11
1 Ntons, ya ma mankun tzan txik tqꞌumaꞌ te Jesus ikxji kyukyꞌi kye kykabꞌlajujil txnaqꞌatz, yaji owex tzi bꞌix oxik pakbꞌon bꞌix oxik xnaqꞌtzon kyuj kye amaqꞌ tuj aj luwarji.
Aj Tyolin Jesus Tiꞌj Te Waꞌnch Aj Swal Aꞌ
2 Ntons yatzun te Waꞌnch, tetz atqex tuq pres, bꞌix tzi owok xhchaꞌoꞌ aj nqet tkꞌuluꞌ tuq te Krist. Ntons ebꞌajxik tlajoꞌ txqꞌan txnaqꞌatz 3 tzan tuq txik kchaꞌoꞌ tetz ikxjani: “¿Aꞌich peꞌ te aj nqoꞌiyon tiꞌj tzan tul qatzun presis tzan qiyon junkyji?” 4 Ntons te Jesus oxik tqꞌumaꞌ kyetz ikxjani: “Pex waq intxik eqꞌumaꞌ te Waꞌnch kyaqil aj nꞌok eten bꞌix kyaqil aj nꞌok echaꞌoꞌ. 5 Intxik eqꞌumaꞌ tzan npaj wetz kye moy nkyekaꞌyin, kye kox nkyebꞌet, kye aj yabꞌeꞌ tukyꞌi lepr nkyebꞌantik, kye tzꞌak nkyechaꞌon, kye kamnaq nkyejaw anqꞌin, bꞌix kye mebꞌaꞌ xjal nxik pakbꞌaꞌ te kyetz te tpakbꞌalil titzaꞌ tzan kykolet.* 6 Galanx-alo te xjal aj kꞌontiꞌl nqet tzꞌaqik [sinoke nꞌokslan wiꞌj] tzan tpaj nkꞌulbꞌen.”
7 Ya ma kyeꞌaj kye tmandader Waꞌnch, te Jesus owaqꞌik tzan tyolin kyukyꞌi kye xjal tiꞌj te Waꞌnch, oxik tqꞌumaꞌ ikxjani: “Aj exwaꞌq tuj te kyꞌixkꞌoj txꞌoꞌtxꞌ aj jaꞌ kꞌontiꞌl najayon, ¿tidiꞌ oxwaꞌq eteꞌeꞌtz? ¿Oxwaꞌq eteꞌeꞌtz peꞌ cha jun toq ajlaj njaw yakꞌuꞌ tzan kyaqꞌiqꞌ? 8 Qa nyaꞌtx, ntons ¿tidiꞌ oxwaꞌq eteꞌeꞌtz? ¿Qa oxwaꞌq eteꞌeꞌtz jun xjal pur tbꞌanil tqꞌanaqji? Etetz etebꞌen kye xjal aj pur tbꞌanil kyqꞌanaq, kyetz nkyenajan tuj kyjay kye kꞌulul mandad. 9 Ntons ¿tidiꞌ oxwaꞌq eteꞌeꞌtz? ¿Jun aj yolil tyol Dios peꞌ? ¡Bꞌanꞌax! Bꞌix tetz toklen mas nim twitz kye txqꞌanky aj yolil tyol Dios. 10 Komo te Waꞌnch, tetz aji te aj nyolin tiꞌj tuj te Tuꞌjal Dios ikxjani: “Wetz oxeꞌl nlajoꞌ nmandader tbꞌayon awitz tzan tpakbꞌan kxol kye xjal tzan kyiyon awiꞌj.”* 11 Wetz oxeꞌl nqꞌumaꞌ etetz bꞌanꞌax, kxol kye xjal tzani twitz txꞌoꞌtxꞌ nijunwt mas nim twitz te Waꞌnch Aj Swal Aꞌ; anke ikxji, te aj mas nekit kxol kye aj akyeqet tuj tqꞌabꞌ Qtata Dios, mas nim twitz tetz.a
12 Atx aj tulen te Waꞌnch Aj Swal Aꞌ, bꞌix tzunx ajnaꞌl, nꞌok en titzaꞌ te Qtata Dios nkolon kyiꞌj kye xjal tukyꞌi nim tbalor, bꞌix kye aj kꞌon kygan te nini, tidiꞌchq nkyekꞌulun tzan kykꞌulun mandad alajwers kyiꞌj kye xjal aj kolomeꞌ titzaꞌ.* 13 Komo kyaqil kye aj yolil tyol Dios oqtxiꞌ, bꞌix ax te aj nyolin tuj te Kawbꞌil, kyaqil nini nyolin titzaꞌ okꞌuluyon mandad te Qtata Dios, nkyeyolin tuq max aj tul te Waꞌnch. 14 Bꞌix qa etetz etokslaꞌtz ntzani, te Waꞌnch a te Eliys aj a tgan tuq tzan tul.b 15 Kye aj atok kxkyin, intok ksiꞌ kywiꞌ tiꞌj ntzani.
16 ¿Tidiꞌ qukyꞌiꞌl bꞌaꞌn tzan kyqet nparejsaꞌ kye xjal tuj ja tyempni? Kyetz iktzaꞌ kye kꞌwaꞌl tuj plas aj nxik kyqꞌumaꞌ kye kyukyꞌiꞌl ikxjani: 17 “Qetza owok qchimbꞌaꞌna te ajlaj bꞌix etetz kꞌontiꞌl okxbꞌixan, qetza oxik qbꞌitzaꞌna bꞌitz bꞌan bꞌis bꞌix etetz kꞌontiꞌl okxꞌoqꞌ.”c 18 Ntons [ikxji kye xjal kyenabꞌlin] tzan tpaj aj tul te Waꞌnch Aj Swal Aꞌ, tetz nꞌipan tuq waꞌij tzan txnaqꞌtzan tukyꞌi Qtata Dios,* bꞌix kꞌontiꞌl owukꞌan [taꞌal ub txꞌamsaꞌ], per kyetz oqet kyyoliꞌ atqex tuq jun malspirit tuj tanim. 19 Bꞌix ajnaꞌl oje kyinꞌul [wetz] te Ichan Aj Tkꞌwaꞌal Dios [aꞌin], bꞌix wetz nkyinwaꞌan bꞌix nkyinꞌukꞌan, per kye xjal nkyinqet kyyoliꞌ qa wetz jun xujul aꞌin bꞌix cha wukꞌanqet bꞌix jun kyajyol kye aj peyul chojenj bꞌix kye txqꞌanky aj chimol choj. Per te tumeꞌl titzaꞌ nqet qbꞌisuꞌ nꞌok eꞌelet tiꞌj te jkꞌulbꞌen.”
Aj Tyolin Jesus Kyiꞌj Kye Xjal Aj Kꞌontiꞌl Nkyeꞌokslan
20 Ntons te Jesus owaqꞌik tzan tilin kyiꞌj kye amaqꞌ aj jaꞌ ojetq tuq qet tkꞌuluꞌ kyꞌilaꞌj labꞌal tukyꞌi nim tajwalil Qtata Dios, tzan tpaj kye xjal aj nkyenajan tzi kꞌontiꞌl ojaw kkyꞌixpuꞌ kynabꞌlin. Te Jesus nxik tuq tqꞌumaꞌ ikxjani: 21 “¡Last aꞌix aj amaqꞌ Korasin! ¡Last aꞌix aj amaqꞌ Betsayd! Kyaqil aj labꞌal aj oqet nkꞌuluꞌ exol tukyꞌi nim wajwalil, cha tzi-wit oqet nkꞌuluꞌ kxol kye aj Tir bꞌix kye aj Sidon, kyetz oqtxiꞌ-tal tjawlen kkyꞌexpuꞌ kyenabꞌlin, bꞌix oje-tal tzꞌok ksiꞌ kyqꞌanaq bꞌan wakꞌ bꞌix oje-tal kyeqet witꞌlet tuj tzaꞌj tzan tqet kyyekꞌuꞌ bꞌanꞌax ntzaj kynaꞌon tetz tiꞌj kchoj.* 22 Per oxeꞌl nqꞌumaꞌ etetz, oj tul te jwisy, te xhchoꞌnal aj owokel siꞌ etiꞌj owokel mas nim twitz te aj owokel siꞌ kyiꞌj kye aj Tir bꞌix Sidon. 23 Bꞌix ax etetz aj Capernaúm, ¿tiꞌtzun etetz tuj enabꞌl okxjawel in tuj kaꞌj tzan eqet jiqꞌbꞌaꞌ? ¡Nlay! Sinoke etetz okxeꞌl xoꞌoꞌ aj jaꞌ ateꞌ kye kamnaq.* Komo cha tuj Sodom* eqet nkꞌuluꞌ-wit kye labꞌal aj eqet nkꞌuluꞌ exol etetz tukyꞌi nim tajwalil Qtata Dios, te aj amaqꞌji tzunx-tal atqet ajnaꞌl. 24 Per oxeꞌl nqꞌumaꞌ etetz, oj tul te jwisy, te xhchoꞌnal aj owokel siꞌ etiꞌj owokel mas nim twitz te aj owokel siꞌ kyiꞌj kye aj Sodom.”*
Aj Tyolin Jesus Tzan Qok Laqꞌchet Tiꞌj Tzan Qojlan
25 Tuj aj tyempji te Jesus oxnaqꞌtzan ikxjani: “Yatz Tat, aj aꞌich tajawil te kaꞌj bꞌix te twitz txꞌoꞌtxꞌ kyaqil, wetz nkyinchalaj awiꞌj tzan tpaj ma qet awewaꞌ te tumeꞌl tiꞌj kyaqil ntzani kywitz kye aj list-eꞌ bꞌix kye aj nkyqꞌumaꞌ at jun kynabꞌl, per maꞌtx xik ayekꞌuꞌ kye xjal aj nyaꞌtx tlimaqal xjal-eꞌ.* 26 Ikxji Tat tzan tpaj ikxji tuq yatz agan.”
27 “Te Ntat oje tzaj tqꞌapoꞌ kyaqil tuj nqꞌabꞌ. Kꞌontiꞌl junky abꞌl aj totzqiꞌ aꞌin iktzaꞌ te Ntat, bꞌix kꞌontiꞌl junky abꞌl aj totzqiꞌ te Ntat sinoke aꞌox aꞌin bꞌix kye aj oje xik nyekꞌuꞌ kyetz.* 28 Etetz aj siktnaqixd bꞌix etetz aj nꞌok eten twitz bꞌis, peꞌetzaj laqꞌchet wiꞌj bꞌix wetz nkꞌuluꞌtz tzan nchewsan etanim.e 29 Peꞌekꞌamon waq te aj nxik nxnaqꞌtzaꞌ etetz tzan tqet ekꞌuluꞌf bꞌix intok esiꞌ enabꞌl wiꞌj wetz, galan kyinnabꞌlin etukyꞌiꞌl bꞌix kꞌamoꞌ witzaꞌ tzan wonen etiꞌj, bꞌix ikxji okxteyon chewsaꞌ etanim.* 30 Komo te aj nxik nxnaqꞌtzaꞌ etetz tzan ekꞌulun, nini nyaꞌtx kwest, bꞌix te aj a tgan tzan ekꞌulun, ax nyaꞌtx kwest.”