14
Aj Tqet Tqꞌanaꞌ Jesus Junky Yabꞌ Tuj Qꞌij Ojlaꞌmj
1 Ntons tuj jun qꞌij ojlaꞌmj, te Jesus oxwaꞌq waꞌil tjay jun kꞌulul mandad kxol kye aj bꞌuchꞌuj Parisey, bꞌix kye aj bꞌuchꞌuj Parisey nꞌok ksiꞌ tuq kynabꞌl tiꞌj. 2 Bꞌix qaynin twitz tetz, atqet tuq jun yabꞌ, mal tuq tiꞌj. 3 Ntons te Jesus oxik xhchaꞌoꞌ kyukyꞌi kye xnaqꞌtzal Kawbꞌil kye aj bꞌuchꞌuj Parisey aj akyeqet tuq tzi: “¿Titzaꞌ etetz tuj enabꞌl tidiꞌ nyolin te Kawbꞌil, galan peꞌ tzan tqet qꞌanlet jun yabꞌ tuj qꞌij ojlaꞌmj qa nyaꞌtxji?” 4 Kyetz kꞌontiꞌl tidiꞌ okyqꞌumaj. Ntons tetz otzaj tjochoꞌ te yabꞌ, oqet tqꞌanaꞌ bꞌix oxik tqꞌumaꞌ tetz bꞌaꞌn tuq tzan taj tjay. 5 Yaji oxik tqꞌumaꞌ kye txqꞌanky xjal tzi: “¿Abꞌl jun te etetz qa ma qex tzꞌaqik jun ekꞌwaꞌal qatzun jun etaloꞌji tuj jun jul, nlay kxqex naj eqꞌil tetz nkesey tuj jun qꞌij ojlaꞌmj?”* 6 Kyetz kꞌontiꞌl tidiꞌ owaj ktzaqꞌbꞌeꞌ tetz.
Te Yekꞌbꞌil Kyiꞌj Kye Aj Mer Kygan Jun Kywitꞌlel Kxol Kye Tlimaqal Xjal
7 Yaji ya ma xik ten te Jesus titzaꞌ tuq kye xjal aj ebꞌajtzaj ukꞌleꞌ waꞌil nꞌel tuq kyjoyoꞌ kywitꞌlel aj jaꞌ tzan kyqet jiqꞌbꞌaꞌ mas tzan kye txqꞌanky, ntons oxik tqꞌumaꞌ jun yekꞌbꞌil kyetz ikxjani: 8 “Oj etzaj ukꞌleꞌ waꞌil tzan tpaj jun xjal omojletel, kꞌon tzꞌel ejoyoꞌ te ewitꞌlel aj mas bꞌan tbꞌanil tzan tpaj qanq at junky aj mas jiqꞌbꞌaꞌ ewitz etetz ojetq tzaj ukꞌleꞌ. 9 Bꞌix te aj otzaj ukꞌlen etetz ekabꞌil, kebal tpon awukyꞌiꞌl, qꞌumal tetz ikxjani: “Pawel tzi, oqtel witꞌlet tetz tuj aluwar.” Nimod ntons presis tzan axik witꞌletel aj jaꞌ kye txqꞌanky kꞌon kygan bꞌix tukyꞌi akyꞌexaw otxeꞌl. 10 Ntons oj etzaj ukꞌleꞌ waꞌil, peꞌeqet witꞌlet aj jaꞌ nyaꞌtx kygan kye xjal tzan kyqet witꞌlet. Ikxji oj tul te aj otzaj ukꞌlen yatz, oxeꞌl tqꞌumaꞌ yatz ikxjani: “Wamiw, pakyꞌik witꞌletel tzani aj jaꞌ mas tbꞌanil.” Ntons ikxji ochtel jiqꞌbꞌaꞌ tzan kye txqꞌanky aj witꞌlikeꞌ awukyꞌiꞌl tiꞌj mes.* 11 Komo abꞌl te aj nqet tjiqꞌbꞌaꞌ tibꞌx, tetz owelal eqꞌiꞌ tkyꞌexaw, bꞌix te aj kꞌontiꞌl nqet tjiqꞌbꞌaꞌ tibꞌx, tetz oqtel jiqꞌbꞌaꞌ.”*
12 Bꞌix ax oxik tqꞌumaꞌ te Jesus ikxjani tukyꞌi te xjal aj otzaj ukꞌlen tetz: “Oj kxik awukꞌleꞌ xjal waꞌil tuj ajay, kꞌon kyetzaj awukꞌleꞌ [cha aꞌox] kye aj aꞌeꞌ awajyol bꞌix kye aj aꞌeꞌ awerman bꞌix kye txqꞌanky afamiliar ni kye aꞌeꞌ abesin aj qꞌinon-eꞌ tzan tpaj kyetz otxeꞌl kyukꞌleꞌ junkyꞌel bꞌix ikxji owokel kchojoꞌ junkyꞌel awukyꞌiꞌl. 13 Mejor, oj ktzaj awukꞌleꞌ xjal waꞌil ajay, inktzaj awukꞌleꞌ kye mebꞌaꞌ xjal bꞌix kye kꞌo yajnaq bꞌix kye kox bꞌix kye moy 14 bꞌix ochtel kyꞌiwlaꞌ tzan tpaj kyetz nlay bꞌantik tzan tok kchojoꞌ junkyꞌel, per [te Qtata Dios] owokel chojon te yatz oj kyjaw anqꞌin kye aj oje kyeꞌel galan tuj twitz.”
Te Yekꞌbꞌil Kyiꞌj Kye Aj Ukꞌlemeꞌ Tuq Waꞌil
15 Ya ma tzꞌok chaꞌoꞌ te nini, jun xjal aj witꞌliqet tuq twimes oxik tqꞌumaꞌ tetz te Jesus ikxjani: “Galanx-alo kye aj okyewaꞌyon tukyꞌi te Qtata Dios aj atjax tuj kaꞌj.” 16 Ntons te Jesus oxik tqꞌumaꞌ [jun yekꞌbꞌil] ikxjani: “At tuq jun xjal oqet tsiꞌ jun wabꞌj bꞌan tbꞌanil bꞌix etzaj tukꞌleꞌ kyꞌilaꞌj xjal waꞌil. 17 Ya ma pon or tzan kywaꞌan tuq te wabꞌj, oxik tlajoꞌ jun tmos qꞌumal kyukyꞌiꞌl kye xjal aj ojetq tuq kyetzaj tukꞌleꞌ, oxik tqꞌumaꞌ ikxjani: “Peꞌetzaj waq, maꞌtx bꞌantik te wabꞌj.” 18 Per nijunwt ebꞌajpon, junjunchaq tidiꞌchq owok ksiꞌ tzan kꞌon kxik. Jun oxik tqꞌumaꞌ ikxjani: “Wetz maꞌtx kaj nloqꞌoꞌ jun ntxꞌoꞌotxꞌ, bꞌix presis tzan nxik eꞌel tetz. Najsaj chꞌin, per nlay bꞌantik tzan nxik.” 19 Tzaj te junky, oxik tqꞌumaꞌ ikxjani: “Wetz maꞌtx qet nloqꞌoꞌ jwebꞌ yunt nwakaxh, presis tzan kyqet nkꞌuluꞌ probar ajnaꞌl. Najsaj chꞌin, nlay bꞌantik tzan nxik.” 20 Yaji junky oxik tqꞌumaꞌ ikxjani: “Wetz man woklen junan, astilji nlay bꞌantik tzan nxik.” 21 Ya ma meltzꞌjik te mosj, oxik tqꞌumaꞌ kyaqil ntzani te tpatron. Ntons yatzun te twitzaleꞌ ojaw qꞌojlik nim, bꞌix oxik tqꞌumaꞌ te tmos ikxjani: “Pax naj jaꞌchq tuj plas bꞌix kye nim bꞌey tuj amaqꞌ, bꞌix inktzaj awin tzani kye aꞌeꞌ mebꞌaꞌ bꞌix kye aꞌeꞌ aj xhkut-eꞌ, bꞌix kye aj moy-eꞌ bꞌix kye aj kox-eꞌ.” 22 Yaji te mosj oxik tqꞌumaꞌ tetz ikxjani: “Tat, maꞌtx bꞌantik kyaqil aj maꞌtx tzaj aqꞌumaꞌ bꞌix tzunx atx luwar kye txqꞌanky.” 23 Ntons te twitzaleꞌ oxik tqꞌumaꞌ te tmos ikxjani: “Pax kyuj kye nim bꞌey bꞌix kyuj kye bꞌey nekit, bꞌix intxik ayoliꞌ kye xjal tzan kyotz tuj njay tzan kynoj kyaqil tuj njay. 24 Oxeꞌl nqꞌumaꞌ, nijunwt kye aj etzaj wukꞌleꞌ tbꞌay-el okyexeꞌl nikyꞌbꞌen te wabꞌj aj maꞌtx bꞌantikni.””
Kwest Tzan Qok Lapet Tiꞌj Jesus
25 Kyꞌilaꞌj xjal nkyeꞌok lapet tuq tiꞌj Jesus, bꞌix tetz owaj meltzꞌjik tiꞌj bꞌix oxik tqꞌumaꞌ kyetz ikxjani: 26 “Abꞌl aj tgan tzan tok lapet wiꞌj, qa tetz nyaꞌtx dispwest tzan kykaj tsiꞌ kye stat qa txuꞌjel qatzun tkꞌwaꞌal qatzun aꞌeꞌ termanji, qatzun tetz tuj tnabꞌl mas presis tetz tanqꞌin twitz tzan tok lapet wiꞌj, ntons nlay bꞌantik tzan tok lapet wiꞌj te nxnaqꞌatz. 27 Bꞌix abꞌl te aj nyaꞌtx dispwest tzan tok ten twitz xhchoꞌnal bꞌix tzan tok lapet wiꞌj, ntons nlay bꞌantik tzan tok nxnaqꞌatz.* 28 Komo abꞌl jun te etetz aj owokelten kꞌulul jun nim jay, ¿kꞌontiꞌl petzun nqet witꞌlet tbꞌayaꞌ bꞌisul tetz jatebꞌ oqtel tnajsaꞌ, ikxji tzan tok ten qa kabal okanoyon tzan tjakonbꞌaj titzaꞌ? 29 Kebal ojetq tqet twitꞌbꞌaꞌ jaꞌ tzan tqet tkꞌuluꞌ bꞌix yaji qa nlay bꞌantik, kye aj okyekyꞌel tzi okyexmayiyon tiꞌj tzan tpaj kꞌontiꞌl ojakon bꞌantik titzaꞌ, 30 bꞌix oxeꞌl kyqꞌumaꞌ ikxjani: “Ja xjal ntzani owaqꞌik tzan tjaw tkꞌuluꞌ tjay bꞌix kꞌontiꞌl ojakon bꞌantik titzaꞌ.” 31 ¿Qatzun abꞌl jun kꞌulul mandad, aj owelax qꞌojiyon tukyꞌi junky kꞌulul mandad, nlay petzun qet witꞌlet tbꞌayaꞌ bꞌix oqtel tbꞌisuꞌ bꞌix oxeꞌl xhchaꞌoꞌ kyukyꞌi txqꞌanky qa bꞌaꞌn tzan txik qꞌojiyon tukyꞌi lajuj mil (10,000) tsoldad tukyꞌi te junky aj ateꞌ winqiꞌ mil (20,000) ikjaꞌn ktzaj tukyꞌiꞌl? 32 Ikxji qa nlay bꞌantik tzan tqꞌojin man ikjaꞌn ktzaj kye tajqꞌoj laqꞌchik, oxeꞌl tlajoꞌ txqꞌan yoliyon tbꞌayon twitz tzan kyyolin tzan kꞌon kyqꞌojin sinoke tzan kyten galan kxol. 33 Ax ikxji, abꞌl aj nlay kaj tkolaꞌ kyaqil aj tidiꞌ tetz, ntons nlay bꞌantik tzan tok te nxnaqꞌatz.”