18
Aj Tyolin Jesus Abꞌl Te Aj Mas Galan
1 Ntons tuj aj orji kye txnaqꞌatz Jesus eꞌok laqꞌchet tiꞌj bꞌix oxik kchaꞌoꞌ tetz ikxjani: “¿Abꞌl te mas nim tajwalil kxol kyaqil kye aj akyeqet tuj tqꞌabꞌ te Qtat aj nnajan tuj kaꞌj?” 2 Ntons te Jesus otzaj tukꞌleꞌ jun tal kꞌwaꞌl bꞌix oqet twabꞌaꞌ kxol 3 bꞌix oxik tqꞌumaꞌ kyetz ikxjani: “Wetz oxeꞌl nqꞌumaꞌ etetz te bꞌanꞌax, qa etetz nlay jaw ekyꞌixpuꞌ enabꞌlin, bꞌix qa nlay kxꞌok iktzaꞌ kꞌwaꞌl, nlay bꞌantik tzan eten tuj tqꞌabꞌ te Qtat aj nnajan tuj kaꞌj.* 4 Astilji, abꞌl aj nꞌokslan iktzaꞌ jun kꞌwaꞌl iktzaꞌ ntzani, nim oqtel jiqꞌbꞌaꞌ kxol kye aj akyeqet tuj tqꞌabꞌ te Qtat aj nnajan tuj kaꞌj. 5 Bꞌix abꞌl te aj otkꞌamoꞌtz jun kꞌwaꞌl iktzaꞌ ntzani tzan tpaj te xjal nꞌokslan wiꞌj, aꞌin nkyintkꞌamoꞌ. 6 Bꞌix abꞌl aj otkꞌuluꞌtz tzan tqet tzꞌaqik jun kꞌwaꞌl iktzaꞌ kye ja ntzanijeꞌni aj nkyeꞌokslan wiꞌj, mejor-tal tzan tqet kꞌalet talq jun matij abꞌj kyebꞌil triw bꞌix tzan tqex xoꞌoꞌ max txeꞌ te nim aꞌ. 7 ¡Last-al kye xjal twitz ja txꞌoꞌtxꞌni aj nkyekꞌulun tzan kyqet tzꞌaqik txqꞌanky! Qetz owokel qenkix twitz tidiꞌchq aj tgan-tal tzan jqet tzꞌaqik titzaꞌ, per last-al te xjal aj nkꞌulun tzan tqet tzꞌaqik junky. 8 Ntons qa te aqꞌabꞌ qatzun awoqji ntkꞌuluꞌ tzan aqet tzꞌaqik, ntons intel atxꞌemuꞌ bꞌix intel awin awiꞌj; komo mejor tzan aten kox qa xhkutji bꞌix tzan awanqꞌin, bꞌix nyaꞌtx tzan axik xon tukyꞌi kykabꞌil awoq bꞌix kykabꞌil aqꞌabꞌ tuj te nim qꞌaqꞌ aj kꞌontiꞌl nqextzaj.* 9 Bꞌix qa te tbꞌaqꞌ awitz ntkꞌuluꞌ tzan aqet tzꞌaqik, ntons intetz awin bꞌix intex axon; komo mejor tzan aten cha tukyꞌi jun tbꞌaqꞌ awitz bꞌix tzan awanqꞌin, bꞌix nyaꞌtx tzan axik xon tukyꞌi kykabꞌil awitz tuj te nim qꞌaqꞌ aj jaꞌ te xhchoꞌnal kꞌontiꞌl nmankun.”*
Te Yekꞌbꞌil Tiꞌj Jun Karner Aj Ojetq Xik Naj
10 “Intok esiꞌ enabꞌl tzan kꞌon kyel etikꞌoꞌ nijunwt kye aj kꞌo kꞌwaꞌlni. Komo kye ángel tuj kaꞌj aj nkyekꞌulun kwent te kyetz, akyeqet twitz te Ntat aj atjax tuj kaꞌj. 11 Komo [wetz] te Ichan Aj Tkꞌwaꞌal Dios [aꞌin] inꞌul koloyon kyiꞌj kye aj oje kyexiknaj.a
12 ¿Titzaꞌ etetz tuj enabꞌl? Qa jun xjal at oqal (100) taloꞌ bꞌix qa oxeꞌl naj jun, ¿nlay petzun kyekaj tsiꞌ kye txqꞌanky tuj kꞌul bꞌix oxeꞌl joyol te jun aj ojetq xiknaj? 13 Wetz oxeꞌl nqꞌumaꞌ etetz te bꞌanꞌax, qa owokel noj titzaꞌ, ochalajel mas tiꞌj aj jun ojetq tzꞌok noj titzaꞌ kywitz kye txqꞌanky aj kꞌontiꞌl ma kyexiknaj. 14 Ax ikxji te etat aj atjax tuj kaꞌj, tetz kꞌon tgan tzan kxiknaj nijunwt kye ja kꞌo kꞌwaꞌlni.”
Aj Tyolin Jesus Tzan Kyqet Qnajsaꞌ Kye Qerman
15 “Ntons, qa jun awerman ma tkꞌuluj jun nyaꞌtx galan awiꞌj, ntons intxik akawiꞌ, payolin tukyꞌiꞌl achukel bꞌix intxik aqꞌumaꞌ tetz jaꞌ npaltin. Qa owokex tuj twiꞌ, ntons maꞌtx bꞌantik sten exol. 16 Per qa nlay tzꞌox tuj twiꞌ, ntons instzaj awukꞌleꞌ junky qa kabꞌeꞌky xjalji, ikxji kyaqil aj oxeꞌl aqꞌumaꞌ tiꞌj owokel kchaꞌoꞌ kye kabꞌeꞌky testiw qa oxji.* 17 Per qa ni ikxji nlay tzꞌox tuj twiꞌ, ntons a tgan tzan txik aqꞌumaꞌ kywitz kyaqil kye txqꞌanky qerman txini; bꞌix qa ni ikxji nlay tzꞌox tuj twiꞌ, ntons a tgan tzan tok qꞌumlet tetz iktzaꞌ jun aj nyaꞌtx qijajil aj kꞌontiꞌl nꞌokslan te Qtata Dios qatzun iktzaꞌ jun aj peyul chojenjji [aj kꞌontiꞌl nꞌokslan].
18 Wetz oxeꞌl nqꞌumaꞌ etetz te bꞌanꞌax, kyaqil aj nlay etzoqpij tzani twitz ja txꞌoꞌtxꞌni, ax nlay kꞌamet [tukyꞌi te Qtata Dios] tuj kaꞌj, bꞌix kyaqil te aj etzoqpiꞌtz tzani twitz txꞌoꞌtxꞌni, ax okꞌametel [tukyꞌi te Qtata Dios] tuj kaꞌj.* 19 Ax oxeꞌl nqꞌumaꞌ etetz qa kabꞌeꞌ te etetz oj exnaqꞌtzan tzani twitz txꞌoꞌtxꞌ, qa dyakwerd atix tiꞌj te aj oxeꞌl eqaniꞌ, ntons te Ntat aj atjax tuj kaꞌj otzajel tsiꞌ. 20 Komo aj jaꞌ akyeqet kabꞌeꞌ qatzun oxji chimoꞌ kyibꞌ nkyenaꞌon wetz, wetz akyinqet kxol.”
21 Ntons owok laqꞌchet te Xhpeꞌy tiꞌj Jesus, oxik xhchaꞌoꞌ tetz ikxjani: “¿Tat, jatebꞌ-el oqtel nnajsaꞌ jun werman qa ma tkꞌuluj jun nyaꞌtx galan wiꞌj? ¿Wuq-el peꞌ?” 22 Te Jesus oxik tqꞌumaꞌ tetz ikxjani: “Nyaꞌtx cha wuq-el sinoke bꞌan kyꞌilaꞌj-elb aj presis.”
Te Yekꞌbꞌil Tiꞌj Jun Aqꞌunon Aj Kꞌontiꞌl Oqet Tnajsaꞌ Junky
23 “Nxik nqꞌumaꞌ ikxji tzan tpaj oj kykaj kye xjal tuj tqꞌabꞌ te Qtat aj nnajan tuj kaꞌj, te nini iktzaꞌ tiꞌj jun kꞌulul mandad nꞌeqꞌin tajlal kyukyꞌi kye tmos. 24 Aj taqꞌik tzan tpeyun kyetz, opon qꞌapbꞌaj tukyꞌiꞌl jun xjal aj kꞌasbꞌenaꞌ tuq titzaꞌ bꞌan nim tminc tukyꞌiꞌl. 25 Komo te aj aqꞌunonji kꞌontiꞌl tuq stumin tzan xhchojet titzaꞌ, ntons te kꞌulul mandad oxik tkꞌuluꞌ mandad tzan tuq txik kꞌayiꞌ te taqꞌunon tukyꞌi junky, tukyꞌix txuꞌjel bꞌix tkꞌwaꞌal bꞌix kyaqil tuq aj tidiꞌ tetz tzan tuq xhchojet te kꞌas. 26 Ntons te tmos oqet mejlet twitz bꞌix oqet twitz twitz ikxjani: “Tat, insten apasens chꞌin wiꞌj, wetz owokel nchojoꞌ kyaqil te nkꞌas awukyꞌiꞌl.” 27 Ntons te kꞌulul mandad owok loꞌet tkꞌuꞌj tiꞌj bꞌix oqet tnajsaꞌ te tkꞌas bꞌix oxik stzoqpiꞌ.
28 Per ya ma xik tzoqpiꞌ te tmos, dech owoknoj twitz jun tukyꞌiꞌl aj kꞌasbꞌenaꞌ tuq titzaꞌ jun nim tmin tukyꞌiꞌl iktzaꞌ twiꞌ tkꞌuꞌj jun xjal kye oqal qꞌij. Otzaj stzyuꞌ bꞌix owaqꞌik tzan tok chxhipoꞌ talq bꞌix oxik tqꞌumaꞌ tetz ikxjani: “¡Intok achojoꞌ aj kꞌasbꞌenaꞌ awitzaꞌ wukyꞌiꞌl!” 29 Ntons te tukyꞌiꞌl oqet mejlet twitz bꞌix oqet twitz twitz ikxjani: “Insten apasens chꞌin wiꞌj, wetz owokel nchojoꞌ kyaqil te nkꞌas.” 30 Per tetz ni kꞌontiꞌl oqet tnajsaꞌ sinoke oxik tsamaꞌ pres max aj tok xhchojoꞌ kyaqil.
31 Tzan tpaj ntzani bꞌan oje kyebꞌisun kye txqꞌanky mosj, kyetz exwaꞌq qꞌumal tukyꞌi te kꞌulul mandad kyaqil aj ojetq tuq kyꞌik. 32 Ntons te kꞌulul mandad owok xtxokoꞌ bꞌix oxik tqꞌumaꞌ tetz ikxjani: “Yatz aꞌich jun mosj bꞌan nyaꞌtx galan. Wetz oqet nnajsaꞌ kyaqil te akꞌas wukyꞌiꞌl tzan tpaj oqet awitz nwitz. 33 ¿Nyaꞌtx petzun presis tuq tzan tok loꞌet akꞌuꞌj tiꞌj te awukyꞌiꞌl iktzaꞌx wetz owok loꞌet nkꞌuꞌj awiꞌj?” 34 Ntons te kꞌulul mandad ojaw qꞌojlik nim, bꞌix oxik tkꞌuluꞌ mandad tzan tuq txik siꞌ xhchoꞌnal tiꞌj max aj tokbꞌaj xhchojoꞌ kyaqil.”
35 Te Jesus ax oxik tqꞌumaꞌ ikxjani: “Ax ikxji otkꞌuluꞌtz etukyꞌiꞌl te Ntat aj atjax tuj kaꞌj qa etetz nlay qet enajsaꞌ tukyꞌi jun tkꞌuꞌjlal jun eterman.”