5
Aj Tqet Tqꞌanaꞌ Jesus Jun Yabꞌ Tuj Amaqꞌ Betest
1 Ntons ya ma kyꞌik kyaqil ntzani, te Jesus oxik Jerusalen tzan tpaj at tuq jun qꞌij aj nkyeqꞌijlan tuq kye xjal aj tijajil Israel. 2 Ntons te amaqꞌ Jerusalen at tuq jun tlamelul bꞌix tbꞌi te lamel “Kybꞌey Karner,” bꞌix qaynin tzi at tuq jun nim tqatel aꞌ, Betest tbꞌi tuj yol ebrey aj kyyol kyetz. Te tqatel aꞌ tuj jun nim galera bꞌix jwebꞌ palaj te galera. 3 Tzi atkyeqet tuq kyꞌilaꞌj xjal yabꞌeꞌ, iktzaꞌ moy, kox, bꞌix kye aj kamnaq kchiꞌjel, bꞌix cha lanchikeꞌ twitz txꞌoꞌtxꞌ stziꞌ te aꞌ bꞌix cha nkyeꞌiyon tuq tzan tjaw yakꞌun te aꞌ. 4 Komo atqet jun ángel derepent nkyaqul tuj te aꞌ bꞌix njaw tuq tyakꞌuꞌ te aꞌ, bꞌix te tbꞌay xjal aj nqex tuq tuj te aꞌ oj tjaw yakꞌun, ntons nbꞌantik tuq bꞌeyx alchaqkyetz tyabꞌil.a 5 Ntons at tuq kxol kyetz jun xjal bꞌan yabꞌ tuq, wajxaqlajuj tuj kawnaq (38) aqꞌbꞌixiꞌ tuq tqetlen yabꞌtik.
6 Ntons te Jesus, ya ma xik teꞌeꞌ cha bꞌaqlik tuq bꞌix aj tok xhchaꞌoꞌ jatebꞌ aqꞌbꞌixiꞌ tuq tqetlen yabꞌtik, yaji oxik tqaniꞌ te yabꞌ ikxjani: “¿Agan peꞌ tzan abꞌantik?” 7 Owaj stzaqꞌbꞌeꞌ te yabꞌ: “Tat, wetz kꞌontiꞌl abꞌl nqex swan wetz tuj aꞌ chaꞌoj tjaw yakꞌun te aꞌ. Oj nqex wetz, junky nkanon tbꞌay nwitz.” 8 Yaji te Jesus oxik tqꞌumaꞌ: “Pajaw waꞌlet, intxik awin awatbꞌil bꞌix pabꞌet.” 9 Bꞌeyxnajji te xjal obꞌantik bꞌix ojaw tin te twatbꞌil bꞌix obꞌet. Aj qꞌijji, jun qꞌij ojlaꞌmj tuq.
10 Ntons kye aj tijajil Israel aj at tuq kyajwalil, kyetz oxik kyqꞌumaꞌ tukyꞌi te xjal aj ojetq tuq bꞌantik: “Ajnaꞌl qꞌij ojlaꞌmj. Xjan tzan txik awin awatbꞌil.”* 11 Te xjal owaj stzaqꞌbꞌeꞌ: “Te xjal aj ma qet qꞌanan wetz, ma tzaj tqꞌumaꞌ “intjaw awin awatbꞌil bꞌix pabꞌet.”” 12 Yaji kyetz oxik kchaꞌoꞌ tetz: “¿Abꞌl te aj xjal ma xik qꞌuman yatz “intjaw awin awatbꞌil bꞌix pabꞌet”?” 13 Kꞌontiꞌl tuq tebꞌen abꞌl ojetq qet qꞌanan tetz tzan tpaj te Jesus ojetq tuq xiknaj kxol kye xjal aj akyeqet tuq tzi. 14 Mas yaj te Jesus owok tkꞌulbꞌaꞌ tuj te Nin Jay Nabꞌil Qtata Dios bꞌix oxik tqꞌumaꞌ tetz ikxjani: “Tzaj achaꞌoꞌ, ajnaꞌl yatz bꞌaꞌnich. Kꞌonky chjoyon choj tzan kꞌon tkyꞌik junky tidiꞌ awiꞌj mas bꞌan nyaꞌtx galan.” 15 Te xjal owaj bꞌix oxik tyoliꞌ kyukyꞌi kye aj at kyajwalil a te Jesus ojetq tuq qet qꞌanan tetz. 16 Astilji kygan tuq tzan tjaw ktzyuꞌ te Jesus tzan tpaj nkyeqet tqꞌanaꞌ xjal tuj qꞌij ojlaꞌmj. 17 Per te Jesus oxik tqꞌumaꞌ: “Wetz Ntat kꞌontiꞌl nkaj tsiꞌ tzan tkꞌulun galan kyiꞌj kye xjal bꞌix ax wetz nkyinkꞌulun ikxji.” 18 Astilji kygan tuq tzan tqet kykansaꞌ tzan tpaj kyetz tuj kynabꞌl kꞌontiꞌl nqet txjaniꞌ te qꞌij ojlaꞌmj bꞌix tzan tpaj ntqꞌumaꞌ tuq qa tetz Stat a te Qtata Dios, ikxji ntparejsaꞌ tuq tibꞌ tukyꞌi te Qtata Dios.
Aj Tyolin Jesus Jaꞌ Tzajnaq Tuq Tetz Tajwalil
19 Te Jesus oxik tqꞌumaꞌ ikxjani:b “Wetz oxeꞌl nqꞌumaꞌ etetz bꞌan bꞌanꞌax, [wetz] aj Tkꞌwaꞌal Dios [aꞌin] kꞌontiꞌl nqet nkꞌuluꞌ jun tidiꞌ aj cha tuj nwiꞌx-wit wetz nꞌetz win sinoke aj nꞌok wen tukyꞌi te Ntat; bꞌix aj nqet tkꞌuluꞌ te Ntat, ax nqet nkꞌuluꞌ wetz [tzan tpaj aꞌin] tkꞌwaꞌal. 20 Komo te Ntat nkyinqet tganiꞌ bꞌix ntzaj tyekꞌuꞌ kyaqil aj ntkꞌuluꞌ, bꞌix atx tzan stzaj tyekꞌuꞌ kye tkꞌulbꞌen mas nim twitz te aj ntzaꞌn, bꞌix etetz okxlabꞌayon tiꞌj. 21 Iktzaꞌx te Ntat njaw anqꞌin jun kamnaq titzaꞌ bꞌix nxik tsiꞌ tanqꞌin, ax ikxji [wetz] nxik nsiꞌ tanqꞌin abꞌl aj wetz ngan [tzan tpaj aꞌin] Tkꞌwaꞌal [Dios]. 22 Komo te Ntat kꞌontiꞌl nxik tqꞌumaꞌ abꞌl at til sinoke oje kaj tsiꞌ tuj nqꞌabꞌ tzan txik nqꞌumaꞌ wetz abꞌleꞌ kye aj at kyil 23 tzan nqet jiqꞌbꞌaꞌ tzan kyaqil xjal iktzaꞌx nqet kyjiqꞌbꞌaꞌ te Ntat. Komo [aꞌin wetz] te Tkꞌwaꞌal [Dios], abꞌl aj kꞌontiꞌl nkyinqet tjiqꞌbꞌaꞌ ax kꞌontiꞌl nqet tjiqꞌbꞌaꞌ te Ntat aj otzaj lajon [wetz].
24 Wetz oxeꞌl nqꞌumaꞌ etetz bꞌan bꞌanꞌax, abꞌl te aj nꞌok xhchaꞌoꞌ nyol bꞌix nꞌokslan tiꞌj te aj otzaj lajon wetz, at jun tanqꞌin te jun-eleꞌx bꞌix nlay xik siꞌ tuj il, tetz kamnaq tuq, per ajnaꞌl at jun tanqꞌin. 25 Wetz oxeꞌl nqꞌumaꞌ etetz bꞌan bꞌanꞌax, chꞌinky tpon te or, bꞌix ajnaꞌl maꞌtx pon, tzan tok kchaꞌoꞌ nwiꞌ wetzc kye aj kamnaq [kyanim] bꞌix kye aj oxeꞌl kchaꞌoꞌ okyeꞌanqꞌiyon. 26 Komo te Ntat at tanqꞌin tibꞌx [tzan txik tsiꞌ kyanqꞌin kye xjal], ax oje tzaj tsiꞌ te wetzd tzan wanqꞌin wibꞌx [tzan txik nsiꞌ kyanqꞌin kye xjal]. 27 Bꞌix te Ntat oje tzaj tsiꞌ wajwalil tzan txik nqꞌumaꞌ kyil kye xjal tzan tpaj wetz aꞌin te Ichan Aj Tkꞌwaꞌal Dios.
28 Kꞌon kxlabꞌan tiꞌj te ntzani. Chꞌinky tpon te or aj owokel kchaꞌoꞌ nwiꞌ kyaqil kye kamnaq 29 bꞌix okyejawel anqꞌin kye aj ebꞌajqex muquꞌ. Kye aj oqet kykꞌuluꞌ galan okyejawel anqꞌin junkyꞌel tzan kyanqꞌin te jun-eleꞌx, bꞌix kye aj ekꞌulun nyaꞌtx galan okyejawel anqꞌin tzan kxik siꞌ tuj il.* 30 Wetz kꞌontiꞌl nqet nkꞌuluꞌ jun tidiꞌ aj cha tuj nwiꞌx-wit wetz nꞌetz win, sinoke nxik nqꞌumaꞌ iktzaꞌ ntzaj tqꞌumaꞌ te Ntat, bꞌix nxik nqꞌumaꞌ tumeꞌl tzan tpaj kꞌontiꞌl nqet nkꞌuluꞌ iktzaꞌ wetz ngan, sinoke nqet nkꞌuluꞌ iktzaꞌ tgan te Ntat aj otzaj lajon wetz. 31 Qa wetz nchukel nkyinyolin wiꞌjx wetz, kꞌontiꞌl token [tzan tpaj cha aꞌox nchukel nkyinyolin], 32 per at junky aj nyolin wiꞌj bꞌix wetz webꞌen te aj ntyoliꞌ wiꞌj bꞌanꞌax. 33 Etetz oxwaꞌq echaꞌoꞌtz tukyꞌi Waꞌnch, bꞌix aj otyolij tetz tumeꞌl tiꞌj te bꞌanꞌax,* 34 per wetz nyaꞌtx presis tzan tyolin jun xjal galan wiꞌj. Wetz nxik nqꞌumaꞌ etetz kyaqil ntzani te jun galan te etetz tzan ekolet. 35 Te Waꞌnch oxik tpakbꞌaꞌ tzan tel enikyꞌ tiꞌj te tumeꞌl bꞌix etetz nkxchalaj tuq tiꞌj per cha te kabꞌe qꞌij tuq.e 36 Per te aj nkꞌulbꞌen wetz telponx wiꞌj mas nim twitz te aj ntyoliꞌ tuq te Waꞌnch wiꞌj tzan tpaj wetz nkꞌulbꞌen ikx titzaꞌ otzaj tqꞌumaꞌ te Ntat, ikxji bꞌaꞌn tzan tel qnikyꞌ qa a te Ntat otzaj lajon wetz. 37 Bꞌix te Ntat aj otzaj lajon te wetz, tetz oje tzaj tyoliꞌ bꞌanꞌax wiꞌj.* Per etetz minaꞌ tok echaꞌoꞌ aj ntyoliꞌ bꞌix minaꞌ txik eten titzaꞌ kaꞌyin 38 bꞌix kꞌontiꞌl nꞌox tuj ewiꞌ te tyol tzan tpaj kꞌontiꞌl nkxꞌokslan wiꞌj wetz aj intzaj tlajoꞌ. 39 Etetz nqet eten bꞌan kyebꞌaꞌ te Tuꞌjal Dios tzan tpaj etetz tuj enabꞌl ikxji okxꞌanqꞌiyon te jun-eleꞌx,* per axkix aj Tuꞌjalji nyolin wiꞌj wetz. 40 Per etetz kꞌon egan tzan etok lapet wiꞌj tzan txik nsiꞌ jun etanqꞌin te jun-eleꞌx. 41 Wetz kꞌontiꞌl nkyinbꞌisun tiꞌj kyyol kye xjal qa nkyinqet kyjiqꞌbꞌaꞌ. 42 Wetz oje tzꞌel nnikyꞌ etiꞌj, etetz kꞌontiꞌl nqet eganiꞌ te Qtata Dios. 43 Wetz lajomin tzan Ntat bꞌix kꞌontiꞌl nkyinꞌekꞌamoꞌ. Qa tzul-wit junky aj cha oqtel tjiqꞌbꞌaꞌ tibꞌ, tetzji ekꞌamoꞌtz-talo. 44 ¿Titzaꞌ okyinxeꞌl etokslaꞌ qa cha nqet ejiqꞌbꞌaꞌ etibꞌx exolx bꞌix kꞌontiꞌl nkxjoyon tzan eqet jiqꞌbꞌaꞌ tzan Qtata Dios aj cha jun at? 45 Wetz nyaꞌtx presis tzan txik nqꞌumaꞌ etil tzan tpaj a te Kawbꞌilf aj jaꞌ witꞌlik etetz ekꞌuꞌj, aji te aj oxeꞌl tqꞌumaꞌ etil. 46 Cha tzun-wit nxik etokslaꞌ [te aj okaj stzꞌibꞌaꞌ] Moisés [tuj te Kawbꞌil], ntons tzun-tal nkyinxik etokslaꞌ etetz, tzan tpaj aj oqet stzꞌibꞌaꞌ nyolin wiꞌj. 47 Per qa etetz kꞌontiꞌl nxik etokslaꞌ aj oqet stzꞌibꞌaꞌ tetz, ¿titzaꞌ oxeꞌl etokslaꞌ te aj nxik nqꞌumaꞌ wetz?”