10
Aj Txik Tsiꞌ Jesus Kyajwalil Kye Kykabꞌlajujil Tkyꞌixel
1 Ntons te Jesus etzaj tukꞌleꞌ kye kykabꞌlajujil txnaqꞌatz bꞌix oxik tsiꞌ jun kyajwalil tzan tjatz kyin malspirit tuj kyanim xjal bꞌix tzan kyqꞌanan kyaqil txakl yabꞌil bꞌix tidiꞌchq aj nchoꞌon kye xjal. 2 Aj ntzani kybꞌi kye kykabꞌlajujil tkyꞌixel Jesus: Tbꞌay, te Simon aj nꞌok qꞌumaꞌ Xhpeꞌy, bꞌix te titzꞌin aj Lexh tbꞌi; ax te Jacoboa bꞌix te titzꞌin aj Waꞌnch tbꞌi, kyetz aꞌeꞌ tkꞌajol Sebedey; 3 bꞌix ax te Lip, te Xhtoꞌl, te Maxh, bꞌix te Matey aj peyul chojenj tuq, Jacobob aj tkꞌajol Alfey, bꞌix te Tadey; 4 te Simon aj nꞌok qꞌumaꞌ tuq Te Kananey,c bꞌix te Judas Iskaryot aj mas yaj ojaw meltzꞌjik tiꞌj Jesus.
Aj Oxik Tqꞌumaꞌ Jesus Kye Kykabꞌlajujil Tkyꞌixel Tzan Kxik Pakbꞌayon Jaꞌchq
5 Ntons te Jesus ebꞌajxik tlajoꞌ kye kykabꞌlajujil, bꞌix oxik tqꞌumaꞌ kyetz ikxjani: “Kꞌon kxik kxol kye aj nyaꞌtx tijajil Israel bꞌix kꞌon kxpon kyuj kye amaqꞌ aj Samary, 6 sinoke pex waq kxol kye aj tijajil Israel aj oje kyexiknaj, iktzaꞌ karner aj cha oje kyexik tanan. 7 Pex waq bꞌix intxik epakbꞌaꞌ ikxjani: “Maꞌtx pon te tyemp tzan tkꞌulun mandad exol tukyꞌi nim tajwalil te Qtata Dios aj nnajan tuj kaꞌj.” 8 Ntons inkyqet eqꞌanaꞌ kye yabꞌ, inkyjaw etanqꞌinsaꞌ kye kamnaq, intel etin kyyabꞌil kye aj at lepr kyiꞌj, bꞌix inkyjatz etin malspirit tuj kyanim xjal. Etetz maꞌtx ekꞌamoj [ja etajwalilni] cha ekotz,* ntons ax kꞌontiꞌl tzan tel epeyuꞌ oj ekꞌulun jun galan kyiꞌj kye xjal. 9 Kꞌontiꞌl tzan txik etin etumind tuj ebols, 10 kꞌontiꞌl tzan txik etin ebꞌeꞌeq tuj ebꞌey, bꞌix kꞌontiꞌl tzan txik etin junky moj eqꞌanaq bꞌix ni exajabꞌ bꞌix ni exbꞌaqꞌen. Komo jun aqꞌunon presis tzan tkꞌamon jun tidiꞌ tzan tpaj taqꞌumbꞌen.* 11 Oj epon etetz tuj jun amaqꞌ qatzun jun aldeyji, peꞌejoyon waq jun xjal aj bꞌaꞌn tzan tok ewitꞌbꞌaꞌ ekꞌuꞌj tiꞌj, bꞌix peꞌeten tuj tjay maxkix oj etex tuj te amaqꞌ.* 12 Oj etox tuj jun jay, intxik eqaniꞌ tukyꞌi Qtata Dios jun galan kyajsik kye xjal aj nkyenajan tzi.* 13 Qa kyetz nkyajoꞌ jun galan, ntons te galan aj maꞌtx tzaj eqaniꞌ te kyetz okyꞌelkix ikxji; per qa kꞌontiꞌl nkyajoꞌ, ntons nlay kyꞌik ikxji.* 14 Bꞌix qa nlay kxqet kykꞌamoꞌ bꞌix kꞌon kygan tzan tok ksiꞌ kywiꞌ etiꞌj, peꞌetetz waq tuj aj jayji qatzun tuj aj amaqꞌji, bꞌix intel epojkꞌaꞌ te quq tiꞌj etoq [tzan tel kynikyꞌ nyaꞌtx galan nkykꞌuluꞌ].* 15 Wetz oxeꞌl nqꞌumaꞌ etetz te bꞌanꞌax, tuj te qꞌij oj tul te jwisy, te xhchoꞌnal aj owokel siꞌ kyiꞌj kye aj amaqꞌji owokel mas nim twitz te aj owokel siꞌ kyiꞌj kye xjal aj Sodom bꞌix Gomor.*
16 ¡Tzaj eten! Wetz okxeꞌl nlajoꞌ [kxol kye xjal] iktzaꞌ karner kxol xoꞌj. Astilji peꞌeten waq list iktzaꞌ jun kan, per ax peꞌeten waq mans iktzaꞌ jun palom.e 17 Intok esiꞌ enabꞌl tzan tpaj okxeꞌl qꞌapoꞌ tuj kyqꞌabꞌ kye kꞌulul mandad. Okxtelbꞌaj kyjubꞌchaꞌ tuj te jay nabꞌil Dios 18 bꞌix tzan npaj wetz okxeꞌl qꞌapoꞌ tuj kyqꞌabꞌ kye gobernador bꞌix tuj kyqꞌabꞌ kye kywitzaleꞌ gobernador. Ikxji etetz oxeꞌl eqꞌumaꞌ wiꞌj wetz kywitz kyetz bꞌix ax kywitz kye aj nyaꞌtx tijajil Israel [aj kꞌontiꞌl nkyeꞌokslan]. 19 Per oj exik qꞌapoꞌ tuj kyqꞌabꞌ kye kꞌulul mandad, kꞌon kxbꞌisun etetz tiꞌj te aj oxeꞌl eqꞌumaꞌ, tzan tpaj oj tpon or te etetz tzan eyolin, maxji te Qtata Dios oxeꞌl tsiꞌ te eyol aj presis tzan txik eyoliꞌ. 20 Nyaꞌtx aꞌix etetz te aj okxyoliyon, sinoke a te Txew Dios oyoliyon tuj etanim te aj oxeꞌl eqꞌumaꞌ. 21 Junjun xjal oxeꞌl kyqꞌapoꞌ kyermanx tzan kyqet kansaꞌ, bꞌix junjun kꞌwaꞌlon okyexeꞌl kyqꞌapoꞌ kykꞌwaꞌal, bꞌix junjun kꞌwaꞌalbꞌaj okyejawel meltzꞌjik kyiꞌj kytat bꞌix okykꞌuluꞌtz tzan kyqet kansaꞌ.* 22 Kyaqil xjal okyeꞌokel ajqꞌojan etetz tzan tpaj etokslbꞌen wiꞌj, per te aj otipaꞌtz kyaqil nini max oj tponbꞌaj kyaqil, tetzji okoletel.* 23 Oj tqet kykꞌuluꞌ jun nyaꞌtx galan etiꞌj tzan etex tuj jun amaqꞌ, peꞌexik oqik tuj junky amaqꞌ. Wetz oxeꞌl nqꞌumaꞌ bꞌan bꞌanꞌax, etetz minaꞌ tuq stzajbꞌaj ebꞌetzaꞌ kyaqil amaqꞌ tuj Israel, kyinꞌul junkyꞌel [wetz] te Ichan Aj Tkꞌwaꞌal Dios [aꞌin].
24 Nijunwt aj nxnaqꞌtzan tibꞌ mas nim tajwalil twitz te aj nxnaqꞌtzan tetz, bꞌix nijunwt mosj mas nim twitz te tpatron.* 25 Te aj nxnaqꞌtzan tibꞌ a tgan tzan sten kontent tzan tpon iktzaꞌ te aj nxnaqꞌtzan tetz, bꞌix te mosj tzan tpon iktzaꞌ te tpatron. Qa kye xjal nqet kyyoliꞌ tiꞌj te twitzaleꞌ tuj jun jay, nꞌok kyqꞌumaꞌ qa aji te Tajaw Choj,f ¿ntons tidiꞌ owokel kyqꞌumaꞌ kye aj tuj tjay?
26 Kꞌon kxobꞌ [kyiꞌj kye xjal] tzan tpaj kꞌontiꞌl jun tidiꞌ aj ewj nlay-wit tzꞌok en. Bꞌix ax kꞌontiꞌl jun tidiꞌ aj cha ewaꞌ aj nlay-wit tzꞌok chaꞌoꞌ.* 27 Aj nxik nqꞌumaꞌ wetz etetz qchukel, intxik eqꞌumaꞌ etetz kyukyꞌi kyaqil kye txqꞌanky, bꞌix aj nxik nqꞌumaꞌ etetz ewj, intxik epakbꞌaꞌ jaꞌchq tzan tok kchaꞌoꞌ kyaqil.g 28 Kꞌon kxobꞌ etetz kyiꞌj kye aj bꞌaꞌn tzan eqet kykansaꞌ per nlay bꞌantik tzan kykansan te etanim, sinoke intqet exobꞌleꞌ te aj bꞌaꞌn tzan eqet tkansaꞌ bꞌix ax bꞌaꞌn tzan epon tnajsaꞌ tuj te chman qꞌaqꞌ aj jaꞌ te xhchoꞌnal kꞌontiꞌl nmankun.
29 ¿Kꞌontiꞌl petzun nkyekꞌayjik kabꞌeꞌ tal chol tzan jun sentab? Per anke ikxji nijunwt te kyetz nkyeqet tzꞌaqik twitz txꞌoꞌtxꞌ qa te Qtata Dios kꞌontiꞌl nstzoqpiꞌ. 30 Yatzun etiꞌj etetz, kyaqil te stzamal ewiꞌ bꞌan ajlaꞌ [tzan te Qtata Dios]. 31 Kꞌon kxobꞌ tzan tpaj etetz mas ganimix aꞌix kywitz kye tal pichꞌ. 32 Bꞌix abꞌl aj oxeꞌl tqꞌumaꞌ kywitz xjal qa tetz nꞌokslan wiꞌj, ax wetz oxeꞌl nqꞌumaꞌ galan tiꞌj tetz twitz te Ntat aj atjax tuj kaꞌj; 33 per te aj oqtel tewaꞌ qa nꞌokslan wiꞌj, ax oqtel wewaꞌ tiꞌj tetz twitz te Ntat aj atjax tuj kaꞌj.*
34 Kꞌon qet ebꞌisuꞌ etetz qa wetz inꞌul cha aꞌox tzan kyten galan kye xjal kxol tzani twitz txꞌoꞌtxꞌ; wetz kꞌontiꞌl inꞌul cha aꞌox tzan kyten galan kxol sinoke owokel kyen qꞌoj kxol tzan npaj. 35 Tzan tpaj wetz maꞌtx kyinꞌul, oqꞌojiyon jun xjal tiꞌj statx, bꞌix jun xuj tiꞌj tnanx, bꞌix jun alibꞌj tiꞌj talibꞌ; 36 bꞌix ikxji kye kyajqꞌoj junjun aꞌeꞌxk aj tuj kyjayx.* 37 Abꞌl te aj nqet tganiꞌ mas te stat qatzun te tnan nwitz wetz, kꞌontiꞌl ntajoꞌ tzan tok lapet wiꞌj. Bꞌix te aj nqet tganiꞌ te tkꞌajol qatzun te tmeꞌal mas nwitz wetz, kꞌontiꞌl ntajoꞌ tzan tok lapet wiꞌj. 38 Bꞌix te aj nyaꞌtx dispwest tzan tkamik tzan npaj wetz, iktzaꞌ wetz dispwest tzan nkamik, ntons tetz kꞌontiꞌl ntajoꞌ tzan tok lapet wiꞌj.h 39 Abꞌl aj tetz tuj tnabꞌl maꞌtx tzꞌoknoj jun tumeꞌl tzan tanqꞌin, opoyonajkixiꞌ; yatzun te aj maꞌtx kamik tzan tpaj tokslbꞌen wiꞌj, tetz otkambꞌaꞌtz jun tanqꞌin.*
40 Abꞌl te aj okꞌamoyon te etetz ax okyintkꞌamoꞌtz, bꞌix abꞌl te aj okyintkꞌamoꞌtz, ntkꞌamoꞌ te aj otzaj lajon wetz.* 41 Abꞌl te aj ntkꞌamoꞌ jun tlajen Dios tzan tpaj tzajnaq tukyꞌi Qtata Dios, otkꞌamoꞌtzkix jun galan te tetz iktzaꞌx aj ntkꞌamoꞌ jun aj yolil tyol Qtata Dios. Bꞌix te aj ntkꞌamoꞌ jun bꞌan galan xjal tzan tpaj te xjal bꞌan galan, otkꞌamoꞌtzkix jun galan te tetz iktzaꞌx ntkꞌamoꞌ jun bꞌan galan xjal. 42 Bꞌix abꞌl aj oxeꞌl tsiꞌ nkesey jun chꞌi bas tukꞌaꞌ aꞌi kye ja xjal aj nkyeꞌokslan wiꞌj aj nyaꞌtx nim [kyajwalilni], oxeꞌl nqꞌumaꞌ etetz te bꞌanꞌax, tetz otkꞌamoꞌtzkix jun galan te tetz.”*