20
Aj Txik Kchaꞌoꞌ Kye Xjal Tidiꞌ Tuq Tajwalil Te Jesus
1 Jun qꞌij te Jesus nxnaqꞌtzan tuq kye xjal tuj te Nin Jay Nabꞌil Qtata Dios bꞌix npakbꞌan tuq te tpakbꞌalil titzaꞌ tzan jkolet. Ntons ebꞌajpon kye pal aj nim kyajwalil bꞌix kye xnaqꞌtzal Kawbꞌil bꞌix kye aj tijxjal kꞌulul mandad kxol kye aj tijajil Israel, 2 bꞌix oxik kyqꞌumaꞌ ikxjani: “¿Tidiꞌ awajwalil tzani tzan akꞌulun kyaqil aj nꞌakꞌuluꞌ? ¿Abꞌl oxik sin awajwalil?” 3 Yaji te Jesus oxik tqꞌumaꞌ ikxjani: “Ax wetz oxeꞌl nchaꞌoꞌ etetz. Intajtz etzaqꞌbꞌeꞌ tiꞌj te ntzani: 4 ¿Abꞌl otzaj lajon te Waꞌnch [tukyꞌi jun tajwalil] tzan tjaw tsiꞌ aꞌ kywiꞌ xjal, te Qtata Dios tuj kaꞌj qatzun kye xjalji?” 5 Yaji kyetz eꞌaqꞌik tzan kywululun kyibꞌkyibꞌx ikxjani: “Qa oxeꞌl jqꞌumaꞌ qa Qtata Dios aj atjax tuj kaꞌj otzaj lajon tetz, otzajel tqꞌumaꞌ “¿Tistil kꞌontiꞌl oxik etokslaꞌ?” 6 Bꞌix ax nlay bꞌantik tzan txik jqꞌumaꞌ qa kye xjal etzaj lajon tetz tzan tpaj kye xjal oqotel kykansaꞌ tukyꞌi abꞌj tzan tpaj kkyaqil kyetz tuj kynabꞌl te Waꞌnch jun aj yolil tyol Dios tuq.” 7 Ntons kyetz owaj ktzaqꞌbꞌeꞌ, kꞌontiꞌl kyebꞌen abꞌl otzaj lajon te Waꞌnch swal aꞌ. 8 Ntons te Jesus owaj stzaqꞌbꞌeꞌ kyetz ikxjani: “Ntons ax wetz nlay xik nqꞌumaꞌ etetz abꞌl otzaj sin wajwalil tzan nkꞌulun ntzani.”
Te Yekꞌbꞌil Kyiꞌj Kye Majenon Aj Nyaꞌtx Galan Kyenabꞌlin
9 Yaji te Jesus owaqꞌik tzan tyolin kyukyꞌi kye xjal bꞌix oxik tqꞌumaꞌ ja yekꞌbꞌil ntzani:* “Jun xjal oqex tawaꞌ jun punuj ub. Yaji oxik tmajenaꞌ kye txqꞌan xjal, bꞌix yaji oxik tuj jun tbꞌey laqꞌchik kyꞌilaꞌj qꞌij. 10 Ya ma pon tyemp tzan tjaw te awalj, te tajaw oxik tlajoꞌ jun tmos qanil [chꞌin taꞌl te kymajenbꞌen] twitz te awalj aj presis tuq te tetz, per kye majenayon oqet kybꞌujuꞌ bꞌix kꞌontiꞌl oxik ksiꞌ chꞌinwt bꞌix owaj kylajoꞌ. 11 Ntons yaji te tajaw oxik tlajoꞌ junky tmos, per ax tetz owokbꞌaj kyiliꞌ bꞌix oqet kybꞌujuꞌ bꞌix ax kꞌontiꞌl oxik ksiꞌ nichꞌinwt, bꞌix owaj kylajoꞌ. 12 Yaji oxik tlajoꞌ junky taqꞌunon per ax oqet kyokꞌonsaꞌ bꞌix owex kylajoꞌ. 13 Yaji te tajaw awalj oqet tbꞌisuꞌ ikxjani: “Ajnaꞌl ¿tidiꞌ nkꞌuluꞌtz? Oxeꞌl nlajoꞌ te nkꞌajol aj ganiꞌ nim witzaꞌ. Qanq oqtel kyokslaꞌ.” 14 Per ya ma xik kyeꞌeꞌ kye majenayon ikjaꞌn tuq stzaj, ntons okyyolij kyibꞌkyibꞌx ikxjani: “Aj nini-alo te aj okꞌamoyon te erensy. Intqet jkansaꞌ tzan tkaj tuj jqꞌabꞌ qetz te ja txꞌoꞌtxꞌni oj tkamik stat.” 15 Ntons owex kyin tiꞌjx te awalj bꞌix oqet kykansaꞌ. Ntons ¿tidiꞌ otkꞌuluꞌtz te tajaw awalj ajnaꞌl? 16 Otzajel tetz, okyeqtel tkansaꞌ kye aj eleqꞌni bꞌix oxeꞌl tmajenaꞌ te xtxꞌoꞌotxꞌ kyukyꞌi txqꞌanky xjal.” Ntons, kye xjal ya ma tzꞌok kchaꞌoꞌ ja yekꞌbꞌilni, okyqꞌumaj ikxjani: “¡Kꞌonxwit kyꞌik jun tidiꞌ ikxji!” 17 Yaji tetz ebꞌajxik tkaꞌyiꞌ bꞌix oxik tqꞌumaꞌ kyetz ikxjani: “Ntons ¿tidiꞌ telponx te aj tzꞌibꞌankaj tuj Tuꞌjal Dios aj jaꞌ nyolin “Te abꞌj aj owel kyikꞌoꞌ kye kꞌulul jay, oje tzꞌok ajnaꞌl te abꞌj twitꞌlel jay bꞌix bꞌan presis”?* 18 Abꞌl te aj oqtel tzꞌaqik tiꞌj te aj abꞌjji, oqtel tokꞌonsaꞌ tibꞌ; bꞌix qa te abꞌj oqtel tzꞌaqꞌik tajsik jun xjal, te xjal okajel bꞌan xhink.”
19 Ntons, kye pal aj nim kyajwalil bꞌix kye xnaqꞌtzal Kawbꞌil, kyetz kygan tuq tzan tjaw ktzyuꞌ te Jesus bꞌeyx tuj aj qꞌijji tzan tpaj kyebꞌen tuq te yekꞌbꞌil telponx tuq kyiꞌj kyetz. Per nkyexobꞌ tuq kywitz kye xjal.*
Aj Txik Txnaqꞌtzaꞌ Jesus Tzan Qchojon
20 Yaji oxik kylajoꞌ tukyꞌi Jesus txqꞌan xjal aj nqet kykꞌuluꞌ kyibꞌ tuq iktzeꞌxtzun galan xjal-eꞌ, tzan tuq tqet kyeqꞌiꞌ Jesus tukyꞌi tyolx, ikxji bꞌaꞌn tuq tzan txik kyqꞌumaꞌ til bꞌix tzan txik kyqꞌapoꞌ tuj tqꞌabꞌ te twitzaleꞌ kꞌulul mandad. 21 Kyetz oxik kchaꞌoꞌ tetz ikxjani: “Xnaqꞌtzon, qetza qebꞌena, yatz jun chyolin bꞌix tumeꞌl aj ntzaj axnaqꞌtzaꞌ, bꞌix kꞌontiꞌl nꞌel tuj awitz jun mas tbꞌanil twitz junky. Yatz nxik axnaqꞌtzaꞌ aꞌox te bꞌanꞌax titzaꞌ tzan qanqꞌin iktzaꞌ te Qtata Dios tgan. 22 Ntons, ¿titzaꞌ yatz tuj anabꞌl, bꞌaꞌn peꞌ tukyꞌi te Kawbꞌil tzan txik qchojoꞌ chojenja [aj qꞌumankaj tzan] te Césarb aj twitzaleꞌ kꞌulul mandad, qa nyaꞌtxji?”
23 Ntons, te Jesus owel tnikyꞌ tistil tuq nxik kchaꞌoꞌ, ntons tetz oxik tqꞌumaꞌ kyetz ikxjani: 24 “Instzaj eyekꞌuꞌ jun tmin. ¿Abꞌl qwitz atok tiꞌj te tminni bꞌix abꞌl qbꞌi atok tiꞌj?” Yaji kyetz owaj ktzaqꞌbꞌeꞌ: “Twitz te César bꞌix ax tbꞌi.” 25 Ntons te Jesus oxik tqꞌumaꞌ kyetz ikxjani: “Intxik esiꞌ te César aj te tetz kixiꞌ, bꞌix intxik esiꞌ te Qtata Dios aj te Qtata Dios.” 26 Ntons kꞌontiꞌl obꞌantik tzan tqet kyeqꞌiꞌ tiꞌj tyol kywitz kye xjal. Cha bꞌan nkyelabꞌan tuq tzan tpaj aj ojetq tzꞌajtz stzaqꞌbꞌeꞌ bꞌix yaji elumet.
Aj Txik Chaꞌoꞌ Te Jesus Qa Kye Anim Nkyejaw Anqꞌin
27 Yaji ebꞌajpon txqꞌan aj bꞌuchꞌuj Sadusey tukyꞌi Jesus. Komo kyetz kꞌontiꞌl nkyokslaꞌ qa kye kamnaq nkyejaw anqꞌin.* Astilji kyetz oxik kchaꞌoꞌ tetz ikxjani: 28 “Xnaqꞌtzon, te Moisés okaj stzꞌibꞌaꞌ qetza, qa ma kamik jun ichan aj ojetq tzꞌok junan bꞌix kꞌontiꞌl ma kaj nijunwt tkꞌwaꞌal, ntons titzꞌin te xjal presis tuq tzan tok junan tukyꞌi te xuj byud tzan tkaj tijajil te titzik aj ma kamik.* 29 Ntons, jun-el ateꞌ tuq wuq ichan, kyerman kyibꞌ. Te tbꞌay owok junan per yaji okamik bꞌix kꞌontiꞌl okaj nijunwt tkꞌwaꞌal. 30 Yaji ax ikxji okyꞌik tiꞌj te tkabꞌiꞌ 31 bꞌix te toxiꞌ, ax eꞌok junan tukyꞌiꞌl [per ebꞌajkamik]; bꞌix ax ikxji okyꞌik kyukyꞌi kye txqꞌanky, bꞌix ebꞌajkamik kywuqil bꞌix kꞌontiꞌl okaj kyijajil. 32 Yaji ax okamik te xuj. 33 Ya oj kyjaw anqꞌin kye kamnaq, komo kywuqil eꞌok junan tukyꞌiꞌl, ¿abꞌl qxuꞌjel owokel te xuj?”
34 Ntons te Jesus owaj stzaqꞌbꞌeꞌ ikxjani: “Twitz ja txꞌoꞌtxꞌni, kye ichan bꞌix kye xuj nkyeꞌok junan. 35 Yatzun kye aj nkyajoꞌ tzan kyjaw anqꞌin kxol kye kamnaq tzan kyox tuj kaꞌj, kyetz qa xuj qatzun ichanji, ya nlay kyeꞌok junan 36 tzan tpaj kyetz ya nlay kyekamik tzan tpaj okyeꞌokel iktzaꞌ kye ángel bꞌix kyetz tkꞌwaꞌal Qtata Dios-eꞌ, komo maꞌtx kyejaw anqꞌin junkyꞌel. 37 Bꞌix yatzun kyiꞌj kye kamnaq qa nkyejaw anqꞌin, te Moisés oyolin tiꞌj nini aj jaꞌ oqet stzꞌibꞌaꞌ tiꞌj te kꞌul aj ntilun tuq, komo tzi nyolin tiꞌj te Qajawil, aji te Qtata Dios aj ntzaj tnaꞌoꞌ te Abran, aj ntzaj tnaꞌoꞌ te Isak, bꞌix aj ntzaj tnaꞌoꞌ te Jacob.* 38 Te Qtata Dios nyaꞌtx jun Dios aj ntzaj naꞌoꞌ tzan kye kamnaq sinoke aj ntzaj naꞌoꞌ tzan kye aj itzꞌojeꞌ, komo tuj twitz tetz kyaqil itzꞌojeꞌ.” 39 Ntons junjun aj xnaqꞌtzal Kawbꞌil oxik kyqꞌumaꞌ tetz ikxjani: “Xnaqꞌtzon, yatz galan ma tzꞌaj atzaqꞌbꞌeꞌ.” 40 Yaji ya kꞌontiꞌl okynimsaj kykꞌuꞌj tzan txik kchaꞌoꞌ tidiꞌchq tetz.
Te Tijajil Aj Jaꞌ Tzajnaq Te Koloyon Aj Qꞌumankaj Oqtxiꞌ
41 Yaji te Jesus oxik xhchaꞌoꞌ kyetz ikxjani: “¿Tistil nqꞌumjik qa te Koloyon Aj Qꞌumankaj Oqtxiꞌ jun tijajil te [tzqan] Dawid? 42 Axkix te Dawid oyolin tuj te tuꞌjal Kye Salmo, otqꞌumaj ikxjani: “Te Qtata Diosc oxik tqꞌumaꞌ te Wajawil,d ‘Paqet witꞌlet tzani tuj nbꞌanqꞌabꞌ 43 bꞌix onkꞌuluꞌtz tzan kyqet kye awajqꞌoj witzaꞌ.’ ”e 44 Ntons, te Dawid nꞌok tuq tqꞌumaꞌ “Wajawil” [tiꞌj te Koloyon Aj Qꞌumankaj Oqtxiꞌ], bꞌix ¿titzaꞌ atok ikxji qa te Koloyon otzaj tijajil tiꞌj Dawid?”
Intok Qsiꞌ Qnabꞌl Tzan Kꞌon Qoqet Eqꞌiꞌ Tzan Kye Aj Kyok Kaꞌyin Bꞌan Relijyos-eꞌ
45 Kyaqil kye xjal nkyechaꞌon tuq tiꞌj Jesus, ntons tetz owaqꞌik tzan txik tqꞌumaꞌ kye txnaqꞌatz ikxjani: 46 “Intok esiꞌ waq enabꞌl kyiꞌj kye aj xnaqꞌtzal Kawbꞌil. Kyetz mer kygan tzan tok ksiꞌ kyqꞌanaq xluj bꞌan tbꞌanil, bꞌix mer kygan tzan kyok limaꞌ iktzaꞌ tlimaqal xjal-eꞌ tzan kye xjal tuj te plas. Bꞌix kyetz mer kygan tzan kyqet witꞌlet kyuj kye jay nabꞌil Dios aj jaꞌ nkyeqet jiqꞌbꞌaꞌ, bꞌix ax kygan ikxji oj kxik ukꞌleꞌ waꞌil tzan junky. 47 Per kyetz nꞌel kyin kyjay kye byud, bꞌix yaji nim tuj nkyexnaqꞌtzan tzan kyqet jiqꞌbꞌaꞌ tzan xjal [iktzeꞌxtzun galan xjal-eꞌ]. Kyetz oxeꞌl siꞌ jun nim xhchoꞌnal kyiꞌj.”