3
Aj Tyolin Jesus Tukyꞌi Nicodemo
1 Ntons at tuq jun xjal kxol kye aj bꞌuchꞌuj Parisey, Nicodemo tuq tbꞌi, tetz nim tuq tajwalil kxol kye xjal aj tijajil Israel. 2 Tetz oxwaꞌq qonikꞌan qꞌolbꞌel Jesus bꞌix oxik tqꞌumaꞌ ikxjani: “Xnaqꞌtzon, qetza qebꞌenkyna yatz lajomich tzan Qtata Dios tzan qtzaj axnaqꞌtzaꞌna. Komo yatz tidiꞌchq labꞌal nqet ayekꞌuꞌ, bꞌix nijunwt bꞌaꞌn tzan tkꞌulun ikxniꞌn qa te Qtata Dios kꞌontiꞌl-wit atqet tukyꞌiꞌl.” 3 Te Jesus owaj stzaqꞌbꞌeꞌ: “Oxeꞌl nqꞌumaꞌ yatz bꞌan bꞌanꞌax, qa jun xjal nlay tzꞌitzꞌjik junkyꞌel, nlay bꞌantik tzan sten tuj tqꞌabꞌ Qtata Dios.”* 4 Yaji te Nicodemo oxik tqꞌumaꞌky ikxjani: “¿Titzaꞌ obꞌantel tzan titzꞌjik jun xjal aj ya tijky? ¿Oꞌ petzun obꞌantel tzan tox tuj talbꞌil tnan tzan titzꞌjik junkyꞌel?” 5 Te Jesus owaj stzaqꞌbꞌeꞌky: “Wetz oxeꞌl nqꞌumaꞌ yatz bꞌan bꞌanꞌax, abꞌl aj nlay tzꞌitzꞌjik tukyꞌi aꞌa bꞌix ax tukyꞌi Txew Dios nlay bꞌantik tzan sten tuj tqꞌabꞌ Qtata Dios. 6 Te aj nꞌitzꞌjik tzan tpaj tetz stat jun xjal, ax tetz xjal, per te aj nꞌitzꞌjik tzan tpaj Txew Dios, ntons tetz at te Txew Dios tuj tanim. 7 Kꞌon chlabꞌan tzan tpaj ma xik nqꞌumaꞌ yatz qa presis tzan etitzꞌjik junkyꞌel tzan te Txew Dios. 8 Komo iktzaꞌ te kyaqꞌiqꞌ jaꞌchq nxik, anke nxik qchaꞌoꞌ nxukꞌin, kꞌontiꞌl qebꞌen jaꞌ tzajnaq bꞌix kꞌontiꞌl qebꞌen jaꞌ ikjaꞌn txik, ax ikxji kyaqil kye aj nkyeꞌitzꞌjik tzan te Txew Dios.”
9 Yaji te Nicodemo oxik xhchaꞌoꞌky: “¿Titzaꞌ bꞌaꞌn tzan tbꞌantik kyaqil ntzani?” 10 Te Jesus owaj stzaqꞌbꞌeꞌ: “Yatz aj ntxnaqꞌtzan kye xjal aj tijajil Israel, ¿tiꞌtzun, kꞌontiꞌl nꞌel anikyꞌ tiꞌj kyaqil ntzani? 11 Wetz oxeꞌl nqꞌumaꞌ yatz bꞌan bꞌanꞌax, qetza nxik jqꞌumaꞌna te aj qebꞌenky bꞌix ax nxik qyoliꞌna te aj oje tzꞌok qen, per etetz kꞌontiꞌl nxik etokslaꞌ aj nxik qyoliꞌna. 12 Qa kꞌontiꞌl nkyinxik etokslaꞌ oj txik nqꞌumaꞌ tiꞌj tidiꞌ aj at twitz txꞌoꞌtxꞌ, ¿titzaꞌ okyinxeꞌl etokslaꞌ oj nyolin tiꞌj tidiꞌchq aj at tuj kaꞌj? 13 Kꞌontiꞌl abꞌl oje jax tuj kaꞌj sinoke aꞌox te aj oje qetz tuj kaꞌj bꞌix a tetz te Ichan Aj Tkꞌwaꞌal Dios. 14 Iktzaꞌx te Moisés tuj te kyꞌixkꞌoj txꞌoꞌtxꞌ ojaw tin jawnaq te kan [tzan kykolet tuq kye xjal],* ax ikxji te Ichan Aj Tkꞌwaꞌal Dios presis tzan tjaw eqꞌiꞌ jawnaq* 15 tzan kyanqꞌin te jun-eleꞌx kyaqil kye aj okyeꞌokslayon tiꞌj.
16 Te Qtata Dios nkyeqet tganiꞌ kyaqil xjal twitz txꞌoꞌtxꞌ, astilji otzaj tlajoꞌ te Tkꞌwaꞌal aj cha jun tuq, otzaj tlajoꞌ tzan kꞌon kyexiknaj kye aj nkyeꞌokslan tiꞌj sinoke tzan kyanqꞌin te jun-eleꞌx. 17 Komo te Qtata Dios intzaj tlajoꞌ wetz aj Tkꞌwaꞌal aꞌin twitz txꞌoꞌtxꞌ, nyaꞌtx tzan txik nswaꞌ xhchoꞌnal kyiꞌj kye xjal sinoke tzan nkolon te kyetz. 18 Abꞌlchaq aj nꞌokslan wiꞌj [wetz] aj Tkꞌwaꞌal Dios [aꞌin], tetz nlay xik siꞌ tuj il. Yatzun te aj nlay tzꞌokslan, tetz ya qꞌumankaj jun xhchoꞌnal tiꞌj tzan tpaj kꞌontiꞌl nꞌokslan wiꞌj wetz aj cha jun aꞌin Tkꞌwaꞌal Dios. 19 Kyetz kyajoꞌtz tzan kxik siꞌ tuj il tzan tpaj aj ntzani: Intkyaqul swal jun chkꞌatunal tuj kywitz, bꞌix kye xjal owel kyganiꞌ mas te qlolj twitz te chkꞌatunal tzan tpaj te kykꞌulbꞌen nyaꞌtx tuq galan. 20 Kyaqil kye aj nkyekꞌulun nyaꞌtx galan kꞌon kygan te chkꞌatunal tzan tpaj kꞌon kygan tzan tok en te aj nkykꞌuluꞌ.b 21 Yatzun kye xjal aj nkyebꞌet tuj tumeꞌl, kyetz nkyeꞌok laqꞌchet tiꞌj te chkꞌatunalc tzan tok eꞌeꞌ te kykꞌulbꞌen nqet kykꞌuluꞌ iktzaꞌx te Qtata Dios tgan.”
Aj Tyolin Junkyꞌel Te Waꞌnch Tiꞌj Jesus
22 Ntons yaji, te Jesus kyukyꞌi txnaqꞌatz ebꞌajxik tuj jun luwar tuj tkwentil Judey, bꞌix okajten tzi kyukyꞌiꞌl bꞌix njaw tuq tsiꞌ aꞌ kywiꞌ kye xjal. 23 Ax te Waꞌnch njaw tuq tsiꞌ aꞌ kywiꞌ xjal tuj Enon qaynin tiꞌj Salim, tzan tpaj tzi ajun aꞌ tuq bꞌix kye xjal nkyepon tuq tukyꞌiꞌl bꞌix njaw siꞌ tuq aꞌ kywiꞌ. 24 Kyaqil ntzani okyꞌik aj minaꞌ tuq tqex siꞌ te Waꞌnch pres.*
25 Ntons jun qꞌij kye txnaqꞌatz Waꞌnch bꞌix txqꞌan kxjalil aj tijajil Israel ebꞌajjaw wululun chꞌin tiꞌj titzaꞌ nkaj saq qanim tuj twitz Qtata Dios. 26 Yaji exwaꞌq qꞌumal te Waꞌnch: “Xnaqꞌtzon, te aj opon awukyꞌiꞌl jun-el aj atoqet tuq junxlaꞌ te Jordan Aꞌ, aj ochyolin tiꞌj, ajnaꞌl njaw tsiꞌ aꞌ kywiꞌ xjal bꞌix kyaqil kye xjal nkyepon tukyꞌiꞌl.” 27 Tzaj te Waꞌnch, owaj stzaqꞌbꞌeꞌ kyetz: “Jun xjal kꞌontiꞌl nbꞌantik tzan tjaw tjalbꞌeꞌ jun tajwalild qa nyaꞌtx a te [Qtata Dios] aj tuj kaꞌj ntzaj sin tetz. 28 Etetz etebꞌen bꞌanꞌax wetz oxik nqꞌumaꞌ, nyaꞌtx aꞌin te Koloyon Aj Qꞌumankaj Oqtxiꞌ* sinoke aꞌin wetz te aj lajomin tbꞌayon twitz tetz [tzan txik npakbꞌaꞌ tiꞌj tetz]. 29 Komo iktzaꞌ oj tok junan jun ichan tukyꞌi txuꞌjel, yatzun jun tajyol te ichan nchalaj oj tok xhchaꞌoꞌ te ichan ojetq tzul; ax ikxji wetz ajnaꞌl bꞌan nkyinchalaj tiꞌj tetz. 30 A tgan tzan tok mas nim tajwalil tetz nwitz wetz bꞌix wetz nlay kyinpon iktzaꞌ tetz. 31 Tetz tzajnaq tuj kaꞌj bꞌix at tajwalil tiꞌj kyaqil. Per jun xjal aj tzajnaq cha aꞌox tzani twitz txꞌoꞌtxꞌ ntons cha aꞌox aj te twitz txꞌoꞌtxꞌ, bꞌix cha nyolin tiꞌj te aj at tzani twitz txꞌoꞌtxꞌ. Te aj tzajnaq tuj kaꞌj, tetz at toklen tiꞌj kyaqil 32 bꞌix nyolin tiꞌj aj oje tzꞌok ten bꞌix tiꞌj aj oje tzꞌok xhchaꞌoꞌ, per kꞌontiꞌl abꞌl nxik okslan te aj ntyoliꞌ. 33 Per qa at abꞌl nxik okslan tetz, ntons ikxji tetz ntqꞌumaꞌ te Qtata Dios jun yolin. 34 Te aj otzaj lajoꞌ tzan Qtata Dios, tyol Qtata Dios ntyoliꞌ tzan tpaj te Qtata Dios nxik tsiꞌ Txew tukyꞌiꞌl bꞌeyx te jun-eleꞌx. 35 Te Qtata Dios nqet tganiꞌ Tkꞌwaꞌal, bꞌix kyaqil oje kaj tsiꞌ tuj tqꞌabꞌ.* 36 Jun xjal aj nꞌokslan tiꞌj te Tkꞌwaꞌal Dios at jun tanqꞌin te jun-eleꞌx, per te junky aj kꞌontiꞌl nqet tokslaꞌ te Tkꞌwaꞌal Dios kꞌontiꞌl jun tanqꞌin ikxji, sinoke te tqꞌoj Qtata Dios nꞌul tajsik.”