyaꞌtx presis tuq tzan tyolin junky titzaꞌ tuq kyenabꞌlin kye xjal tzan tpaj tetz oje tzꞌel tnikyꞌ tuq tiꞌj kyanim kye xjal.