19
Te Tumeꞌl Tistil Nyaꞌtx Galan Tzan Kyqet Pawjik Kye Xjal
1 Ntons ya ma xik tqꞌumaꞌ kyaqil ntzani, ntons te Jesus owex tuj Galiley bꞌix oxik tuj tkwentil Judey junxlaꞌ te Jordan Aꞌ. 2 Bꞌan kyꞌilaꞌj xjal ebꞌajꞌok lapet tiꞌj bꞌix ebꞌajqet tqꞌanaꞌ kye yabꞌ. 3 Junjun aj bꞌuchꞌuj Parisey ebꞌajꞌok laqꞌchet tiꞌj Jesus bꞌix oxik kchaꞌoꞌ tetz ikxjani tzan tuq tqet kyeqꞌiꞌ: “¿Bꞌaꞌn peꞌ tukyꞌi te Kawbꞌil tzan tqet qpawaꞌ qibꞌ tukyꞌi qxuꞌjel tzan tpaj jun tidiꞌ?” 4 Ntons te Jesus owaj tqꞌumaꞌ ikxjani: “¿Tiꞌtzun minaꞌ tjaw eteꞌeꞌ etetz tuj Tuꞌjal Dios tiꞌj te [Qtata Dios] aj oqet kꞌulun kye xjal, oqet tkꞌuluꞌ ichan tukyꞌi xuj?”* 5 Bꞌix otqꞌumaj ikxjani: “Astilji te ichan okajel tsiꞌ stat bꞌix te tnan tzan tok junan tukyꞌi txuꞌjel, bꞌix ikxji kykabꞌil okyeꞌokel iktzaꞌ cha jun xjal.* 6 Astilji, nyaꞌtx kabꞌeꞌ kybꞌet sinoke cha jun xjal. Astilji jun xjal kꞌontiꞌl tzan tel tpawaꞌ aj oje tzꞌok junchꞌiꞌ tzan Qtata Dios.” 7 Ntons kyetz oxik kchaꞌoꞌ tetz ikxjani: “Ntons ¿tistil te Moisés oxik tkꞌuluꞌ mandad qa jun ichan ma qet pawjik, a tgan tzan txik tsiꞌ jun tuꞌjal te txuꞌjel, bꞌix ikxji bꞌaꞌn tzan taj tlajoꞌ te xuj?”* 8 Ntons te Jesus oxik tqꞌumaꞌ ikxjani: “Tzan tpaj etetz kꞌontiꞌl nꞌox tuj ewiꞌ, te Moisés ostzoqpij tzan eqet pawjik, per tbꞌayaꞌ nyaꞌtx tuq ikxji. 9 Wetz oxeꞌl nqꞌumaꞌ etetz, abꞌl aj oqtel tpawaꞌ tibꞌ bꞌix qa nyaꞌtx tzan tpaj te xuj nkꞌajajin, bꞌix qa te xjal owokel junan junkyꞌel tukyꞌi junky, ntons nkꞌajajin; bꞌix jun xjal aj nꞌok junan tukyꞌi jun xuj aj pawaꞌ tibꞌ, ax nkꞌajajin.”a
10 Ntons kye txnaqꞌatz oxik kyqꞌumaꞌ ikxjani: “Qa ikxji nkyꞌik tukyꞌi jun ichan tukyꞌi txuꞌjel, ntons mejor kꞌontiꞌl tzan tok junan.” 11 Yaji te Jesus owaj stzaqꞌbꞌeꞌ ikxjani: “Nyaꞌtx kyaqil nꞌox tuj kywiꞌ te ntzani, sinoke aꞌox kye aj [te Qtata Dios] maꞌtx tzaj tsiꞌ kynabꞌl tzan tel kynikyꞌ. 12 Komo at tistil kye xjal kꞌontiꞌl nkyeꞌok junan, qa tzan tpaj eqet itzꞌjik sloꞌq, qatzun eqet kꞌuluꞌ tzan junky tzan kyok sloꞌq, qatzun kꞌontiꞌl nkyeꞌok junan tzan tpaj ikxji kygan tzan kyaqꞌunan te Qtat aj nnajan tuj kaꞌj. Abꞌl te aj bꞌaꞌn tzan tkꞌamon te ntzani ntons intkꞌamon.”
Aj Kyqet Tkyꞌiwlaꞌ Jesus Kye Kꞌwaꞌl
13 Ntons [kye xjal] ebꞌajpon kyeqꞌiꞌ txqꞌan kꞌwaꞌl tukyꞌi Jesus tzan tuq tqet tsiꞌ tqꞌabꞌ kyajsik bꞌix tzan txnaqꞌtzan kyiꞌj. Per kye txnaqꞌatz eꞌaqꞌik tzan kyok kyiliꞌ kye aj eqꞌil tuq kye kꞌwaꞌl. 14 Ntons te Jesus oxik tqꞌumaꞌ ikxjani: “Tzoqpij waq tzan ktzaj kye kꞌwaꞌl wukyꞌiꞌl bꞌix kꞌon tzꞌel etin gan kyetz, komo kye xjal aj iktzaꞌ ja kꞌwaꞌl ntzanijeꞌni nkyekaj tuj tqꞌabꞌ te Qtat aj nnajan tuj kaꞌj.” 15 Ntons oqet tsiꞌ tqꞌabꞌ kyajsik kye kꞌwaꞌl bꞌix yaji owex tuj aj luwarji.
Aj Tok Xhchaꞌoꞌ Jun Qꞌinon Tidiꞌ Presis Tzan Tox Tuj Kaꞌj
16 Ntons, jun xjal owok laqꞌchet tiꞌj Jesus bꞌix oxik xhchaꞌoꞌ tetz ikxjani: “Xnaqꞌtzon, ¿tidiꞌ jun galan presis tzan nkꞌulun tzan nkꞌamon jun wanqꞌin te jun-eleꞌx?” 17 Ntons te Jesus owaj stzaqꞌbꞌeꞌ ikxjani: “¿Tistil ntzaj achaꞌoꞌ wetz alkyetz te galan? Aꞌox [Qtata Dios te] aj galan. Per qa yatz agan tzan awanqꞌin te jun-eleꞌx, a tgan tzan tqet awokslaꞌ kyaqil te aj oje kaj tqꞌumaꞌ te Qtata Dios.” 18 Yaji te xjal oxik xhchaꞌoꞌ ikxjani: “¿Alkyetz?” Yaji te Jesus oxik tqꞌumaꞌ ikxjani: “Kꞌon chkansan,* kꞌon chkꞌajajin,* kꞌon xhchꞌelqꞌan,* kꞌon jaw anikꞌoꞌ jun yol tiꞌj junky,* 19 inkyqet alimaꞌ te atat bꞌix te anan,* bꞌix ax intqet aganiꞌ junky abꞌl yatz iktzaꞌx nqet awen awibꞌx.”* 20 Ntons kyi te kuꞌxon: “Kyaqil nini nqet nkꞌuluꞌ. ¿Tidiꞌ junky presis tzan tqet nkꞌuluꞌ?” 21 Ntons te Jesus oxik tqꞌumaꞌ: “Qa yatz agan tzan aten bꞌan galan tuj twitz Qtata Dios, ntons intxik akꞌayiꞌ kyaqil aj tidiꞌ yatz bꞌix intxik awoyeꞌ kye mebꞌaꞌ xjal. Ikxji at aqꞌinomal tuj kaꞌj. Yaji patzaj wukyꞌiꞌl bꞌix pawok lapet wiꞌj.” 22 Ya ma tzꞌok xhchaꞌoꞌ te kuꞌxon ikxji, tetz owaj bꞌix bꞌan nbꞌisun tuq tzan tpaj tetz bꞌan qꞌinon tuq.
23 Ntons te Jesus oxik tqꞌumaꞌ kye txnaqꞌatz ikxjani: “Wetz oxeꞌl nqꞌumaꞌ etetz te bꞌanꞌax, bꞌan kwest te jun qꞌinon tzan txik tqꞌapoꞌ tibꞌ tuj tqꞌabꞌ te Qtat aj nnajan tuj kaꞌj. 24 Oxeꞌl nqꞌumaꞌ junkyꞌel etetz, mas nyaꞌtx kwest tzan tkyꞌik jun kway kamey tuj xhchutil jun akuxh, twitz te jun qꞌinon tzan txik tqꞌapoꞌ tibꞌ tuj tqꞌabꞌ Qtata Dios.” 25 Ya ma tzꞌok kchaꞌoꞌ kye txnaqꞌatz ikxji, kyetz ebꞌajlabꞌan bꞌix okyyolij kyibꞌkyibꞌx ikxjani: “Ntons ¿abꞌl bꞌaꞌn tzan tkolet?” 26 Te Jesus exik teꞌeꞌ bꞌix oxik tqꞌumaꞌ kyetz ikxjani: “Te ja ntzani nlay bꞌantik tzan kye xjal; per yatzun te Qtata Dios, bꞌaꞌn tzan tbꞌantik kyaqil titzaꞌ.” 27 Ntons te Xhpeꞌy oxik tqꞌumaꞌ ikxjani: “Qetza oje kaj qsiꞌna kyaqil aj at tuq tidiꞌ qetz tzan tpaj qoklen lapetna awiꞌj. ¿Tidiꞌ qetza ojkꞌamoꞌtzna?” 28 Yaji te Jesus oxik tqꞌumaꞌ kyetz ikxjani: “Wetz oxeꞌl nqꞌumaꞌ etetz te bꞌanꞌax, oj tpon tyemp oj tjaw kyꞌixpuꞌ kyaqil tzan tok akꞌaꞌj, oj nqet witꞌlet [wetz] te Ichan Aj Tkꞌwaꞌal Dios [aꞌin] tuj nwitꞌlel tuj kaꞌj aj jaꞌ okyinkꞌuluyon mandad,* etetz aj maꞌtx kxꞌok lapet wiꞌj ax okxtel witꞌlet tuj kykabꞌlajujil ewitꞌlel tzan txik eqꞌumaꞌ tumeꞌl tiꞌj te kykꞌulbꞌen kye kykabꞌlajujil bꞌuchꞌuj tijajil Israel.* 29 Bꞌix abꞌl te aj tzan npaj wetz okajel tsiꞌ tjay qa kye terman qatzun stat qatzun tnan qatzun kye tkꞌwaꞌal qatzun xtxꞌoꞌotxꞌji, tetz otkꞌamoꞌtz bꞌan kyꞌilaꞌj txqꞌanky ikxji, bꞌix otkꞌamoꞌtz jun tanqꞌin te jun-eleꞌx. 30 Per kyꞌilaꞌj kye aj tbꞌay, okyeꞌokel xtxaꞌmpon, bꞌix kye aj xtxaꞌmpon, okyeꞌokel tbꞌay.”b