5
Aj Tkaj Ksiꞌ Kyaqꞌun Ox Xjal Chimol Kyiy Tzan Kyok Lapet Tiꞌj Jesus
1 Jun qꞌij te Jesus atqet tuq stziꞌ te Jenesaret Aꞌ, bꞌix kyꞌilaꞌj xjal nꞌok tuq kybꞌetzꞌaꞌ kyibꞌ tzan tok kchaꞌoꞌ [te aj ntxnaqꞌtzaꞌ tuq tiꞌj] tyol Qtata Dios. 2 Te Jesus exik teꞌeꞌ kabꞌeꞌ bark stziꞌ te aꞌ, bꞌix kye chimol kyiy ojetq tuq kyqetz bꞌix nkyetxꞌajon tuq te kypa. 3 Ntons te Jesus ojax tuj jun bark, aj tbark tuq te Simon,a bꞌix oxik tqaniꞌ tzan tox tpilqꞌuꞌ chꞌinky te bark tuj te aꞌ. Yaji oqet witꞌlet xtxaꞌm te bark bꞌix owaqꞌik tzan kxik txnaqꞌtzaꞌ kye xjal.* 4 Ya ma mankun tyolin kyukyꞌi kye xjal, oxik tqꞌumaꞌ tetz te Simon ikxjani: “Intxik awin te abark aj jaꞌ nim txeꞌ bꞌix intqex exon te epa tzan kyjatz etin kye kyiy.” 5 Ntons te Simon owaj stzaqꞌbꞌeꞌ ikxjani: “Xnaqꞌtzon, qetza maꞌtx tzꞌex qaqꞌbꞌilna tzan qaqꞌunan bꞌix kꞌontiꞌl ma jatz chꞌinwt.* Per qa yatz nꞌaqꞌumaꞌ, ntons oqtex nsiꞌ te pa.”
6 Ya ma qex ksiꞌ te kypa, ejatz kyin kyꞌilaꞌj kyiy bꞌix te kypa ikjaꞌn tuq tel laqik.* 7 Astilji etzaj kxmatxbꞌeꞌ kye txqꞌanky kyukyꞌiꞌl tuj junky bark, tzan tuq kypon onel kyetz. Ntons kye kyukyꞌiꞌl ebꞌajpon bꞌix ebꞌajnoj kykabꞌil kye bark, bꞌix chꞌinky tuq ebꞌajxik mulan tzan talal. 8 Tzan tpaj ntzani te Simon oqet mejlet twitz te Jesus bꞌix oxik tqꞌumaꞌ ikxjani: “Tat, intel apawaꞌ awibꞌ wiꞌj; wetz aꞌin jun chimol choj.” 9 Komo te Simon bꞌix kye txqꞌanky tukyꞌiꞌl ojetq tuq kyexobꞌ tzan tpaj tjatzlen kyin aleꞌ kyiyji. 10 Bꞌix ax te Jacobob bꞌix te Waꞌnch aꞌeꞌ tkꞌajol Sebedey, kyetz ax aꞌeꞌ tuq tukyꞌiꞌl Simon, ax kyetz xobꞌnaqeꞌ tuq. Per te Jesus oxik tqꞌumaꞌ te Simon: “Kꞌon txobꞌ. Ajnaꞌl yatz oxhchimoyon xjal [te Qtata Dios].” 11 Ntons oxik kyin te kybark stziꞌ te aꞌ, tzi okaj ksiꞌ kyaqil bꞌix eꞌok lapet tiꞌj Jesus.
Aj Tqet Tqꞌanaꞌ Jesus Jun Xjal Yabꞌ Tuq Tukyꞌi Lepr
12 Jun qꞌij aj atqet tuq te Jesus tuj jun amaqꞌ, opon jun xjal tukyꞌiꞌl, at tuq te yabꞌil lepr tiꞌj kyaqil xhchiꞌjel. Ya ma xik ten tetz te Jesus, oqet mejlet tukyꞌi twitz max twitz txꞌoꞌtxꞌ, oqet twitz twitz Jesus ikxjani: “Tat, qa yatz agan, bꞌaꞌn tzan tel awin chꞌin te nyabꞌil.” 13 Ntons te Jesus owok tmakoꞌ tukyꞌi tqꞌabꞌ bꞌix oxik tqꞌumaꞌ tetz ikxjani: “Wetz ngan. Pabꞌantik.” Bꞌeyxnajji owel te lepr tiꞌj te yabꞌ. 14 Oxik tqꞌumaꞌ te Jesus tetz ikxjani: “Kꞌon xik aqꞌumaꞌ te nijunwt. Pax yekꞌul awibꞌ twitz te pal, bꞌix intxik awin te awoyej aj telponx maꞌtx chbꞌantik iktzaꞌ aj okaj tqꞌumaꞌ Moisés [oqtxiꞌ],* ikxji tzan tok kyen kye pal yatz maꞌtx chbꞌantik tukyꞌi aj ayabꞌil niꞌn.” 15 Per jaꞌchq tuq nꞌok chaꞌoꞌ te tpakbꞌalil tiꞌj te Jesus bꞌix kyꞌilaꞌj xjal nꞌok tuq kchimoꞌ kyibꞌ chaꞌoyon tiꞌj bꞌix tzan tuq kyqet qꞌanaꞌ tukyꞌi kyyabꞌil. 16 Per te Jesus kobꞌchaq tuq nxikkix xnaqꞌtzon tukyꞌi te Qtata Dios aj jaꞌ kꞌontiꞌl ateꞌ tuq xjal.
Aj Tqet Tqꞌanaꞌ Jesus Jun Yabꞌ Kamnaq Tuq Toq
17 Ntons, jun qꞌij te Jesus nxnaqꞌtzan tuq kye xjal, bꞌix ateꞌ tuq junjun xjal aj bꞌuchꞌuj Parisey bꞌix xnaqꞌtzal Kawbꞌil, kyetz tzajnaqeꞌ tuq tuj kyaqil aldey tuj tkwentil Galiley bꞌix tkwentil Judey bꞌix te amaqꞌ Jerusalen, bꞌix te Jesus at tuq tajwalil Qtata Dios tukyꞌiꞌl tzan tqꞌanan xjal. 18 Ntons ebꞌajpon txqꞌan xjal eqꞌiꞌ tuq kyitzaꞌ jun yabꞌ aj kamnaqeꞌ tuq toq, kyetz kygan tuq tzan tox kyin te yabꞌ tuj te jay tzan tqet ksiꞌ twitz Jesus. 19 Per kꞌontiꞌl obꞌantik tzan tox kyin tzan tpaj ajun xjal tuq; astilji ebꞌajjax twiꞌ te jay bꞌix [ojaw kypujuꞌ] te tej bꞌix oqex kytumbꞌaꞌ te yabꞌ twitz twatbꞌil twiꞌ te jay, oqex kytumbꞌaꞌ kywitz kyaqil tzan tkyaqon twitz Jesus. 20 Ya ma tzꞌok ten te Jesus titzaꞌ tuq witꞌlik kykꞌuꞌj tiꞌj, ntons oxik tqꞌumaꞌ tetz te yabꞌ ikxjani: “Yatz ajnaꞌl te achoj maꞌtx qet najslet.”
21 Ntons kye xnaqꞌtzal Kawbꞌil bꞌix kye aj bꞌuchꞌuj Parisey nkyebꞌisun tuq ikxjani: “¿Tidiꞌ tetz tajwalil tuj tnabꞌl tzan txik tqꞌumaꞌ xmaybꞌil tiꞌj Dios? ¿Abꞌl junky bꞌaꞌn tzan tnajsan qchoj twitz te Qtata Dios?” 22 Per te Jesus owel tnikyꞌ tidiꞌ tuq nqet kybꞌisuꞌ bꞌix oxik xhchaꞌoꞌ kyetz ikxjani: “¿Tistil etetz nkxbꞌisun tuj etanim ikxji? 23 ¿Alkyetz nyaꞌtx kwest tzan txik jqꞌumaꞌ: “Te achoj maꞌtx qet najslet” qatzun “pajaw waꞌlet bꞌix pabꞌet”? 24 Per tzan tel enikyꞌ [wetz] te Ichan Aj Tkꞌwaꞌal Dios [aꞌin] at wajwalil tzani twitz txꞌoꞌtxꞌ tzan tqet nnajsaꞌ kchoj xjal,” (ntons oxik tqꞌumaꞌ tetz te yabꞌ ikxjani): “Oxeꞌl nqꞌumaꞌ yatz, pajaw waꞌlet, intjaw awin awatbꞌil bꞌix pax ajay.” 25 Bꞌeyxnajji te xjal ojaw waꞌlet kywitz kyaqil, ojaw tin te twatbꞌil aj jaꞌ tuq atqet, bꞌix owaj tjay, bꞌan nqet tuq tjiqꞌbꞌaꞌ Qtata Dios. 26 Kyaqil kye xjal bꞌan nkyelabꞌan tuq bꞌix bꞌan nqet tuq kyjiqꞌbꞌaꞌ Qtata Dios, bꞌix ojetq tuq kyetzajbꞌaj, bꞌix oxik kyqꞌumaꞌ ikxjani: “Ajnaꞌl maꞌtx tzꞌok qen tidiꞌchq aj bꞌan nqolabꞌan tiꞌj.”
Aj Txik Tukꞌleꞌ Te Jesus Lewi Tzan Tok Lapet Tiꞌj
27 Ntons, ya ma kyꞌik kyaqil ntzani, te Jesus owex tzi bꞌix oxik ten jun xjal aj peyul chojenj bꞌix tetz tbꞌi Lewic bꞌix witꞌliqet tuq aj jaꞌ nꞌel tpeyuꞌ te chojenj. Te Jesus oxik tqꞌumaꞌ tetz ikxjani: “Pawok lapet wiꞌj.” 28 Ntons te Lewi ojaw waꞌlet, okaj tsiꞌ kyaqil bꞌix oxik lapet tiꞌj Jesus.
29 Yaji te Lewi etzaj tukꞌleꞌ kyꞌilaꞌj xtxoken tuj tjay, bꞌix oqet tsiꞌ jun kyweꞌ bꞌix kyꞌilaꞌj tuq kye aj peyul chojenj bꞌix txqꞌanky xjal nkyewaꞌan tuq kyukyꞌiꞌl twimes. 30 Bꞌix kye bꞌuchꞌuj Parisey bꞌix kye xnaqꞌtzal Kawbꞌil kxol kyetz, kyetz nkyeꞌok tuq kyiliꞌ kye txnaqꞌatz Jesus, nkyeyolin tuq ikxjani: “¿Tistil etetz nkxwaꞌan kxol kye aj peyul chojenj bꞌix kxol kye aj chimol choj?” 31 Tzaj te Jesus, oxik tqꞌumaꞌ kyetz ikxjani: “Kye aj bꞌaꞌneꞌ nyaꞌtx presis jun qꞌanon kyiꞌj, per yatzun kye aj yabꞌeꞌ a tgan jun qꞌanon kyiꞌj. 32 Ikxji kꞌontiꞌl inꞌul joyol kye aj kꞌontiꞌl kchoj sinoke inꞌul joyol kye aj at kchoj tzan tjaw kkyꞌixpuꞌ kynabꞌlin.”
Aj Tyolin Jesus Tiꞌj Te Oj Qipan Waꞌij Tzan Qxnaqꞌtzan
33 Oxik kyqꞌumaꞌ te Jesus ikxjani: “Kye aꞌeꞌ txnaqꞌatz Waꞌnch bꞌix kye kxnaqꞌatz kye aj bꞌuchꞌuj Parisey, kyetz koꞌchq nkyeꞌipan waꞌij tzan kxnaqꞌtzan nim, per yatzun yatz axnaqꞌatz nkyewaꞌan kixiꞌ bꞌix nkyeꞌukꞌan.” 34 Yaji te Jesus owaj stzaqꞌbꞌeꞌ kyetz ikxjani: “¿Tiꞌtzun? ¿Bꞌaꞌn petzun tzan kyipan waꞌij kye xtxoken jun xjal aj owokel mojlet qa tetz man atqet kyukyꞌiꞌl? 35 Per opoyon jun or oj txik eqꞌiꞌ te xjal aj owokel mojlet, ntons maxji okyeꞌipayon waꞌij.”
36 Bꞌix ax oxik tqꞌumaꞌ kyetz jun yekꞌbꞌil ikxjani: “Nijunwt abꞌl nqet tkꞌupuꞌ jun xqꞌapj akꞌaꞌj tzan tok tremyentiꞌ tiꞌj jun xqꞌapj qꞌanq. Qa oqtel tkꞌuluꞌ-wit ikxji, ntons te remyent akꞌaꞌj olaqelkixiꞌ bꞌix nlay kaj galan tukyꞌi te qꞌanq.”
37 [Ax oxik tqꞌumaꞌ junky yekꞌbꞌil ikxjani:] “Bꞌix nijunwt nqex tsiꞌ taꞌal ub man telentz tuj jun txꞌuꞌy tzꞌuꞌm qꞌanq tzan tpaj te aj man telentz owelal tlaquꞌ te txꞌuꞌy qꞌanq bꞌix ikxji te taꞌal ub bꞌix te txꞌuꞌy kykabꞌil okyepoyonaj. 38 Astilji a tgan tzan tqex siꞌlet te taꞌal ub man telentz tuj jun txꞌuꞌy man akꞌaꞌj. 39 Nijunwt aj nꞌukꞌan te taꞌal ub txꞌamsaꞌ oxeꞌl tukꞌaꞌky te aj man telentz tzan tpaj otqꞌumaꞌtz “te aj txꞌamsaꞌ mas galan.””