22
Te Yekꞌbꞌil Aj Telponx Nyaꞌtx Kyaqil Nkyeꞌokslan Tuj Tumeꞌl Tzan Kyox Tuj Kaꞌj
1 Yaji te Jesus owaqꞌik tzan tyolin junkyꞌel kyukyꞌiꞌl tukyꞌi txqꞌanky yekꞌbꞌil bꞌix oxik tqꞌumaꞌ kyetz ikxjani: 2 “Ntons, kyiꞌj kye xjal aj nkyekaj tuj tqꞌabꞌ te Qtat aj nnajan tuj kaꞌj, te nini iktzaꞌ jun kꞌulul mandad aj oqet tbꞌisuꞌ jun pyest tzan tpaj toklen junan te tkꞌajol. 3 Ntons ebꞌajxik tlajoꞌ kye tmos ukꞌlel kye aj ukꞌlemeꞌ tuj te pyest, per kye aj ukꞌlemeꞌ kꞌontiꞌl okybꞌanij tzan kypon. 4 Yaji ebꞌajxik tlajoꞌ junkyꞌel kye tmos bꞌix oxik tqꞌumaꞌ kyetz ikxjani: “Intxik eqꞌumaꞌ kyukyꞌi kye aj ukꞌlemeꞌ witzaꞌ, wetz maꞌtx kyeqet nkansaꞌ kye nwakaxh bꞌix kye waloꞌ aj bꞌan worteꞌ bꞌix kyaqil maꞌtx bꞌantik [tzan qpyestin]. Peꞌetzaj ajnaꞌl tuj te pyest.”
5 Ntons kye aj ebꞌajtzaj ukꞌleꞌ kꞌontiꞌl owox tuj kywiꞌ. Jun te kyetz oxik tuj tawal, bꞌix junky oxik tuj taqꞌun, 6 bꞌix kye junjunky eqet kybꞌujuꞌ kye tmos te kꞌulul mandad bꞌix ebꞌajqet kykansaꞌ. 7 Ntons te kꞌulul mandad ojaw qꞌojlik nim bꞌix oxik tkꞌuluꞌ mandad kye tsoldad tzan kyqet kykansaꞌ kye aj eqet kansan kye tmos bꞌix tzan tqet tuq tzꞌeꞌsaꞌ te kyamaqꞌ. 8 Yaji oxik tqꞌumaꞌ kye tmos ikxjani: “Kyaqil maꞌtx bꞌantik tzan taqꞌik te pyest, per kye aj etzaj wukꞌleꞌ tbꞌayaꞌ nyaꞌtx tuq kymeres tzan kyul. 9 Ajnaꞌl pex etetz tuj te nim bꞌey bꞌix inktzaj etukꞌleꞌ tuj te pyest aj okyeꞌokelnoj ewitz.”
10 Ntons kye tmos ebꞌajꞌex kyuj kye bꞌey bꞌix eꞌok kchimoꞌ kyaqil kye aj eꞌoknoj kywitz, kyaqil kye aj nyaꞌtx galan-eꞌ bꞌix kye aj galan-eꞌ, bꞌix ikxji te luwar onoj tukyꞌi xjal. 11 Ya ma tzꞌox te kꞌulul mandad eꞌel kye aj ukꞌlemeꞌ, oxik tkaꞌyiꞌ jun xjal aj kꞌontiꞌl tuq atok jun tqꞌanaq galan te jun pyest toklen junan kabꞌeꞌ xjal. 12 Bꞌix oxik tqꞌumaꞌ tetz ikxjani: “Wamiw, ¿titzaꞌ ma xhchꞌotz tzani bꞌix qa kꞌontiꞌl atok jun aqꞌanaq galan?” Per te xjal kꞌontiꞌl owaj stzaqꞌbꞌeꞌ chꞌinwt. 13 Ntons te kꞌulul mandad oxik tqꞌumaꞌ kye tmos: “Intqet ekꞌaloꞌ toq bꞌix tqꞌabꞌ, bꞌix intex etin jwer tuj qlolj. Tzi owokelten oqꞌel bꞌix ma qitxꞌitxꞌin txeꞌ teꞌ.”* 14 Ntons kyꞌilaꞌj kye aj nkyetzaj ukꞌleꞌ, per cha junjun kye aj nkyeꞌel joyoꞌ.”*
Te Tumeꞌl Tiꞌj Te Chojenj
15 Ntons, yaji kye aj bꞌuchꞌuj Parisey eꞌex tzi bꞌix eꞌokten kawlayon titzaꞌ tuq tzan tqet kyeqꞌiꞌ te Jesus tiꞌj jun tyol bꞌix ikxji tzan txik kyqꞌumaꞌ iktzaꞌ til. 16 Ntons ebꞌajxik kylajoꞌ junjun aj nkyeꞌok lapet tuq kyiꞌj bꞌix junjunky aj nkyeꞌokslan tuq tiꞌj te Eródes tzan txik kyqꞌumaꞌ tuq ikxjani: “Xnaqꞌtzon, qetza qebꞌena yatz jun chyolin bꞌix tuj tumeꞌl nxik axnaqꞌtzaꞌ tzan qanqꞌin tuj jun tumeꞌl iktzaꞌ ntqꞌumaꞌ te Qtata Dios, bꞌix kꞌontiꞌl nchkꞌulun jun tidiꞌ cha aꞌox tzan akaj galan tuj kywitz txqꞌanky, tzan tpaj kꞌontiꞌl nꞌok asiꞌ anabꞌl tiꞌj jun xjal titzaꞌ tok kaꞌyin tiꞌj. 17 Astilji, qgana tzan txik qchaꞌoꞌna jun tidiꞌ te yatz. ¿Titzaꞌ yatz tuj anabꞌl tiꞌj te Jkawbꞌil, bꞌaꞌn peꞌ tzan txik qchojoꞌ chojenja te twitzaleꞌ kꞌulul mandad tuj qamaqꞌb qa nyaꞌtxji?” 18 Ntons te Jesus owel tnikyꞌ tiꞌj te nyaꞌtx galan aj nkybꞌisuꞌ tuq, bꞌix oxik tqꞌumaꞌ ikxjani: “¡Xmeletzꞌ kaꞌr! ¿Tistil egan tzan nqet eteqꞌiꞌ? 19 Instzaj eyekꞌuꞌ jun tmin aj nꞌoken tzan xhchojet te chojenj.” Ntons oxik ksiꞌ jun tmin iktzaꞌx twiꞌ tkꞌuꞌj jun xjal tuj jun qꞌij, 20 bꞌix tetz oxik tqꞌumaꞌ kyetz ikxjani: “¿Abꞌl qitzbꞌalil atok tiꞌj te ja tminni, bꞌix abꞌl qbꞌi atok tiꞌj?” 21 Yaji owaj ktzaqꞌbꞌeꞌ tetz ikxjani: “Titzbꞌalil te César aj twitzaleꞌ kꞌulul mandad.” Ntons te Jesus oxik tqꞌumaꞌ kyetz ikxjani: “Intxik esiꞌ te César aj tetzkixiꞌ bꞌix intxik esiꞌ te Qtata Dios aj te Qtata Dios.” 22 Ya ma tzꞌok kchaꞌoꞌ ikxji, kyetz oje kyelabꞌan bꞌix okaj ksiꞌ bꞌix ebꞌajꞌaj.
Aj Txik Tqꞌumaꞌ Jesus Oqojawel Anqꞌin Junkyꞌel
23 Ntons, tuj aj qꞌijji junjun aj bꞌuchꞌuj Sadusey ebꞌajxwaꞌq qꞌolbꞌel Jesus. Kye aj bꞌuchꞌuj Sadusey, kyetz tuj kynabꞌl jun xjal kꞌontiꞌl njaw anqꞌin,* astilji kyetz oxik kyqꞌumaꞌ te Jesus ikxjani: 24 “Xnaqꞌtzon, te Moisés okaj stzꞌibꞌaꞌ qa jun xjal ma kamik bꞌix qa kꞌontiꞌl ma kaj jun tkꞌwaꞌal, ntons te junky terman a tgan tzan tok junan tukyꞌiꞌl te xuj byud tzan tkaj tkꞌwaꞌal te xjal aj okamik.* 25 Ntons, jun-el tzani qxola ateꞌ tuq wuq ichan kyerman tuq kyibꞌ. Te tbꞌay ermanj owok junan bꞌix yaji okamik. Bꞌix komo kꞌontiꞌl okaj jun tkꞌwaꞌal, astilji te txuꞌjel okaj tuj tqꞌabꞌ te junky titzꞌin. 26 Yaji ax ikxji okyꞌik tiꞌj te tkabꞌiꞌ, bꞌix ax tiꞌj te toxiꞌ ermanj, bꞌix ikxji okyꞌik kyukyꞌi kye txqꞌanky ermanj max tukyꞌi te twuqiꞌ. 27 Ya ma kamik te twuqiꞌ ermanj, ax okamik te xujky. 28 Ntons oj kyjaw anqꞌin kye kamnaq, ntons kxol kye kywuqiꞌ ichan, ¿abꞌl jun te kyetz owokel tichmil te xuj? Komo te xuj owok junan kyukyꞌi kywuqil.” 29 Yaji te Jesus owaj stzaqꞌbꞌeꞌ kyetz ikxjani: “Etetz kꞌontiꞌl nꞌel enikyꞌ tzan tpaj kꞌontiꞌl etebꞌen te Tuꞌjal Dios bꞌix kꞌontiꞌl nꞌel enikyꞌ tiꞌj te tajwalil Qtata Dios. 30 Oj kyjaw anqꞌin kye kamnaq, kye xuj bꞌix kye ichan, nlay kyeꞌok junan iktzaꞌ kye ángel aj akyejax tuj kaꞌj [kꞌontiꞌl nkyeꞌok junan]. 31 Bꞌix tiꞌj te oj kyjaw anqꞌin kye kamnaq, ¿tiꞌtzun, minaꞌ tqet eteꞌeꞌ etetz aj otqꞌumaj te Qtata Dios? Komo ikxjani nyolin: 32 “Wetz aꞌin te Dios aj ntzaj kynaꞌoꞌ te Abran bꞌix te Isak bꞌix te Jacob.”* Ntons astilji te Qtata Dios tetz nyaꞌtx jun Dios kye kamnaq sinoke jun Dios aj ntzaj naꞌoꞌ kyitzaꞌ xjal aj itzꞌojeꞌ.”
33 Ya ma tzꞌok kchaꞌoꞌ kyaqil ntzani, kye txqꞌanky xjal oje kyelabꞌan tiꞌj titzaꞌ nxnaqꞌtzan tuq kxol kye xjal.
Te Aj Mas Presis Aj Okaj Tqꞌumaꞌ Te Qtata Dios Tzan Jkꞌulun
34 Ntons, kye aj bꞌuchꞌuj Parisey, aj tok kchaꞌoꞌ ojetq tuq kye lumet kye aj Sadusey titzaꞌ, kyetz owok kchimoꞌ kyibꞌ tiꞌj Jesus, 35 bꞌix jun xjal kxol kyetz, jun xnaqꞌtzal Kawbꞌil, oxik tqꞌumaꞌ te Jesus ikxjani tzan tqet teqꞌiꞌ: 36 “Xnaqꞌtzon, ¿alkyetz te aj qꞌumankaj tuj te Kawbꞌil aj mas presis tzan tqet jkꞌuluꞌ?”* 37 Yaji te Jesus owaj stzaqꞌbꞌeꞌ ikxjani: “Intqet eganiꞌ te Etajawil aj Qtata Dios ntzaj enaꞌoꞌ, intqet eganiꞌ tukyꞌi jun tkꞌuꞌjlal tuj etanim, bꞌix tukyꞌi jun tkꞌuꞌjlal tukyꞌi ebalor, bꞌix tukyꞌi jun tkꞌuꞌjlal tukyꞌi enabꞌl.* 38 Te ntzani a te tbꞌay aj mas presis tzan jkꞌulun. 39 Bꞌix te tkabꞌiꞌ ax chꞌinky tuq parej, bꞌix nyolin ikxjani: “Intqet eganiꞌ te junky abꞌl etetz iktzaꞌx nqet eganiꞌ etibꞌx etetz.”* 40 Kye ja kabꞌeꞌ yol ntzani aj otzaj tqꞌumaꞌ te Qtata Dios tzan tqet qokslaꞌ, a te mas presis twitz kyaqil aj nyolin te Kawbꞌil bꞌix te aj oqet ktzꞌibꞌaꞌ kye aj yolil tyol Dios oqtxiꞌ.”
Te Koloyon Aj Qꞌumankaj Oqtxiꞌ Mas Nim Tajwalil Twitz Te Dawid
41 Aj man tuq tzunx chimoꞌ kyibꞌ kye aj bꞌuchꞌuj Parisey, 42 te Jesus oxik xhchaꞌoꞌ kyetz ikxjani: “¿Titzaꞌ etetz nkxbꞌisun tiꞌj te Koloyon Aj Qꞌumankaj Oqtxiꞌ? ¿Abꞌl qijajil tetz?” Ntons kyetz oxik kyqꞌumaꞌ: “Tijajil Dawid.” 43 Ntons te Jesus oxik tqꞌumaꞌ kyetz ikxjani: “¿Ntons titzaꞌ te Dawid, aj nyolin tuq te Txew Dios tuj tanim, owok tqꞌumaꞌ tiꞌj tetz iktzaꞌ Tajawil? Komo te Dawid oxik tqꞌumaꞌ ikxjani: 44 “Te Qtata Diosc oxik tqꞌumaꞌ te Wajawil:d ‘Paqet witꞌlet tuj nbꞌanqꞌabꞌ bꞌix nkꞌuluꞌtz tzan kyqet kye awajqꞌoj witzaꞌ.’ ”e 45 Ntons komo te Dawid oxik tqꞌumaꞌ “Wajawil” tiꞌj te Koloyon aj Qꞌumankaj Oqtxiꞌ, ¿titzaꞌ tetz jun tijajil ikxji?” 46 Ntons, nijunwt abꞌl obꞌantik tzan taj stzaqꞌbꞌeꞌ ni jun yol, bꞌix yaji nijunwt otnimsaj tkꞌuꞌj tzan txik xhchaꞌoꞌ jun tidiꞌ tetz.