15
Te Yekꞌbꞌil Tiꞌj Te Pastoriyon Aj Oxiknaj Jun Taloꞌ Bꞌix Owoknoj Junkyꞌel
1 Ntons, kyꞌilaꞌj kye aj peyul chojenj te amaqꞌ Rom bꞌix txqꞌanky xjal aj chimol choj, nkyeꞌok tuq kchimoꞌ kyibꞌ chaꞌoyon tiꞌj Jesus. 2 Ntons tzan tpaj nini kye aj bꞌuchꞌuj Parisey bꞌix kye aj xnaqꞌtzal Kawbꞌil, nkyeyolin tuq nyaꞌtx galan tiꞌj, nxik tuq kyqꞌumaꞌ ikxjani: “Tetz nkyetkꞌamoꞌ kye aj chimol choj bꞌix nwaꞌan junx kyukyꞌiꞌl.”
3 Ntons te Jesus oxik tqꞌumaꞌ ja yekꞌbꞌil kyetz ikxjani: 4 “¿Abꞌl jun te etetz, qa at oqal (100) taloꞌ bꞌix yaji dech oxeꞌl naj jun, nlay petzun kyekaj tbꞌubꞌaꞌ kye txqꞌanky xtxaꞌm pastorbꞌil bꞌix yaji oxeꞌl joyol te junky aj ojetq xiknaj maxkix oj toknoj titzaꞌ? 5 Bꞌix ya oj toknoj titzaꞌ, nchalaj, njax tsiꞌ twiꞌ tqꞌabꞌ 6 bꞌix oj tpon tjay, okyeꞌokel xhchimoꞌ tajyol bꞌix kye aꞌeꞌ tbesin, oxeꞌl tqꞌumaꞌ kyetz ikxjani: “Peꞌechalaj waq wukyꞌiꞌl tzan tpaj maꞌtx tzꞌoknoj witzaꞌ te waloꞌ aj ojetq tuq xiknaj.” 7 Wetz oxeꞌl nqꞌumaꞌ etetz, ax ikxji tuj kaꞌj at mas chalajbꞌil tzan tpaj jun chimol choj maꞌtx jaw tkyꞌixpuꞌ tnabꞌlin, kywitz kye kyꞌilaꞌj txqꞌankya galan xjal aj nyaꞌtx presis tzan tjaw kkyꞌixpuꞌ kynabꞌlin.”
Te Yekꞌbꞌil Tiꞌj Te Xuj Aj Oxiknaj Jun Stumin Bꞌix Owoknoj Junkyꞌel
8 “¿Abꞌl jun xuj aj at lajuj stumin, qa oxeꞌl tnajsaꞌ jun, kꞌontiꞌl petzun nꞌok xtxaqoꞌ jun tqꞌanal bꞌix owelax tkyꞌisuꞌ [byenech kyebꞌaꞌ] tuj tjay bꞌix ojoyoyon [kyebꞌaꞌ] maxkix oj toknoj? 9 Bꞌix oj toknoj titzaꞌ okyeꞌokel xhchimoꞌ kye aꞌeꞌ tajyol bꞌix kye tbesin, oxeꞌl tqꞌumaꞌ kyetz ikxjani: “Peꞌechalaj waq junx wukyꞌiꞌl tzan tpaj maꞌtx tzꞌoknoj te tmin witzaꞌ aj ojetq tuq xiknaj.” 10 Wetz oxeꞌl nqꞌumaꞌ etetz, ax ikxji tuj kaꞌj at nim chalajbꞌil tzan tpaj maꞌtx jaw tkyꞌixpuꞌ tnabꞌlin jun joyol choj.”
Te Yekꞌbꞌil Tiꞌj Te Kꞌwaꞌlon Aj Nchalaj Tiꞌj Te Tkꞌwaꞌal Aj Omeltzꞌjik Tjay
11 Ntons, ax oxik tqꞌumaꞌ kyetz ikxjani: “Jun xjal ateꞌ tuq kabꞌeꞌ tkꞌwaꞌal. 12 Tzaj te itzꞌinj, oxik tqꞌumaꞌ te stat ikxjani: “Tat, instzaj asiꞌ te werensy aj at woklen tiꞌj.” Ntons te kꞌwaꞌlon oqet tpawaꞌ te kyerensy. 13 Ntons nyaꞌtx kyꞌilaꞌj qꞌijky, te itzꞌinj, ya ma chimet titzaꞌ kyaqil [aj tidiꞌ tetz], tetz oxik tuj junky amaqꞌ laqꞌchik bꞌix tzi oqet txqꞌelaꞌ kyaqil te terensy, owanqꞌin tuj jun tumeꞌl bꞌan nyaꞌtx galan bꞌix ikxji cha oqet txqꞌelaꞌ te stumin. 14 Bꞌix ya ma qetbꞌaj tnajsaꞌ kyaqil te stumin, yaji otzaj jun nim waꞌij tuj aj amaqꞌji, yaji tetz otnaꞌoj tidiꞌchq tuq npaltin tetz. 15 Yaji tzaj tetz, oxwaꞌq tukyꞌi jun xjal tuj aj amaqꞌji qanil jun taqꞌun bꞌix te xjal oxik tlajoꞌ kꞌulul kwent kye kuch tuj kꞌul. 16 [Bꞌix komo nꞌokten tuq twitz nim waꞌij], tetz tgan tuq tzan txik twaꞌaꞌ kyweꞌ kye kuch, per nijunwt tuq abꞌl nxik sin tetz. 17 Ntons oqeten bꞌisul tetz bꞌix otyolij tibꞌx ikxjani: “Kyꞌilaꞌj kye aqꞌunon tuj tjay ntat, kyetz at nim kyweꞌ, bꞌix wetz tzani chꞌinky nkamik tzan waꞌij. 18 Mejor ma kyinꞌaj tjay ntat bꞌix oxeꞌl nqꞌumaꞌ tetz ikxjani: ‘Tat, wetz maꞌtx kyinjoyon choj tuj twitz [Qtata Dios aj atjax] tuj kaꞌj bꞌix tuj awitz yatz. 19 Kꞌontiꞌl woklen tzan wok aqꞌumaꞌ akꞌwaꞌal aꞌin. Kꞌuluj chꞌin wukyꞌiꞌl iktzaꞌ nꞌakꞌuluꞌ kyukyꞌi kye aj awaqꞌunon.’ ”
20 Ntons owaj bꞌix oxik, opon tukyꞌi stat. Aj man tuq ikxjaꞌn stzaj laqꞌchet laqꞌchik, te stat oxik teꞌeꞌ bꞌix owok loꞌet tkꞌuꞌj tiꞌj bꞌix oxik oqelan kanol tetz, bꞌix bꞌan nchalaj otzaj xhcheleꞌ.b 21 Tzaj te tkꞌwaꞌal, oxik tqꞌumaꞌ tetz ikxjani: “Tat, wetz maꞌtx kyinjoyon choj tuj twitz [Qtata Dios aj atjax] tuj kaꞌj bꞌix tuj awitz yatz. Kꞌontiꞌl woklen tzan wok aqꞌumaꞌ akꞌwaꞌal aꞌin.” 22 Per tzaj te stat, oxik tqꞌumaꞌ kye tmos ikxjani: “Instzaj ejoyoꞌ naj jun tqꞌanaq aj mas bꞌan tbꞌanil bꞌix intok esiꞌ tiꞌj, bꞌix intok esiꞌ jun txmulqꞌabꞌ bꞌix intok esiꞌ txajabꞌ. 23 Bꞌix instzaj etin te tal wakxh aj mas bꞌan wort bꞌix intqet ekansaꞌ. Qobꞌajwaꞌan bꞌix qobꞌajchalaj waq 24 tzan tpaj te ja nkꞌajolni, tetz iktzaꞌ kamnaq tuq bꞌix ajnaꞌl maꞌtx jaw anqꞌinky, ojetq tuq xiknaj per ajnaꞌl maꞌtx tzꞌoknoj.” Bꞌix eꞌaqꞌik tzan kchalaj kxolx.
25 Ntons te itzikj nꞌaqꞌunan tuq tuj kꞌul. Ya ma tzul, otzaj laqꞌchet tzijay bꞌix oxik xhchaꞌoꞌ te bꞌixbꞌilj bꞌix te son. 26 Ntons otzaj tukꞌleꞌ jun aqꞌunon bꞌix oxik xhchaꞌoꞌ tistil tuq kyaqil nini. 27 Tzaj te aqꞌunon, oxik tqꞌumaꞌ tetz ikxjani: “Te awitzꞌin maꞌtx tzul bꞌix te atat ma xik tkꞌuluꞌ mandad tzan tqet kanslet te tal wakxh aj mas bꞌan wort tzan tpaj ma tzul galan.” 28 Ntons tetz ojaw qꞌojlik nim bꞌix kꞌon tgan tuq tzan tox. Ntons owetz te stat bꞌix oqet twitz twitz tzan tuq tox. 29 Tzaj te itzikj, oxik tqꞌumaꞌ te stat ikxjani: “Wetz tzani akyinqet kyꞌilaꞌj aqꞌbꞌi nkyinꞌaqꞌunan te yatz, bꞌix kyaqil tyemp ma chqet wokslaꞌ tiꞌj kyaqil aj ntzaj akꞌuluꞌ mandad wetz, bꞌix ni jun-el oje tzaj asiꞌ-wit wetz ni jun chꞌi tal chib tzan nchalaj kyukyꞌi wamiw. 30 Per ajnaꞌl tulen te ja akꞌwaꞌal aj maꞌtx qetbꞌaj txqꞌelaꞌ kyaqil tidiꞌ yatz kyukyꞌi xuj aj cha nkyekꞌayin kyibꞌ, bꞌix maꞌtx qet akansaꞌ te tetz te tal wakxh aj mas bꞌan wort.” 31 Ntons te stat oxik tqꞌumaꞌ ikxjani: “Nkꞌajol, yatz atichqetkix tzani wukyꞌiꞌl bꞌajqꞌij bꞌix kyaqil aj tidiꞌ wetz kyaqil te yatz. 32 Per presis tuq tzan qchalaj qkyaqil tzan tpaj te ja awitzꞌinni tetz [iktzaꞌ] kamnaq tuq, per ajnaꞌl maꞌtx jaw anqꞌin junkyꞌel, tetz ojetq tuq xiknaj per ajnaꞌl maꞌtx tzꞌoknoj.””