16
Te Yekꞌbꞌil Tiꞌj Jun Aqꞌunon Aj Nyaꞌtx Galan Nabꞌlin
1 Ntons, ax oxik tqꞌumaꞌ kye txnaqꞌatz [jun yekꞌbꞌil] ikxjani: “At tuq jun xjal bꞌan qꞌinon, bꞌix tetz at tuq jun taqꞌunon aj nkꞌulun mandad tuq tiꞌj kyaqil tidiꞌ tetz, per yaji owok jun part tukyꞌiꞌl, te aj taqꞌunonni nqet tuq bꞌaj txqꞌelaꞌ kyaqil aj tidiꞌ tetz. 2 Ntons te ajawilon otzaj tukꞌleꞌ, oxik tqꞌumaꞌ tetz ikxjani: “¿Tidiꞌ kyaqil aj nꞌok nchaꞌoꞌ awiꞌjni? Ajnaꞌl ngan tok nchaꞌoꞌ tiꞌj kyaqil aj nꞌawaqꞌunaꞌ, bꞌix ya nlay xhchꞌok kꞌulul mandad tiꞌj kyaqil tidiꞌ wetz.” 3 Ntons te aqꞌunon otyolij tibꞌx ikxjani: “¿Ajnaꞌl tidiꞌ nkꞌuluꞌtz? Te npatron okyinꞌelal tin tuj waqꞌun. Bꞌix tzan waqꞌunan tuj kꞌul kꞌontiꞌl nbꞌantik. Bꞌix tzan nqanin jun limosn nkyinkyꞌixwik. 4 Ya webꞌenky tidiꞌ nkꞌuluꞌtz tzan nkꞌamet tuj kyjay kye xjal oj tel eqꞌiꞌ waqꞌun.”
5 Ntons ebꞌajtzaj tukꞌleꞌ junjunchaq kye xjal aj at tuq kykꞌas tukyꞌi te tpatron bꞌix oxik tqꞌumaꞌ te aj tbꞌay ikxjani: “¿Jatebꞌ kꞌasbꞌenaꞌ awitzaꞌ tukyꞌi npatron?” 6 Te junky oxik tqꞌumaꞌ ikxjani: “Kꞌasbꞌenaꞌ witzaꞌ oqal (100) malon aseyt.” Ntons tetz oxik tyoliꞌ tukyꞌi te kꞌasbꞌenon ikxjani: “Ntzani te tuꞌjal; paqet witꞌlet bꞌix intqet atzꞌibꞌaꞌ lajuj tuj oxqal (50) malon.” 7 Yaji otzaj tukꞌleꞌ junky, oxik tqꞌumaꞌ tetz ikxjani: “Yor yatz, ¿jatebꞌ kꞌasbꞌenaꞌ awitzaꞌ?” Te xjal oxik tqꞌumaꞌ: “Wetz kꞌasbꞌenaꞌ oqal (100) malona triw.” Yaji tetz oxik tqꞌumaꞌ: “Ntzani te tuꞌjal bꞌix paqet witꞌlet bꞌix inqet atzꞌibꞌaꞌ cha mutxꞌ (80) malon.”
8 Ntons yaji te tpatron owel tnikyꞌ tiꞌj te aqꞌunon aj nyaꞌtx tuq galan nabꞌlin, oje labꞌan tiꞌj tzan tpaj titzaꞌ tuq ojetq qet tbꞌisuꞌ tzan tkꞌulun kyukyꞌi kye xjal. Komo kye xjal aj twitz ja txꞌoꞌtxꞌni aj kꞌontiꞌl Dios tuj kywitz, kyetz nkyeꞌok il tzan kyjoyon jun tumeꞌl titzaꞌ tzan kyten galan kxolx, yatzun kye tkꞌwaꞌal Qtata Dios kꞌontiꞌl nꞌok ksiꞌ kykꞌuꞌj [tzan kyjoyon te tumeꞌl bꞌanꞌax]. 9 Wetz oxeꞌl nqꞌumaꞌ etetz tzan token etitzaꞌ kyaqil eqꞌinomal aj twitz ja txꞌoꞌtxꞌni tzan kyok mas etajyol. Ikxji oj tmankun kyaqil te aj twitz ja txꞌoꞌtxꞌni, yaji at abꞌl aj okꞌamoyon te etetz tuj kyjay tuj kaꞌj te jun-eleꞌx. 10 Abꞌl te aj galan ntkꞌuluꞌ tukyꞌi jun tidiꞌ aj nyaꞌtx nim, ax galan ntkꞌuluꞌ tukyꞌi jun tidiꞌ nim; bꞌix te aj kꞌontiꞌl ntkꞌuluꞌ galan tukyꞌi jun tidiꞌ nyaꞌtx nim, ax kꞌontiꞌl ntkꞌuluꞌ galan tukyꞌi jun tidiꞌ aj nim. 11 Qa etetz kꞌontiꞌl nꞌekꞌuluꞌ jun galan tukyꞌi te eqꞌinomal aj twitz ja txꞌoꞌtxꞌni, ¿ntons abꞌl okajel witꞌlet tkꞌuꞌj etiꞌj tzan tkaj tuj eqꞌabꞌ te qꞌinomal bꞌan bꞌanꞌax [aj tuj kaꞌj]? 12 Qa etetz kꞌontiꞌl nꞌekꞌuluꞌ galan tukyꞌi jun tidiꞌ aj nyaꞌtx etetz, ntons ¿abꞌl oxeꞌl sin jun tidiꞌ te etetz?
13 Nijunwt mosj bꞌaꞌn tzan taqꞌunan te kabꞌeꞌ tpatron tzan tpaj owokel tajqꞌojaꞌ te jun bꞌix te junky oqtel tganiꞌ, qatzun oqtel tokslaꞌ te jun bꞌix te junky owelal tikꞌoꞌ. Ax ikxji nlay bꞌantik tzan qaqꞌunan te Qtata Dios bꞌix tiꞌj kyaqil te jqꞌinomal kykabꞌil.”*
Te Jesus Nxnaqꞌtzan Tiꞌj Junjun Tidiꞌ Aj Nlay Kyꞌixpjik
14 Kye aj bꞌuchꞌuj Parisey nkyechaꞌon tuq aj txik tqꞌumaꞌ ikxjani, bꞌix kyetz bꞌan kygan tuq te qꞌinomal bꞌix nkyexmayin tuq tiꞌj Jesus. 15 Yaji te Jesus oxik tqꞌumaꞌ kyetz ikxjani: “Etetz aꞌixk nkxyolin galan etiꞌjx tzan etel galan tuj kywitz kye xjal, per te Qtata Dios totzqiꞌ te etanim. Te aj bꞌan tbꞌanil tuj kywitz kye xjal, nꞌel tuj twitz te Qtata Dios bꞌan nyaꞌtx galan.
16 Te Kawbꞌil bꞌix te aj oqet ktzꞌibꞌaꞌ kye aj yolil tyol Dios oqtxiꞌ, nyolin tuq titzaꞌ tzan qbꞌet tuj tumeꞌl max aj tul te Waꞌnch. Yaji owaqꞌik tzan txik pakbꞌlet te tpakbꞌalil galan tiꞌj te tumeꞌl titzaꞌ tzan kykaj kye xjal tuj tqꞌabꞌ Qtata Dios bꞌix kkyaqil nkyeꞌok il tzan kykaj tuj tqꞌabꞌ.* 17 Anke ponaj-wit te twitz txꞌoꞌtxꞌ bꞌix te twitz kaꞌj, yatzun te tyol Qtata Dios aj oje kaj tsiꞌ, nlay bꞌantik tzan tponaj chꞌinwt, opoyonkix kyaqil aj tzꞌibꞌankaj.* 18 Abꞌl aj owelal tpawaꞌ tibꞌ tiꞌj txuꞌjel bꞌix owokel junan tukyꞌi junky, te nini cha nkꞌajajin. Bꞌix abꞌl te aj owokel junan tukyꞌi jun aj pawaꞌ tibꞌ tukyꞌi tichmil ax cha nkꞌajajin.”*
Te Yekꞌbꞌil Tiꞌj Jun Qꞌinon Bꞌix Jun Mebꞌaꞌ Xjal
19 [Yaji oxik tqꞌumaꞌ Jesus ikxjani]: “Ntons, at tuq jun xjal bꞌan qꞌinon tuq, bꞌix nꞌok tsiꞌ tuq tqꞌanaq púrpura tebꞌl bꞌan kar bꞌix lino bꞌan tzꞌuꞌin. Bꞌix bꞌajqꞌij nqꞌijlan tuq tukyꞌi tidiꞌchq bꞌan tbꞌanil. 20 Bꞌix ax at tuq jun mebꞌaꞌ xjal, Lásaro tbꞌi, aj cha nqeten tuq stziꞌ tlamel te qꞌinon qanil jun tlimosn bꞌix tetz ajun txꞌaꞌk tuq tiꞌj. 21 Tetz bꞌan tgan tuq tzan twaꞌan chꞌin te aj nqet tzꞌaqik tjaqꞌ tmes te qꞌinon [per kꞌontiꞌl obꞌantik], bꞌix nkyetzaj tuq kye txꞌyaꞌn nꞌel tuq kyleqꞌuꞌ twitz xtxꞌaꞌak te mebꞌaꞌ.
22 Ntons, jun qꞌij okamik te mebꞌaꞌ bꞌix oxik eqꞌiꞌ tuj kaꞌj tzan kye ángel aj jaꞌ atqet te Abran. Bꞌix ax okamik te qꞌinon xjal, bꞌix tetz owox muquꞌ. 23 Te qꞌinon atqet tuq kxol kye kamnaqb aj jaꞌ nꞌok ten tuq twitz nim xhchoꞌnal, bꞌix ojaw kaꞌyin bꞌix oxik ten laqꞌchik te Abran bꞌix te Lásaro tukyꞌiꞌl. 24 Te qꞌinon ojaw sikyꞌin ikxjani: “Tat Abran, intok loꞌet chꞌin akꞌuꞌj wiꞌj. Instzaj alajoꞌ chꞌin te Lásaro tzan tok tmuꞌuꞌ chꞌin te twiꞌ tqꞌabꞌ tukyꞌi aꞌ tzan stzaj muꞌul chꞌin te waqꞌ tzan tpaj nꞌok wen twitz nim xhchoꞌnal tuj ja qꞌaqꞌni.” 25 Per te Abran owaj stzaqꞌbꞌeꞌ ikxjani: “Tey, instzaj anaꞌoꞌ, yatz kyaqil bꞌan galan okyꞌik awiꞌj aj itzꞌojich tuq, per te Lásaro kꞌontiꞌl okyꞌik galan tiꞌj. Tetz ajnaꞌl nxik nimsaꞌ tkꞌuꞌj tzani bꞌix yatz tzi nꞌok awen twitz xhchoꞌnal. 26 Bꞌix oje kaj siꞌ qxol jun chman xaq, bꞌix nlay bꞌantik kkyꞌix nijunwt aj qxola tzani tzan tpon etukyꞌiꞌl tzi. Bꞌix kye aj kygan kkyꞌitz exol tzi tzan kyul tzani, ax nlay bꞌantik tzan kkyꞌitz.” 27 Yaji te qꞌinon oxik tqꞌumaꞌ ikxjani: “Ntons bꞌekꞌan chꞌin tat Abran tzan txik alajoꞌ chꞌin te Lásaro tjay te ntat. 28 Ateꞌ jwebꞌ werman, bꞌix tzan txik tyoliꞌ kyukyꞌiꞌl tzan kꞌon ktzaj kyetz tuj ja luwar aj jaꞌ nim xhchoꞌnalni.” 29 Te Abran oxik tqꞌumaꞌ tetz ikxjani: “Kyetz atqet kyukyꞌiꞌl te aj oqet stzꞌibꞌaꞌ Moisés bꞌix ax aj oqet ktzꞌibꞌaꞌ kye aj yolil tyol Dios oqtxiꞌ. Intok ksiꞌ kywiꞌ tiꞌj.” 30 Yaji te qꞌinon oxik tqꞌumaꞌ: “Bꞌanꞌax tat, per qa jun kamnaq ojawel anqꞌin bꞌix oyoliyon kyukyꞌiꞌl ntons kyetz ojawel kkyꞌixpuꞌ kynabꞌlin.” 31 Per te Abran oxik tqꞌumaꞌ: “Qa kꞌon kygan tzan txik kyokslaꞌ aj stzꞌibꞌen Moisés bꞌix aj ktzꞌibꞌen kye aj yolil tyol Dios oqtxiꞌ, ax nlay xik kyokslaꞌ anke ma jaw anqꞌin jun kamnaq kxol.””