10
Aj Kyel Tjoyoꞌ Jesus Kabꞌlajuj Tuj Mutxꞌ (72) Xjal Tzan Kxik Pakbꞌayon
1 Ya ma kyꞌik te nini, te Twitzaleꞌ eꞌel tjoyoꞌ junky kabꞌlajuj tuj mutxꞌ (72)a xjal bꞌix ebꞌajxik tlajoꞌ kakabꞌchaq kybꞌet tzan kxik tbꞌayon twitz kyuj kye amaqꞌ bꞌix jaꞌchq aj jaꞌ tuq opoyon tetzky. 2 Bꞌix oxik tqꞌumaꞌ kyetz ikxjani: “[Kye xjal iktzaꞌ] jun awalj aj nabꞌenky tzan tjaw, bꞌix kye aqꞌunon nyaꞌtx kyꞌilaꞌj-eꞌ. Intqet ewitz twitz te tajaw te awalj tzan ktzaj tlajoꞌ txqꞌanky aqꞌunon tzan tjaw kyin te awalj.* 3 ¡Pex waq! Wetz nkxik nlajoꞌ iktzaꞌ tal karner [aj nkyexik tuj jun luwar aj jaꞌ ateꞌ] xoꞌj.* 4 Bꞌix kꞌon xik eteqꞌiꞌ ebꞌeꞌeq ni etumin ni exajabꞌ bꞌix [peꞌexik sakꞌson], kꞌon kxqet yolin tukyꞌi nijunwt tuj bꞌey. 5 Oj etox tuj jun jay, tbꞌay inkxik elimaꞌ kye xjal ikxjani: “Tzꞌokxwit jun galan tuj ja jayni.” 6 Tuj aj jayji, qa at jun xjal aj njoyon tumeꞌl tzan qten galan kyukyꞌi txqꞌanky bꞌix tukyꞌi Qtata Dios, ntons te aj galan aj otzajel eqaniꞌ, okyꞌel tukyꞌiꞌl. Per qa kꞌontiꞌl jun xjal ikxji, ntons aꞌox etetz ekꞌamoꞌtz jun galan tukyꞌi Qtata Dios. 7 Bꞌix oj epon tuj jun amaqꞌ, peꞌekajten cha tuj jun jay bꞌix intxik ewan bꞌix intxik etukꞌaꞌ kyaqil aj oqtel siꞌ ewitz; komo jun aj nꞌaqꞌunan presis tzan tkꞌamon jun tidiꞌ tzan tpaj taqꞌumbꞌen.b Kꞌon kxjaw bꞌet tuj jun jay tuj jun jay. 8 Oj epon tuj jun amaqꞌ aj jaꞌ okxtel kꞌamoꞌ, intxik ewaꞌaꞌ te aj oqtel siꞌ ewitz, 9 bꞌix inkyqet eqꞌanaꞌ kye yabꞌ tuj aj luwarji bꞌix intxik eqꞌumaꞌ kyetz ikxjani: “Ajnaꞌl maꞌtx pon te tyemp tzan tkꞌulun mandad te Qtata Dios exol tukyꞌi nim tajwalil.” 10 Per oj etox tuj jun amaqꞌ bꞌix qa nlay kxqet kꞌamoꞌ, ntons intxik epakbꞌaꞌ kyuj kye bꞌey tuj aj amaqꞌji, oxeꞌl eqꞌumaꞌ ikxjani: 11 “Kyaqil te quq aj maꞌtx tzꞌok lakꞌet tiꞌj qoqna, owelal qkyitoꞌ [tzan tpaj etetz kꞌontiꞌl ma qoqet ekꞌamoꞌna]. Per instzaj echaꞌoꞌ waq: Ajnaꞌl maꞌtx pon te tyemp tzan tkꞌulun mandad te Qtata Dios tukyꞌi nim tajwalil.”* 12 Wetz oxeꞌl nqꞌumaꞌ etetz, [oj tul te jwisy], oxeꞌl siꞌ mas nim xhchoꞌnal kyiꞌj kye xjal aj amaqꞌji kywitz kye aj te amaqꞌ Sodom.”*
Te Aj Okyꞌel Kyiꞌj Kye Amaqꞌ Aj Kꞌontiꞌl Nkyeꞌokslan
13 “¡Last aꞌix aj Korasin! ¡Last aꞌix aj Betsayd! Kyaqil aj yekꞌbꞌil aj oqet nkꞌuluꞌ exol tukyꞌi nim wajwalil, cha tzi-wit oqet nkꞌuluꞌ kxol kye aj Tir bꞌix kye aj Sidon, kyetz oqtxiꞌ-tal tjawlen kkyꞌexpuꞌ kynabꞌlin, bꞌix oje-tal tzꞌok ksiꞌ kyqꞌanaq bꞌan wakꞌ, bꞌix oje-tal kyeqet witꞌlet tuj tzaꞌj tzan tqet kyyekꞌuꞌ bꞌanꞌax ntzaj kynaꞌon tetz tiꞌj kchoj.* 14 Astilji oj tul te jwisy ntons te xhchoꞌnal aj oxeꞌl siꞌ etiꞌj owokel mas nim twitz te aj oxeꞌl siꞌ kye aj Tir bꞌix Sidon. 15 Bꞌix ax etetz aj Capernaúm ¿tiꞌtzun etetz tuj enabꞌl okxjawel in tuj kaꞌj tzan eqet jiqꞌbꞌaꞌ? ¡Nlay! Komo etetz okxeꞌl xoꞌoꞌ tuj aj jaꞌ ateꞌ kye kamnaq.* 16 Ntons [etetz aj nkxꞌok lapet wiꞌj], abꞌl te aj owokel tsiꞌ twiꞌ etiꞌj, wiꞌj nꞌok tsiꞌ twiꞌ, bꞌix abꞌl te aj okxꞌelal tikꞌoꞌ, aꞌin nkyinꞌel tikꞌoꞌ, bꞌix te aj nkyinꞌel tikꞌoꞌ ax nꞌel tikꞌoꞌ te aj otzaj lajon wetz.”*
Aj Kymeltzꞌjik Kye Kabꞌlajuj Tuj Mutxꞌ (72) Aj Exik Lajoꞌ Pakbꞌayon
17 Ntons, aj kymeltzꞌjik kye aj kabꞌlajuj tuj mutxꞌ (72)c tlajen Jesus, kyetz ebꞌajmeltzꞌjik bꞌan nkyechalaj tuq, nkyyoliꞌ tuq ikxjani: “¡Tat, ax kye malspirit nqoqet kyokslaꞌna tzan tpaj yatz awajwalil!” 18 Ntons te Jesus oxik tqꞌumaꞌ kyetz ikxjani: “Wetz oxik wen te Satanas [oponaj tajwalil] naqe jun ray aj ntzaj txekaꞌj [nqet bꞌix nponaj]. 19 Wetz maꞌtx xik nsiꞌ etajwalil tzan ebꞌet kyajsik kan bꞌix alakran bꞌix tzan kyqet etitzaꞌ,* bꞌix tzan tqet etitzaꞌ tidiꞌchq aj nkꞌulun te aj nꞌok ajqꞌojan qetz, bꞌix kꞌontiꞌl tidiꞌ okyꞌel etiꞌj. 20 Per kꞌon kxchalaj tzan tpaj qa kye malspirit nkxqet kyokslaꞌ sinoke peꞌechalaj tzan tpaj etetz tzꞌibꞌamix aꞌix tuj kaꞌj.”
21 Ntons te Jesus, te Txew Dios nxik tsiꞌ tuq jun chalajbꞌil tuj tanim, bꞌix oxik tqꞌumaꞌ [tukyꞌi Qtata Dios] ikxjani: “Tat, yatz aꞌich tajawil te kaꞌj bꞌix te twitz txꞌoꞌtxꞌ kyaqil. Wetz nkyinchalaj awiꞌj tzan tpaj ma qet awewaꞌ te tumeꞌl tiꞌj kyaqil ntzani kywitz kye aj bꞌan list-eꞌ bꞌix kye aj at jun kynabꞌl, per maꞌtx xik ayekꞌuꞌ kye xjal aj nyaꞌtx tlimaqal xjal-eꞌ.* Ikxji tat tzan tpaj ikxji tuq yatz agan.”
22 “Te Ntat oje tzaj tqꞌapoꞌ kyaqil tuj nqꞌabꞌ. Kꞌontiꞌl junky abꞌl aj totzqiꞌ aꞌin iktzaꞌ te Ntat, bꞌix kꞌontiꞌl junky abꞌl aj totzqiꞌ te Ntat sinoke aꞌox aꞌin bꞌix kye aj oje xik nyekꞌuꞌ kyetz.”* 23 Yaji oxik tqꞌumaꞌ kye txnaqꞌatz apart kchukel ikxjani: “Galanx-alo kye aj owokel eꞌen kyaqil aj nꞌok eten etetz. 24 Wetz oxeꞌl nqꞌumaꞌ etetz, kyꞌilaꞌj aj yolil tyol Dios oqtxiꞌ bꞌix kye aj kꞌulul mandad bꞌan kygan tuq tzan tok kyen aj nꞌok eten etetz ajnaꞌl, per kꞌontiꞌl owok kyen, bꞌix kygan tuq tzan tok kchaꞌoꞌ aj nꞌok echaꞌoꞌ etetz ajnaꞌl, per kyetz kꞌontiꞌl owok kchaꞌoꞌ.”*
Te Yekꞌbꞌil Tiꞌj Jun Aj Galan Xjal
25 Ntons jun xnaqꞌtzal Kawbꞌil ojaw waꞌlet bꞌix oxik xhchaꞌoꞌ te Jesus ikxjani tzan tuq tok ten tidiꞌ otqꞌumaꞌtz: “Xnaqꞌtzon, ¿tidiꞌ presis tzan nkꞌulun tzan stzaj siꞌ jun wanqꞌin te jun-eleꞌx?” 26 Yaji te Jesus oxik tqꞌumaꞌ tetz ikxjani: “¿Tidiꞌ tzꞌibꞌanqex tuj te Kawbꞌil? ¿Tidiꞌ njaw aweꞌeꞌ tuj?” 27 Ntons te xnaqꞌtzal Kawbꞌil owaj stzaqꞌbꞌeꞌ ikxjani: “Nyolin ikxjani: Intqet eganiꞌ te Etajawil aj Qtata Dios ntzaj enaꞌoꞌ, intqet eganiꞌ tukyꞌi jun tkꞌuꞌjlal tuj etanim bꞌix tukyꞌi kyaqil exwinqlal bꞌix tukyꞌi kyaqil ebalor, bꞌix tukyꞌi kyaqil enabꞌl, bꞌix ax inkyqet eganiꞌ junky abꞌl etetz iktzaꞌx nqet eganiꞌ etibꞌx etetz.”* 28 Yaji te Jesus oxik tqꞌumaꞌ tetz: “Bꞌanꞌax iktzaꞌx maꞌtx stzaj aqꞌumaꞌni. Qa yatz oqtel akꞌuluꞌ nini ntons otzajel siꞌ yatz jun awanqꞌin te jun-eleꞌx.” 29 Per te xnaqꞌtzal Kawbꞌil, tgan tuq tzan tjoyon jun tumeꞌl tzan tkaj galan tiꞌj te aj oxik xhchaꞌoꞌ, ntons oxik tqꞌumaꞌ ikxjani: “¿Abꞌltzun te junky aj abꞌl wetz?” 30 Ntons te Jesus oxik tqꞌumaꞌ ikxjani: “At tuq jun xjal owetz Jerusalen, oqex Jeriko, bꞌix tuj bꞌey dech eꞌetz txqꞌan eleqꞌ tiꞌj. Owel kyelqꞌaꞌ kyaqil tidiꞌ tetz, oqetbꞌaj kyokꞌonsaꞌ bꞌix ebꞌajꞌoqik, okaj ksiꞌ chꞌinky tuq tkamik. 31 Yaji dech okyꞌik jun pal tuj aj bꞌeyji. Ya ma xik teꞌeꞌ te xjal okꞌonsaꞌ, cha okyꞌik xtxꞌuꞌk, cha okaj tkaꞌyiꞌ. 32 Yaji ax okyꞌik junky xjal aj bꞌuchꞌuj Lewi, opon qaynin tiꞌj, ya ma tzꞌok ten, cha okaj tkaꞌyiꞌ. 33 Per yaji okyꞌik jun aj Samary, ikjaꞌn tuq txik tuj jun tbꞌey, ya ma tzꞌok teꞌeꞌ, owok loꞌet tkꞌuꞌj tiꞌj. 34 Owok laqꞌchet tiꞌj, bꞌix oqet tqꞌanaꞌ te okꞌol tiꞌj te xjal tukyꞌi aseyt bꞌix taꞌal ub txꞌamsaꞌ bꞌix yaji oqet tbꞌatzꞌoꞌ. Yaji ojax tsiꞌ tajsik tkway bꞌix oxik teqꞌiꞌ aj jaꞌ tuq ntzaj siꞌ jun posad ntons oqet tkꞌuluꞌ kwent. 35 Yaji tuj junky iwitq te xjal aj Samary oxik tsiꞌ kabꞌeꞌ stumind te tajaw te jay bꞌix oxik tqꞌumaꞌ ikxjani: “Intqet akꞌuluꞌ kwent chꞌin ja xjalni, bꞌix qatzun ochnajsayon mas tzan tpaj tetz, wetz owokel nchojoꞌ oj nmeltzꞌjik junkyꞌel.” 36 Ntons yatz tuj anabꞌl, ¿kxol kye ox xjal aj ekyꞌik, abꞌl te junky abꞌl tetz te aj oqet okꞌonsaꞌ tzan kye eleqꞌ?” 37 Ntons te xnaqꞌtzal Kawbꞌil owaj stzaqꞌbꞌeꞌ ikxjani: “Te aj owok loꞌet tkꞌuꞌj tiꞌj.” Ntons te Jesus oxik tqꞌumaꞌ tetz ikxjani: “Ntons ax yatz intqet akꞌuluꞌ ikxji.”
Aj Tpon Jesus Tjay Maꞌt Bꞌix Liy
38 Ntons te Jesus oxikky tuj tbꞌey bꞌix opon tuj jun aldey, bꞌix jun xuj tbꞌi Maꞌt otkꞌamoj tuj tjay. 39 Tetz at tuq jun titzꞌin tbꞌi Liy, bꞌix te Liy oqet witꞌlet tkꞌatzaj te Qajawil bꞌix nchaꞌon tuq tiꞌj kyaqil aj ntyoliꞌ.* 40 Per te Maꞌt cha nbꞌisun tuq tiꞌj taqꞌun, bꞌix owok laqꞌchet kyiꞌj bꞌix oxik tqꞌumaꞌ ikxjani: “Tat, ¿kꞌontiꞌl nchbꞌisun yatz tzan tpaj te witzꞌin maꞌtx kyinkaj tsiꞌ nchukel aqꞌunonni? Qꞌumax chꞌin tetz tzan wok toneꞌ.” 41 Per te Qajawil oxik tqꞌumaꞌ tetz ikxjani: “Maꞌt, Maꞌt, yatz nꞌok asiꞌ akꞌuꞌj tiꞌj tidiꞌchq bꞌix bꞌan nchbꞌisun, 42 per aꞌox jun tidiꞌ te aj bꞌan presis. Te awitzꞌin maꞌtx tzꞌel tjoyoꞌ te aj presis, bꞌix kꞌontiꞌl abꞌl owelal in te tetz.”