6
Aj Kxik Tkꞌaꞌchaꞌ Jesus Jwebꞌ Mil Xjal
1 Ntons ya ma kyꞌik kyaqil ntzani, te Jesus oxwaꞌq junxlaꞌ te Galiley Aꞌ, aj nꞌok qꞌumaꞌ Tibérias Aꞌ. 2 Kyꞌilaꞌj tuq xjal nkyeꞌok lapet tiꞌj tzan tpaj ojetq tuq tzꞌok kyen aj kyqet tqꞌanaꞌ kye xjal tukyꞌi nim tajwalil. 3 Ntons komo at tuq jun witz txini, te Jesus ojax twiꞌ te witz bꞌix tzi oqet witꞌlet kyukyꞌi txnaqꞌatz 4 bꞌix chꞌinky tuq tpon te qꞌij Paskw aj nqet tuq kyqꞌijlaꞌ kye xjal aj tijajil Israel. 5 Ya ma xik ten, oxik teꞌeꞌ ajun xjal tuq lapikeꞌ tiꞌj, oxik tqꞌumaꞌ tetz te Lip ikxjani: “¿Jaꞌ otzajel qloqꞌoꞌ kyweꞌ kyaqil ja xjal ntzani?” 6 Tetz oxik tqꞌumaꞌ ikxjani tzan tpaj tgan tuq tzan tok xhchaꞌoꞌ tidiꞌ otqꞌumaꞌtz te Lip, per tetz tebꞌenky tuq tidiꞌ otkꞌuluꞌtz. 7 Ntons te Lip owaj stzaqꞌbꞌeꞌ: “Tajlal kabꞌeꞌ oqal (200) qꞌij twiꞌ tkꞌuꞌj jun xjal loqꞌbꞌil te wabꞌj nlay kanon nisiker tzan txik kynikyꞌbꞌeꞌ-wit chꞌin.” 8 Ntons yaji tzaj te Lexh, jun aj kxol kye txnaqꞌatz bꞌix terman Simon Xhpeꞌy, oxik tqꞌumaꞌ tetz ikxjani: 9 “Tzani atqet jun kꞌwaꞌl aj eqꞌiꞌ jwebꞌ wabꞌj brisk titzaꞌ bꞌix kabꞌeꞌ kyiy, ¿per titzaꞌ okanoyon ntzani kxol kyaqil ja xjalni?” 10 Te Jesus oxik tqꞌumaꞌ: “Intxik aqꞌumaꞌ kyetz tzan kyqet witꞌlet.” Komo ajun xpatzpan tuq txini bꞌix kye xjal eqet witꞌlet tzi, bꞌix tzan kyaqil qanq jwebꞌ mil (5000) ichan tuq. 11 Te Jesus ojaw stzyuꞌ kye wabꞌj, bꞌix ya ma xik tsiꞌ pixon te Dios, oxik tsipaꞌ kxol kye xjal aj witꞌlikeꞌ tuq tzi. Bꞌix ax otkꞌuluj ikxji kyukyꞌi kye kyiy, bꞌix exik tkꞌaꞌchaꞌ bꞌix enoj. 12 Ya ma kyenoj bꞌan byenech ntons te Jesus oxik tqꞌumaꞌ kye txnaqꞌatz ikxjani: “Intjaw echimoꞌ kyaqil xtxꞌanqaꞌ tzan kꞌon tkaj xqꞌeljik.” 13 Yaji kyetz ojaw kchimoꞌ bꞌix enoj kabꞌlajuj chiꞌl tzan kyaqil te aj osobrin kyiꞌj kye jwebꞌ wabꞌj. 14 Ya ma tzꞌok kyen kye xjal te labꞌal aj nqet tuq tkꞌuluꞌ, okyyolij ikxjani: “Bꞌanꞌax a tetz te aj yolil tyol Dios aj tzul twitz txꞌoꞌtxꞌni.” 15 Te Jesus owel tnikyꞌ kyiꞌj, kygan tuq tzan txik kyin tzan tok te twitzaleꞌ kꞌulul mandad tuj kyamaqꞌ, astilji owex kxol bꞌix oxik twiꞌ te witz xhchukel.
Aj Tbꞌet Jesus Tajsik Aꞌ
16 Ya ma qoqet yupan, kye txnaqꞌatz ebꞌajkyaqon stziꞌ te nim aꞌ, 17 ebꞌajjax tuj jun bark, bꞌix ebꞌajjunxlaꞌin te aꞌ tzan kypon Capernaúm. Ntons yajxiꞌ ojetq tuq qoꞌok bꞌan chukaqꞌbꞌil bꞌix te Jesus minaꞌ tuq tkanon kyiꞌj, 18 bꞌix te kyaqꞌiqꞌ bꞌan nxukꞌin tuq tuj te nim aꞌ bꞌix te aꞌ njaw puljik tzan te kyaqꞌiqꞌ. 19 Ya ojetq tuq xik kybꞌeteꞌ chꞌinky waqaq kilómetr txik kyeꞌeꞌ te Jesus ikjaꞌn tuq tok laqꞌchet kykꞌatzaj, nbꞌet tuq tajsik te aꞌ, bꞌix kyetz ebꞌajxobꞌ. 20 Tetz oxik tqꞌumaꞌ kyetz ikxjani: “¡Aꞌin wetz! ¡Kꞌon kxobꞌ waq!” 21 Kyetz nkyechalaj tuq tzan kykꞌamon te tetz tuj te bark. Yaji ebꞌajponaj aj jaꞌ tuq kygan kypon.
Aj Nkyejoyon Tuq Kye Xjal Tiꞌj Jesus
22 Bwen, tuj junky iwitq kye xjal aj akyeqet tuq junxlaꞌ te aꞌ owok kchaꞌoꞌ, kye txnaqꞌatz ojetq tuq kyexik tuj te bark aj aleꞌx tuqji at, bꞌix te Jesus kꞌontiꞌl tuq ajun kyukyꞌiꞌl, kchukel ebꞌajxik. 23 Yaji ebꞌajpon txqꞌan bark aj tzajnaqeꞌ tuj amaqꞌ Tibérias, ebꞌajpon qaynin tiꞌj te luwar aj jaꞌ ebꞌajwaꞌan aj txik tsiꞌ te Qajawil jun pixon te Qtata Dios. 24 Ya ma tzꞌok kyen kye xjal kꞌontiꞌl akyeqet tuq tzi bꞌix ax kye txnaqꞌatz kꞌontiꞌl tuq ateqet, ebꞌajjax kyuj kye bark, bꞌix ebꞌajxik Capernaúm joyol tetz.
A Te Jesus Swal Qanqꞌin Te Jun-eleꞌx
25 Ya ma kyepon kye xjal junxlaꞌ te aꞌ, owoknoj te Jesus kywitz bꞌix oxik kyqꞌumaꞌ tetz: “Xnaqꞌtzon, ¿janikꞌletzun awulen yatz tzani?” 26 Te Jesus oxik tqꞌumaꞌ kyetz ikxjani: “Wetz oxeꞌl nqꞌumaꞌ etetz bꞌan bꞌanꞌax, etetz nkyinꞌejoyoꞌ tzan tpaj okxwaꞌan byenech bꞌix nyaꞌtx-wit tzan tpaj owel-wit enikyꞌ tiꞌj te labꞌal aj oqet nkꞌuluꞌ. 27 Kꞌon kxjoyon te eweꞌ aj cha aꞌox nxik tsiꞌ tanqꞌin te echiꞌjel; mejor peꞌejoyon waq te aj nxik sin jun tanqꞌin etanim te jun-eleꞌx, aj etanqꞌin aj otzajel nsiꞌ [wetz] te Ichan Aj Tkꞌwaꞌal Dios [aꞌin] tzan tpaj aꞌin wetz intzaj lajoꞌ tzan te Qtat.”a 28 Yaji kyetz oxik kchaꞌoꞌ tetz: “¿Tidiꞌ presis tzan jkꞌulun tzan tbꞌantik qitzaꞌ aj tgan te Qtata Dios?” 29 Owaj stzaqꞌbꞌeꞌ tetz: “Te Qtata Dios tgan tzan etokslan [wiꞌj wetz] aj intzaj tlajoꞌ.” 30 Oxik kchaꞌoꞌky tetz ikxjani: “¿Tidiꞌ jun labꞌal oqtel akꞌuluꞌ [tukyꞌi tajwalil Qtata Dios] tzan tok qen qetza bꞌix tzan qokslana awiꞌj? ¿Tidiꞌ nbꞌantik awitzaꞌ? 31 Kye qijajil oqtxiꞌ, kyetz oxik kywaꞌaꞌ te wabꞌj mana [aj otzaj tsiꞌ te Qtata Dios kyetz] tuj te kyꞌixkꞌoj txꞌoꞌtxꞌ.* Iktzaꞌx tzꞌibꞌankaj [tuj Tuꞌjal Qtata Dios] ikxjani: “Te Qtata Dios aj atjax tuj kaꞌj otzaj tsiꞌ te kyweꞌ tzan kywaꞌan.””* 32 Te Jesus owaj stzaqꞌbꞌeꞌ kyetz ikxjani: “Wetz oxeꞌl nqꞌumaꞌ etetz bꞌan bꞌanꞌax, nyaꞌtx a te Moisés nxik sin etetz te wabꞌj aj tzajnaq tuj kaꞌj sinoke a te Ntat ntzaj sin te wabꞌj bꞌan bꞌanꞌax aj tzajnaq tuj kaꞌj. 33 Te wabꞌj aj ntzaj tsiꞌ te Qtata Dios tzajnaq tuj kaꞌj bꞌix nxik tsiꞌ kyanqꞌin kye xjal twitz txꞌoꞌtxꞌ.” 34 Kyetz oxik kyqaniꞌ ikxjani: “Tat, tzaj asiꞌ aj wabꞌjni te qetza.” 35 Te Jesus oxik tqꞌumaꞌ kyetz: “Aꞌin wetz te wabꞌj aj nxik sin etanqꞌin. Abꞌl aj owokel lapet wiꞌj nlay tzꞌok waꞌij tiꞌj, bꞌix te aj owokslayon wiꞌj nlay tzaj tzajkꞌaj tiꞌj. 36 Komo iktzaꞌx maꞌtx xik nqꞌumaꞌ, etetz kꞌontiꞌl nkxꞌokslan wiꞌj anke oje kyinꞌok eten. 37 Kyaqil aj nkyetzaj tsiꞌ Ntat wetz, nkyeꞌok lapet wiꞌj bꞌix kye aj nkyeꞌok lapet wiꞌj, nlay kyeꞌel wikꞌoꞌ. 38 Komo wetz tzajnaqin tuj kaꞌj inꞌul tzani twitz txꞌoꞌtxꞌ, nyaꞌtx tzan tqet nkꞌuluꞌ iktzaꞌ wetz ngan, sinoke iktzaꞌ tgan te Ntat. 39 Ikxjani tgan te aj otzaj lajon wetz, tzan kꞌon kxik nnajsaꞌ nijunwt kye aj oje kyetzaj tswaꞌ wetz, sinoke tzan kyjaw anqꞌin oj tul te jwisy. 40 Komo aj tgan te Ntat, abꞌl aj okyinꞌokel teꞌeꞌ bꞌix owokslayon wiꞌj, oxeꞌl siꞌ jun tanqꞌin te jun-eleꞌx bꞌix ojawel anqꞌin oj tpon or te jwisy.”b
41 Ntons kye xjal tzi, aꞌeꞌ aj tijajil Israel owaqꞌik tzan kyjasnajeꞌ tiꞌj tzan tpaj oxik tqꞌumaꞌ, “Wetz aꞌin te wabꞌj aj tzajnaq tuj kaꞌj.”* 42 Bꞌix nkyyoliꞌ tuq ikxjani: “¿Nyaꞌtx petzun a te tkꞌajol te Chep, aj qotzqiꞌ stat bꞌix tnan? ¿Tistil ntqꞌumaꞌ tetz qa tuj kaꞌj tzajnaq?” 43 Te Jesus oxik tqꞌumaꞌ kyetz ikxjani: “Kꞌon kxjasnajeꞌ waq exol. 44 Kꞌontiꞌl abꞌl bꞌaꞌn tzan tok lapet wiꞌj qa nyaꞌtx a te Ntat aj otzaj lajon wetz axk tetz ntzaj ukꞌlen te tetz wukyꞌiꞌl, bꞌix ojawel anqꞌin witzaꞌ oj tul te jwisy. 45 Iktzaꞌx tzꞌibꞌankaj oqtxiꞌ tzan kye aj yolil tyol Dios “kyaqil okyexeꞌl xnaqꞌtzaꞌ tzan Qtata Dios.”* Ikxji kyaqil kye aj nꞌok ksiꞌ kywiꞌ tiꞌj te Ntat bꞌix qa nꞌox tuj kywiꞌ aj nxik txnaqꞌtzaꞌ kyetz, okyeꞌokel lapet wiꞌj. 46 Nyaꞌtx tzan tpaj-wit at abꞌl oje tzꞌok en te Qtata Dios, aꞌox te Tkꞌwaꞌal oje tzꞌok en tetz. 47 Wetz oxeꞌl nqꞌumaꞌ etetz bꞌan bꞌanꞌax, abꞌl aj owokslayon wiꞌj owanqꞌiyon te jun-eleꞌx. 48 Aꞌin wetz te wabꞌj aj nxik sin etanqꞌin. 49 Kye etijajil etetz oxik kywaꞌaꞌ te wabꞌj mana aj ateꞌ tuq tuj te kyꞌixkꞌoj txꞌoꞌtxꞌ per aj tpon or kyetz, kyetz ebꞌajkamikkixiꞌ. 50 [Per ajnaꞌl wetz nkyinyolin tiꞌj] te wabꞌj aj tzajnaq tuj kaꞌj bꞌix abꞌl aj owaꞌyon tiꞌj nlay kamik [sinoke owanqꞌiyon te jun-eleꞌx]. 51 Aꞌin wetz te wabꞌj aj tzajnaq tuj kaꞌj; abꞌl aj owaꞌyon te ja wabꞌjni owanqꞌiyon te jun-eleꞌx. Te aj wabꞌj nxik nsiꞌ wetz, akix te nchiꞌjel aj oxeꞌl nsiꞌ tzan kyanqꞌin kye xjal twitz txꞌoꞌtxꞌ.”
52 Ntons kye xjal eꞌokten wululuyon kyibꞌkyibꞌx ikxjani: “¿Titzaꞌ tetz otzajel tsiꞌ xhchiꞌjelx tzan txik qwaꞌaꞌ?” 53 Ntons te Jesus oxik tqꞌumaꞌ: “Wetz oxeꞌl nqꞌumaꞌ etetz bꞌan bꞌanꞌax, qa nlay xik ewaꞌaꞌ te nchiꞌjel [wetz] te Ichan Aj Tkꞌwaꞌal Dios [aꞌin], bꞌix qa nlay xik etukꞌaꞌ te nchikyꞌel, kꞌontiꞌl jun etanqꞌin. 54 Abꞌl te aj oxeꞌl twaꞌaꞌ te nchiꞌjel bꞌix oxeꞌl tukꞌaꞌ te nchikyꞌel, at jun tanqꞌin te jun-eleꞌx bꞌix wetz ojawel anqꞌin witzaꞌ oj tul te jwisy 55 tzan tpaj wetz nchiꞌjel a te wabꞌj bꞌan bꞌanꞌaxji bꞌix te nchikyꞌel a te etukꞌaꞌ bꞌan bꞌanꞌaxji. 56 Te aj nwaꞌan te nchiꞌjel bꞌix nxik tukꞌaꞌ te nchikyꞌel, tetz nꞌanqꞌinkix junx wukyꞌiꞌl bꞌix wetz tukyꞌiꞌl. 57 Te Ntat aj otzaj lajon wetz, tetz at tanqꞌin bꞌix wetz nkyinꞌanqꞌin tzan tpaj tetz, bꞌix abꞌl te owaꞌyon wiꞌj, ax owanqꞌiyon witzaꞌ. 58 [Wetz aꞌin] te wabꞌj aj tzajnaq tuj kaꞌj, nyaꞌtx iktzaꞌ te aj wabꞌj mana aj oxik kywaꞌaꞌ kye etijajil bꞌix tzan te aj wabꞌjji kyetz kꞌontiꞌl ebꞌajꞌanqin te jun-eleꞌx; per abꞌl te aj oxeꞌl twaꞌaꞌ te ja wabꞌj ntzani owanqꞌiyon te jun-eleꞌx.” 59 Te Jesus oxik txnaqꞌtzaꞌ kyaqil ntzani aj tok kchimoꞌ kyibꞌ kye xjal tuj te jay nabꞌil Qtata Dios tuj amaqꞌ Capernaúm.
60 Ya ma tzꞌok kchaꞌoꞌ nini, kyꞌilaꞌj kxol kye aj lapikeꞌ tuq tiꞌj okyyolij ikxjani: “Te aj ntqꞌumaꞌni bꞌan kwest tzan tel qnikyꞌ tiꞌj. ¿Abꞌl owokel tswaꞌ twiꞌ tiꞌj?” 61 Ya ma tzꞌel tnikyꞌ te Jesus tiꞌj aj nkywululuꞌ, oxik tqꞌumaꞌ kyetz ikxjani: “¿Tiꞌtzun, maꞌtx kxjaw qꞌojlik tzan tpaj aj nyolbꞌenni? 62 ¿Tidiꞌ-tal eqꞌumaꞌtz oj nxik eten [wetz] te Ichan Aj Tkꞌwaꞌal Dios [aꞌin] oj njax tuj kaꞌj aj jaꞌ tuq atinjax tbꞌayaꞌ? 63 A te qanim ntzaj sin tanqꞌin [te qchiꞌjel], nyaꞌtx a te qchiꞌjel nqoꞌanqꞌin tibꞌx titzaꞌ; per wetz nyol aj maꞌtx xik nqꞌumaꞌni nxik tsiꞌ tanqꞌin te etanim bꞌix te echiꞌjel [kykabꞌil]. 64 Per tzunx ateꞌ junjun exol etetz aj kꞌontiꞌl nkyeꞌokslan wiꞌj.” [Ikxji oxik tqꞌumaꞌ] tzan tpaj atx aj bꞌan tbꞌay, tetz tebꞌenky tuq abꞌleꞌ kye aj kꞌontiꞌl nkyeꞌokslan bꞌix abꞌl te aj oxeꞌl qꞌapon tuq tetz. 65 Bꞌix ax oxik tqꞌumaꞌ ikxjani: “Astilji wetz maꞌtx xik nqꞌumaꞌ etetz* nijunwt abꞌl bꞌaꞌn tzan tok lapet wiꞌj qa te Ntat nlay tzaj ukꞌlen tetz.”
66 Yaji kyꞌilaꞌj aj lapikeꞌ tuq tiꞌj te Jesus okaj kykolaꞌ, bꞌix ya kꞌontiꞌl ebꞌajꞌok lapet tiꞌj. 67 Yaji te Jesus oxik tqꞌumaꞌ kye kykabꞌlajujil txnaqꞌatz: “¿Ax etetz egan tzan nkaj ekolaꞌ bꞌix tzan exik kyukyꞌiꞌl?” 68 Ntons te Simon Xhpeꞌy oxik tqꞌumaꞌ: “Tat, ¿per abꞌl qiꞌj oqoꞌokel lapet? Yatz aj nꞌayoliꞌ te jun qanqꞌin te jun-eleꞌx. 69 Qetza nqoꞌokslana awiꞌj bꞌix qebꞌenkyna yatz aꞌich te aj pawamich aꞌox te Qtata Dios.”c 70 Yaji te Jesus owaj stzaqꞌbꞌeꞌ: “¿Bꞌix nyaꞌtx petzun aꞌin wetz aj inꞌel joyon etetz ekabꞌlajujilni? Bꞌix jun aj exol etetz, tetz jun aj te Tajaw Choj.” 71 Aj txik tqꞌumaꞌ te Jesus ikxji, nyolin tuq tiꞌj te Juds, aj tkꞌajol Simon Iskaryot. Oxik tqꞌumaꞌ ikxji tzan tpaj te Juds ojawel tuq meltzꞌjik tiꞌj anke tetz jun kxol kye kykabꞌlajujil tuq.