10
Te Jesus Iktzaꞌ Te Pastoriyon Aj Nkyeqet Tkꞌuluꞌ Kwent Kye Taloꞌ Tukyꞌi Jun Tumeꞌl Bꞌan Galan
1 “Wetz oxeꞌl nqꞌumaꞌ etetz bꞌan bꞌanꞌax, abꞌl aj nlay tzꞌox tuj tlamelul te jun peꞌon sinoke cha njaw twiꞌ te peꞌon ntons te nini cha jun eleqꞌ. 2 Per te aj nꞌox tuj te tlamelul, te nini aji tetz te pastoriyon. 3 Te xbꞌuqil stziꞌ te lamel nꞌel tjaqoꞌ te tlamelul twitz te pastoriyon bꞌix kye taloꞌ ntzaj kchaꞌoꞌ twiꞌ bꞌix nkyetzaj xtxokoꞌ kye taloꞌ tukyꞌi kybꞌichaq te junjun bꞌix nkyeꞌetz tin. 4 Chaꞌoj kyetzbꞌaj tinji, nxik tbꞌayon kywitz bꞌix kye taloꞌ nkyeꞌok lapet tiꞌj tzan tpaj nꞌel kynikyꞌ tiꞌj twiꞌ. 5 Per jun aj nyaꞌtx kyajawil kꞌontiꞌl nkyeꞌok lapet tiꞌj sinoke cha nkyeꞌel oqik tiꞌj tzan tpaj kꞌontiꞌl kyotzqiꞌ te twiꞌ.” 6 Te Jesus oxik tqꞌumaꞌ ja yekꞌbꞌil kyukyꞌiꞌlni per kyetz kꞌontiꞌl owel kynikyꞌ tidiꞌ qiꞌj tuq nyolin.
7 Yaji te Jesus oxik tqꞌumaꞌ junkyꞌel kyetz: “Wetz oxeꞌl nqꞌumaꞌ etetz bꞌan bꞌanꞌax, wetz aꞌin te lamel aj jaꞌ nkyeꞌox kye waloꞌ. 8 Kyaqil kye aj eꞌul tbꞌey nwitz wetz, kyetz cha eleqꞌ-eꞌ, per kye waloꞌ kꞌontiꞌl oxik kyokslaꞌ. 9 Wetz aꞌin te lamel, abꞌl aj owoketz tzan npaj wetz, ntons okoletel bꞌix owokex iktzaꞌx jun karner aj nꞌetz bꞌix nꞌoknoj tweꞌ. 10 Te eleqꞌ nꞌul cha elqꞌon bꞌix cha kanson bꞌix xitul kyaqil, per wetz inꞌul swal jun etanqꞌin bꞌan tumeꞌl bꞌix tzan etanqꞌin te jun-eleꞌx. 11 Wetz aꞌin te pastoriyon aj bꞌan galan.* Jun pastoriyon bꞌan galan dispwest tzan tkamik tzan kypaj kye taloꞌ. 12 Per te aj cha nꞌaqꞌunan tzan tpaj jun twiꞌ tkꞌuꞌj, nyaꞌtx aji te tajawil, bꞌix oj tul te xoꞌj kyiꞌj kye karner tetz cha nꞌoqik, cha nkyekaj tkaꞌyiꞌ tzan tpaj nyaꞌtx tetz kye karner. Ya te xoꞌj nkyetzaj tbꞌaqꞌuꞌ bꞌix nkyexik tslabꞌuꞌ. 13 Te aj xjal nini cha nꞌoqik tzan tpaj tetz cha aꞌox atok tkꞌuꞌj tiꞌj te twiꞌ tkꞌuꞌj, bꞌix kyiꞌj kye karner kꞌontiꞌl nꞌok tsiꞌ tkꞌuꞌj kyiꞌj. 14 Aꞌin wetz te pastoriyon aj bꞌan galan kyinnabꞌlin. Wetz wotzqimeꞌ kye waloꞌ bꞌix kyetz kyotzqimin, 15 iktzaꞌx te Ntat totzqiꞌ aꞌin bꞌix wetz wotzqiꞌ te Ntat,* bꞌix wetz oxeꞌl nqꞌapoꞌ wanqꞌin tzan kypaj kye waloꞌ. 16 Wetz ax ateꞌ txqꞌanky waloꞌ aj nyaꞌtx aꞌeꞌ tuj ja peꞌonni, ax kyetz presis tzan ktzaj win bꞌix okyinqtel kyokslaꞌa bꞌix ikxji okyeꞌokel cha jun peꞌon-oq bꞌix tukyꞌi cha jun pastoriyon. 17 Astilji te Ntat nkyinqet tganiꞌ, tzan tpaj wetz nxik nqꞌapoꞌ wanqꞌin tzan tkyꞌik nkꞌamoꞌ junkyꞌel. 18 Kꞌontiꞌl abꞌl nꞌel eqꞌin te wanqꞌin sinoke aꞌinx wetz nxik nqꞌapoꞌ wibꞌx. At wajwalil tzan txik nqꞌapoꞌ wibꞌx bꞌix at wajwalil tzan tjaw wanqꞌinsaꞌ wibꞌx junkyꞌel tzan tpaj ikxji otzaj tqꞌumaꞌ te Ntat.”
19 Ya ma tzꞌok kchaꞌoꞌ ikxjani kye aj tijajil Israel oqet kypawaꞌ kyibꞌ, kꞌontiꞌl ebꞌajten dyakwerd. 20 Kyꞌilaꞌj xjal kxol nkyqꞌumaꞌ tuq ikxjani: “Tetz atqex jun malspirit tuj tanim bꞌix oje tzꞌel lok. ¿Tistil tzunx nꞌok esiꞌ ewiꞌ tiꞌj?” 21 Junjunky nkyqꞌumaꞌ tuq ikxjani: “Nijunwt aj atqex jun malspirit tuj tanim nyolin ikxjani. ¿Tiꞌtzun, jun malspirit nbꞌantik titzaꞌ tzan tjaw tjaqoꞌ twitz jun moy?”
Aj Txik Tqꞌumaꞌ Jesus Aji Tetz Te Tkꞌwaꞌal Dios
22 Ntons, jabꞌalil tuq bꞌix nqet tuq qꞌijlaꞌ te qꞌij aj nkynaꞌoꞌ aqꞌbꞌiaꞌ tbꞌantlen te Nin Jay Nabꞌil Qtata Dios. 23 Te Jesus atqet tuq tuj te Nin Jay Nabꞌil Qtata Dios bꞌix nbꞌet tuq aj jaꞌ nꞌok qꞌumaꞌ te twitzjay aj “Tkꞌulbꞌen Salomon.” 24 Yaji kye xjal owok kymontoniꞌ kyibꞌ tiꞌj bꞌix oxik kchaꞌoꞌ tetz ikxjani: “¿Tujbꞌaꞌn tzaj aqꞌumaꞌ abꞌl yatz aꞌich? Qa yatz aꞌich te Koloyon Aj Qꞌumankaj Oqtxiꞌ, instzaj aqꞌumaꞌ bꞌeyx ajnaꞌl.” 25 Te Jesus oxik tqꞌumaꞌ kyetz: “Wetz maꞌtx xik nqꞌumaꞌ etetz bꞌix kꞌontiꞌl nkyinxik etokslaꞌ. Kyaqil aj nkyinkꞌulun tzan tpaj tkyꞌixel Ntat aꞌin telponx wiꞌj [abꞌl aꞌin]. 26 Etetz kꞌontiꞌl nꞌetokslaꞌ wiꞌj tzan tpaj nyaꞌtx aꞌix iktzaꞌ waloꞌ [aj lapikeꞌ wiꞌj]. 27 Wetz waloꞌ nꞌel nnikyꞌ kyiꞌj, bꞌix kyetz nꞌel kynikyꞌ tiꞌj nwiꞌ bꞌix nkyeꞌok lapet wiꞌj. 28 Wetz nxik nsiꞌ jun kyanqꞌin te jun-eleꞌx bꞌix nlay kyexiknaj bꞌix nijunwt abꞌl okyeꞌelal eqꞌin tuj nqꞌabꞌ. 29 Te Ntat aj otzaj sin wajwalil, tetz mas nim twitz kyaqil bꞌix nijunwt abꞌl bꞌaꞌn tzan kyel tin tuj tqꞌabꞌ Ntat. 30 Wetz aꞌin tukyꞌi Ntat cha jun-oq aꞌoꞌna.”
31 Yaji kye xjalb ojaw ktzyuꞌ abꞌj junkyꞌel tzan tuq txik kxon tiꞌj [tzan tqet kykansaꞌ]. 32 Te Jesus owaj tqꞌumaꞌ kyetz ikxjani: “Tidiꞌchq galan maꞌtx qet nkꞌuluꞌ ewitz etetz tukyꞌi tajwalil Ntat. ¿Tzan tpaj alkyetz nkꞌulbꞌen okyinꞌokel exoꞌoꞌ tukyꞌi abꞌj?” 33 Yaji kye xjal owaj ktzaqꞌbꞌeꞌ: “Qetza nlay xhchꞌok qxoꞌoꞌna tzan tpaj jun akꞌulbꞌen galan, sinoke tzan tpaj aj ayol bꞌan nyaꞌtx galan nxik aqꞌumaꞌ,* komo nꞌok aqꞌumaꞌ awiꞌjx qa aꞌich Dios bꞌix cha xjal aꞌich.” 34 Yaji te Jesus oxik tqꞌumaꞌ kyetz ikxjani: “Tuj te Kawbꞌil tzꞌibꞌanqex [aj txik tqꞌumaꞌ te Qtata Dios kyukyꞌi xjal] ikxjani: “Wetz oxik nqꞌumaꞌ etetz, ‘Etetz iktzaꞌ Dios aꞌix.’ ”* 35 Ntons, qa te Qtata Dios owok tqꞌumaꞌ iktzaꞌ Dios-eꞌ kye xjal aj nkyechaꞌon tuq tyol, komo te Tuꞌjal Qtata Dios nyolin ikxji bꞌix te nini nlay bꞌantik tzan tjaw kyꞌixpuꞌ, 36 komo te Qtata Dios inꞌel tpawaꞌ aꞌin aꞌox te tetz bꞌix intzaj tlajoꞌ tzani twitz txꞌoꞌtxꞌ, ¿tistil etetz nkxyolin wiꞌj qa wetz nkyinyolin nyaꞌtx galan tiꞌj te Qtat, tzan tpaj oxik nqꞌumaꞌ qa wetz aꞌin Tkꞌwaꞌal? 37 Qa wetz nlay-wit qet nkꞌuluꞌ aj nqet tkꞌuluꞌ te Ntat, kꞌontiꞌl-tal nkxꞌokslan wiꞌj. 38 Per komo wetz nqet nkꞌuluꞌ aj nqet tkꞌuluꞌ te Ntat, anke kꞌontiꞌl nxik etokslaꞌ te aj nkyinyolin, mejor peꞌetokslan wiꞌj tzan tpaj te aj nqet nkꞌuluꞌ. Ikxji tzan tel enikyꞌ bꞌeyx te jun-eleꞌx wetz tukyꞌi Ntat cha jun-oq aꞌoꞌ.” 39 Ntons yaji [kye xjal aj nim kyajwalil kxol kye aj tijajil Israel] kygan tuq tzan tjaw ktzyuꞌ junkyꞌel, per te Jesus luwew owex kxol.
40 Yaji te Jesus oxik junxlaꞌ te Jordan Aꞌ aj jaꞌ tuq te Waꞌnch njaw tsiꞌ aꞌ kywiꞌ xjal tbꞌayaꞌ,* bꞌix okaj ten jun tyemp txini. 41 Kyꞌilaꞌj tuq kye xjal nkyepon tuq tukyꞌiꞌl, bꞌix nkyqꞌumaꞌ tuq ikxjani: “Bꞌanꞌax te Waꞌnch kꞌontiꞌl oqet tkꞌuluꞌ jun labꞌal [tukyꞌi tajwalil Qtata Dios] per aj otyolij tiꞌj ja xjalni, bꞌanꞌax.” 42 Tuj aj luwarji, kyꞌilaꞌj xjal ebꞌajꞌokslan tiꞌj te Jesus.