9
Aj Tqet Tqꞌanaꞌ Jesus Jun Xjal Moy Tuq Titzꞌjlenx
1 Ntons aj tkyꞌik te Jesus tuj jun luwar, oxik ten jun xjal moy tuq titzꞌjlenx. 2 Yaji kye txnaqꞌatz oxik kchaꞌoꞌ tetz ikxjani: “Xnaqꞌtzon, ¿tistil te ja xjal owitzꞌjik moy? ¿Tzan tpaj xhchoj tetz qatzun tzan tpaj kchoj statji?” 3 Yaji te Jesus owaj stzaqꞌbꞌeꞌ kyetz: “Nyaꞌtx tzan tpaj xhchoj tetz ni tzan tpaj kchoj stat sinoke tzan tok eꞌelet tajwalil te Qtata Dios tiꞌj. 4 Qetz presis tzan tqet jkꞌuluꞌ te tkꞌulbꞌen te [Ntat] aj otzaj lajon wetz tzan tpaj atx tuq chꞌinky qiꞌj tzan qaqꞌunan. Chaꞌoj qok chukaqꞌbꞌil nijunwt bꞌaꞌn tzan taqꞌunan. 5 Aj man akyinqet tzani twitz txꞌoꞌtxꞌ, aꞌin wetz [nxik nyekꞌuꞌ te tumelil titzaꞌ tzan kybꞌet kye xjal tuj tumeꞌl, iktzaꞌ jun] chkꞌatunal aj nxik yekꞌun kybꞌey.”* 6 Ya ma xik tqꞌumaꞌ ikxjani, te Jesus oqet stzubꞌaꞌ twitz txꞌoꞌtxꞌ bꞌix owokten xyoqꞌol chꞌin txꞌoꞌtxꞌ bꞌix owok tsiꞌ tiꞌj tbꞌaqꞌ twitz te moy. 7 Bꞌix oxik tqꞌumaꞌ ikxjani: “Pax txꞌajol awitz tuj te tqatel aꞌ aj tbꞌi Siloé.” (Siloé tbꞌi tuj kyyol kyetz per tuj qyol qetz telponx iktzaꞌ Lajomaj.) Yaji te moy oxik bꞌix ya ma tzꞌel xtxꞌajoꞌ, ya ma meltzꞌjik, bꞌaꞌn tuq tzan tkaꞌyin.
8 Yaji kye aj nkyenajan tuq tzi bꞌix kye aj nꞌok en tuq tetz nqanin tuq chꞌi tlimosn, nkyqꞌumaꞌ tuq ikxjani: “¿Nyaꞌtx petzun aj ntzani te aj nqet tuq witꞌlet nqanin tuq chꞌin stumin?” 9 Junjun nkyqꞌumaꞌ tuq ikxjani: “Aji, a tetz.” Bꞌix txqꞌanky nkyqꞌumaꞌ tuq: “Nyaꞌtx aji, cha parej kaꞌyin.” Per tetz ntqꞌumaꞌ tuq: “Aꞌin wetz.” 10 Ntons oxik kchaꞌoꞌ tetz ikxjani: “¿Titzaꞌ ojaqet awitz bꞌix nꞌakaꞌyiꞌ ajnaꞌl?” 11 Ntons, owaj stzaqꞌbꞌeꞌ tetz: “Te xjal aj tbꞌi Jesus, tetz oqet txyoqꞌoꞌ chꞌin txꞌoꞌtxꞌ bꞌix owok tsiꞌ tiꞌj tbꞌaqꞌ nwitz bꞌix otzaj tqꞌumaꞌ tzan nxik txꞌajol nwitz tuj te tqatel aꞌ aj tbꞌi Siloé. Yaji wetz inxwaꞌq bꞌix ya ma tzꞌel ntxꞌajoꞌ nwitz, obꞌantik nkaꞌyin.” 12 Ntons oxik kchaꞌoꞌ tetz ikxjani: “¿Jaꞌ atqet te aj xjalni?” Bꞌix tetz owaj stzaqꞌbꞌeꞌ: “Jeꞌky, kꞌontiꞌl webꞌen.” 13 Ntons te aj moy tuq oxik kyin kywitz kye aj bꞌuchꞌuj Parisey 14 tzan tpaj aj tqet txyoqꞌoꞌ te Jesus te xoqꞌl bꞌix aj tjaqet twitz te moy tuj jun qꞌij ojlaꞌmj tuq. 15 Yaji kye aj bꞌuchꞌuj Parisey oxik kchaꞌoꞌ junkyꞌel tetz titzaꞌ ojaqet twitz. Yaji tetz owaj stzaqꞌbꞌeꞌ kyetz ikxjani: “Tetz owok tsiꞌ xoqꞌl tiꞌj tbꞌaqꞌ nwitz bꞌix yaji owel ntxꞌajoꞌ bꞌix ajnaꞌl nkyinkaꞌyin.” 16 Ntons junjun kxol kye aj bꞌuchꞌuj Parisey nkyqꞌumaꞌ tuq ikxjani: “Ntons te aj otkꞌuluj ntzani nyaꞌtx jun xjal aj tzajnaq tukyꞌi Qtata Dios tzan tpaj kꞌontiꞌl nqet txjaniꞌ te qꞌij ojlaꞌmj.” Per junjunky nkyqꞌumaꞌ tuq ikxjani: “¿Per titzaꞌ nbꞌantik titzaꞌ jun labꞌal ikxjani qa tetz jun chimol choj?” Ntons oqet kypawaꞌ kyibꞌ, nyaꞌtx tuq dyakwerd ateꞌ kxol.
17 Yaji oxik kchaꞌoꞌ junkyꞌel te aj moy tuq tbꞌayaꞌ: “Bꞌix te xjal aj oje jaw tjaqoꞌ awitzni, ¿abꞌl yatz tuj anabꞌl tetz?” Yaji tetz owaj stzaqꞌbꞌeꞌ: “Wetz tuj nnabꞌl tetz jun aj yolil tyol Dios.” 18 Per kye xjal aj nim kyajwalil kxol kye aj tijajil Israel, kyetz kꞌontiꞌl tuq nkyokslaꞌ qa tetz moy tuq tbꞌayaꞌ bꞌix ajnaꞌl nkaꞌyin. Yaji etzaj kyukꞌleꞌ kye kꞌwaꞌlon, 19 oxik kchaꞌoꞌ kyetz ikxjani: “¿Aj ntzani etetz ekꞌwaꞌal aj nꞌeqꞌumaꞌ etetz moy titzꞌjik? ¿Titzaꞌ ajnaꞌl tetz nbꞌantik tkaꞌyin?” 20 Yaji kye kꞌwaꞌlon owaj ktzaqꞌbꞌeꞌ ikxjani: “Qetza qebꞌena a tetz te jkꞌwaꞌal bꞌix owitzꞌjik moy. 21 Per kꞌontiꞌl qebꞌena titzaꞌ obꞌantik tkaꞌyin, bꞌix ax kꞌontiꞌl qebꞌena abꞌl oqet qꞌanan tetz. Intxik echaꞌoꞌ tetz. Komo tetz ya tijxjalky, tebꞌen tidiꞌ okyꞌik tiꞌj. Otzajel tqꞌumaꞌ.” 22 Kye stat oxik kyqꞌumaꞌ ikxjani tzan kxobꞌal tzan tpaj kye kxjalil aj at kyajwalil kxol ojetq tuq qet kykawlaꞌ kyibꞌ qa jun xjal oxeꞌl tqꞌumaꞌ tiꞌj te Jesus qa aji tetz te Koloyon Aj Qꞌumankaj Oqtxiꞌ, ntons owelatz tuq kyin kxol tuj te jay nabꞌil Dios. 23 Astilji kye kꞌwaꞌlon oxik kyqꞌumaꞌ, “Intxik echaꞌoꞌ tetz; tetz ya tijxjalky.”
24 Yaji otzaj kyukꞌleꞌ tkaꞌmjjiꞌn-el te ichan aj moy tuq tbꞌayaꞌ bꞌix oxik kchaꞌoꞌ tetz junkyꞌel ikxjani: “Intxik asiꞌ pixon te Qtata Dios tiꞌj aj maꞌtx kyꞌik awiꞌjni. Per yatzun tiꞌj aj xjalni, qetza qebꞌen aj xjalni tetz jun chimol choj.” 25 Yaji tetz owaj stzaqꞌbꞌeꞌ kyetz ikxjani: “Wetz kꞌontiꞌl webꞌen qa tetz jun chimol choj qa nyaꞌtxji, aꞌox webꞌen, wetz jun moy tuq aꞌin bꞌix ajnaꞌl nweꞌeꞌ.” 26 Yaji oxik kchaꞌoꞌ junkyꞌel tetz: “¿Tidiꞌ owok tkꞌuluꞌ awiꞌj? ¿Titzaꞌ obꞌantik tzan tjaw tjaqoꞌ awitzni?” 27 Yaji oxik tqꞌumaꞌ junkyꞌel kyetz: “Wetz maꞌtx xik nqꞌumaꞌ etetz bꞌix kꞌontiꞌl nkyinxik etokslaꞌ. ¿Tistil ntzaj echaꞌoꞌ junkyꞌel wetz? ¿Tiꞌtzun, ax etetz egan tzan etokslan tiꞌj tzan etok te txnaqꞌatz?” 28 Ntons yaji owok kyiliꞌ bꞌix oxik kyqꞌumaꞌ tetz ikxjani: “Yatz aꞌich jun aj txnaqꞌatz tetz, per qetza nxik qokslaꞌna te aj oqet stzꞌibꞌaꞌ Moisés bꞌan oqtxiꞌ. 29 Qetz qebꞌen te Qtata Dios oyolin tukyꞌi Moisés, per te ja xjalni kꞌontiꞌl qebꞌen jaꞌ tzajnaq.” 30 Yaji te ichan owaj stzaqꞌbꞌeꞌ kyetz: “Te ntzani bꞌan chuktky. Etetz kꞌontiꞌl etebꞌen jaꞌ tzajnaq, per wetz maꞌtx kyinqet tqꞌanaꞌ, maꞌtx jaw tjaqoꞌ nwitz. 31 Qetz qebꞌenky bꞌan bꞌanꞌax te Qtata Dios kꞌontiꞌl ntzaj tsiꞌ twiꞌ kyiꞌj kye xjal aj chimol choj, sinoke ntzaj tsiꞌ twiꞌ aꞌox kyiꞌj kye aj nkyexjanin tetz bꞌix nqet kykꞌuluꞌ iktzaꞌ tetz tgan.* 32 Ni jun-el twitz ja txꞌoꞌtxꞌni oje tzꞌok qen jun xjal oje jaw tjaqoꞌ twitz jun xjal moy titzꞌjlenx. 33 Qa ja xjalni nyaꞌtx-wit jun yolil tyol Dios, ntons kꞌontiꞌl-tal nbꞌantik tkꞌulun chꞌinwt.” 34 Ntons oxik kyqꞌumaꞌ tetz ikxjani: “Yatz aj joyol choj aꞌich awitzꞌjlenx, ¿tiꞌtzun, agan tzan qtzaj axnaqꞌtzaꞌna?” Yaji owex kylajoꞌ.
35 Ntons te Jesus owok xhchaꞌoꞌ qa te xjal ojetq tuq tzꞌetz in, yaji owok tkꞌulbꞌaꞌ junkyꞌel, bꞌix oxik tqꞌumaꞌ ikxjani: “¿Nxhchꞌokslan peꞌ yatz tiꞌj te Ichan Aj Tkꞌwaꞌal Dios?” 36 Yaji tetz oxik tqꞌumaꞌ ikxjani: “Tat, tzaj aqꞌumaꞌ abꞌltzun tetz tzan wokslan wetz tiꞌj.” 37 Yaji te Jesus oxik tqꞌumaꞌ tetz: “Aꞌin wetz.”a 38 Yaji te xjal oxik tqꞌumaꞌ: “Ntons tat, wetz nkyinꞌokslan awiꞌj.” Yaji oqet mejlet twitz, bꞌix onaꞌon tiꞌj. 39 Yaji te Jesus oxik tqꞌumaꞌ tetz ikxjani: “Wetz oje kyinꞌul tzani twitz txꞌoꞌtxꞌ qꞌumal te bꞌanꞌax kyiꞌj kye xjal, inꞌul jaqol kywitz kye aj moy-eꞌ bꞌix txayil kywitz kye aj nkyqꞌumaꞌ qa kyetz nkyekaꞌyin.” 40 Yaji kye aj bꞌuchꞌuj Parisey aj akyeqet tuq tzi okchaꞌoj aj txik tqꞌumaꞌ ikxji bꞌix oxik kyqꞌumaꞌ ikxjani: “¿Tiꞌtzun, ax qetza moy aꞌoꞌna?” 41 Yaji te Jesus oxik tqꞌumaꞌ kyetz ikxjani: “Qa etetz aꞌix-wit moy ntons kꞌontiꞌl-tal epaj tiꞌj te echoj. Per komo etetz nꞌeqꞌumaꞌ “qetza nqokaꞌyina” ntons te echoj tzunx atok etiꞌj.”