9
Aj Tqet Tqꞌanaꞌ Jesus Jun Xjal Kamnaq Tuq Xhchiꞌjel
1 Ntons ya ma kyꞌik kyaqil ntzani, yaji te Jesus ojax tuj bark junkyꞌel bꞌix oxik junxlaꞌ aꞌ, opon tuj tamaqꞌ. 2 Ya ma pon tzi, [txqꞌan xjal] opon kyin jun yabꞌ tukyꞌiꞌl, kamnaq tuq xhchiꞌjel bꞌix eqꞌiꞌ tuq tajsik jun twatbꞌil. Ya ma tzꞌok ten te Jesus titzaꞌ tuq kye xjal witꞌlik kykꞌuꞌj tiꞌj, tetz oxik tqꞌumaꞌ te yabꞌ ikxjani: “Nimsaj akꞌuꞌj tey, te achoj maꞌtx qet najslet.”
3 Ntons junjun kye aj xnaqꞌtzal Kawbꞌil [aj akyeqet tuq tzi] oqet kyyoliꞌ kxolx ikxjani: “Ja xjalni, cha nxmayin tiꞌj Qtata Dios.” 4 Ntons, komo te Jesus tebꞌen tuq te aj nqet kybꞌisuꞌ, ntons oxik xhchaꞌoꞌ kyetz ikxjani: “¿Tistil etetz nkxbꞌisun nyaꞌtx galan tuj etanim? 5 ¿Alkyetz te mas kwest tzan txik jqꞌumaꞌ te jun xjal: “Te achoj maꞌtx qet najslet” qatzun tzan txik jqꞌumaꞌ “Pajaw waꞌlet bꞌix pabꞌet”? 6 Ntons tzan tok eteꞌeꞌ [wetz] te Ichan Aj Tkꞌwaꞌal Dios [aꞌin], at wajwalil tzani twitz txꞌoꞌtxꞌ tzan tqet nnajsaꞌ kchoj kye xjal, [oqtel nyekꞌuꞌ etetz ntzani].” Ntons yaji tetz oxik tqꞌumaꞌ tukyꞌi te yabꞌ ikxjani: “Pajaw waꞌlet bꞌix intjaw awin awatbꞌil bꞌix pax ajay.”
7 Ntons te xjal aj kamnaq tuq xhchiꞌjel, tetz ojaw waꞌlet bꞌix owaj tjay. 8 Ya ma tzꞌok kyeꞌeꞌ kye xjal ikxji, ebꞌajlabꞌan bꞌix oqet kyjiqꞌbꞌaꞌ Qtata Dios aj ntzaj tsiꞌ tajwalil jun xjal tzan tkꞌulun ikxji.
Te Jesus Jun Tajyol Kye Xjal Aj Nyaꞌtx Jiqꞌbꞌameꞌ
9 Ntons te Jesus owex tzi bꞌix yaji oxik teꞌeꞌ jun xjal tbꞌi Matey witꞌliqet tuq aj jaꞌ tuq nꞌel tpeyuꞌ chojenj. Te Jesus oxik tqꞌumaꞌ tetz ikjani: “Pawok lapet wiꞌj.” Ntons te Matey ojaw waꞌlet bꞌix owok lapet tiꞌj.
10 Ntons yaji te Jesus nwaꞌan tuq tuj tjay [Matey], bꞌix kyꞌilaꞌj xjal aj peyul chojenj bꞌix txqꞌanky xjal aj nkyeꞌok qꞌumaꞌ “chimol choj-eꞌ” ebꞌajpon tukyꞌiꞌl bꞌix ebꞌajqet witꞌlet waꞌil tiꞌj mes junx tukyꞌi Jesus bꞌix kye txnaqꞌatz. 11 Yatzun kye aj bꞌuchꞌuj Parisey, ya ma tzꞌok kyeꞌeꞌ kyaqil ntzani, oxik kchaꞌoꞌ kye txnaqꞌatz Jesus ikxjani: “¿Tistil te aj nxnaqꞌtzan etetz nwaꞌan kxol kye aj peyul chojenj bꞌix kxol kye aj chimol chojni?” 12 Ya ma tzꞌok xhchaꞌoꞌ te Jesus, oxik tqꞌumaꞌ ikxjani: “Kye aj bꞌaꞌneꞌ, nyaꞌtx presis jun qꞌanon kyiꞌj, sinoke aꞌox kye aj yabꞌeꞌ. 13 Pex waq bꞌix intqet exnaqꞌtzaꞌ tidiꞌ telponx te aj tzꞌibꞌankaj tuj Tuꞌjal Qtata Dios aj jaꞌ nyolin ikxjani: “Wetz ngan tzan tok loꞌet ekꞌuꞌj kyiꞌj txqꞌanky bꞌix nyaꞌtx cha aꞌox tzan stzaj eqꞌapoꞌ epresent wetz.”* [Ntons, astilji] wetz kꞌontiꞌl inꞌul ukꞌlel kye aj kꞌontiꞌl kchoj sinoke inꞌul ukꞌlel kye aj at kchoj tzan tjaw kkyꞌixpuꞌ kynabꞌlin.”
Aj Tyolin Jesus Junkyꞌel Tiꞌj Te Oj Qipan Waꞌij Tzan Qxnaqꞌtzan
14 Ntons yaji kye txnaqꞌatz te Waꞌnch Aj Swal Aꞌ eꞌok laqꞌchet tiꞌj Jesus bꞌix oxik kchaꞌoꞌ tetz ikxjani: “Qetza bꞌix kye aj bꞌuchꞌuj Parisey nqoꞌipana waꞌij koꞌchq tzan qxnaqꞌtzan. ¿Tistil kye axnaqꞌatz kꞌontiꞌl nkyekꞌulun ikxji?”
15 Ntons te Jesus owaj stzaqꞌbꞌeꞌ kyetz ikxjani: “Kyiꞌj kye aj ukꞌlemeꞌ tzan tpaj jun xjal aj ma tzꞌok junan, ¿tzun petzun kyetz nkyebꞌisun qa te xjal tzunx atqet kxol? Per opoyon jun qꞌij aj oxeꞌl eqꞌiꞌ te aj ma tzꞌok junan, maxji okyeꞌipayon waꞌij. 16 Bꞌix nijunwt xjal nqet txbꞌuqiꞌ jun xqꞌapj qꞌanq tukyꞌi jun remyent akꞌaꞌj, tzan tpaj te remyent nꞌok jukꞌlik, nxik tlaquꞌ te qꞌanq bꞌix ikxji cha mas nxik laqik. 17 Bꞌix kꞌontiꞌl nqex siꞌlet taꞌal ub man telentz tuj jun txꞌuꞌy tzꞌuꞌm qꞌanq, tzan tpaj te txꞌuꞌy owelal laqik, ikxji te taꞌal ub bꞌix te txꞌuꞌy okyepoyonaj. Astilji presis tzan tqex siꞌlet te taꞌal ub man telentz tuj jun txꞌuꞌy akꞌaꞌj, ikxji tzan kꞌon kyponaj kykabꞌil.”
Aj Tjaw Tanqꞌinsaꞌ Jesus Jun Kꞌwaꞌl Bꞌix Aj Tqet Tqꞌanaꞌ Jun Xuj Yabꞌ Tuq Kyꞌilaꞌj Aqꞌbꞌi
18 Ntons aj man tuq nyolin Jesus kyukyꞌiꞌl, opon jun kꞌulul mandad tuj te jay nabꞌil Qtata Dios bꞌix oqet mejlet twitz, bꞌix oxik tqꞌumaꞌ ikxjani: “Wetz nmeꞌal man tkamlen, per qoꞌo chꞌin bꞌix oqtel asiꞌ aqꞌabꞌ tajsik bꞌix owanqꞌiyon junkyꞌel.” 19 Ntons te Jesus ojaw waꞌlet bꞌix tetz kyukyꞌi kye txnaqꞌatz ebꞌajxik tukyꞌi te xjal.
20 Ntons [man tuq ikjaꞌn kxik], at tuq jun xuj aj yabꞌ tuq atx kabꞌlajuj aqꞌbꞌixiꞌ tuq taqꞌlen, tetz cha tuq nꞌel kyikꞌ tiꞌj. Ntons te xuj owok laqꞌchet tiꞌj Jesus ewj tiꞌjx bꞌix owok tmakoꞌ xtxaꞌm tqꞌanaq 21 tzan tpaj tetz nbꞌisun tuq ikxjani: “Cha aꞌox oj tok nmakoꞌ chꞌin tqꞌanaq okyinbꞌantel.” 22 Per te Jesus owaj meltzꞌjik tiꞌjx bꞌix oxik teꞌeꞌ te xuj bꞌix oxik tqꞌumaꞌ ikxjani: “Nimsaj akꞌuꞌj noy, tzan tpaj ma tzꞌok witꞌlet akꞌuꞌj wiꞌj, ajnaꞌl maꞌtx chbꞌantik.” Ntons bꞌeyxnajji te xuj obꞌantik.
23 Ntons yaji, ya ma pon te Jesus tjay te kꞌulul mandad, exik teꞌeꞌ kye aj nkyexuxan kyajlaj [tzan tpaj te anim] bꞌix kyaqil kye xjal bꞌan nkyeꞌoqꞌ tuq. 24 Tzaj te Jesus, oxik tqꞌumaꞌ kyetz ikxjani: “Peꞌetex waq. Te tal xuj nyaꞌtx kamnaq, cha nwitan.” Ntons kye xjal cha ejaw tzeꞌen tiꞌj. 25 Per ya ma kyeꞌex lajoꞌ tzijay, yaji te Jesus owox aj jaꞌ atqet tuq te kamnaq, ojaw stzyuꞌ tqꞌabꞌ, bꞌix yatzun [te tal xuj] ojaw waꞌlet. 26 Bꞌix tuj kyaqil aj luwarji owok chaꞌoꞌ te tpakbꞌalil tiꞌj te aj ojetq tuq kyꞌik.
Aj Tqet Tqꞌanaꞌ Jesus Kabꞌeꞌ Moy
27 Ya ma tzꞌex te Jesus tzi, kabꞌeꞌ moy exik lapet tiꞌj bꞌix nkyesikyꞌin tuq ikxjani: “Intok loꞌet akꞌuꞌj qiꞌja yatz aj tijajil Dawid aꞌich.”
28 Ya ma tzꞌox te Jesus tuj te jay, kye moy ebꞌajꞌok laqꞌchet tiꞌj bꞌix te Jesus oxik xhchaꞌoꞌ kyetz ikxjani: “¿Nꞌetokslaꞌ peꞌ etetz qa bꞌaꞌn tzan ebꞌantik witzaꞌ?” Ntons oxik kyqꞌumaꞌ kyetz: “Tzun tat.” 29 Ntons te Jesus owok tmakoꞌ tbꞌaqꞌ kywitz bꞌix oxik tqꞌumaꞌ ikxjani: “Iktzaꞌx maꞌtx tzꞌok witꞌlet ekꞌuꞌj wiꞌj, ikxji intbꞌantik etukyꞌiꞌl.” 30 Bꞌeyxnajji ebꞌajkaꞌyin bꞌix te Jesus exik tkawiꞌ byenech ikxjani: “Intok esiꞌ enabꞌl tzan kꞌon tok chaꞌoꞌ tzan nijunwt.” 31 Per kye aj moy tuq, man tuq kyexlen, oxik kyqꞌumaꞌ kye kyaqil xjal tuj aj luwarji, te aj ojetq tuq tkꞌuluj te Jesus kyiꞌj.
Aj Tqet Tqꞌanaꞌ Jesus Jun Men
32 Ntons aj man tuq kyajtzlen kye moy, txqꞌan xjal opon kyin tukyꞌi Jesus jun xjal men tuq tzan tpaj atqex tuq jun malspirit tuj tanim. 33 Ya ma jatz tin te Jesus te malspirit, te men owaqꞌik tzan tyolin. Kye xjal bꞌan nkyelabꞌan tuq, nxik tuq kyqꞌumaꞌ ikxjani: “Ni jun-el qxol qetz aj tijajil Israel oje tzꞌok qen jun tidiꞌ ikxjani.” 34 Per yatzun kye aj bꞌuchꞌuj Parisey nkyqꞌumaꞌ tuq ikxjani: “Tetz bꞌaꞌn tzan kyjatz tin kye malspirit tzan tpaj te twitzaleꞌ kxol kye malspirit, nxik sin tajwalil.”*
Aj Txik Tqꞌumaꞌ Jesus Tzan Qonen Txqꞌanky Kxol Kye Xjal
35 Ntons te Jesus jaꞌchq tuq nkyꞌik tuj kyaqil amaqꞌ bꞌix aldey, bꞌix nxnaqꞌtzan tuq kyuj kye jay nabꞌil Dios. Nxik tuq tpakbꞌaꞌ te tpakbꞌalil galan tiꞌj titzaꞌ te Qtata Dios nkolon qiꞌj tzan jkaj tuj tqꞌabꞌ, bꞌix nkyeqet tuq tqꞌanaꞌ kye yabꞌ tiꞌj kyaqil kyyabꞌil bꞌix aj tidiꞌ nchoꞌon kyetz.* 36 Bꞌix aj kxik teꞌeꞌ kye xjal bꞌan kyꞌilaꞌj, owok loꞌet tkꞌuꞌj kyiꞌj tzan tpaj kyetz bꞌan bꞌis tuq tuj kyanim bꞌix kꞌontiꞌl tuq abꞌl bꞌaꞌn tzan tonen kyiꞌj, kyetz iktzaꞌ karner tuq aj kꞌontiꞌl pastoriyon kyiꞌj.* 37 Ntons tetz oxik tqꞌumaꞌ kye txnaqꞌatz ikxjani: “Bꞌanꞌax tzan tjaw twitz te awalj at aqꞌunj nim, per kye aqꞌunon nyaꞌtx kyꞌilaꞌj-eꞌ. 38 Astilji intxik eqaniꞌ etetz tukyꞌi Tajaw te awalj tzan ktzaj tlajoꞌ [txqꞌanky] aqꞌunon tzan tjaw kyin te awalj.”*