20
Te Yekꞌbꞌil Aj Telponx Te Qtata Dios Nkꞌulun Parej Kyukyꞌi Kyaqil Kye Aj Nkyeꞌokslan Tiꞌj
1 “Komo te tumeꞌl titzaꞌ te Qtat aj nnajan tuj kaꞌj nkꞌulun kyukyꞌi kye xjal aj akyeqet tuj tqꞌabꞌ, te nini iktzaꞌ aj tex jun tajaw jay bꞌan qꞌeqoꞌ joyol taqꞌunon tzan tuq kyaqꞌunan tuj tawal ub. 2 Okaj kyukyꞌiꞌl kye aqꞌunon tzan xhchojon twiꞌ kykꞌuꞌj iktzaꞌx twiꞌ tkꞌuꞌj jun xjal jun qꞌij,a ntons ebꞌajxik tlajoꞌ aqꞌunon tuj tawal. 3 Yaji owex junkyꞌel te toxiꞌ or te qꞌeqoꞌ,b bꞌix ebꞌajxik teꞌeꞌ txqꞌanky xjal tuj plas kꞌontiꞌl tuq kyaqꞌun, 4 oxik tqꞌumaꞌ kyetz ikxjani: “Ax etetz, pex waq aqꞌunon tuj wawal, bꞌix oxeꞌl nsiꞌ twiꞌ ekꞌuꞌj aj presis.” Ntons kyetz ebꞌajxik. 5 Yaji te tajaw owex junkyꞌel mer chijqꞌijc bꞌix ax owex junkyꞌel te toxiꞌ or te qaleꞌ,d bꞌix ax etzaj tukꞌleꞌ txqꞌanky aqꞌunon. 6 Yaji ya ma qopon te tjwebꞌiꞌ or te qaleꞌ,e owex junkyꞌel bꞌix eꞌoknoj twitz txqꞌanky aj kꞌontiꞌl tuq kyaqꞌun, bꞌix oxik xhchaꞌoꞌ kyetz ikxjani: “¿Tistil etetz atikxqet tzani, maꞌtx tzꞌex eqꞌij bꞌix cha atikxqet?” 7 Yaji kyetz oxik kyqꞌumaꞌ: “Tzan tpaj nijunwt abꞌl ma tzul ukꞌlel qetza tzan qaqꞌunan tukyꞌiꞌl.” Ntons tetz oxik tqꞌumaꞌ kyetz ikxjani: “Ax etetz pex waq aqꞌunon tuj wawal.” 8 Ya ma qoꞌok chukaqꞌbꞌil oxik tqꞌumaꞌ te tajaw tukyꞌi te aj eꞌel taqꞌun: “Inktzaj awukꞌleꞌ kye aqꞌunon bꞌix intxik asiꞌ twiꞌ kykꞌuꞌj, bꞌix pawaqꞌik tbꞌayaꞌ kyukyꞌi kye aj ma kyeꞌox aqꞌunon max tmankbꞌil bꞌix kye aj ma kyeꞌaqꞌik bꞌan tbꞌay max tmankbꞌilxiꞌ.”* 9 Ntons ebꞌajꞌox ukꞌleꞌ kye aj ebꞌajꞌaqꞌik tzan kyaqꞌunan te tjwebꞌiꞌ or te qaleꞌ,f bꞌix junjunchaq te kyetz okykꞌamoj twiꞌ kykꞌuꞌj iktzaꞌxkix twiꞌ tkꞌuꞌj jun xjal jun qꞌij. 10 Yaji ya ma pon or tzan kyox ukꞌleꞌ kye aj eꞌaqꞌik tzan kyaqꞌunan bꞌan luwew, kyetz tuj kynabꞌl qa maꞌ tuq kykꞌamoj mas nim twiꞌ kykꞌuꞌj kywitz kye aj eꞌaqꞌik yaj, per ax kyetz okykꞌamoj twiꞌ kykꞌuꞌj iktzaꞌx twiꞌ tkꞌuꞌj jun xjal jun qꞌij. 11 Ya ma kyꞌik kykꞌamoꞌ te twiꞌ kykꞌuꞌj, kyetz eꞌaqꞌik tzan kyyolin nyaꞌtx galan tiꞌj te tajawil 12 bꞌix nkyqꞌumaꞌ tuq ikxjani: “Kye aj ma kyepon aqꞌunon yaj, kyetz ma kyeꞌaqꞌunan cha jun or bꞌix yatz maꞌtx xik achojoꞌ twiꞌ kykꞌuꞌj parej iktzaꞌ qetza, bꞌix qetza maꞌtx qoꞌaqꞌunan nim bꞌix maꞌtx qipaj jun chman kyaq.” 13 Per te tajaw oxik tqꞌumaꞌ te jun te kyetz ikxjani: “Wamiw, wetz kꞌontiꞌl nkyinkꞌulun awukyꞌiꞌl jun nyaꞌtx galan. ¿Kꞌontiꞌl petzun ma qet tuj awitz tzan txik nchojoꞌ twiꞌ akꞌuꞌj iktzaꞌx twiꞌ tkꞌuꞌj jun xjal jun qꞌij? 14 Intkyꞌik akꞌamoꞌ te twiꞌ akꞌuꞌj bꞌix pax. Qa wetz ngan tzan txik nsiꞌ twiꞌ tkꞌuꞌj te xjal aj ma tzꞌox aqꞌunon max tmankbꞌil parej tukyꞌi twiꞌ akꞌuꞌj, 15 ¿nyaꞌtx petzun wetz at woklen tzan nkꞌulun tukyꞌi ntumin iktzaꞌ wetz ngan? ¿Qatzun yatz nchqꞌojin wiꞌj tzan tpaj galan xjal kyinnabꞌlinji?” 16 Ntons ax ikxji okyꞌel [tzani twitz txꞌoꞌtxꞌ], kye aj tmankbꞌil okyeꞌokel iktzaꞌ kye aj tbꞌay, bꞌix kye aj tbꞌay okyeꞌokel iktzaꞌ kye aj tmankbꞌil.”g
Aj Tyolin Jesus Toxmajjiꞌn-el Tiꞌj Tkamiky
17 Te Jesus aj ikjaꞌn tuq txik tuj tbꞌeyil Jerusalen, ebꞌajtzaj tukꞌleꞌ kye kykabꞌlajujil txnaqꞌatz apart bꞌix oxik tqꞌumaꞌ kyetz ikxjani: 18 “Etetz etebꞌen, ajnaꞌl ikjaꞌn qxik Jerusalen aj jaꞌ okyinxeꞌl qꞌapoꞌ [wetz] te Ichan Aj Tkꞌwaꞌal Dios [aꞌin] tuj kyqꞌabꞌ kye pal aj nim kyajwalil bꞌix kye xnaqꞌtzal kawbꞌil, bꞌix yaji oxeꞌl kyqꞌumaꞌ tzan nkamik, 19 bꞌix okyinxeꞌl kyqꞌapoꞌ tuj kyqꞌabꞌ kye kꞌulul mandad aj nyaꞌtx qxjalil aj kꞌontiꞌl nkyeꞌokslan te Qtata Dios tzan kxmayin wiꞌj bꞌix okyinqtel kyjubꞌchaꞌ bꞌix okyinqtel kyklabiꞌ twitz jun krus, per yaji tuj toxiꞌn qꞌij okyinjawel anqꞌin.”
Aj Tok Xhchaꞌoꞌ Te Tnan Waꞌnch Bꞌix Jacobo Tidiꞌ Presis Tzan Jkꞌamon Jun Qajwalil
20 Ntons te kynan kye tkꞌajol Sebedey opon tukyꞌi Jesus bꞌix ajuneꞌ tuq kye tal tukyꞌiꞌl.h Eqet mejlet twitz Jesus tzan tuq txik kyqaniꞌ tukyꞌiꞌl tzan tbꞌekꞌan kyiꞌj. 21 Te Jesus oxik xhchaꞌoꞌ te xuj ikxjani: “¿Tidiꞌ agan?” Yaji tetz oxik tqꞌumaꞌ ikxjani: “Oj aqet witꞌlet kꞌulul mandad tuj awitꞌlel, intxik akꞌuluꞌ mandad chꞌin tzan kyqet witꞌlet kye wal akꞌatzaj, jun tuj amanqꞌabꞌ bꞌix junky tuj asurt.” 22 Yaji te Jesus owaj stzaqꞌbꞌeꞌ ikxjani: “Etetz kꞌontiꞌl etebꞌen tidiꞌ aj ntzaj eqaniꞌ. ¿Oꞌpetzun obꞌantel tzan etipan etetz te aj xhchoꞌnal iktzaꞌ wetz owokel wen?”i Yaji kyekyi kyetz ikxjani: “Oꞌ.” 23 Te Jesus oxik tqꞌumaꞌ kyetz: “Bꞌanꞌax, etetz owokel eten te xhchoꞌnal iktzaꞌ wetz owokel wen,j per tzan eqet witꞌlet tuj nmanqꞌabꞌ bꞌix tuj nsurt nyaꞌtx aꞌin wetz eꞌel tetz, sinoke oxeꞌl siꞌlet kye aj te Ntat oje kyeꞌel tjoyoꞌ.”
24 Yatzun kye junky lajuj txnaqꞌatz, ya ma tzꞌok kchaꞌoꞌ tidiꞌ okyꞌik, kyetz ebꞌajjaw qꞌojlik kyukyꞌi kye kabꞌeꞌ aj kyerman kyibꞌ. 25 Per yaji te Jesus etzaj tukꞌleꞌ bꞌix oxik tqꞌumaꞌ kyetz ikxjani: “Etetz etebꞌen kxol kye aj kꞌontiꞌl nkyeꞌokslan Dios, kye kꞌulul mandad bꞌix kye aj tlimaqal-eꞌ, kyetz nkyekꞌulun mandad bꞌan jwert kyiꞌj kye kxjalilx. 26 Per exol etetz kꞌontiꞌl tzan tok ikxji, sinoke abꞌl aj tgan tzan tok nim tajwalil exol etetz, a tgan tzan taqꞌunan kye txqꞌanky;* 27 bꞌix abꞌl jun exol etetz aj tgan tzan tok te tbꞌay ewitz, a tgan tzan taqꞌunan kye txqꞌanky iktzaꞌ jun aj cha mosiꞌ tzan junky.* 28 Ax ikxji wiꞌj [wetz] te Ichan Aj Tkꞌwaꞌal Dios [aꞌin]; wetz kꞌontiꞌl inꞌul tzan tok kꞌuluꞌ kyaqil te wetz, sinoke inꞌul tzan kxik nnaꞌoꞌ kye xjal bꞌix tzan txik nqꞌapoꞌ wibꞌ tzan nkamik te kkyꞌixel tzan kykolet kyꞌilaꞌj te kyetz.”*
Aj Tqet Tqꞌanaꞌ Jesus Kabꞌeꞌ Moy
29 Ya ma kyeꞌetz kyetz tuj te amaqꞌ Jeriko, kyꞌilaꞌj xjal ebꞌajꞌok lapet tiꞌj Jesus. 30 Kabꞌeꞌ moy aj witꞌlikeꞌ tuq xtxꞌuꞌk te bꞌey, aj txik kchaꞌoꞌ te Jesus ikjaꞌn tuq tkyꞌik tzi, kyetz ebꞌajjaw sikyꞌin kongan ikxjani: “Tat, yatz aj tijajil Dawid aꞌich, intok loꞌet chꞌin akꞌuꞌj qiꞌja.” 31 Kye xjal ebꞌajxik ilin kyiꞌj tzan tuq kylumet, per kyetz mas tuq nkyejaw sikyꞌin kongan ikxjani: “¡Tat, aj tijajil Dawid aꞌich, intok loꞌet akꞌuꞌj qiꞌja!” 32 Ntons te Jesus owaꞌlet, etzaj tukꞌleꞌ kye moy, bꞌix oxik xhchaꞌoꞌ kyetz ikxjani: “¿Tidiꞌ egan tzan nkꞌulun etiꞌj etetz?” 33 Yaji kyetz owaj ktzaqꞌbꞌeꞌ ikxjani: “Tat, qetza qgana tzan jkaꞌyin.” 34 Ntons te Jesus owok loꞌet tkꞌuꞌj kyiꞌj bꞌix owok tmakoꞌ te kywitz, bꞌeyxnajji kyetz ekaꞌyin bꞌix ebꞌajꞌok lapet tiꞌj Jesus.