10
Aj Tyolin Jesus Tzan Kꞌon Tqet Kypawaꞌ Kyibꞌ Jun Ichan Tukyꞌi Txuꞌjel
1 Bwen, yaji te Jesus kyukyꞌi kye txnaqꞌatz eꞌex tzia bꞌix exik tuj tkwentil Judey bꞌix ejunxlaꞌin te Jordan Aꞌ. Yaji kyꞌilaꞌj xjal owok kchimoꞌ kyibꞌ tiꞌj bꞌix komo iktzaꞌxkix tuq tetz modin, ebꞌajxik txnaqꞌtzaꞌ.
2 Yaji ebꞌajpon txqꞌan aj bꞌuchꞌuj Parisey bꞌix kygan tuq tzan tqet kyeqꞌiꞌ. Ntons oxik kyqaniꞌ te Jesus ikxjani: “¿Nyolin peꞌ tuj te kawbꞌil qa bꞌaꞌn tzan taj tlajoꞌ jun ichan txuꞌjel qatzun nyaꞌtxji?” 3 Ntons te Jesus oxik tqꞌumaꞌ ikxjani: “¿Tidiꞌ okaj tqꞌumaꞌ Moisés?” 4 Ntons owaj ktzaqꞌbꞌeꞌ ikxjani: “Te Moisés okaj tqꞌumaꞌ, jun ichan bꞌaꞌn tzan tqet tkꞌuluꞌ jun tuꞌjal tbꞌay bꞌix yaji tzan taj tlajoꞌ te txuꞌjel.”* 5 Yaji te Jesus oxik tqꞌumaꞌ kyetz ikxjani: “Te Moisés okaj tqꞌumaꞌ ikxji tzan stzꞌakal ewiꞌ.b 6 Per aj tqet tkꞌuluꞌ Dios kyaqil tbꞌay, tetz oqet tkꞌuluꞌ ichan tukyꞌi xuj.* 7 Astilji te ichan okajel tsiꞌ stat tukyꞌi tnan tzan tok junan tukyꞌi txuꞌjel. 8 Ikxji okyeꞌokel iktzaꞌ jun xjal; nyaꞌtx kabꞌeꞌ sinoke iktzaꞌxkix cha jun.* 9 Astilji komo Dios ojetq tzꞌok junbꞌen te kyetz, kꞌontiꞌl tzan tqet kypawaꞌ kyibꞌ.”
10 Ntons ya ma kyeꞌox tuj jun jay, kye txnaqꞌatz oxik kyqaniꞌ junkyꞌel te Jesus tidiꞌ telponx aj oxik tyoliꞌ kye aj bꞌuchꞌuj Parisey. 11 Yaji tetz oxik tqꞌumaꞌ kyetz ikxjani: “Qa jun ichan owajel tlajoꞌ txuꞌjel bꞌix yaji owokel junan tukyꞌi junky, ikxji cha nkꞌajajin. 12 Ax qa jun xuj okajel tkolaꞌ tichmil bꞌix yaji owokel junan tukyꞌi junky, ax ikxji cha nkꞌajajin.”*
Aj Tyolin Jesus Abꞌleꞌ Okyekajel Tuj Tqꞌabꞌ Dios
13 Kye xjal ntzaj tuq kyin kye kykꞌwaꞌal twitz Jesus tzan tuq tqet tsiꞌ tqꞌabꞌ kyajsik tzan kyqet tkyꞌiwlaꞌ. Per kye txnaqꞌatz nkyexik tuq kymiyoꞌ kye xjal. 14 Ya ma tzꞌok ten ikxji, te Jesus kꞌontiꞌl oqet tuj twitz, ojaw qꞌojlik bꞌix oxik tqꞌumaꞌ kyetz ikxjani: “Tzoqpij waq tzan kyul kye kꞌwaꞌl wukyꞌiꞌl bꞌix kꞌon kyexik emiyoꞌ, tzan tpaj kye xjal iktzaꞌ ja kꞌwaꞌlni [aj nkyechalaj wiꞌj] okyekajel tuj tqꞌabꞌ te Qtata Dios. 15 Oxeꞌl nqꞌumaꞌ etetz te bꞌanꞌax, abꞌl aj nlay tkꞌamoj tzan tkaj tuj tqꞌabꞌ te Qtata Dios, iktzaꞌ kye ja kꞌwaꞌl ma kykꞌamojni, ntons aj xjalji nlay kaj tuj tqꞌabꞌ te Qtata Dios.”* 16 Te Jesus nkyejaw tuq xhcheleꞌ kye kꞌwaꞌl bꞌix yaji nqet tuq tsiꞌ tqꞌabꞌ kyajsik tzan kyqet tkyꞌiwlaꞌ.
Aj Tyolin Jesus Kyiꞌj Kye Aj Cha Atok Kykꞌuꞌj Tiꞌj Kyqꞌinomal
17 Aj ikjaꞌn tuq tex te Jesus tzi, jun xjal otzaj karedin bꞌix oqet mejlet twitz, bꞌix oxik tqꞌumaꞌ ikxjani: “Xnaqꞌtzon, yatz galan xjal aꞌich. Ngan tzan txik nqaniꞌ yatz ¿tidiꞌ presis tzan tqet nkꞌuluꞌ tzan wanqꞌin te jun-eleꞌx?” 18 Te Jesus oxik tqꞌumaꞌ: “¿Tistil ntzaj aqꞌumaꞌ wetz qa galan xjal aꞌin? Aꞌox te Qtata Dios galan. 19 Yatz awebꞌenky te aj okaj tqꞌumaꞌ te Qtata Dios oqtxiꞌ tzan kꞌon jkansan xjal,* bꞌix tzan kꞌon jkꞌajajin,* bꞌix tzan kꞌon qelqꞌan,* bꞌix tzan kꞌon tjaw qnikꞌoꞌ kyiꞌj xjal,* bꞌix tzan kꞌon tzꞌel qin tidiꞌ te junky, bꞌix ax tzan kyqet qlimaꞌ qtat tukyꞌi qnan.”* 20 Yaji te xjal oxik tqꞌumaꞌ ikxjani: “Xnaqꞌtzon, wetz owaqꞌik tqet wokslaꞌ kyaqil nini atx aj man tuq nekitin bꞌix eqꞌiꞌx witzaꞌ ajnaꞌl.” 21 Yaji te Jesus owok teꞌeꞌ te xjal bꞌix ochalaj tiꞌj, bꞌix oxik tqꞌumaꞌ ikxjani: “Cha aꞌox junky tidiꞌ npaltin te yatz.c Pax, kꞌayix kyaqil aj tiꞌchq yatz bꞌix yaji oxeꞌl awoyeꞌ te twibꞌen kye mebꞌaꞌ xjal bꞌix yaji owokelnoj mas aqꞌinomal tuj kaꞌj. Yaji bꞌaꞌn tzan atzaj bꞌix pawok lapet wiꞌj.” 22 Ntons ya ma tzꞌok xhchaꞌoꞌ te xjal ikxji, owaj bꞌan nbꞌisun tzan tpaj tetz nim tuq tqꞌinomal. 23 Yaji te Jesus exik teꞌeꞌ kye txnaqꞌatz bꞌix oxik tqꞌumaꞌ ikxjani: “Kye aj qꞌinon xjal kwest tzan tkaj kyqꞌapoꞌ kyibꞌ tuj tqꞌabꞌ Qtata Dios.”
24 Yatzun kye txnaqꞌatz, aj tok kchaꞌoꞌ ikxji, kyetz oje kyelabꞌan. Yaji te Jesus oxik tqꞌumaꞌ junkyꞌel ikxjani: “Nkꞌwaꞌal,d oxeꞌl nqꞌumaꞌ etetz, kye aj qꞌinon xjal kwest tzan tkaj kyqꞌapoꞌ kyibꞌ tuj tqꞌabꞌ Qtata Dios. 25 Jun kway kamey nlay bꞌantik tox tuj jun xhchutil akuxh; ax ikxji kye qꞌinon nlay bꞌantik kykaj tuj tqꞌabꞌ te Qtata Dios [tzan tpaj kyqꞌinomal].”
26 Ntons kye txnaqꞌatz ebꞌajlabꞌan mas. Eꞌokten yoliyon kyibꞌkyibꞌx ikxjani: “¿Abꞌl jun te qetz bꞌaꞌn tzan tkolon tibꞌx?” 27 Ntons te Jesus exik teꞌeꞌ bꞌix oxik tqꞌumaꞌ kyetz ikxjani: “Te ja ntzani nlay bꞌantik tzan kye xjal; yatzun te Qtata Dios bꞌaꞌn tzan tbꞌantik titzaꞌ, komo tetz kyaqil bꞌaꞌn tzan tbꞌantik titzaꞌ.” 28 Yaji te Xhpeꞌy oxik tqꞌumaꞌ ikxjani: “Qetza oje kaj qswaꞌna kyaqil tiꞌchq qetza tzan qok lapetna awiꞌj.” 29 Ntons te Jesus oxik tqꞌumaꞌ ikxjani: “Oxeꞌl nqꞌumaꞌ etetz te bꞌanꞌax, abꞌlchaq xjal aj okajel tsiꞌ tjay, qa terman ichan qatzun terman xuj qatzun stat tukyꞌi tnan bꞌix kye tkꞌwaꞌal qa xtxꞌoꞌotxꞌji, qa okajel tsiꞌ kyaqil nini tzan npaj wetz qatzun tzan tpaj te tpakbꞌalil galan titzaꞌ te Qtata Dios nkolon qiꞌj,e 30 yaji tetz itzꞌojx otkꞌamoꞌtz mas twitz aj at tuq te tetz tbꞌay. Otkꞌamoꞌtz kyꞌilaꞌj tjay, kyꞌilaꞌj terman ichan bꞌix terman xuj, kyꞌilaꞌj xjal iktzaꞌ tnan qa iktzaꞌ tkꞌwaꞌal bꞌix ax mas nim xtxꞌoꞌotxꞌ. Per ax okyꞌel nyaꞌtx galan tiꞌj kyitzaꞌ kye xjal aj nkyeqꞌojin tiꞌj te Qtata Dios, per yatzun oj tponaj ja twitz txꞌoꞌtxꞌni owanqꞌiyon te jun-eleꞌx tukyꞌi te Qtat. 31 Kyꞌilaꞌj kye aj tbꞌay ajnaꞌl okyeꞌokel tmankbꞌil, bꞌix kye aj tmankbꞌil okyeꞌokel tbꞌay.”*
Aj Txik Tqꞌumaꞌ Jesus Te Aj Okyꞌel Tuq Tiꞌj Tetz Tuj Amaqꞌ Jerusalen
32 Ntons te Jesus kyukyꞌi kye txnaqꞌatz ikjaꞌn tuq kxik jawnaq Jerusalen bꞌix te Jesus tbꞌayon kywitz. Kye txnaqꞌatz nkyelabꞌan tuq bꞌix kye aj lapikeꞌ tuq kyiꞌj nkyexobꞌ tuq. Ntons te Jesus eꞌok xhchimoꞌ kye kykabꞌlajujil txnaqꞌatz bꞌix oxik tqꞌumaꞌ kyetz tidiꞌ okyꞌel tuq tiꞌj, oxik tqꞌumaꞌ ikxjani: 33 “Ikjaꞌn qxik Jerusalen bꞌix chaꞌoj qpon tzi, [wetz] te Ichan Aj Tkꞌwaꞌal Dios [aꞌin] okyinxeꞌl qꞌapoꞌ tuj kyqꞌabꞌ kye pal aj nim kyajwalil bꞌix tuj kyqꞌabꞌ kye xnaqꞌtzal Kawbꞌil. Kyetz oxeꞌl kyqꞌumaꞌ tzan nqet kansaꞌ bꞌix yaji okyinxeꞌl kyqꞌapoꞌ tuj kyqꞌabꞌ kye kꞌulul mandad aj nyaꞌtx qxjalil aj kꞌontiꞌl nkyeꞌokslan te Qtata Dios. 34 Bꞌix kyetz okyinꞌokel kxmayiꞌ bꞌix okyinꞌokel ktzubꞌaꞌ bꞌix okyinqtel kyjubꞌchaꞌ bꞌix yaji okyinqtel kykansaꞌ. Per wetz tuj toxiꞌn qꞌij nkamiklen okyinjawel anqꞌin junkyꞌel.”
Aj Tyolin Jesus Tzan Kxik Qnaꞌoꞌ Txqꞌanky Qerman
35 Yaji te Jacobof tukyꞌi Waꞌnch (aꞌeꞌ tkꞌajol Sebedey), kyetz eꞌok laqꞌchet tiꞌj Jesus, bꞌix oxik kyqꞌumaꞌ tetz ikxjani: “Xnaqꞌtzon, qgana tzan tqet akꞌuluꞌ te aj oxeꞌl jqaniꞌna yatz.” 36 Yaji te Jesus oxik tqꞌumaꞌ: “¿Tidiꞌ egan tzan tqet nkꞌuluꞌ?” 37 Ntons kyetz oxik kyqꞌumaꞌ tetz ikxjani: “Chaꞌoj ajakon tuj awitꞌlel, qgana tzan jqetena jun te qetza tuj abꞌanqꞌabꞌ bꞌix junky tuj asurt.” 38 Te Jesus oxik tqꞌumaꞌ ikxjani: “Etetz kꞌontiꞌl nꞌel enikyꞌ tidiꞌ nꞌeqaniꞌ. ¿Nqet peꞌ ebꞌisuꞌ qa etipaꞌtz te xhchoꞌnal iktzaꞌ wetz owokel wen?”g 39 “Oꞌ” kyekyi. “¡Oqipaꞌtzna!” Yaji kyi tetz ikxjani: “Bꞌanꞌax owokel eten twitz te xhchoꞌnal iktzaꞌ wetz owokel wen.h 40 Per nyaꞌtx aꞌin wetz eꞌel tetz tzan eqet witꞌlet tuj nbꞌanqꞌabꞌ bꞌix tuj nsurt, sinoke kye nini kye aj oje kyeꞌel joyoꞌ.”
41 Ntons ya ma tzꞌok kchaꞌoꞌ kye lajujky txnaqꞌatz, kyetz ejaw qꞌojlik tiꞌj te Waꞌnch bꞌix te Jacobo.i 42 Ntons te Jesus ebꞌajtzaj tukꞌleꞌ kkyaqil bꞌix oxik tqꞌumaꞌ kyetz ikxjani: “Etetz etebꞌen, kxol kye aj kꞌontiꞌl nkyeꞌokslan te Qtata Dios, kye aj kꞌulul mandad bꞌix kye aj tlimaqal-eꞌ, kyetz nkyekꞌulun mandad bꞌan jwert kyiꞌj kye kxjalilx. 43 Yatzun exol etetz, kꞌon ekꞌuluj ikxji* sinoke abꞌl jun aj tgan tzan tok nim tajwalil exol etetz, a tgan tzan taqꞌunan kye txqꞌanky. 44 Bꞌix abꞌl jun etetz aj tgan tzan tok te tbꞌay ewitz, a tgan tzan taqꞌunan kye txqꞌanky iktzaꞌ jun aj cha mosiꞌ tzan junky,* 45 iktzaꞌx [wetz] te Ichan Aj Tkꞌwaꞌal Dios [aꞌin], kꞌontiꞌl inꞌul tzan tok kꞌuluꞌ kyaqil te wetz, sinoke inꞌul tzan kxik nnaꞌoꞌ kye xjal bꞌix tzan txik nqꞌapoꞌ wibꞌ tzan nkamik te kkyꞌixel tzan kykolet kyꞌilaꞌj te kyetz.”
Aj Tqet Tqꞌanaꞌ Jesus Jun Moy Tuj Amaqꞌ Jeriko
46 Bwen, yaji ebꞌajpon tuj amaqꞌ Jeriko. Aj ikjaꞌn tuq kyex te Jesus kyukyꞌi txnaqꞌatz, lapikeꞌ tuq kyꞌilaꞌj xjal kyiꞌj. Ntons tuj bꞌey atqet tuq jun xjal moy bꞌix limosner, Bartimey tuq tbꞌi, tetz stat Timey. Te Bartimey tetz witꞌliqet tuq tzi. 47 Ya ma xik xhchaꞌoꞌ a tuq te Jesus aj Nasaret ikjaꞌn tkyꞌik tzi, tetz ojaw sikyꞌin kongan ikxjani: “Jesus aj tijajil Dawid aꞌich,j intok loꞌet chꞌin akꞌuꞌj wiꞌj.” 48 Kyꞌilaꞌj xjal nkyemiyon tuq tiꞌj tzan kꞌon tsikyꞌin, per yatzun tetz mas tuq njaw sikyꞌin kongan, nxik tuq tqꞌumaꞌ: “Tijajil Dawid aꞌich, intok loꞌet chꞌin akꞌuꞌj wiꞌj.” 49 Ntons yaji te Jesus owaꞌlet bꞌix oxik tqꞌumaꞌ kye xjal ikxjani: “Instzaj etukꞌleꞌ.” Ntons otzaj kyukꞌleꞌ bꞌix oxik kyqꞌumaꞌ ikxjani: “¡Nimsaj akꞌuꞌj! ¡Pajaw waꞌlet! ¡Tetz nchtukꞌleꞌ aꞌich!” 50 Ntons te moy okaj txon te xtxoꞌw bꞌix ojaw waꞌlet toqwen tzan tpon twitz Jesus. 51 Yaji te Jesus oxik xhchaꞌoꞌ tetz: “¿Tidiꞌ agan tzan tok nkꞌuluꞌ awiꞌj?” Te moy oxik tqꞌumaꞌ ikxjani: “Xnaqꞌtzon, ngan tzan tbꞌantik nkaꞌyin.” 52 Yaji te Jesus oxik tqꞌumaꞌ: “Bꞌaꞌn tzan awaj; maꞌtx chbꞌantik tzan tpaj ma tzꞌok witꞌlet akꞌuꞌj wiꞌj.” Bꞌeyxnajji te xjal obꞌantik tkaꞌyin bꞌix owok lapet tiꞌj Jesus.