8
Aj Tqet Tnajsaꞌ Te Jesus Xhchoj Jun Xuj Aj Nkꞌajajin Tuq
1 Yaji te Jesus oxik twiꞌ te witz Olib.a 2 Ya tuj junky iwitq bꞌan qꞌeqoꞌ, oxik junkyꞌel tuj te Nin Jay Nabꞌil Qtata Dios, bꞌix kyaqil kye xjal ebꞌajpon tukyꞌiꞌl, oqet witꞌlet kxol bꞌix owaqꞌik tzan txnaqꞌtzan kyetz. 3 Yaji kye xnaqꞌtzal Kawbꞌil kyukyꞌi kye aj bꞌuchꞌuj Parisey otzaj kyin jun xuj twitz, man tuq stzajlen kykꞌulbꞌaꞌ nkꞌajajin tuq bꞌix oqet ksiꞌ kxol kye aj akyeqet tuq tzi. 4 Bꞌix oxik kyqꞌumaꞌ ikxjani: “Xnaqꞌtzon, ja xujni maꞌtx stzaj kꞌulbꞌaꞌ nkꞌajajin tuq. 5 Tuj te Kawbꞌil aj okaj tsiꞌ te Moisés nyolin qa jun xuj nkꞌulun ikxjani, ntons a tgan tzan tqet kanslet tukyꞌi pur abꞌj.* Bꞌix yatz, ¿titzaꞌ yatz tuj anabꞌl?” 6 Komo kyetz oxik kyqꞌumaꞌ ikxjani tzan tqet kyeqꞌiꞌ tuq tiꞌj, aber tidiꞌ tuq otqꞌumaꞌtz, tzan txik kyqꞌumaꞌ til. Tzaj te Jesus, oqet xhkꞌojlet bꞌix owokten tzꞌibꞌon twitz txꞌoꞌtxꞌ tukyꞌi twiꞌ tqꞌabꞌ. 7 Komo bꞌan nkyeqanlaj tuq, yaji ojaw waꞌlet bꞌix oxik tqꞌumaꞌ ikxjani: “Abꞌl aj exol etetz aj kꞌontiꞌl xhchoj intaqꞌik tzan txik txon te tbꞌay abꞌj.” 8 Yaji tetz oqet mokꞌlet junkyꞌel bꞌix owokten junkyꞌel tzꞌibꞌon twitz txꞌoꞌtxꞌ. 9 Ya ma tzꞌok kchaꞌoꞌ ikxji, junjunchaq eꞌaqꞌik tzan kyaj, tbꞌay eꞌaj kye tij, kyebꞌayleꞌ ebꞌajkaj kchukel te Jesus tukyꞌi te xuj. 10 Yaji te Jesus ojaw waꞌlet junkyꞌel bꞌix oxik tqꞌumaꞌ ikxjani: “Xuj, ¿janijeꞌ kye aj nkyexik poqon tuq te yatz? ¿Nijunwt abꞌl ma xik sin atz tuj il?” 11 Yaji te xuj oxik tqꞌumaꞌ tetz: “Nijunwt, tat.” Yaji te Jesus oxik tqꞌumaꞌ: “Ax wetz nlay txik nsiꞌ tuj il. [Kꞌon chbꞌisun,] pax, bꞌix kꞌonky chjoyon choj.”
Te Jesus Iktzaꞌ Jun Chkꞌatunal Te Yekꞌul Qbꞌey
12 Yaji te Jesus oyolin junkyꞌel kyukyꞌi kye xjal, bꞌix oxik tqꞌumaꞌ ikxjani: “Aꞌin wetz te chkꞌatunal twitz txꞌoꞌtxꞌ.* Abꞌl aj owokel lapet wiꞌj nlay bꞌet tuj qlolj, sinoke obꞌetel tuj te chkꞌatunal tzan tanqꞌin.” 13 Yaji kye aj bꞌuchꞌuj Parisey oxik kyqꞌumaꞌ ikxjani: “Komo yatz cha achukel nchyolin galan awiꞌjx yatz, ntons aj nchyolin awiꞌjxni kꞌontiꞌl token.”* 14 Te Jesus owaj stzaqꞌbꞌeꞌ ikxjani: “Wetz aj nxik nyoliꞌ wiꞌjxni, bꞌanꞌax. Anke wiꞌjx wetz nxik nyoliꞌ, te nini bꞌanꞌax tzan tpaj wetz webꞌen jaꞌ tzajnaqin bꞌix jaꞌ okyinxeꞌl. Per etetz kꞌontiꞌl etebꞌen jaꞌ tzajnaqin bꞌix jaꞌ okyinxeꞌlky. 15 Etetz nkxqꞌuman nyaꞌtx galan ntkꞌuluꞌ jun xjal bꞌix cha tuj ewiꞌx nꞌetz etin qa nyaꞌtx galan. Per wetz kꞌontiꞌl nkyinqꞌuman til nijunwt. 16 Qa wetz nxik nqꞌumaꞌ-wit til junky, wetz aj nxik nqꞌumaꞌ bꞌanꞌax tzan tpaj wetz nyaꞌtx nchukel akyinqet sinoke akyinqet wetz tukyꞌi te [Ntat] aj otzaj lajon wetz. 17 Tuj te Kawbꞌilb tzꞌibꞌanqex qa kabꞌeꞌ xjal nxik kyyoliꞌ tiꞌj jun tidiꞌ bꞌix parej nkyeyolin kykabꞌil, ntons te aj nxik kyqꞌumaꞌ at token bꞌix bꞌanꞌax. 18 Wetz aꞌin jun aj nkyinyolin bꞌanꞌax wiꞌjx wetz bꞌix ax te Ntat aj otzaj lajon wetz nyolin bꞌanꞌax wiꞌj.” 19 Ntons kyetz oxik kyqaniꞌ tetz: “¿Jaꞌ atqet yatz atat?” Yaji te Jesus owaj stzaqꞌbꞌeꞌ: “Etetz kꞌontiꞌl etotzqimin bꞌix ax kꞌontiꞌl etotzqiꞌ te Ntat, per etotzqimin-wit ax-tal etotzqiꞌ wetz Ntat.” 20 Te Jesus oxik tqꞌumaꞌ kyaqil ntzani aj man tuq nxnaqꞌtzan kye xjal tuj te Nin Jay Nabꞌil Qtata Dios aj jaꞌ tuq nkaj ksiꞌ te kytumin te kyoyej. Bꞌix nijunwt ojaw tzyun tetz tzan tpaj atx tuq tzan tpon or te tetz.
21 Yaji te Jesus oxik tqꞌumaꞌ junkyꞌel kyetz: “Wetz ma kyinxik bꞌix okxjoyoyon wiꞌj, bꞌix okxkamel tukyꞌix echoj; aj jaꞌ ma kyinxik wetz, etetz nlay bꞌantik tzan exik tzi.” 22 Yaji kye xjalc nkyyoliꞌ tuq ikxjani: “Tiꞌtzun, ¿oqtel tkansaꞌ tibꞌx? Komo ntqꞌumaꞌ, “Aj jaꞌ ma kyinxik wetz, nlay bꞌantik exik etetz.”” 23 Te Jesus nxik tuq tqꞌumaꞌ kyetz: “Etetz aꞌix aj tzani, per wetz aꞌin aj ajas tuj kaꞌj; etetz aꞌix te ja twitz txꞌoꞌtxꞌni, per wetz nyaꞌtx aꞌin aj te ja twitz txꞌoꞌtxꞌni. 24 Astilji wetz ma xik nqꞌumaꞌ etetz okxkamel tukyꞌi echoj. Komo qa nlay xik etokslaꞌ abꞌl aꞌin iktzaꞌx aj maꞌtx xik nqꞌumaꞌni, okxkamelkix tuj te echoj.” 25 Ntons kyetz oxik kchaꞌoꞌ tetz: “¿Abꞌl yatz aꞌich?” Yaji te Jesus owaj stzaqꞌbꞌeꞌ ikxjani: “¿Tidiꞌ oje xik nqꞌumaꞌ etetz atx bꞌan tbꞌay-el?d 26 Atx nim tzan txik nqꞌumaꞌ etiꞌj etetz bꞌix tzan txik nqꞌumaꞌ qa nyaꞌtx galan nkxkꞌulun, per te aj otzaj lajon te wetz, tetz jun yolin, bꞌix wetz aj owok nchaꞌoꞌ tukyꞌiꞌl, te nini aj nxik nqꞌumaꞌ kxol kye xjal twitz txꞌoꞌtxꞌ.”
27 Ntons kyetz kꞌontiꞌl owel kynikyꞌ qa nyolin tiꞌj te Stat. 28 Yaji oxik tqꞌumaꞌ tetz kyetz: “Max oj njaw in wetz jawnaq, [wetz] te Ichan Aj Tkꞌwaꞌal Dios [aꞌin], maxji owelal enikyꞌ qa aꞌin wetz iktzaꞌx aj maꞌtx xik nqꞌumaꞌ bꞌix qa kꞌontiꞌl tidiꞌ nbꞌantik witzaꞌ cha wibꞌx-wit sinoke nqet nkꞌuluꞌ iktzaꞌx otzaj txnaqꞌtzaꞌ te Ntat wetz. 29 Te [Ntat] aj otzaj lajon wetz atqet wukyꞌiꞌl bꞌix kꞌontiꞌl nkyinkaj tsiꞌ nchukel tzan tpaj te aj nqet nkꞌuluꞌ nꞌel galan tuj twitz.” 30 Ntons aj man tuq nxik tqꞌumaꞌ te Jesus ikxjani, kyꞌilaꞌj xjal ebꞌajꞌokslan tiꞌj.
Te Jesus Nyolin Abꞌleꞌ Kye Aj Tkꞌwaꞌal Dios Bꞌaꞌn Bꞌanꞌax
31 Ntons te Jesus oxik tqꞌumaꞌ kyukyꞌi kye xjal aj tijajil Israel aj ojetq tuq kyeꞌokslan tiꞌj, oxik tqꞌumaꞌ ikxjani: “Qa etetz nlay kaj ekolaꞌ aj nxik nqꞌumaꞌ, ntons aꞌix nxnaqꞌatz bꞌan bꞌanꞌax 32 bꞌix owokel etotzqilaꞌ te tumeꞌl bꞌanꞌax, bꞌix tzan tpaj te tumeꞌl bꞌanꞌax okxkolpjel.” 33 Yaji kyetz owaj ktzaqꞌbꞌeꞌ ikxjani: “Qetza aꞌoꞌna tijajil Abran,* bꞌix qetz ni jun-el oqetna mosiꞌ tzan junky. ¿Tistil yatz nꞌaqꞌumaꞌ oqokolpjelna?” 34 Te Jesus oxik tqꞌumaꞌ kyetz: “Wetz oxeꞌl nqꞌumaꞌ etetz bꞌan bꞌanꞌax, abꞌl aj njoyon choj tetz nqet mosiꞌ tzan te choj. 35 Jun xjal aj mosiꞌ tzan jun tajaw, tetz nyaꞌtx bꞌan bꞌanꞌax jun aj tuj tjay te tajawil; per te jun aj tkꞌwaꞌal te tajawil, tetzji jun aj tuj tjay te jun-eleꞌx. 36 Astilji qa te Tkꞌwaꞌal [Dios] okolpiyon te etetz, ntons bꞌan bꞌanꞌax okxkolpjel.* 37 Wetz webꞌen etetz aꞌix aj tijajil Abran, per egan tzan nqet ekansaꞌ tzan tpaj kꞌontiꞌl nꞌel galan tuj ewitz te aj nkyinyolin etukyꞌiꞌl. 38 Wetz nxik nqꞌumaꞌ etetz aj oje tzaj tyekꞌuꞌ te Ntat wetz, per etetz nqet ekꞌuluꞌ aj oje xik qꞌumaꞌ etetz tzan te etat.” 39 Yaji kyetz owaj ktzaqꞌbꞌeꞌ ikxjani: “Qetza qijajilna Abran.” Ntons te Jesus oxik tqꞌumaꞌ kyetz: “Qa etetz aꞌix-wit tijajil te Abran, ntons nqet-tal ekꞌuluꞌ iktzaꞌ te Abran oqet tkꞌuluꞌ. 40 Per etetz egan tzan nqet ekansaꞌ anke wetz maꞌtx xik nqꞌumaꞌ etetz te bꞌanꞌax iktzaꞌx aj otzaj tqꞌumaꞌ te Qtata Dios wetz. Te Abran kꞌontiꞌl otkꞌuluj iktzaꞌ etetz nꞌekꞌuluꞌ. 41 Etetz nqet ekꞌuluꞌ iktzaꞌ tkꞌulbꞌen te etat.” Yaji kyetz owaj ktzaqꞌbꞌeꞌ: “Qetza nyaꞌtx cha sikꞌoꞌl aꞌoꞌna, sinoke cha jun qetza qtata, aj Qtata Dios.” 42 Oxik tqꞌumaꞌ te Jesus kyetz ikxjani: “Qa etetz etat a-wit te Qtata Dios, nkyinqet-tal eganiꞌ tzan tpaj wetz tzajnaqin tukyꞌiꞌl bꞌix akyinqet tzani tzan tpaj tetz, nyaꞌtx cha aꞌinx-wit wetz intzaj sinoke aji otzaj lajon te wetz. 43 ¿Tistil kꞌontiꞌl nꞌel enikyꞌ tiꞌj aj nxik nqꞌumaꞌ etetzni? Kꞌontiꞌl nꞌel enikyꞌ tzan tpaj kꞌon egan chaꞌon te aj nxik nqꞌumaꞌni. 44 Te etat etetz a te Tajaw Choj, bꞌix aj tgan kꞌulun te etat, ax ikxji etetz egan kꞌulun. Atx aj bꞌan tbꞌay-el, tetz jun kansal xjal bꞌix kꞌontiꞌl oxik tin te bꞌanꞌax, kyaqil aj ntyoliꞌ nyaꞌtx bꞌanꞌax. Chaꞌoj txik tqꞌumaꞌ jun nyaꞌtx bꞌanꞌax, nyolin iktzaꞌx tetz yolin tzan tpaj tetz jun bꞌan ajun nikꞌon bꞌix aji tetz te aj swal kyaqil nikꞌbꞌil. 45 Wetz tzan tpaj nkyinyolin te bꞌanꞌax, astilji etetz kꞌontiꞌl nkyinxik etokslaꞌ. 46 ¿Abꞌl jun te etetz bꞌaꞌn tzan stzaj tqꞌumaꞌ qa wetz at nchoj? Bꞌix qa wetz nkyinyolin te bꞌanꞌax ¿tistil kꞌontiꞌl nkyinxik etokslaꞌ? 47 Abꞌl te aj qꞌapoꞌ tibꞌ tuj tqꞌabꞌ Qtata Dios nꞌok xhchaꞌoꞌ aj ntyoliꞌ te Qtata Dios, per komo etetz nyaꞌtx aꞌix aj te Qtata Dios, astilji kꞌon egan tzan tok echaꞌoꞌ aj ntyoliꞌ tetz.”
Aj Txik Tqꞌumaꞌ Jesus Tetz Atqetkix Tuq Tbꞌay Twitz Abran
48 Yaji kye xjale oxik kyqꞌumaꞌ tetz: “Ntons bꞌanꞌax qetza qyol, yatz aꞌich jun [nyaꞌtx galan iktzaꞌ kye] aj Samary bꞌix atqex jun malspirit tuj awanim.” 49 Te Jesus owaj stzaqꞌbꞌeꞌ ikxjani: “Wetz kꞌontiꞌl jun malspirit tuj wanim. Kyaqil aj nqet nkꞌuluꞌni tzan tqet njiqꞌbꞌaꞌ te Ntat, per etetz cha nꞌel etin nkyꞌexaw. 50 Wetz kꞌontiꞌl nkyinjoyon tzan nqet jiqꞌbꞌaꞌ, per at abꞌl tgan tzan nqet tjiqꞌbꞌaꞌ bꞌix bꞌaꞌn tzan stzaj tqꞌumaꞌ alkyetz te tumeꞌl. 51 Wetz oxeꞌl nqꞌumaꞌ etetz bꞌan bꞌanꞌax, abꞌl aj oxeꞌl tokslaꞌ te nyol, nlay tzꞌok ten twitz te kamikyj te jun-eleꞌx.” 52 Yaji kye xjalf oxik kyqꞌumaꞌ tetz: “Ajnaꞌl bꞌan bꞌanꞌax qebꞌen, yatz atqex jun malspirit tuj awanim. Komo te Abran bꞌix kyaqil kye aj yolil tyol Qtata Dios oqtxiꞌ ebꞌajkamik, per yatz nꞌaqꞌumaꞌ abꞌl aj oxeꞌl tokslaꞌ te ayol nlay tzꞌok ten twitz te kamikyj te jun-eleꞌx. 53 ¿Tiꞌtzun, mas nim yatz awajwalil twitz te qijajil Abran bꞌix tetz okamik? Ax kye aj yolil tyol Dios oqtxiꞌ ebꞌajkamik. ¿Abꞌl yatz aꞌich tuj anabꞌl?” 54 Te Jesus owaj stzaqꞌbꞌeꞌ ikxjani: “Qa wetz nqet njiqꞌbꞌaꞌ-wit wibꞌx, te aj nxik nqꞌumaꞌ tzan tqet njiqꞌbꞌaꞌ wibꞌx kꞌontiꞌl-tal token. Te aj nqet jiqꞌbꞌan wetz a te Ntat bꞌix a tetz te aj nꞌeqꞌumaꞌ etetz ntzaj enaꞌoꞌ. 55 Etetz kꞌontiꞌl etotzqiꞌ tetz. Wetz bꞌanꞌax wotzqiꞌ. Qa wetz oxeꞌl nqꞌumaꞌ kꞌontiꞌl wotzqiꞌ, ntons aꞌin-tal wetz jun nikꞌoyon iktzaꞌ etetz aꞌixni; per wetz wotzqiꞌ tetz bꞌix nkyinꞌokslan tyol. 56 Te Abran aj etijajil etetz, tetz oje chalaj tzan wul wetz tzani bꞌix inꞌok ten bꞌix oje chalaj.” 57 Ntons kye xjal oxik kyqꞌumaꞌ tetz: “¡Per yatz nisiker oje jakon lajuj tuj oxqal (50) aqꞌbꞌi aꞌich bꞌix nꞌaqꞌumaꞌ qa oje tzꞌok awen te Abran!” 58 Yaji te Jesus oxik tqꞌumaꞌ kyetz: “Oxeꞌl nqꞌumaꞌ etetz bꞌan bꞌanꞌax, atx aj minaꞌ tuq titzꞌjik te Abran wetz akyinqetkix tuq.”* 59 Yaji kye xjal ojaw kyin abꞌj tzan tuq tok kxoꞌoꞌ, per te Jesus owewan bꞌix owex tuj te Nin Jay Nabꞌil Qtata Dios.