7
Aj Kꞌontiꞌl Tuq Nxik Okslaꞌ Te Jesus Tzan Kye Titzꞌinx
1 Ntons ya ma kyꞌik kyaqil ntzani, te Jesus nbꞌet tuq tuj tkwentil Galiley, tzan tpaj kꞌon tgan tuq tzan tqet ten tuj tkwentil Judey tzan kypaj kye aj at kyajwalil kxol kye xjal aj tijajil Israel nkyejoyon tuq tumeꞌl tzan kykansan tetz. 2 Ntons komo chꞌinky tuq tkanon te qꞌij aj nqet kyqꞌijlaꞌ kye xjal aj tijajil Israel, tbꞌi te qꞌij “Qꞌij te Sakꞌabꞌteꞌ,”* 3 kye titzꞌin oxik kyqꞌumaꞌ tetz: “Kꞌon chkajten tzani. Pax tuj Judey tzan tok eꞌeꞌ kyaqil akꞌulbꞌen tzan kye aj axnaqꞌatz. 4 Jun xjal aj tgan tzan tok otzqilaꞌ tzan kye xjal, kꞌontiꞌl nqet tkꞌuluꞌ cha pur ewj. Komo yatz nqet akꞌuluꞌ tidiꞌchq ikxjani, mejor intqet akꞌuluꞌ kywitz kyaqil xjal.” 5 Kye titzꞌin nkyeyolin tuq ikxji tzan tpaj kꞌontiꞌl tuq nkyeꞌokslan tiꞌj. 6 Te Jesus oxik tqꞌumaꞌ kyetz: “Atx minaꞌ tpon or te wetz, per etetz bꞌaꞌn tzan exik tzan tpaj etetz abꞌlchaq kyetz qꞌij bꞌaꞌn tzan exik. 7 Kye xjal nlay bꞌantik tzan etok kyqꞌojiꞌ, per wetz okyinꞌokel kyqꞌojiꞌ tzan tpaj wetz nkyinyolin bꞌanꞌax kyiꞌj tzan tpaj te nyaꞌtx galan aj nkyekꞌulun. 8 Pex waq etetz tuj te qꞌij. Wetz nlay kyinxik tzan tpaj minaꞌ tpon or wetz.” 9 Txiklen tqꞌumaꞌ ikxji, tetz okajten Galiley.
Aj Kꞌontiꞌl Tuq Nkyeten Dyakwerd Kye Xjal Abꞌl Tuq Te Jesus
10 Ntons ojetq tuq kyexik kye titzꞌin tuj te qꞌij, yaji ax te Jesus oxik, per ewj, kꞌontiꞌl tuq kyebꞌen kye xjal. 11 Kye tijxjal aj tijajil Israel nkyejoyon tuq tiꞌj tuj te qꞌij, nkyyoliꞌ tuq ikxjani: “¿Jaꞌ atqet aj xjal-alo?” 12 Kyaqil kye xjal nkyeyolin tuq tiꞌj, junjun nkyqꞌumaꞌ tuq ikxjani: “Tetz bꞌan galan xjal.” Bꞌix junjunky nkyqꞌumaꞌ tuq ikxjani: “Tetz nyaꞌtx galan, cha nkyeqet teqꞌiꞌ xjal.” 13 Per nijunwt tuq nkynimsaꞌ kykꞌuꞌj tzan kyyolin tiꞌj kywitz kye xjal tzan tpaj nkyexobꞌ tuq kywitz kye aj nim kyajwalil.
14 Ntons, ya ojetq tuq qopon lamitan te qꞌij, tzaj te Jesus, owox tuj te Nin Jay Nabꞌil Qtata Dios bꞌix owaqꞌik tzan txnaqꞌtzan kye xjal tiꞌj te Tuꞌjal Dios. 15 Kye xjal aj nim kyajwalil kxol kye aj tijajil Israel, bꞌan nkyelabꞌan tuq tiꞌj, bꞌix nkyyoliꞌ tuq ikxjani: “¿Titzaꞌ tetz bꞌan totzqiꞌ kyaqil bꞌix minaꞌ stzaj xnaqꞌtzaꞌ tzan jun xnaqꞌtzon?” 16 Yaji te Jesus owaj stzaqꞌbꞌeꞌ ikxjani: “Wetz aj nxik nxnaqꞌtzaꞌni nyaꞌtx cha tuj nwiꞌx nꞌetz win, sinoke aj ntqꞌumaꞌ te aj otzaj lajon wetz. 17 Abꞌl aj tgan kꞌulun iktzaꞌ tgan te Qtata Dios, ntons bꞌaꞌn tzan tel tnikyꞌ qa aj nxik nxnaqꞌtzaꞌni ntzaj tukyꞌi Qtata Dios qatzun cha tuj nwiꞌx wetz nꞌetz winji. 18 Te aj nyolin nim tiꞌjx, cha tgan tzan tqet jiqꞌbꞌaꞌ tzan xjal; yatzun te aj tgan tzan tqet jiqꞌbꞌaꞌ tzan te [Qtata Dios] aj otzaj lajon tetz, tetzniꞌn jun yolin bꞌix kꞌontiꞌl nnikꞌon. 19 ¿Nyaꞌtx petzun Moisés okaj sin te Ekawbꞌil? Per nijunwt exol etetz nqet tkꞌuluꞌ iktzaꞌ tgan te Kawbꞌil. ¿Tistil egan etetz tzan nqet ekansaꞌ?” 20 Yaji kye xjal owaj ktzaqꞌbꞌeꞌ ikxjani: “Yatz cha at malspirit tuj awanim [astilji nꞌaqꞌumaꞌ ikxji]. ¿Abꞌl tgan tzan tkansan yatz?” 21 Yaji te Jesus owaj stzaqꞌbꞌeꞌ kyetz: “Etetz bꞌan nkxlabꞌan tzan tpaj jun tidiꞌ galan oqet nkꞌuluꞌ.* 22 Te Moisés okaj tqꞌumaꞌ tzan tok siꞌlet qechalul tiꞌj qchiꞌjel,* per nyaꞌtx cha tuj twiꞌx te Moisés owetz tin, sinoke eqꞌiꞌkix tuq tzan kye qijajil oqtxiꞌ,* bꞌix etetz nꞌok esiꞌ techalul tiꞌj xhchiꞌjel jun kꞌwaꞌl nkesey tuj qꞌij ojlaꞌmj. 23 Qa etetz tuj jun qꞌij ojlaꞌmj nꞌok esiꞌ techalul tiꞌj xhchiꞌjel jun kꞌwaꞌl tzan tpaj te Kawbꞌil, ¿tistil nkxjaw qꞌojlik wiꞌj tzan tpaj ma qet nqꞌanaꞌ kyaqil xhchiꞌjel jun xjal tuj jun qꞌij ojlaꞌmj?* 24 Kꞌon xik eqꞌumaꞌ jun tidiꞌ tiꞌj jun xjal tzan tpaj titzaꞌ tok kaꞌyin, sinoke intqet ebꞌisuꞌ tiꞌj tukyꞌi jun tumeꞌl bꞌan bꞌanꞌax.”
Aj Tyolin Jesus Jaꞌ Tzajnaq Tuq Tetz
25 Junjun xjal aj kyjayx tzi tuj Jerusalen nkyqꞌumaꞌ tuq ikxjani: “¿Nyaꞌtx petzun aj ntzani te xjal aj kygan tuq kansan tetz? 26 Bꞌix intxik eten, ajnaꞌl nyolin kywitz kyaqil xjal bꞌix kꞌontiꞌl tidiꞌ nxik kyqꞌumaꞌ tetz. ¿Qanq bꞌanꞌax ajnaꞌl maꞌtx tzꞌok kyen kye aj nim kyajwalil qa a tetz te Koloyon Aj Qꞌumankaj Oqtxiꞌ? 27 Per qetz qebꞌen jaꞌ tzajnaq ja xjalni, bꞌix chaꞌoj tul te Koloyon Aj Qꞌumankaj Oqtxiꞌ, nijunwt tebꞌen jaꞌ tzajnaq.”
28 Astilji te Jesus, aj nxnaqꞌtzan tuq kye xjal tuj te Nin Jay Nabꞌil Qtata Dios, oxik tqꞌumaꞌ kongan ikxjani: “Etetz etotzqimin bꞌix ax etotzqiꞌ jaꞌ tzajnaqin, per wetz nyaꞌtx tzajnaqin tzan tpaj nganxwit wetz, sinoke te aj otzaj lajon te wetz, tetz jun yolin, per etetz kꞌontiꞌl etotzqiꞌ tetz. 29 Wetz wotzqiꞌ tzan tpaj tukyꞌiꞌl tetz tzajnaqin, bꞌix aji otzaj lajon te wetz.” 30 Ntons kye xjal aj nim kyajwalil kxol kye aj tijajil Israel, kyetz kygan tuq tzan tjaw ktzyuꞌ, per nijunwt owok tsiꞌ tqꞌabꞌ tiꞌj tzan tpaj minaꞌ tuq tpon or te tetz. 31 Kye xjal aj akyeqet tuq tzi, kyꞌilaꞌj ebꞌajꞌokslan tiꞌj, bꞌix nkyqꞌumaꞌ tuq ikxjani: “Oj tul te Koloyon Aj Qꞌumankaj Oqtxiꞌ, ¿oqtel tkꞌuluꞌ petzun mas labꞌal twitz te aj nqet tkꞌuluꞌ te ja xjalni?”
Aj Kygan Tuq Tjaw Ktzyuꞌ Te Jesus
32 Kye aj bꞌuchꞌuj Parisey, kyetz owok kchaꞌoꞌ aj nkyqꞌumaꞌ tuq kye xjal tiꞌj Jesus, bꞌix kye pal aj nim kyajwalil kyukyꞌi kye aj bꞌuchꞌuj Parisey ebꞌajxik kylajoꞌ mulon tzan tuq tjaw ktzyuꞌ. 33 Ntons te Jesus oxik tqꞌumaꞌ kyetz ikxjani: “Wetz akyinqet etukyꞌiꞌl, per ya nyaꞌtx nim tyemp, bꞌix yaji ma kyinxik tukyꞌiꞌl te aj otzaj lajon wetz. 34 Etetz okxjoyoyon wiꞌj, per nlay kyinꞌoknoj etitzaꞌ tzan tpaj etetz nlay bꞌantik exik aj jaꞌ okyinteyon wetz.”
35 Ntons kye xjala owaqꞌik tzan kyyolin kyibꞌkyibꞌx, nkyqꞌumaꞌ tuq ikxjani: “¿Jaꞌ oxeꞌl tetz qa nlay tzꞌoknoj qitzaꞌ? ¿Oxeꞌl petzun kxol txqꞌanky qxjalil aj laqꞌchik ateꞌ, samomeꞌ kxol kye aj nyaꞌtx qijajil?b ¿Qatzun oxeꞌl petzun xnaqꞌtzal kye aj nyaꞌtx qxjalil? 36 ¿Tidiꞌ telponx aj ma tqꞌumaj, “Etetz okxjoyoyon wiꞌj per nlay kyinꞌoknoj etitzaꞌ tzan tpaj etetz nlay bꞌantik exik aj jaꞌ okyinteyon”?”
A Te Jesus Ntzaj Sin Tanqꞌin Te Qanim
37 Ntons te tmankbꞌil qꞌij te qꞌij, a tuq te ninqꞌijji,* bꞌix te Jesus ojaw waꞌlet kxol kye xjal bꞌix oxik tqꞌumaꞌ kongan ikxjani: 38 “Qa at abꞌl aj ntnaꞌoꞌ iktzaꞌ jun kꞌachjel [tuj tanim], instzaj laqꞌchet wiꞌj bꞌix otkꞌamoꞌtz [te aj npaltin tetz]. Abꞌl aj owokslayon wiꞌj otkꞌamoꞌtz tuj tanim iktzaꞌ jun nim aꞌ aj nxik tsiꞌ jun tanqꞌin, iktzaꞌx nyolin tuj Tuꞌjal Dios.”c 39 Aj txik tqꞌumaꞌ te Jesus ikxjani, nyolin tuq tiꞌj te Txew Dios aj okykꞌamoꞌtz tuq kye aj okyeꞌokslayon tiꞌj. Komo te Txew minaꞌ tuq txik siꞌ tuj kyanim tzan tpaj minaꞌ tuq tjakon Jesus tuj twitꞌlel tuj kaꞌj.
Junkyꞌel Kye Xjal Nyaꞌtx Tuq Dyakwerd Ateꞌ Tiꞌj Jesus
40 Ateꞌ tuq junjun kxol kye xjal txiklen kchaꞌoꞌ aj ntqꞌumaꞌ tuq te Jesus, kyetz nkyqꞌumaꞌ tuq ikxjani: “Te ntzani, bꞌanꞌax a tetz te aj yolil tyol Dios.”* 41 Junjunky nkyqꞌumaꞌ tuq: “Aj ntzani te Koloyon Aj Qꞌumankaj Oqtxiꞌ.” Bꞌix junjunky nkyqꞌumaꞌ tuq ikxjani: “¿Tiꞌtzun, tuj Galiley otzajel te Koloyon Aj Qꞌumankaj Oqtxiꞌ? 42 Komo nyolin tuj te Tuꞌjal Dios, te Koloyon Aj Qꞌumankaj Oqtxiꞌ tzajnaq tiꞌj tijajil Dawid bꞌix tzi otzajel tuj Belen* aj jaꞌ tuq nnajan te Dawid.” 43 Ikxji kye xjal oqet kypawaꞌ kyibꞌ, nyaꞌtx tuq dyakwerd ateꞌ tiꞌj te Jesus. 44 Junjun kygan tuq tzan txik kyin tuj pres per nijunwt abꞌl oxik in tetz.
45 Yaji kye mulon ebꞌajmeltzꞌjik kyukyꞌi kye pal aj nim kyajwalil bꞌix kye aj bꞌuchꞌuj Parisey bꞌix oxik chaꞌoꞌ kyetz ikxjani: “¿Tistil kꞌontiꞌl ma tzaj etin?” 46 Yaji kyetz owaj ktzaqꞌbꞌeꞌ ikxjani: “Nijunwt xjal minaꞌ tyolin ni jun-el iktzaꞌ tetz nyolin aj nxik tqꞌumaꞌ.” 47 Ntons kye aj bꞌuchꞌuj Parisey oxik kyqꞌumaꞌ ikxjani: “¿Tiꞌtzun, ax etetz maꞌtx kxqet teqꞌiꞌ? 48 Nijunwt kxol kye aj nim kyajwalil qxol nkyeꞌokslan tiꞌj, pyor qetz aj bꞌuchꞌuj Parisey. 49 Kyaqil aj xjal ntzani aj kꞌontiꞌl nꞌel kynikyꞌ tiꞌj te Kawbꞌil qanbꞌenbꞌaj kyajsik.”
50 Te Nicodemo jun aj te bꞌuchꞌuj Parisey aj owul jun-el qꞌolbꞌel te Jesus,* oxik tqꞌumaꞌ kyetz ikxjani: 51 “Iktzaꞌx nyolin tuj Jkawbꞌil nlay bꞌantik tzan txik qsiꞌ tuj il jun xjal qa minaꞌ tok qchaꞌoꞌ tidiꞌ maꞌtx tkꞌuluj.” 52 Yaji kyetz owaj ktzaqꞌbꞌeꞌ tetz: “¿Tiꞌtzun, ax yatz aꞌich aj Galiley [iktzaꞌx tetz]? Intqet axnaqꞌtzaꞌ te Tuꞌjal Dios bꞌix owelal anikyꞌ tuj Galiley nijunwt aj yolil tyol Dios oje tzaj.” 53 Ntons yaji kkyaqil kyetz junjunchaq ebꞌajꞌaj kyjay.